Anga hẽ Olofeka Oku Imbila Kumosi Ombunje ci Veyita Muẽle Omanu Oku Likuata Omunga?—Nye Embimbiliya li Popia?

Keteke 20 ya Kuvala kuenda keteke 18 ya Cembanima 2022, ku lavokaiwa okuti, ci soka olohulukãi 5 viomanu vi ka tala olofeka vi ka imbila kumosi ombunje. Omanu valua, va sima okuti olofeka oku imbila kumosi ombunje ci kuatisa oku likuata omunga.

• “Ombunje yi kuete unene woku pongolola oluali. Yi vetiya calua. Yi kuete unene walua woku pongolola omanu okuti, ocina cikuavo ci sule.”—Nelson Mandela, wa kala ombiali yo ko Áfrika do Sul.

• “Ombunje yeca elavoko, yi kuatisa koku kuata esanju, oku kuata ocisola ndeci ci lingiwa kovina viosi.”—Gianni Infantino, usongui wo FIFA. a

Anga hẽ olofeka oku imbila kumosi ombunje ale omapalo yikuavo mua kongela oku imba ombunje, yi pondola oku tẽlisa ocimãho covina via velapo? Kuli hẽ elavoko liokuti eteke limue tu ka kuata ombembua loku likuata omunga?

Anga hẽ olomapalo viombunje ovio ono yomunga?

Olofeka oku imbila kumosi ombunje unyamo ulo, mua kongela ovina vialua okuti oku imba lika ombunje ci sule. Voku imba kuaco ombunje, mua kongela oku sapela catiamẽla kovitangi viopulitika oku kongelamo elianjo liomanu, ekova kuenda olombongo.

Ndaño ndoco, valua va sima okuti olomapalo viombunje ndeci olofeka oku imbila kumosi ombunje, olomapalo vimue viwa. Pole, ocili ceci okuti ndaño omanu va kuete ovisimĩlo viaco, olomapalo viaco ka vi nena omunga yi kala otembo yosi. Handi vali, vi koka lika oku situlula ovituwa kuenda ovilinga vi nyõla omunga. Embimbiliya li popia okuti, ovituwa viaco vi ka lekisiwa calua “koloneke via sulako.”—2 Timoteo 3:1-5.

Anga hẽ eteke limue voluali mu ka kala omunga yocili?

Embimbiliya li lekisa elavoko limue liocili. Olio lia likuminya okuti, omanu vosi voluali va ka likuata omungaeci va ka vialiwa “Lusoma wa Suku,” okuti usoma umue u kasi kilu.—Luka 4:43; Mateo 6:10.

Soma Yusoma wa Suku, Yesu Kristu, o ka koka okuti voluali luosi mu ka kala ombembua. Embimbiliya li popia okuti:

• “Ukuesunga o ka telẽha kuenda ombembua yi ka kala kuosi toke eci ka ku kala vali osãi.”—Olosamo 72:7.

• “Momo eye o ka yovola ohukũi yina yi kaluka oku pinga ekuatiso . . . Eye o ka va yovola kohali kuenda kungangala.”—Olosamo 72:12, 14.

Koloneke vilo, alongiso a Yesu a kasi ale oku kuatisa olohuluwa viomanu vi kasi kolofeka vi soka 239, oku likuata omunga. Omanu vaco, va lilongisa oku yuvula oku kuatela vakuavo onya. Oco o kũlĩhe ovina vikuavo, tanga ovipama losapi, “Oku Yula Esuvu.”