Owuya Walua Voluali Luosi Kunyamo wo 2023—Nye Embimbiliya li Popia?

Omanu vosi voluali va kasi oku liyaka lowuya walua kuenda ovilunga vikuavo via kokiwa lowuya waco. Kũlĩhĩsa ovolandu a kuãimo:

• “Osãi Yevambi, ya kala osãi yimue okuti owuya voluali luosi waluile calua tunde eci omanu va fetika oku limbuka owuya walua voluali luosi kueci ci soka 174 kanyamo a pita ale.”—Administração Nacional Oceânica e Atmosférica, Oseketa Yolomĩlu yo EUA, 13 Yevambi Linene, 2023.

• “Vo Italia, vo Espanha, vo Fransa, vo Alemanha kuenda vo Polonia, mua kala owuya walua kuenda ci lekisa okuti owuya waco, u ka livokiya toke ketendelo 48°C vovifuka vio Sicília kuenda vio Sardenha okuti etendelo liaco liowuya ka lia la muiwa ko Europa.”— Agência Espacial Europeia, Yevambi Linene 13, 2023.

• “Osiumbu owuya volualu u livokiya, tu pondola oku lavoka okuti okuti ombela yi ka loka calua loku koka okuti ku kala andunde alua.”—Stefan Uhlenbrook, usongi wo hidrologia, água e criosfera wo Organização Meteorológica Mundial, 17 Yevambi Linene 2023.

Ove hẽ o sakalala poku yeva asapulo atiamẽla kovitangi viekalo liotembo? Kũlĩhĩsa eci Embimbiliya li popia catiamẽla kondaka yaco yi kuete esilivilo.

Anga hẽ ovitangi viekalo liotembo vi kasi oku tẽlisa ovitumasuku Viembimbiliya?

Oco. Owuya waco walua kuenda ovitangi vikuavo viekalo liotembo vi kasi oku lipita voluali luosi, vi likuata leci Embimbiliya li popia catiamẽla koloneke vilo. Ndeci, Yesu wa popia okuti tu ka mola “olondimbukiso vinene.” (Luka 21:11; Embimbiliya li Kola-Epongoluilo Lioluali Luokaliye.) Owuya walua voluali luosi lua siata oku koka omanu oku sima okuti, va ka nyõla ongongo.

Anga hẽ Vongongo ka mu ka kala vali omanu?

Sio. Suku wa lulika ongongo oco tu kalemo. Eye ka ka ecelela okuti omanu va nyõla ongongo. (Osamo 115:16; Ukundi 1:4) Ocili okuti, eye o likuminya oku nyõla vana va “kundula vana va vĩhisa ilu lieve.”—Esituluilo 11:18.

Embimbiliya li lekisa okuti Suku o pondola kuenda o ka tateka oco ongongo ka yi ka nyõliwe lovitangi viowuya.

• “[Suku] o tulumũla ehunguhungu liofela; akimba okalunga a tulumũha.” (Osamo 107:29) Suku o kuete unene woku tateka ovitangi viekalo liotembo voluali. Eye o kuetevo unene woku malako ovitangi viekalo liotembo vina vi kokela omanu oku tala ohali.

• “Ove o tata ilu lieve, o li lingisa okuti lima calua kuenda li kuata ukuasi walua.” (Osamo 65:9) Lekuatiso lia Suku kuenda asumũlũho aye, ongongo yi ka linga ocumbo celau.

Oco o lilongise ovina vikuavo viatiamẽla kohumiyno Yembimbiliya yokuti ongongo yi ka tumbuluiwa, tanga ocipama losapi hati, “Helie o ka Yovola Ongongo?”