Nye ci Pita Nda ka ku Lekisiwa Esumbilo?—Nye Embimbiliya li Popia?

Koloneke vilo ocituwa coku lekisa esumbilo, ka ca siatele vali. Olombei vi vangula lukãlu lolondotolo viavo, vana va endela voviendelo viowiñi okuti, ka va pokola kovihandeleko va kelohãla vana va talavayamo, omãla ka va lekisa esumbilo kalongisi kuenda vamue vakuapulitika va linga ombuanja osimbu vakuavo va seteka oku lekisa esumbilo.

Embimbiliya lieca olonumbi via koleliwa via tiamẽla koku lekisa ovituwa viwa. Olio li lombololavo esunga lieci koloneke vilo, ku ka silili ekambo liovituwa viwa.

Nye ci pita nda ka ku lekisiwa esumbilo?

Esumbilo ale ocituwa cimue ciwa, ca sunguluka haeco ci taviwa, ka vi lekisiwa voluali luosi.

• Vekonomuiso limue lia lingiwa ko Estados Unidos, omanu va popia okuti kesulilo lianyamo 22, ovituwa viwa via tepuluka calua.

• Ekonomuiso likuavo lia lingiwa leci ci pitahãla 32 kolohulukãi viomanu kolofeka 28, ci soka 65 kolopulusendu viomanu va pulisiwa va popia okuti, koloneke vilo ekambo liesumbilo lialua calua okuti kosimbu ci sule.

Embimbiliya lia tukuile okuti, koloneke via sulako omanu va ka lekisa ovituwa viaco.

• “Kũlĩha okuti koloneke via sulako, ekalo li ka tĩla calua halio li koka ohele. Momo omanu va ka linga vakuakulisola ovo muẽle, vakuakusola olombongo, vakuakulipanda, vakuakulivelisapo, vakuakupopia atonãi, vakuakusinĩla olonjali, . . . . , ka va ka tẽla oku likandangiya, olongangala, ka va ka sola eci ciwa.—2 Timoteo 3:1-3.

Oco o kũlĩhe olonumbi vikuavo vi lekisa ndomo ocitumasuku eci ci kasi oku tẽlisiwa, tanga ocipama losapi, “Anga hẽ Embimbiliya Lia Popele Ale Ndomo Ovisimĩlo Lovituwa Viomanu Via Laikele Oku Kala?”

Onumbi yimue ya koleliwa yi kuatisa oku lekisa ovituwa viwa

Ndaño esumbilo ka lilekisiwa voluali luosi, pole, olohuluwa viomanu via limbuka okuti, Embimbiliya onumbi yimue yiwa yi kuatisa oku lekisa ovituwa viwa. Olonumbi vialio via tiamẽla kueci ciwa kuenda kueci cĩvi, “olonjanja viosi via koleliwa, cilo kuenda otembo ka yi pui.” (Olosamo 111:8) Kũlĩhĩsa ovolandu amue:

• Ceci Embimbiliya li popia: “Ovina viosi vu yongola okuti omanu vo vi lingili, haivio vu linga kokuavo.”—Mateo 7:12.

  Elomboloko liocisonehua eci: Tu sukila oku tata vakuetu lohenda kuenda esumbilo ndomo tu yongolavo oku tatiwa.

• Ceci Embimbiliya li popia: “Kaliye, omo okuti wa sipo uhembi, omunu lomunu pokati kene a vangule ocili lukuavo.”—Va Efeso 4:25.

  Elomboloko liocisonehua eci: Tu sukila oku kala vakuacili kovina viosi tu popia levi tu linga.

Oco o kũlĩhe ovina vikuavo via tiamẽla ketosi eli tanga ocipama:

• Vutala Wondavululi losapi “Nye ci ku Kuatisa Oku Kũlĩha—Eci Ciwa Leci Cĩvi?”

• Ocipama losapi “Oku Ecelela—Ndomo Embimbiliya li Pondola Oku kuatisa.”