Anga hẽ Olomapalo Vioku Tasula Ombunje vi Koka Muẽle Omunga Pokati Komanu?—Nye Embimbiliya li popia?

Vokuenda kunyamo 2024 kolomapalo vioku tasula ombunje, kua konomuisiwa okuti, olomapalo viaco vi ka taliwa leci ci soka olohuluwa vitãlo viomanu va tunda kueci ci soka 206 kolofeka. Thomas Bach, usongui Wolomapalo Vioku Tasula Ombunje Voluali Luosi, wa popia hati: “Tu panga onepa kocipito cimue ci kongela omanu vekalo limue liombembua. Tu lingi ocipito coku tasula ombunje lonjila yimue yi koka ombembua, ndepata limuamue loku likuata omunga ndaño lakova a litepa.”

Olomapalo vioku tasula ombunje, vi pondola hẽ oku tẽlisa ocimãho caco? Anga hẽ eteke limue tu ka kuata ombembua yocili kuenda omunga?

Olomapalo viaco vi ka nena hẽ ombembua kuenda omunga?

Olomapalo vioku tasula ombunje viunyamo ulo, via vetiya omanu oku sokolola calua kombunje. Olomapalo viaco, via tiamisiwila vali enene kekalo liomanu kuenda kopulitika, ovina vi koka oku litepa tepa kuomanu. Vulandu waco mua kongela elianjo liomanu, olonepele viakova, oku liponda omo lioku tiamẽla katavo a litepa kuenda ekalo lia litepa liomanu.

Omanu va sole olomapalo vioku tasula ombunje vi lingiwa voluali luosi. Pole, olomapalo viaco via siatavo oku lekisa kuenda oku situlula ovituwa kuenda ovilinga ka vi koki ombembua kuenda omunga.

Embimbiliya lia tukuile ale ovituwa omanu va ponduile oku lekisa okuti, ka vi vetiya omanu oku likuata omunga. (2 Timoteo 3:1-5) Oco o lilongise vali catiamẽla kocitumasuku eci Cembimbiliya, tanga ocipama losapi “Anga hẽ Embimbiliya Lia Popele Ale Ndomo Ovisimĩlo Lovituwa Viomanu Via Laikele Oku Kala?”

Elavoko liocili lioluali luombembua kuenda omunga

Vembimbiliya muli elavoko liocili lioluali luombembua kuenda omunga. Olio li lombolola okuti, omanu vosi voluali va ka likuata omunga vemẽhi ‘Liusoma wa Suku.’—Luka 4:43; Mateo 6:10.

Yesu Kristu, o Soma Yusoma waco, o ka koka okuti oluali luosi lu kala ocitumãlo combembua. Embimbiliya liti:

• “Koloneke viaye ukuesunga o ka telẽha, kuenda ombembua yi ka kala kuosi.”—Osamo 72:7.

• “Eye o ka yovola ohukũi yina yi kaluka oku pinga ekuatiso . . . o ka va yovola kohali kuenda kungangala.”—Osamo 72:12, 14.

Koloneke vilo, alongiso a Yesu a siata oku kongela olohuluwa viomanu vomunga yimuamue kueci ci soka 239 kolofeka. Ndakristão, Olombangi Via Yehova voluali luosi, via siata oku lilongisa oku kala vakuakukoka ombembua. Oco o limbuke ndomo via siata oku ci linga, tanga Utala Wondavululi losapi, “Oku Yula Esuvu.”