Asokiyo a Kuatisa Oku Kuata Esanju Kotembo Yovitangi—Nye Embimbiliya li Popia?

Kotembo yilo yovitangi, ka tu tẽla oku lavulula ovina viosi vi pondola oku pita letu. Pole, onjanja vimue, esanju lietu liatamba vali enene kocituwa tu lekisa poku liyaka lovitangi, kekalo lietu hakoko. Embimbiliya li popia okuti, ndaño tu liyaka lovitangi, “omunu o kuete esanju vutima, wa sanjuka eteke leteke.” (Olosapo 15:15) Nye tu sukila oku linga oco tu amameko lesanju? Kũlĩhĩsa ndomo olonumbi Viembimbiliya vi pondola oku ku kuatisa.

Ndomo o yula esakalalo

Embimbiliya li popia ndoco: “Asakalalo a honguisa utima womunu, pole, ondaka yiwa yi petula utima.”—Olosapo 12:25.

• Embimbiliya li pondola oku ku kuatisa oku yuvula esakalalo ka lia sungulukile. Oco o kũlĩhe ndomo o ci linga, tanga ocipama losapi, “O Conceito da Bíblia Sobre Ansiedade.”

Yuvula oku kala ulika

Embimbiliya li popia ndoco: “Ekamba liocili li lekisa ocisola otembo yosi, Kuenda olio li linga manjove kotembo yohali.”—Olosapo 17:17.

• Vembimbiliya mu sangiwa alungulo a pondola oku ku kuatisa oku yuvula oku kala ulika, poku pamisa ukamba wove lavakuene. Tanga ocipama losapi, “Pinga Kakamba Oco va ku Kuatise Oku Yula Ocitangi Culika—Ndomo Embimbiliya li Pondola Oku Kuatisa.”

Vokiya ocisola o kuetele Suku kuenda vana o lisungue lavo

Embimbiliya li popia ndoco: “Sola Yehova Suku yove lutima wove wosi, lomuenyo wove wosi kuenda lolondunge viove viosi. . . . Sola u o lisungue love ndeci o lisole ove muẽle.”a—Mateo 22:37-39.

• Ohutililo yi tu kuatisa oku pamisa ukamba wetu la Suku. Oco o lilongise ovina vikuavo, tanga ocipama losapi, “Anga hẽ Suku o Yevelela Olohutililo Vietu?”

• Tu lekisi ocisola ku vakuetu poku va tata ndomo Yesu a ci popia. Sanga ovolandu akuavo vocipama losapi, “Nye Yesu a Popia Catiamẽla Koku Tata Vakuetu?”

Momo lie ku lilongisila ovina vikuavo Embimbiliya li popia oco o limbuke ndomo vi ku kuatisa oku kuata esanju kotembo yovitangi? Oco o ci linge, tu ku vetiya oco o seteke eliangiliyo lietu lielilongiso Liembimbiliya li lingiwa ocali.