Ovimãho vi sokisiwa lesokiyo lioku tunga lionjo yimue; lelikolisilo, ci tẽliwa
KAMALẼHE
12 Ovimãho
CI LOMBOLOKA NYE?
Ocimãho ka ci lomboloka lika onjoyi, ale onjongole yimue. Vocimãho cocili, mua kongela esokiyo, apongoloko amue kuenda alikolisilo.
Kuli ovimãho vi tẽlisiwa votembo yitito, ndeci voloneke vimue ale volosemana. Kulivo ovimãho vi tẽlisiwa votembo ya sokamo ndeci, noke yolosãi vimue kuenda ovimãho vi tẽlisiwa votembo yalua okuti, vi cilua unyamo, ale anyamo oco vi tẽlisiwe. Ovimãho viotembo yalua, vi pondola oku tẽlisiwa pocakati covimãho vikuavo viotembo yitito.
MOMO LIE CI KUETELE ESILIVILO?
Oku tẽlisa ovimãho viove, ci ku kuatisa oku kolapo, oku pamisa ukamba wove la vakuene kuenda esanju liove li livokiya.
Oku likolela: Eci o tẽlisa ovimãho vitito, o kuata ekolelo lioku tẽlisavo ovimãho vinene. O liyeva okuti wa kolapo poku liyaka lovitangi vieteke leteke, ndeci, oku setekiwa oku linga cina wa kũlĩha okuti ka ca sungulukile.
Akamba: Omanu vosi va sole oku kala la vana va kuete ovimãho, ale omanu vana va kũlĩha eci va yongola okuti, va likolisilako oku vi tẽlisa. Omo liaco, nda ekamba liove li kuete ocimãho ndeci cove, oku talavayela kumosi oco vu ci tẽlisi, ci pamisa ukamba wene.
Esanju: Nda o tẽlisa ovimãho viove, o kuata esanju.
“Ndi sole calua oku tumbika ovimãho. Ovio vi ngecelela oku linga upange umue loku amamako oku sanda oku vi tẽlisa. Eci o tẽlisa ocimãho cimue, ciwa oku sokolola konyima loku popia okuti: ‘Haka! Nda tẽlisa cina nda yonguile!’”—Christopher.
CECI EMBIMBILIYA LI POPIA: “U o lavulula ofela ka imbi ombuto; lu o lavulula alende ka lombola.”—Ukundi 11:4, Embimbiliya li Kola.
NYE O PONDOLA OKU LINGA?
Tala ananga amue a ka ku kuatisa oku tẽlisa ovimãho viove.
Nõla. Linga ulala wovimãho viove. Nõla ocimãho catete o yongola oku tẽlisa, noke cavali, catatu kuenda vikuavo.
Linga esokiyo. Kocimãho locimãho linga ndoco:
Tumbika otembo ya suapo.
Sokiya ananga o sukila oku eca.
Sokolola kovitangi vi pondola oku molẽha kuenda ndomo o liyaka lavio.
Ceci o sukila oku linga. Ku sukila oku sokiya ovina viosi osimbu kua fetikile. Lipula ndoco: ‘Enanga lipi liatete ndi sukila oku eca oco ndi tẽlise ocimãho cange?’ Kuenje eca enanga liatete loku kuama ndomo o ci linga, osimbu weca ananga akuavo.
CECI EMBIMBILIYA LI POPIA: “Asokiyo omunu ukuambili, a nena muẽle onima yiwa.”—Olosapo 21:5.