Oku Pongiya Olohundo Viekongelo
OVIPAMA Viosikola Yupange Wakristão, via pongiyiwila oco vi kuatise ekongelo liosi. Kua siatavo oku eciwa elongiso li kuete esilivilo liocili kolohongele vikuavo viekongelo kuenda kolohongele vimbo levi viofeka. Nda wa ihĩwa ocikele coku linga onepa kolohongele viaco evi, wa tambula ocikele cimue cinene. Upostolo Paulu wa vetiya Ukristão Timoteo, okuti otembo yaco wa kala ale ukulu wekongelo oco amameko loku lava oku longisa kuaye. (1 Tim. 4:16) Ava va siata oku kala kolohongele via Kristão, va siata oku kapa ponele otembo yi kuete esilivilo liocili. Kuenda vamue pokati kavo, va siata oku likolisilako calua oco va ende koku tambula elongiso liatiamẽla kelitokeko liavo la Suku. Oku eca elongiso liaco, ocili okuti esumũlũho limue linene! Oco hẽ, ndamupi o pondola oku tẽlisa ocikele caco lonjila yimue yiwa?
Elomboluilo Liatosi a Velapo a Tangiwa Vembimbiliya
Onepa eyi yosikola ya kunamẽla koku tangiwa Kuembimbiliya kua sokiyiwila vokuenda kuosemana. Vonepa eyi, eci ci kuete oku velisiwapo vali, oku lombolola ndomo ulandu waco u tu kuatisa koloneke vilo. Ndomo ca sonehiwa kelivulu lia Nehemiya 8:8, Esera la vakuavo va tangela owiñi Ondaka ya Suku, va yi sitululula, ‘loku pitiya elomboloko liayo.’ Poku linga elomboluilo liatosi a velapo veci ca tangiwa Vembimbiliya, cika ku ĩha epuluvi lioku lingavo ndeci ovo va linga.
Ndamupi hẽ o pongiya ocipama caco? Nda ci tava, eci handi okuti kua kamba osemana ale ceci ci pitahãla osemana, fetika oku tanga onepa Yembimbiliya wa ilikiwila. Noke, ovisimĩlo viove vi tiamisila kekongelo liene kuenda kueci omanu va sangiwamo va sukila. Likutilila eci catiamẽla konepa yaco. Elungulo lipi, ongangu yipi, olonumbi vipi, vonepa eyi Yondaka ya Suku vi likuata lasukila aco?
Oku konomuisa ku kuete esilivilo liocili. Anga hẽ o Watchtower Library vo CD-ROM (Okasete Kamue Musangiwa Alivulu Ocisoko Atangiwila vo Komputador) ale o Índice das Publicações da Torre de Vigia yi sangiwavo velimi liove? Nda okuti ka kuli, upa esilivilo kovipama vi sangiwa kemẽla lia sulako Liutala Wondavululi wa Cembanima wunyamo lunyamo. Poku konomuisa eci ca sandekiwa ale catiamẽla kovinimbu wa nõla oku ka lombolola, ci tava okuti oka sanga alomboluilo ondongosi atiamẽla kocipama caco. Oka sangavo alomboluilo ovitumasuku, lesituluilo lieci ovinimbu vimue Viembimbiliya vi lekisa catiamẽla ku Yehova, ale elomboluilo liovihandeleko. Ku ka sokiye oku ka lombolola atosi alua enene. Luluvalela lika kovinimbu vimue ño wa nõla. Ca velapo oku lombolola lika ovinimbu vimue vitito kuenda oku ci linga ciwa.
Vocikele cove pamue mu kongelavo oku laleka olonjeveleli oco vi lombolole esilivilo vopa ketangiwo Liembimbiliya vokuenda kuosemana. Nye ovo va sangamo okuti cika va kuatisa kelilongiso liavo liopokolika kuenda liepata? Ale kupange wavo woku kunda kuenda komuenyo wavo? Ovituwa vipi via Yehova via li lekisila koku linalisa kuaye lomanu kuenda lolofeka? Nye olonjeveleli via lilongisa okuti ca pamisa ekolelo liavo kuenda ca va vetiya oku kuatela ocisola Yehova? Ku ka luluvalele koku lombolola atosi atatama. Velisapo oku tukula elomboloko kuenda esilivilo liatosi wa nõla.
Ohundo Yelogiso
Ohundo eyi yupiwa vocipama cimue ca sandekiwa Cutala Wondavululi ale co Despertai! ale pamue yupiwa velivulu limue. Ndomo ca siata, vocipama ca ilikiwa, mu sangiwa alomboluilo alua okuti otembo ya sokiyiwa yi sule. Ndamupi hẽ o pondola oku linga onepa yaco? Omo okuti wulongisi, ku ka tange ño ocipama caco toke kesulilo. Ukulu wekongelo te o ‘loñoloha koku longisa.’—1 Tim. 3:2.
Fetika oku lipongiya kuove loku lilongisa ocipama va ku ilikila. Tanga ovisonehua viosi. Ci sokolola lutate. Livanga oku likolisilako oku ci pongiya ciwa osimbu handi eteke liove lioku linga onepa yaco ka lia pitililepo. Ivaluka okuti, eci handi eteke liohongele ka lia pitililepo, vamanji va siata oku vetiyiwa oco va tange ocipama ca sandekiwa omu muopiwa ohundo yove. Ocikele cove, hakupitululako lika oku lombolola eci ci kasi vocipama, ale oku ci teta onimbu, pole oku lekisa ndomo ci kapiwako. Lombolola olonepa vimue viocipama caco lonjila yimue okuti ci kuatisa ekongelo.
Ndomo ca siata, omõla lomõla o kuete ocituwa caye. Haicovo ekongelo lekongelo li kuete ovituwa via litepa. Onjali yina okuti yi longisa luloño, ka yi longisa lika loku pituluila omõla waye olonumbi via sunguluka. Pole eye, o konomuisila kumosi lomõla waye. Eye poku ci linga, o kapako ocituwa comõla kuenda ovitangi a kasi loku liyaka lavio. Cimuamue haico, alongisi vekongelo va likolisilako oku limbuka eci olonjeveleli viavo vi sukila kuenje va vi kuatisa. Pole, ulongisi wa loñoloha o yuvula oku tukula ovolandu ana a sumuisa umue pokati kolonjeveleli. Eye oka velisapo oku tukula ovowa eyilila koku endela vonjila ya Yehova, kuenda oka eca olonumbi viupiwa Vembimbiliya vina vi kuatisa ekongelo oku yula ovitangi va kasi loku liyaka lavio.
Elongiso liwa livetiya ovitima violonjeveleli. Eci ci kisika oku linga vali calua okuti hakulombololako lika ovolandu. Puãi mua kongela oku vetiya oku sola eci ci kasi loku lomboluiwa. Eci ci sukila oku kuatela onjongole yocili omanu va kasi loku longisiwa. Angombo kespiritu va kuete oku kũlĩha olomeme. Oco va vangule levetiyo liocili, loku lekisa elembeleko, locikembe kuenda ohenda, va sukila oku kapako ovitangi omunu lomunu a kasi loku liyaka lavio.
Alongisi va loñolõha va kũlĩha okuti ohundo te ya kuata ocimãho cimue yi tẽlisa. Ocipama te ca lingiwa lonjila yimue okuti atosi a velapo a patekeliwa kuenda a ivalukiwa. Olonjeveleli te vi tẽla oku ivaluka kuenda oku kapako ovisimĩlo vina vi tiamẽla komuenyo wavo.
Ohongele Yupange
Eci o linga ohundo yimue yupiwa vocipama Cupange Wetu Wusoma, ekatanga oka liyaka lalio, pamue lia litepapo kamue. Catiamẽla koku linga ohundo yaco, ndomo ca siata, oka kisikiwa oku lolombolola ocipama caco cosi kolonjeveleli, okuti hakunõlako lika olonepa vimue. Kuatisa olonjeveleli oku konomuisa ovisonehua vina okuti ovio ono yelungulo liosi lia eciwa. (Tito 1:9) Otembo ya siata oku sokiyiwa yitito, kuenje ka yecelela oku vokiyako vali ovipama vikuavo.
Pole, ci tava okuti pamue o tambula ocikele coku linga onepa yimue okuti ka yi sangiwa Vupange Wetu Wusoma. Etukulo liaco pamue li ku ilikila vocipama cimue Cutala Wondavululi ale pamue li ku ilikila ño katosi amue onimbu. Oku nõla vocipama va ku ilikila eci ekongelo li sukila, ocikele cove ulongisi. Ove pamue oka sukila oku tukula ulandu umue wonimbu watiamẽla kocipama o kasi loku linga. Ivaluka okuti ocikele cove hakuvangulako lika eci catiamẽla kocipama wa tambula. Pole, o kuete oku ci linga lonjila yimue okuti ekongelo liupako ekuatiso oco li tẽlise upange, Ondaka ya Suku yilekisa okuti owo tua kundikiwa oku linga kuenda oku sanga esanju poku u linga.—Ovil. 20:20, 21.
Osimbu o pongiya onepa yove, sokolola eci catiamẽla kekalo liomanu va kasi vekongelo liene. Va pandiya kueci va siata oku linga ale. Ndamupi oku kapako olonumbi via eciwa vocipama va ku ilikila cika vokiya ombili yavo kuenda esanju liavo kupange woku kunda?
Anga hẽ onepa yove yi kisika oku lekisa cimue ocindekaise ale oku linga apulilo? Nda oco, ciwa okuti o livanga oku ci sokiya ciwa. Pamue o yeva ekisika lioku pinga ño komunu umue vonjanja yaco oco a linge ocindekaise. Pole, eci halonjanja viosiko okuti ci tuala konima yiwa. Nda ci tava, sayala ocindekaise caco ale apulilo aco osimbu handi eteke liohongele ka lia pitililepo. Kũlĩhĩsa ciwa okuti onepa yaco eyi yi lingiwa lonjila yimue okuti yi vokiya esilivilo kelongiso li kasi loku eciwa.
Olohongele Vimbo Kuenda Viofeka
Vamanji vana va likolisilako oku kala lovituwa viespiritu okuti veya oku kala olohundi via loñoloha viowiñi haivo alongisi vawa, pamue vokuenda kuotembo ci tava okuti va pingiwa oco va pange onepa kohongele yimbo ale kohongele yofeka. Ocili okuti, a-a apuluvi amue a likasi atiamẽla koku longisiwa la Suku. Onepa yaco pamue yiya ndohundo yoku tanga ulandu wosi wa sonehiwa (manuscrito). Ale yiya ndohundo yimue okuti yi sukila oku yi lombolola (esboço). Ale pamue ci tava okuti yiya ndolonumbi viatiamẽla kondalama yimue yopiwa Vembimbiliya kuenda oku lekisa ndomo olonumbi viaco vi kapiwako koloneke vilo. Handi vali pamue yiya ndovinimbu vimue vielongiso. Nda weya oku kuata esumũlũho lioku lalekiwa oco oka pange onepa kolohongele viaco, lilongisa ciwa lutate ocipama wa tambula. Pitololamo oku lipongiya ciwa toke eci o limbuka okuti ca ku lomboloka ciwa.
Ava va tambula ohundo yoku tanga ulandu wosi wa sonehiwa, va kuete oku tanga ohundo yaco ondaka londaka. Ovo ka ci tava okuti ohundo yaco va yi pongoluila volondaka vikuavo ale va yi sokiya mumue muiñi. Ovo va kuete oku yi lilongisa lutate oco va tẽle oku limbuka atosi a velapo kuenda oku a lombolola ciwa. Ovo va tanga ohundo yaco loku yi pitolola lolukandi toke eci va pondola oku yi linga lombili yi sesamẽla, lesanju, lowuya, locikembe, lonjongole yocili, lekolelo kuenda locileñi ci litava lowiñi womanu u kasipo.
Vamanji va tambula ohundo yina okuti yi sukila oku yi lombolola, va kuete ocikele coku yi lombolola lonjila yimue okuti yi likuata ciwa leci ci sangiwa vohundo. Hundi o kuete oku vangula volondaka viaye muẽle vi tundilila kutima, okuti ka luluvalela vohundo yaco osimbu a kasi loku yi linga, kuenda ka yi pongiya ndohundo yoku tanga okuti, o soneha cosi aka popia. Ci kuete esilivilo liocili oku kuama otembo yi lekisiwa vonepa lonepa yi sangiwa vohundo oco cecelele oku lekisa lulelu atosi a velapo a sangiwa vohundo. Hundi o kuete oku lombolola ciwa ovisimĩlo kuenda oku konomuisa ciwa ovisonehua vi sangiwa vemẽhi liatosi osi a velapo. Eye ka ci tava okuti o vokiyako atosi ana eye muẽle a sima okuti awa, momo cu tuala koku kapela ponele atosi ana a sangiwa ale vohundo. Ocili okuti, ono yelongiso Ondaka ya Suku. Ocikundi Cakristão akulu vekongelo, oku “kunda ondaka.” (2 Tim. 4:1, 2) Omo liaco, hundi te wa luluvalela vali calua kovisonehua vi sangiwa vohundo, oku vi lombolola kuenda oku lekisa ndomo vi kapiwako.
Ku ka Kuate Ocituwa Coku Lipañela
Anga hẽ o kasi vekongelo limue okuti o kuete apuluvi alua voku linga ohundo? Ndamupi o kuete oku pongiya lutate olonepa viaco viosi? Yuvula oku pongiya olonepa viove vakukutu a sulako.
Olohundo vi kuatisa muẽle ocili ekongelo, vi sukila oku vi angiliya ciwa, eci okuti kua kamba handi oloneke vialua. Omo liaco, kuata ocituwa coku tanga ocipama wa ihĩwa vonjanja yaco muẽle eci o ci tambula. Eci cika ku kuatisa oku sokolola eci catiamẽlako, osimbu o linga ovina vikuavo. Vokuenda kuoloneke ale kuolosemana vimue okuti handi kua lingile ohundo yove, pamue oka yeva olondaka vimue vika ku kuatisa oku kũlĩhĩsa ndomo elomboluilo liaco li kapiwako. Pamue ku molẽha asapulo amue okuti ci tava oku a kapako. Oku tanga kuenda oku sokolola vonjanja yaco muẽle eci catiamẽla konepa wa tambula, ci sukila otembo, pole otembo yimue okuti yi peseliwa ciwa. Pana okuti wa tumãla oco o pongiye ohundo yove, o kongula olonima viwa omo lioku livanga oku sokolola ciwa lutate eci catiamẽlako. Oku linga ocipama wa tambula lonjila eyi, cika tepulula calua asakalalo kuenda cika ku kuatisa oku linga onepa yove lonjila yimue okuti o vetiya ovitima viava va kasi vekongelo.
Nda wa likolisilako oku sanjukila ongavelo yove wa tambula ku Yehova, yatiamẽla koku longisa omanu vaye, oko kemanya kuenje cika kala esumũlũho liocili ku vana vosi vo sole.—Isa. 54:13; Va Rom. 12:6-8.