Pitulula Atosi Amue Oco a Patekeliwe

VOKU longisa ciwa, mua kongela oku pitulula. Eci etosi limue lia velapo li pituluiwa eci ci pitahãla onjanja yimosi, ci leluka vali kolonjeveleli oku li patekela. Eci ocisimĩlo cimue ci pituluiwa lonjila yimue okuti ya litepapo kamue, ci pondola oku kuatisa olonjeveleli oku kuata vali elomboloko liwa liocisimĩlo caco.

Nda olonjeveleli viove ka vi patekela eci o popia, olondaka viove ka vika va vetiya kueci ovo va tava ale komuenyo wavo. Ovo vaka amamako loku sokolola atosi ove wa velisapo oku tukula.

Ulongisi wetu Wavelapo Yehova, wa tu tumbikila ongangu kueci catiamẽla koku pitulula. Eye wa ecele Ovihandeleko Ekũi ku va Isareli. Poku vanguila vungelo umue, eye wa lingisa okuti va Isareli va yeva ovihandeleko viaco Komunda Sinai. Noke weya oku vieca ku Mose okuti via sonehiwa ale. (Etu. 20:1-17; 31:18; Esin. 5:22) Osimbu handi ka va iñilile Vofeka Yohuminyo, Yehova wa handeleka Mose oco a pituluile ovihandeleko viaco ku va Isareli. Noke, longusu yespiritu sandu, Mose wa soneha ovihandeleko viaco, ndomo vi sangiwa kelivulu Liesinumuĩlo 5:6-21. Pokati kovihandeleko via eciwile ku va Isareli, pa kala ocihandeleko coku sola loku vumba Yehova lutima wavo wosi, lomuenyo wavo wosi, kuenda longusu yavo yosi. Ocihandeleko caco eci ca pituluiwavo olonjanja vialua. (Esin. 6:5; 10:12; 11:13; 30:6) Momo lie? Momo, ndomo Yesu a ci popia, “eci oco ocihandeleko cinene, haico catete.” (Mat. 22:34-38) Loku tuma uprofeto Yeremiya, Yehova wa ivaluisa omanu voko Yuda ci pitahãla olonjanja akũi avali esilivilo lioku pokola kokuaye kovina viosi eye a va handelekele. (Yer. 7:23; 11:4; 12:17; 19:15) Loku tuma uprofeto Esekiele, Suku wa popia eci ci pitahãla akũi epandu kolonjanja okuti omanu ava va “limbuka okuti ame ndi Yehova.”​—Esek. 6:10; 38:23.

Kulandu watiamẽla kupange wa Yesu woku kunda, tu sangakovo oku pituluiwa kuovina vialua. Ndongangu, kalivulu akuãla a lombolola eci catiamẽla komuenyo wa Yesu, tu sangako okuti kelivulu lelivulu kua sonehiwa cimue ci kuete esilivilo okuti ca pituluiwavo kelivulu likuavo, pole locisimĩlo ca litepapo kamue. Yesu, wa longisavo ocisimĩlo cimuamue olonjanja vialua pole lonjila ya litepa. (Mark. 9:34-37; 10:35-45; Yoa. 13:2-17) Kuenda eci a kala Komunda yo Oliveira, okuti otembo yaco kua kambele ño oloneke viñami ñami koku fa kuaye, Yesu wa pitulula elungulo eli lia velapo loku popia hati: “Lavululi, momo ka wa kũlĩhili eteke Ñala yene eya.”​—Mat. 24:42; 25:13.

Kupange Woku Kunda. Eci o kundila omanu, o lavoka okuti ovo va patekela eci o va sapuila. Oku pitulula ku kuatisa calua koku tẽlisa ocimãho eci.

Olonjanja vialua okuti, oku pitulula eci ca popiwa vonjanja yaco muẽle ci kuatisa njeveleli oku ci patekela. Omo liaco, pana okuti wa tanga ocisonehua cimue, lekisa etosi lia velapo li sangiwamo loku pula hati: “wa limbuka ondaka ya tukuiwa vocisonehua eci?”

Olondaka via sulako viombangulo yimue vi pondolavo oku kuatisa konepa eyi. Ndongangu, ove ci tava okuti o popia hati: “Ondaka ya velapo yombangulo yetu ndi yongola okuti oyo o patekela, yeyi. . . ” Noke pitulula ondaka yaco volondaka via leluka. Ondaka yaco ci tava okuti yi kala yimue ya soka ndeyi: “Ocipango ca Suku ceci okuti ilu lieve liosi li pongoloka ofeka yelau. Ocipango caco cika tẽlisiwa muẽle.” Ale yimue ya soka ndeyi: “Embimbiliya li lekisa ciwa okuti tu kasi koloneke via sulako violuali lulo. Nda tu yongola oku puluka kesulilo liaco, tu sukila oku lilongisa eci Suku a yongola okuti oco tu linga.” Ale cimue ca soka ndeci: “Ndomo tua mõla, Embimbiliya lieca olonumbi viwa ndomo ku tetuluiwa ovitangi vepata.” Kapuluvi amue, oka sukila lika oku pitulula olondaka vimue vi sangiwa vocisonehua cimue Cembimbiliya ndetosi li sukila oku patekeliwa. Ocili okuti eci oku ci linga ciwa, ci kisika tete oku sokolola lutate.

Kapasu kuenda poku songola alilongiso Embimbiliya, epitululo li pondola oku lingiwa loku linga apulilo oku pitulula.

Nda omunu co tĩlila oku kuata elomboloko ale oku kapako onumbi yimue Yembimbiliya, ove pamue o sukila oku pitulula eci catiamẽla kondaka yaco ci pitahãla onjanja yimosi. Likolisilako oku lekisa ondaka yaco loku yi sokisa lovina viñi viñi via litepa. Ka ci sukila okuti alomboluilo aco alua ño enene, pole te a vetiya ondonge oku amamako loku sokolola ondaka yaco. Ivaluka okuti Yesu wa kuama onjila eyi yoku pitulula poku kuatisa olondonge viaye oku yula onjongole yoku livelisapo.​—Mat. 18:1-6; 20:20-28; Luka 22:24-27.

Poku Linga Ohundo. Eci o vanguila kembumbua, onjongole yove haku lekisako lika alomboluilo. Onjongole yove yeyi okuti olonjeveleli ci va lomboloka, va ci patekela, kuenda va ci kapako. Oco o tẽlise ocimãho eci, likolisilako oku kuama onjila yoku pitulula.

Pole, nda wa pitulula ño enene olonjanja vialua atosi a velapo, olonjeveleli vika liwekapo oku ku yevelela. Lutate, nõlamo ño atosi ana okuti a sesamẽla muẽle oku a pitulula. Atosi aco, ndomo ca siata, ana a velapo vohundo yove. Pole ci tava okuti mu kongeliwa ovisimĩlo vikuavo vina okuti vika kuata esilivilo lia velapo kolonjeveleli.

Oco o kuame ciwa onjila yoku pitulula, tete, o kuete oku tukula atosi a velapo kefetikilo liohundo yove. Ci linga loku vangula olondaka vionimbu vina vi lekisa ocisimĩlo cosi catiamẽla kueci oka vangula, loku linga apulilo ale loku lekisa ovitangi vimue vi sukila oku tetuluiwa. Ci tava okuti o lekisa atosi añami a velapo a sangiwa vohundo kuenda oku a tukula. Noke voku lingiwa kuohundo, lombolola ciwa etosi letosi. Oco wece ongusu katosi aco, voku lingiwa kuohundo ci tava okuti o pitulula oku tukula etosi letosi lia velapo osimbu handi kua tehẽlele ketosi likuavo. Ale o ci linga loku tukula ongangu yimue mua kongela oku kapako etosi limue lia velapo. Poku sulako, eca ongusu katosi a velapo loku a pitulula, loku a tukula poku lekisa ovisimĩlo vimue via litepa, poku tambulula apulilo a votuiwile, ale loku lekisa vokatembo kamue katito ndomo ovitangi via tukuiwile vi tetuluiwa.

Handi vali, ohundi yina okuti ya loñoloha, yi luluvalela lutate komanu va sangiwa pokati kolonjeveleli viaye. Eye o tẽla oku limbuka nda vamue pokati kolonjeveleli va kuete ekatanga lioku kuata elomboloko liocisimĩlo cimue. Kuenje nda etosi liaco li kuete esilivilo lialua, eye o li pitulula. Pole, oku pitulula ño olondaka viaco vimuamue ka ci tẽla. Voku longisa mua kongela vali calua. Hundi te o kala umue o tẽla oku linalisa lekalo liaco. Eye pamue o sukila oku vokiya kohundo yaye olondaka vimue okuti ka vi sokiyile. Oku lilongisa kuove ciwa oku linalisa lasukila olonjeveleli lonjila ndeyi, okuo kuka molehĩsa eloñoloho liove lioku kala ohundi yiwa.