Situlula osapi yohundo

OLOHUNDI vina via loñoloha, via kũlĩha ciwa esilivilo lioku kuata osapi yohundo. Poku pongiya ohundo, osapi yi va kuatisa oku luluvalela konepa yimue yelomboluilo kuenda oku konomuisa vali ciwa eci catiamẽlako. Eci ci iyililako ceci okuti, ka va lombolola atosi alua okuti va pita ño kilu, pole va lombolola ohundo yaco lonjila yimue okuti olonjeveleli viupako vali ekuatiso. Eci etosi letosi lia velapo li tokekisiwa kosapi kuenda li kuatisa koku lombolola osapi yaco, ci kuatisavo olonjeveleli oku patekela atosi aco kuenda oku limbuka esilivilo liatosi aco.

Ndaño ci tava oku popia hati osapi yove ondaka yina yi kasi loku vanguiwa, oka limbuka okuti olohundo viove vika mioñoloha vali nda wa kuata ocisimĩlo cokuti osapi etosi lina lia velapo, okuti oko ondaka yi kasi oku lomboluiwa yatiamisiwila. Ndongangu, Usoma, Embimbiliya kuenda epinduko, olondaka vimue okuti ci tava oku vi lombolola muiñi muiñi loku kuama olosapi via litepa. Ndeci osapi eyi: “Usoma Uviali Umue Wocili,” “Usoma Wa Suku Uka Pongolola Ilu Lieve Oco li Kale Ofeka Yelau,” “Embimbiliya Ocitumasuku,” “Embimbiliya Olio Usongui Uwa Koloneke Vietu Vilo,” “Epinduko Lieca Elavoko Kuava va Sumua” kuenda “Elavoko Liepinduko li tu Kuatisa Oku Pandikisa Eci tu Lambalaliwa.” Osapi losapi pokati kolosapi evi, yi sukila oku yi lombolola mumue muiñi.

Loku tiamisila kosapi ya velapo Yembimbiliya, Yesu eci a kala palo posi, koku kunda kuaye wa velisilepo oku tukula osapi ya linga hati: “usoma wokilu u kasi ocipepi.” (Mat. 4:17) Ndamupi osapi eyi yeya oku lomboluiwa? Valivulu akuãla a lombolola eci catiamẽla komuenyo wa Yesu, mu sangiwa eci ci pitahãla 110 katukulo Usoma waco. Pole Yesu wa linga vali calua okuti haku tukulako lika olonjanja vialua ondaka “usoma.” Cikale kueci a longisa cikale kovikomo a linga, Yesu wa lekisa ciwa okuti eye Omõla a Suku, Mesiya, una Yehova eya oku ĩha Usoma. Yesu wa lekisavo okuti vonduko yaye, onjila yoku viala Kusoma waco, yeya oku yikuiwilavo vakuavo vaka vialela kumosi laye. Eye wa tukula ovituwa vi sukila oku lekisiwa la vana va ihĩwa esumũlũho liaco. Kelongiso liaye kuenda kovina vinene eye a linga, wa lekisa ciwa eci Usoma wa Suku uka lomboloka vovimuenyo viomanu kuenda wa lekisavo okuti oku tundisa kuaye olondele lunene wespiritu lia Suku, kua lombolokele okuti ‘usoma wa Suku wa kala ale pokati’ kolonjeveleli viaye. (Luka 11:20) Usoma waco, owo eye a kundika koloñame viaye oku u kunda.​—Mat. 10:7; 24:14.

Oku Nõla Osapi Yimue ya Sunguluka. Ka ku keveleliwa okuti ove o lombolola calua catiamẽla kosapi yove ndomo ci lingiwa Vembimbiliya, pole eci ka ci tepulula esilivilo lioku kuata osapi yimue ya sunguluka.

Nda okuti ocikele coku nõla osapi ca eciwa peka liove, ocina catete o sukila oku linga oku kũlĩhĩsa eci ci yonguiwa oku tẽlisiwa lelomboluilo liove. Noke, poku nõla atosi a velapo aka kongeliwa vohundo yove, kũlĩhĩsa ciwa okuti ovo a lienda muẽle losapi ya nõliwa.

Nda okuti osapi ya ku ihĩwa ale, yi konomuisa ciwa lutate oco o tale ndomo yi lomboluiwa. Ci sukila oku likolisilako oco o konomuise esilivilo kuenda ongusu yosapi yaco. Poku nõla ovipama vioku lombolola osapi ya ilikiwa, nõla ciwa oco okuti osapi oyo yi velisiwapo. Handi vali, ndaño ovipama viaco via ku ihĩwa ale, handi lopo o sukila oku sokolola ciwa ndomo o vi tiamisila kosapi yaco. O sukilavo oku konomuisa esunga lieci ovipama viaco vi kuetele esilivilo kolonjeveleli viove, kuenda poku vi lombolola cipi ci kuete oku kala ocimãho cove. Eci cika ku kuatisa oku nõla eci ci sukila oku ci tukula longusu poku linga ohundo.

Ndomo ku Velisiwapo Oku Tukula Osapi. Kepuluvi lioku nõla kuenda lioku sokiya ovipama, oco ku siwa ociseveto coku velisapo oku tukula osapi. Nda wa nõla lika ovipama vina viatiamẽla kosapi yove, kuenda wa kuama olonumbi vioku pongiya ohundo yina ya sokiyiwa lika lolondaka vionimbu, oku velisapo oku tukula osapi kuka tunda muẽle lulelu.

Oku pitulula ku pondola oku eca ongusu kosapi. Kovisikilo vina vi tukuiwa hati música classica, osapi yaco ocileñi cina ci pituluiwa olonjanja vialua okuti ci pongoloka muẽle onepa yocisikilo caco cosi. Pole ocileñi caco ka ci yevala ño lelaka limuamue. Olonjanja vimue ku yevala ño elaka limosi ale avali, pamue handi elaka liosapi yaco li pongolokapo kamue, pole lonjila yimue ale yikuavo, luloño, usiki iñisa ocileñi caco vocisikilo toke ci yevala muẽle vocisikilo caco cosi. Eci oco ci sukila oku lingiwa losapi yohundo. Oku pitulula olondaka via velapo viosapi yohundo, ca soka ndocileñi camamako vokati kocisikilo. Oku tukula olondaka via litepa pole vi kuete elomboloko limuamue ale oku pitulula olondaka viosapi yaco, ci kala ndoku pongololapo kamue osapi yaco. Oku kuama onjila eyi cika lingisa okuti osapi yi kala ocisimĩlo ca velapo olonjeveleli viove vika patekela.

Olonumbi evi ka vi kapiwako lika poku lingila olohundo kembumbua, pole vi kapiwakovo poku vangula lomanu kupange woku kunda. Ombangulo yimue yitito, yi patekeliwa vali nda osapi yaco ya velisiwapo oku tukuiwa. Eci ca longisiwa velilongiso Liembimbiliya cika ivalukiwa vali nda osapi yaco ya velisiwapo oku tukuiwa. Elikolisilo o kapa koku nõla kuenda koku situlula ciwa osapi yohundo, lika molehĩsa ulõno wove woku kala ohundi yiwa kuenda ulongisi uwa Wondaka ya Suku.