Tu Sanjukili Upange Wetu Wokungulla!
“Okungula kua lua puãi olondingupange viñamiñami. Pingi ku Cimue cokungula oco a tume olondingupange kokungula kuaye.”—MATEO 9:37, 38.
1. Nye ci tu kuatisa oku amamako koku linga ocipango ca Suku?
ECI tu sokolola eteke tua papatisiwa Ndolombangi via Yehova, cikale okuti tua papatisiwa osimbu ale ndopo, ci molẽha soketi tua papatisiwile hẽla lia pita. Oku sivaya Yehova oko kua velisiwilepo kelitumbiko liomuenyo wetu. Osimbu tua kala loku amamako oku sandiliya otembo yoku kuatisa vakuetu oku yevelela kuenda oku tava kondaka Yusoma, upange u sanjuisa wa Yehova owo tua sakalalele lawo vali enene. (Va Efeso 5:15, 16) Koloneke vilo, tu lete okuti, otembo yi pita ño lonjanga, ca piãla vali enene eci tu ‘litumbika calua kupange wa Ñala.’ (1 Va Korindo 15:58) Ndaño okuti tu liyaka lovitangi, handi lopo esanju lietu koku linga ocipango ca Yehova, li tu vetiya oku amamako.—Nehemiya 8:10.
2. Nye ci tu kuatisa oco tu kuate esanju kupange wokungula koloneke vilo?
2 Etu Tuakristão, tua litumbika kupange umue wa soka lupange wokungula. Yesu Krsitu, upange woku ongolola omanu oco va kuate omuenyo ko pui wa u sokiya ndupange wolkungula. (Yoano 4:35–38) Omo okuti, tu kueteko onepane kupange waco owu wokungula, cika tu vetiya calua oku konomuisa lutate esanju Akristão vokocita catete va kuata kupange waco owu umuamue. Noke, tuka konomuisa ovina vitatu vi tu kuatisa oco tu kuate esanju kupange wokungula koloneke vilo. Ovina viaco vitatu vievi: (1) ondaka tu kasi loku kunda yelavoko, (2) oku sandiliya kuetu omanu ku kasi loku enda ciwa, kuenda (3) ocituwa cetu coku kala vakuambembua kupange wokungula.
Va Tumiwa Ndolonalavayi Wokungula
3. Nye ca kokelele esanju lia piãla olondonge viatete via Yesu?
3 Hepongolokokuolio lia pita lava va litumbikile kupange wokungula kocita catete, ca piãla vali enene 11 kovapostolo va Yesu keteke 33 K.K., eci va endele komunda yoko Galilea oku ka ñualehẽla la Yesu wa pinduiwa! (Mateo 28:16) Yesu ‘wa molehẽla kueci ci pitahãla ovita vitãlo via vamanji,’ va kalapo. (1 Va Korindo 15:6) Ocikundi Yesu a va ihile, va ci liyevela muẽle lovatui avo. Eye wa va sapuila hati: “Kuendi, ka tavisi [omanu vo k]olofeka viosi oco va linge olondonge. Va papatisili vonduko ya Tate la Mõla, kuenda espiritu sandu. Va longisi oku linga ovina viosi ndo kundiki.” (Mateo 28:19, 20) Ndaño okuti kua kala oku suvukiwa kualua, olondonge via Kristu, via kuatele esanju lia lua kupange wokungula, poku mõla akongelo a kala loku tumbikiwa kolonepa viñi viñi. Vokuenda kuotembo, ‘olondaka viwa via kala loku kundiwila voluali luosi.’—Va Kolosai 1:23; Ovilinga 1:8; 16:5.
4. Vemẽhi liekalo lipi, olondonge via Kristu via tumiwile?
4 Yesu, kefetikilo liupange waye ko Galileia, wa lalekele eci ci soka 12 kolondonge, kuenje, wa vi tuma oku kunda hati: “Usoma wokilu u kasi ocipepi.” (Mateo 10:1–7) Eye muẽle Yesu, “wa ñuala ñuala kovaimbo osi anene la–a atito oku longisa volosunangonga viavo loku kunda ondaka yiwa yusoma. [Kuenda] wa sakula ovoveyi osi lokuvela kuosi.” Yesu wa kuatela ohenda omanu, ‘momo va pekenguele kuenda va ka ndolomeme ka vi kuete ungombo.’ (Mateo 9:35, 36) Noke, omo liocikembe eye a kuata, wa sapuila olondonge viaye hati: “Okungula kua lua puãi olondingupange viñamiñami. Pingi ku [Yehova Suku] Cime cokungula oco a tume olondingupange kokungula kuaye.” (Mateo 9:37, 38) Ocisimilo Yesu a kala laco, catiamẽla kupange wokungula, haico eya oku kala laco ko Yudea okuti otembo yaco, kuokambelele lika olosãi epandu oco a tẽlise upange waye wa palo posi. (Luka 10:2) Kolonjanja viaco evi viosi vivali, eye wa tumile olondonge viaye kupange wokungula.—Mateo 10:5; Luka 10:3.
Ondaka tu Kasi Loku Kunda Yelavoko
5. Esapulo lipi tu kasi loku kunda?
5 Etu Tulombangi via Yehova koloneke vilo, tu sanjukila elaleko lioku kuata onepa kupange wokungula. Esunga limue, lioku kuata esanju lia piãla, lieli liokuti, etu tu kasi loku kundila ondaka yelavoko komanu vana va teka ovitima, kuenda kuava va sumua. Ndeci ca pita lolondonge via Yesu kocita catete, hesumuluhokuolio tu kuete, lioku sapula olondaka viwa vielavoko komanu vana “va pekengua kuenda va sakalaisua ndolomeme ka vi kuete ungombo”!
6. Kupange upi ovopostolo va li tumbikile kocita catete?
6 Vokuenda kuocita catete, upostolo Paulu wa litumbikile calua kupange woku kunda olondaka viwa. Kuenda, upange waye wokungula ci mõleha okuti wa enda muẽle ciwa, momo kunyamo wa 55 K.K., eci a sonehela Akristão voko Korindo, eye wa popia hati: “A vamanji, njongole oku vu wivaluisa ndomo ndo kundili ondaka yiwa, eyi wa tavi, kuenda wu tãi vokuayo.” (1 Va Korindo 15:1)Ovapostolo kuenda Akristão vakuavo vo kocita catete, va kala vakuambili kupange wokungula. Ndaño okuti, Embimbiliya ka li tu lomboluila eci ca pita lovapostolo voluali vokuenda kuotembo yina yekatanga lieya oku sulila voku kunduiwa kuo Yerusalãi kunyamo wo 70 K.K., lopo tua kuliha ciwa okuti, upostolo Yoano noke weya oku amamako loku kunda vokuenda kueci ci soka 25 kanyamo.—Esituluilo 1:9.
7, 8. Ondaka yipi yelavoko omanu va Yehova va kasi loku sandeka lonjanga yalua okuti kosimbu ci sule?
7 Noke, kueya oku kala otembo yoku talisiwa ohali lasongui vetavo Liakristão Vesanda, vana va tomba Suku, va tukuiwa hati, ‘omunu wekandu.’ (2 Va Tesalonike 2:3) Pole, kesulilo liocita 19, vosi vana va likolisilileko oku kuama muẽle alongiso nda vana Akristão vokocita catate, veya oku tava kesapulo lielavoko, kuenje va kunda Usoma. Omo liaco, noke kueya oku sandekiwa o revista yatete (kosãi Yevambi Linene yunyamo wo 1879), okuti osapi yaco, mua kongelele olondaka kelimi lioputu vi tukuwa hati: “Arauto da Presença de Cristo,” “Arauto do Reino de Cristo,” ale “Anunciando o Reino de Jeová.”
8 Usoma wa Suku wokilu wa tumbikiwa peka lia Yesu kristu kunyamo wo 1914, omo liaco, cilo tu kasi loku sandeka ondaka yelavoko lonjanga yocili okuti kosimbu ci sule. Momo lie? Momo okuti, otembo Yusoma wa Suku, una uka nena asumuluho ocili haiwo uka kundula oluali lulo yi kasi ocipepi. (Daniele 2:44) Anga hẽ, kuli vali handi esapulo limue likuavo liwa okuti, eli lia tukuiwa ndeti palo li sule? Esanju lipi tu pondola oku kuata poku li tumbika kupange woku kunda Usoma osimbu “ohali ya lua” ka yeyile handi?—Mateo 24:21; Marko 13:10.
Oku Litunda Ciwa Koku Sandiliya Omanu
9. Olonumbi vipi Yesu a ecele kolondonge viaye, kuenda Ndamupi omanu va siata oku tambuluiya kesapulo Liusoma?
9 Esunga limue likuavo tu kuete lioku sanjuka calua kupange wetu wokungula, momo okuti, tu kasi oku litunda ciwa kupange wetu woku sandiliya omanu, kuenda omanu vaco, va linga olondonge, kuenje va kasi oku likongela letu kupange wokungula. Kunyamo wa 31 lowu wa 32 K.K., Yesu wa longisa kolondonge viaye hati: “Vimbo liosi wiñili, ci kale linene, ci kale litito, kulihisimo umue wa sunguluka.” (Mateo 10:11) Ha vosiko okuti, va sungulukile muẽle, momo va ci lekisilile koku li kala kuavo ondaka Yusoma. Pole, olondonge via Yesu via kala lombili yalua yoku kundila olondaka viwa kolonepa viosi ovo va enda loku sanga omanu.
10. Ndamupi upostolo Paulu amamako kupange waye woku sandiliya omanu vakuesunguluko?
10 Noke liolofa via Yesu, kuenda epinduko liaye, upange woku sandiliya omanu, weya oku amamako lombili yocili. Upostolo Paulu wa vangulavo lomanu va kala pocitanda kofeka yo Atenai. Eci eye a eca uvangi ko Areópago, kuna va enda loku sombisila omanu volupale luo Helasi, “alume vamue vo lamẽlela kuenje va kolela. Pokati kavo pa kala Dionusio, umue woko Areópago, lukãi umue, onduko yaye Damarisi, kuenda vamue vakuavo.” Kolonepa viosi upostolo Paulu a endaile, wa lekisa ongangu yiwa yatiamẽla kupange woku kundila, cikale ‘pocila, cikale konjo lanjo.’—Ovilinga 17:17, 34; 20:20.
11. Olonjila vipi via kuamawailue kupange woku kunda vokuenda kuanyamo a pita?
11 Vokuenda kuanyamo a sulako kocita 19, Akrsitão olombuavekua va litumbikile calua kupange woku sandiliya vakuesunguluko. Vocipama cimue ci tukuiwa hati, “Olombuavekua Kupange Woku Kunda,” o revista yi tukuiwa hati, Zion’s Watch Tower, yosãi Yenyenye, yunyamo wo 1881 ya lombolola hati: “Oku kundiwa kuolondaka viwa, . . . ku kasi oku amamako loku sandiliya ambombe, okuti omanu vana va lekisa onjongole, kuenda va tẽla oku yevelela, osimbu va kasi oku kuatisiwa la Kristu.” Olondingupange via litumbika kupange wa Suku wokungula, via siata oku sanga omanu vana okuti, va siapo upange woku talavaya volonembele, kuenje va va iha olotratadu vi kuete esapulo Liembimbiliya okuti, li vetiya vana vomboka oco va eca etambululo limue lia sunguluka. Noke yoku konomuisa ciwa olonjila ovo va enda loku kuava poku eca uvangi, Utala Wondavululi 15 wosãi ya Kupemba wo 1903, wa vetiya vakuopange wokungula oco va eci olotratadu “kolonjo, Calumingu kekumbi.”
12 Ndamupi oku vokiya upange wetu woku kunda kua siata oku enda ciwa? Ci lombolola.
12 Koloneke vilo, tua siata oku vokiya upange wetu woku kunda poku sandiliya omanu kovitumãlo vikuavo okuti kolonjo ci sule. Koku kuama onjila yaco eyi kua siata oku imila apako alua, ca piãla vali enene kolofeka vina okuti omanu vaco va tekela calua kovitalukilo, lo kolofeka vina okuti ka calelukile oku sanga eteku, kuenje, eci tu va pasuisa ka tu va sangi kolonjo viavo. Vimue Olombangi via Yehova kofeka yo Inglaterra, eci via limbuka okuti, omanu vana ovo va yonguile oku pasuisa va kala oku londa vokalela oco va pite eteke liosi kohulo yo kalunga, lutõi wocili, ovo va londavo vokalela kuenda va fetika oku eca Utala Wondavululi kuenda o Despertai! Komanu vosi va kala vokalela. Vokuenda kuosãi yimosi, ovo va eca eci ci soka 229 kolorevista. Ovo va lombolola hati: “Ka tu kuete usumba woku kundila kohulo yo kalunga, lo vovikanjo violomilu, ale kovitumãlo vina okuti ka ca lelukile oku vangula lomanu, momo tua kuliha okuti, olonjanja viosi komanu vamuamue va lekisa onjongole, noke va fetika alilongiso Embimbiliya, kuenda kavali kavo va litumbika kupange wakundi vasokamo.
13. Esokiyo lipi kaliye li sukiliwa kovikanjo vimue kueci catiamẽla kupange wetu woku kunda?
13 Osimbu yu amamako loku sandiliya omanu vana vakuesunguluko, tu sukila oku konomuisa ciwa, momo kuli ovikanjo vimue okuti, tu sukila oku lunguka. Ndaño okuti vialua Olombangi via Yehova siata oku litumbika kupange woku kundila kolonjo Vovialumingu komẽle, kovikanjo vimue, oku endako komẽle, ovo ka va siatele oku litunda ciwa, momo kowola yaco, vamue vakualonjo viaco pamue va pekela. Poku sokiya ciwa otembo yavo, valua pokati Kolombangi via Yehova, kaliye va siata oku sandiliya omanu vovikanjo viaco eci okuti ekumbi lia kula, noke yoku tunda kohongele. Kuenje, onjila yaco eyi ya siata oku eca apako alua awa Kakristão. Kunyamo wa pita etendelo liakundi Vusoma voluali luosi, lia tẽla eci ci soka 2, 3 kolopursentu. Eci ci sivaya Cime cokungula, kuenda ci sanjuisa calua ovitima vietu.
Kala Ukuambembua Kupange Wokungula
14. Ocituwa cipi tu sesamẽla oku lekisa poku kunda ondaka Yusoma, kuenda momo lie?
14 Esunga limue likuavo lieci tu sukilila oku kuata esanju, momo, liocituwa cetu combembua tu lekisa kupange wokungula. Yesu wa popia hati: “Eci wiñili vonjo yaco yi lami lombembua. Oco nda onjo yaco ya sunguluka, ombembua yene yi yi wila.” (Mateo 10:12, 13) Kelimi lio Heveru oku lama, oku ku tiamisila ko Helasi Yembimbiliya, ci lomboloka ocisimilo cokuti: ‘Kuende ciwa lombembua.’ Ocikembe caco eci, oco ci tu vetiya oku vangula lomanu eci tu va kundila olondaka viwa. Etu tu lavoka okuti, ovo va tava ciwa kondaka Yusoma tu kasi oku kunda. Ku vana va tava lonjongole yocili, kuli elavoko liokuti va linalisa la Suku, poku likekembela akandu avo, oku siapo ovina viosi vivi va lingaile, oco va fetike oku linga ocipango caye. Noke, oku amamako kuavo lombembua la Suku, kuka va tuala komuenyo wenda ño hu.—Yoano 17:3; Ovilinga 3:19; 13:38, 48; 2 Va Korindo 5:18–20.
15. Ndamupi tu pondola oku amamako loku lekisa ombembua yetu eci tu vangula lomanu vana okuti ka va tu tambula ciwa kupange wetu woku kuanda?
15 Ndamupi tu pondola oku amamako lombembua yetu ndaño vocikanjo ka va tu tambuluile ciwa? Yesu wa popia hati: “Nda onjo yaco ka ya sungulukile, ombembua yi tiukila kokuene.” (Mateo 10:13) Vesapulo lia Luka liatiamẽla koku tuma 70 kolondonge, mua kongela olondaka via Yesu eci a popia hati: “Nda u o kasimo o sole ombembua, ombembua yene yi kala laye, puãi nda ka yi sole yi [tiukila] kokuene.” (Luka 10:6) Eci tu enda koku sapuila komanu olondaka viwa, tu vangula lavo lesanju liocili, kuenda oku lekisa onjongole yocili kokuavo. Etambululo limue ka lia sungulukile, ale ondaka yimue yi sumuisa yeciwa lomunu tu kasi oku vangula laye, yecelela okuti esapulo lietu liombembua li ‘tiukila kokuetu.’ Pole, la cimue pokati kovina viaco evi ci tepulula ombembua yetu, okuti oyo epako liespiritu sandu lia Yehova.—Va Galatia 5:22, 23.
Ocimãho Cimue Ciwa Kolondingupange Via Litumbika Kupange Wokungula
16, 17. (a) Cipi hẽ ocimãho cetu poku linga apasu? (b) Ndamupi tu pondola oku kuatisa omanu vana va kuete apulilo alua atiamẽla Kembimbiliya?
16 Etu tulondingupange viokungula, tu sanjuka calua omo tu kuete onepa kupange woku ongolola omanu oco va kuate omuenyo wenda ño hu. Handi, tu kuata vali esanju lialua, eci omunu tua kundila a tava lonjongole yocili, kuenda a lekisa onjongole yoku lilongisa vali, okuti noke ‘o sola ombembua’! Ci tava okuti, pamue eye o kuata apulilo alua Embimbiliya, kuenje ka tu mõli epuluvi lioku eca atambululo osi veteke limosi. Omo okuti, ka ca sungulukile oku kala otembo yalua kepasu liatete, nye hẽ tu pondola oku linga? Tu pondola oku kuata ocimaho nda cina ca tumbikiwile kanyamo 60 apito konyima.
17 “Olombangi via Yehova Viosi vi kuete oku lipongiya ciwa oco vi songole alilongiso Embimbiliya.” Esapulo eli li sangiwa vokalivulu katatu kelivulu lia tukuiwa hati Estudo Modelo, lia sandekiwa okupisa kunyamo wo 1937 toke wo 1941. Okalivulu kaco kamisako vali loku popia hati: “Akundi vosi [Vusoma] va sukila oku kuata onjongole yocili koku kuama olonjila viñi viñi kupange woku kunda oco va kuatise vana va lekisa ombili yocili kondaka Yusoma. Omanu vaco ava te va [pasuisiwa] loku tambulula apulilo avo añi añi, . . . kuenda oku fetika lavo alilongiso Embimbiliya . . . lonjanga yalua.” Ocili okuti, ocimãho cetu koku pasuisa omanu, oku fetika oku lilongisa lavo Embimbiliya kolonjo viaco. Oku lekisa ukamba locisola, komanu vana va lekisa onjongole, ci tu vetiya oku lipongiya ciwa oco tuka linga lavo elilongiso Liembimbiliya okuti liendisiwa muẽle ciwa.
18. Ndamupi tu pondola oku kuatisa ava va fetika ndopo oku lilongisa Embimbiliya oco va linge olondonge via Yesu Kristu?
18 Lekuatiso Lielivulu Ukulihiso Utuala Komuenyo Ko Pui, kuenda ombrochura, Suku Oyongola Nye Kokuetu?, ci tava oku lingila kolonjo viomanu elilongiso Liembimbiliya, kuenda tu pondolavo oku kuatisa vana va fetika ndopo oku lilongisa oco va linge olondonge. Osimbu tu amamako loku sanda oku kuama ongangu ya Yesu Kristu, Ulongisi Wavelapo, omunu tu lilongisa laye Embimbiliya, oka kuamavo ovituwa vietu ndeci, ombembua, esanju, esunguluko lietu, kuenda esumbilo tu kuetele ovihandeleko via velapo via Yehova, vina vi tu songuila. Eci tu kuatisa umue oku tambulula apulilo aye, tu likolisiliko oku u longisavo ndomo eye a pondola oku tambulula apulilo ana a lingiwa lomanu vakuavo. (2 Timoteo 2:1, 2; 1 Petulu 2:21) Ocili okuti, etu tuakuopange wokungula, tu sanjuka calua omo lietendelo limue lia soka 4.766.631 kalilongiso Embimbiliya aendisiwa lomanu kolonjo viavo, voluali luosi vokuenda kupange wunyamo wa pita. Tuka kuata vali esanju lia piãla nda tua kongeliwavo kolondingupange via litumbika kupange wokungula, okuti vi kuete onepa kupange woku endisa alilongiso Embimbiliya.
Tu Amamiko Loku Sanjukila Upange Wokungula
19. Momo lie kua kalela esunga lioku sanjuka vokuenda kupange wa Yesu wokungula, kuenda noke yaco?
19 Kua kala esunga lioku kuata esanju lia piãla kupange wokungula eci Yesu a kala palo posi, kuenda noke yaco. Omanu valua okuti veya oku tava muẽle kolondaka viwa. Esanju lieya oku livokiya vali calua keteke lio Pendekoste yunyamo wa 33 K.K., omo okuti, ci soka 3.0000 komanu va tava kolondaka via Petulu, kuenje va tambula espiritu sanda lia Yehova, noke va linga ofeka ya Isareli ya Suku kespiritu. Ocili okuti, etendelo liavo lieya oku livokiya vali calua, kuenda veya oku kuata vali esanju lia piãla, eci “Ñala [Yehova] a vokiya kongongela yaco ava va [kala loku] popeliwa.”—Ovilinga 2:37–41, 46, 47; Va Galatia 6:16; 1 Petulu 2:9.
20. Nye ci tu nenela vali esanju lia piãla kupange wetu wokungula?
20 Kotembo yaco yina, ocitumasuku ca Isaya ca tẽlisiwile muẽle: “Ove [a Yehova] wa luisa omanu, haive wa luisa esanju liavo. Va ku sanjukila ndeci va sanjukila okungula, pamue ndeci alume va sanjukila oku liamuila evi via pundiwa.” (Isaya 9:3) Ndaño okuti cilo tu lete okuti, etendelo liolombuavekua lia tẽlisiwa ale, esanju lietu li livokiya vali calua poku mõla ndomo etendelo liava va litumbika kupange wokungula li kasi oku livokiya calua, unyamo lunyamo.—Osamo 4:7; Sakariya 8:23; Yoano 10:16.
21. Nye tuka lilongisa kocipama cikuãimo?
21 Ocili okuti, etu tu kuete esunga lialua lioku amamako loku lekisa esanju kupange wetu wokungula. Ondaka tu kasi loku kunda yelavoko, oku sandiliya kuetu omanu va lekisa onjongole, kuenda oku lekisa kuetu ocituwa combembua, ovina viaco evi ovio vi tu nenela esanju lia piãla kupange wetu wokungula. Omo liaco, cosi eci ci tu pongiya oco tu tẽle oku tambulula omanu vana ka va tava kondaka tu kasi loku kunda, kuenda ava ka va yongola oku tu yevelela. Upostolo Yoano wa pitavo lovitangi viaco. Eye wa kapiwile vokayike kocifuka co Patmo, omo lioku kunda ‘ondaka ya Suku, kuenda omo a imbila Yesu uvangi.’ (Esituluilo 1:9) Oco hẽ, ndamupi tu pondola oku amamako loku lekisa esanju lietu eci tu suvukiwa? Nye cika tu kuatisa oku oku pandikisa katambululo ãvi a tunda komanu valua tu kundila? Ocipama cetu cikuãimo, cika tambulula apulilo a–a lekuatiso Liembimbiliya.
O Tambulula hẽ Ndati?
• Upange upi wa sokisiwa lokungula?
• Ondaka yipi etu tua siata oku kunda?
• Momo lie upange wetu woku sandiliya omanu oco va linge olondonge u kasilili loku endela ciwa?
• Ndamupi tu pondola oku amamako loku lekisa ombembua kupange wetu wokungula?
• Momo lie tu sesamẽla oku lekisa esanju kupange wetu wokungula?
[Alitalatu kamela 10, 11]
Upange woku kunda wa lingiwa kocita catete, kuenda kocita 20
[Elitalatu kemela 11]
Ndeci upostolo Paulu a linga, olondingupange via litumbika cilo kupange wokungula, vi likolisilako loku kundila omanu kolonepa viosi
[Elitalatu kemela 11]
Tu kundi Olondaka viwa lesanju liocili