Tu Amamiko Kupange Wetu Wokungula!
“Ava va kula lasuẽlela vangula lonjolela.”—OSAMO 126:5.
1. Momo lie oku “ping[a] ku Cime cokungula oco a tume olondingupange kokungula kuaye,” ku kuetele esilivilo liocili koloneke vilo?
ECI Yesu Kristu a kundila onjanja yatatu ko Galilea, wa sapuila olondonge viaye hati: “Okungula kua lua puãi olondingupange viñamiñami.” (Mateo 9:37) Ondaka yaco eyi haiyo a vanguile ale eci a kala ko Yudea. (Luka10:2) Omo okuti, tunde apa olondaka viaco via popiwa pa pita ale ci soka 2.000 kanyamo, anga hẽ vi kapiwakovo oloneke vilo? Ocili okuti, vokuenda kunyamo wupange wa pita, ci pitahãla 6.000.000.000 komanu va sangiwa voluali luosi, okuti vana pokati komanu vaco “va pekengua kuenda va sakalaisua ndolomeme ka vi kuete ungombo.” Omo liaco, evetiyo lia Yesu lioku linga hati, “pingi ku Cime cokungula oco a tume olondingupange kokungula kuaye,” li kuetevo esilivilo koloneke vilo, ndeci lia kuata ale esilivilo kanyamo a pita.—Mateo 9:36, 38.
2. Nye ca siata oku tu lingisa okuti tu komohiwa lomanu vosi?
2 Yehova Suku, Cime cokungula, wa siata oku tambulula epingilo lioku tuma vali olondingupange kokungula kuaye. Hesanjukuolio ci tu nenela oku kuata onepa kupange waco owu wokungula u kasi loku songuiwa la Suku! Ndaño okuti, etendelo lietu ka lialuile oku li sokisa lomanu vakualofeka, ombili yetu yoku kuata onepa kupange woku kunda Usoma loku longisa omanu oco va linge olondonge, ya siata oku komohiwa loluali luosi. Kolofeka vialua okuti, tua siata oku tukuiwa olonjanja vialua vasapulo. Vo televisão mua siata oku lekisiwa asapulo alua a lombolola hati, Olombangi via Yehova vi kasi loku enda enda kolonjo viomanu. Ocili okuti, etu Tuakristão tua kulihiwa calua kulo kocita ca 21, omo lioku litumbika kuetu kupange wokungula.
3. (a) Tua kuliha ndati okuti, upange woku kunda Usoma, kocita catete wa kulihiwile calua? (b) Momo lie tu popela tuti, ovangelo va kasi loku tu kuatisa kupange wetu woku kunda?
3 Omanu va limbukilevo upange woku kunda Usoma wa lingiwa kocita catete, upostolo Paulu wa soneha hati: “Etu tuvapostolo Suku wa tu kapa kefulilo liendo ndava va pisiwila okufa, momo tua linga etalula kovaso oluali kuenda kovaso ovangelo lo kovaso omanu.” (1 Va Korindo 4:9) Cimuamue haico koloneke vilo, oku pandikisa kuete kupange woku kunda Usoma, ndaño loku suvukiwa, ku koka okuti tu kulihiwa lomanu kuenda kukuetevo esilivilo kovangelo. Kelivulu Liesituluilo 14:6, upostolo Yoano wa popia hati: “nda mola ungelo ukuavo. Wa kala loku palala vokati kilu. Wambata esapulo liwa liotembo ka yi pui oku sapula komanu va tunga kilu lieve, lo kolofeka viosi, lo kapata osi, lo ku vakualimi añi añi osi, lo komanu vosi.” Ocili okuti, tu kasi oku kuatisiwa lovangelo kupange wetu woku kunda okuti, upange umue wokungula.—Va Heveru 1:13, 14.
‘Oku Suvukiwa’
4, 5. (a) Elungulo lipi Yesu a ecele kolondonge viaye? (b) Momo lie olondingupange via Suku koloneke vilo vikasilili loku ‘suvukiwila’?
4 Eci ovapostolo va Yesu va tumiwa kupange wokungula, ovo va pokuile kelungulo liaye ‘lioku lunguka ndolonyoha, loku unjuka ndolopomba.’ Yesu wa vokiyako hati: “Lunguki lomanu momo vo [pakuili] kakanga kuenje vo [tipuili] volosunangonga viavo. Oco vu nanañainyailua kovaso olombiali lolosoma oku njimbila uvangi kokuavo kuenda ku vakualofeka. . . . Vu[ka suvukiwa] onduko yange lomanu vosi, puãi u o pandikisa toke kefulilo eye o[ka] popeliwa.”—Mateo 10:16–22.
5 Koloneke vilo, tu kasi loku ‘suvukiwila’ omo okuti, ‘oluali luosi lu kasi povaka’ a Satana Eliapu, una okuti eye unyãli wa velapo wa Suku kuenda womanu Vaye. (1 Yoano 5:19) Ovanyãli vetu va lete oku amako kupange wetu kespiritu, pole ka va tava okuti u kasi loku endisiwa la Yehova. Ovanyãli va lete elau lietu kuenda esanju li molehẽla kovipala vietu, osimbu tu amamako lupange wokungula. Ovo va komõha calua ongongela yi kasi pokati ketu. Ocili okuti, ndaño ovo va suma suma, va limbuka muẽle okuti tu likuete ocimunga, ndaño ceci va enda kolofeka vikuavo, va sanga okuti olombangi via Yehova vi kasi loku linga upange umuamue ndowu wu kasi loku lingiwila kofeka yavo. Ocili muẽle, etu tua kuliha okuti, votembo ya sokiyiwa ya Yehova, ovanyãli vetu vaka limbukiwa ciwa oku ku tunda ekuatiso lietu, kuenda ono yongongela yetu.—Esekiele 38:10–12, 23.
6. Ekolelo lipi lia suapo tu kuete, osimbu tu amamako lupange wokungula, pole apulilo api a lingiwa?
6 Cime cokungula wa eca Komõlaye Yesu Kristu ‘uviali wosi wokilu lowu wa palo posi.’ (Mateo 28:18) Omo liaco, Yehova wa eca ku Yesu Ocikele coku songola upange wokungula lekuatiso liovangelo vokilu, kuenda “ukuenje wa kolelua haeye wa lunguka,” palo posi. (Mateo 24:45–47; Esituluilo 14:6, 7) Oco hẽ, tu pondola ndati oku litunda ciwa kuyaki ovanyãli vetu va siata oku tu lingila okuti handi lopo tu tuihinya lesanju osimbu tu amamako lupange wokungula?
7. Ocituwa cipi tu sukila oku likolisilako oku lekisa, eci tu suvukiwa lovanyãli vetu?
7 Eci tu liyaka loku suvukiwa, tu sandiliyi ekuatiso lia Yehova, oco tu kuate ocituwa ndeci upostolo Paulu a kuata. Eye wa soneha hati: “Eci va tu imbula tu va likutilila. Eci va tu talisa ohali tu pandikisa. Eci va tu siliñinya tu livondela.” (1 Va Korindo 4:12, 13) Ocituwa caco eci coku sunguluka kupange wetu woku kunda, olonjanja vimue ca siata oku pongolola ovituwa viovanyãli vetu.
8. Ekoliso lipi ove upa kolondaka via Yesu vi sangiwa kelivulu lia Mateo 10:28?
8 Ndaño muẽle tu suvukiwa toke kolofa, ombili yetu kupange wokungula ka yi tepuluka. Lutõi wocili, tu amamako loku sandeka ondaka Yusoma lelisanjo. Kuenda tu kolela muẽle kolondaka via Yesu wa popia hati: “Ko ka kuateli usumba ava va ipa etimba puãi ka tẽla oku nyõla pe omuenyo okuti ka kuata vali elavoko liepinduko.” (Mateo 10:28, NW) Etu tua kuliha okuti, Isietu wokilu eye Ukuakueca omuenyo. Eye eca onima ku vosi vana va tuihinya loku kolela kokuaye, okuti vamamako lupange wokungula.
Esapulo Limue li Popela Ovimuenyo
9. Ndamupi vamue kosimbu va tendele Olondaka via Esekiele, kuenda Ndamupi ocituwa caco ci kasi loku pitavo koloneke vilo?
9 Eci uprofeto Esekiele a tumiwa oku kunda lutõi wocili ondaka ya Yehova ‘kovisuanji,’ okuti olosoma vio ko Isareli kuenda vio ko Yudea, vamue pokati kavo, va lekisile onjongole yoku yevelele eci eye a yonguile oku popia. (Esekiele 2:3) Yehova wa popia hati: “Tala, ove kokuavo wa linga ndu imbaimba ovisungo via posoka lelaka liwa, haive o sika ciwa ocisikilo.” (Esekiele 33:32) Ndaño okuti va solele olondaka via Esekiele, haimo ka va vi kuamele. Nye hẽ ci kasi loku pitavo koloneke vilo? Eci olombuavekua via supapo kumue lakamba vavo va kunda lutõi wocili ondaka ya Yehova, omanu vamue va siata oku sola oku yevelela eci catiamẽla kasumuluho aka neniwa Lusoma, pole ka va tava kondaka va kongeliwe kupange wokungula.
10, 11. Vokuenda kuocita ca 20, nye ca lingiwa koku sapula ondaka yi yovola ovimuenyo viomanu, kuenda nye ceyililako?
10 Pole, kuli omanu valua okuti, va siata oku tava ciwa kupange wokungula, kuenda va kasi loku kuata onepa kupange woku kunda ondaka ya Suku. Ndeci, vokuenda kuolohongele viofeka via Kristão via lingiwa okupisa kunyamo wo 1922 toke wo 1928, kua lomboluiwa muẽle ciwa eci catiamẽla kesombiso, lioluali lulo lua Satana lueviho. Asapulo aco esombiso, a lomboluiwa kolohongele, a yevalisiwilavo Volaliu. Noke, olondingupange via Suku, vieya oku eca kolohuluwa viomanu otuikanda tuasapulo aco.
11 Kesulilo liunyamo wo 1930, kua kuamiwile onjila yikuavo yoku imba uvangi okuti, akundi va limba kulala oku ñuañuala. Tete, omanu va Yehova va enda loku ambata povaka olopapelo vinene via nyanyumuiwa povaka mua sonehiwa ovolandu olohundo vi kuete osapi ya linga hati; “Religião é laço e Extorção, [Etavo Onjanjo Halio Lipunda,] kuenda yikuavo yiti: “Sirva a Deus e Cristo, o Rei [Vumba Suku la Kristu Osoma,].” Oku pita kuavo volokololo kua enda loku koka omanu vana ovo va enda loku sanga volokololo. Manji umue okuti olonjanja vialua wa kuata onepa kupange waco woku pita volokololo vio kofeka yo Londres ko Inglaterra, wa popia hati: ‘Oku pita Kuolombangi via Yehova volokololo kua ecelela okuti, omanu va kokiwila kokuavo.’
12. Kilu liesapulo liondaka ya Suku yesombiso, nye tua siata oku lingavo kupange wetu woku kunda, kuenda velie cilo va likongelavo kupange woku kunda olondaka viwa?
12 Osimbu tu amamako loku kunda ondaka ya Suku yesombiso, tu kuetevo oku sapula komanu eci catiamẽla kolohuminyo viasumuluho aka neniwa Lusoma. Uvangi wetu tu eca lutõi wocili koluali, u tu kuatisa oco tu amameko koku sandiliya omanu vana va lekisa onjongole. (Mateo 10:11) Onepa yalua ya vamanji olombuavekua va tava muẽle kelaleko lioku kuata onepa kupange wokungula lia lingiwa okupisa kunyamo wo 1920 toke wo 1930. Noke, kohongele yofeka ya lingiwa kunyamo wo 1935, kua yevalisiwa esapulo li komohisa ‘liowiñi wakahandangala,’ okuti haivo ‘olomeme vikuavo’ vika kala vofeka yelau palo posi. (Esituluilo 7:9; Yoano 10:16) Ovo va siata oku kapako ondaka ya Suku yesombiso, kuenje, kumue lolombuavekua, va siata oku kundila kumuamue olondaka viwa vi yovola ovimuenyo viomanu.
13, 14. (a) Elembeleko lipi li tunda kolondaka Viosamo 126:5, 6? (b) Nda okuti tu amamako loku kula kuenda loku tapela, nye cikeyililako?
13 Olondaka vi sangiwa Kosamo 126:5, 6, vieca ekoliso liocili kuava vakuete onepa kupange wokungula, capiãla enene ku vana via siata oku lambalaliwa. Ovio vi popia hati: “Ava va kula lasuẽlela vongule lonjolela. U enda kepia lokahumba kombuto loku lila o tiuka lonjolela lovitungu viaye.” Olondaka viukualosamo viatiamẽla koku kula lokungula, vi lekisa ndomo Yehova a sumuluisa omanu vana va supile kumandekua ko Bavulono yosimbu, kuenje va tiukile vali kofeka yavo. Eci ovo va tunda kumandekua, va sanjukile calua, pole, ci tava okuti valila omo lioku kula ombuto valunda ana okuti mua pita eci ci soka 70 kanyamo ka mua la limiwa. Pole, vosi vana vamaleko loku kula kuavo kumue loku tunga olonjo, veya oku sanjuka calua omo upange wavo ka wa lingile wolivova.
14 Ci tava okuti, tu lola asuẽlela eci tu liyaka lovitangi, ale nda pamue vamanjetu va talisiwa ohali omo liesunga. (1 Petulu 3:14) Kupange wetu wokungula, tu pondola okusumua omo okuti, ka tu lete epako lalimue li kasi loku tunda koku likolisilako kuetu kupange woku kunda. Pole, nda tu amamako loku kula kuenda oku tapela ovava, Suku oka lingisa okuti ku imila apako amue a pitãhala eci tua lavokaile ovikula okuti ka vi sokisiwa leci tua simile. (1 Va Korindo 3:6) Eci cimuiwila vali ciwa kapako a siata oku tunda kupange wetu woku ava Ambimbiliya kuenda alivulu a situlula eci ci kasi Vembimbiliya.
15. Lombolola ulandu u lekisa esilivilo lioku eca alivulu Akristão kupange wokungula.
15 Kulihisa ulandu wulume umue o tekuiwa hati, Jim. Eci inaye a fa, pokati kovikuata viaye wa sangapo elivulu, A Vida—Qual a Sua Origem? A Evolução ou a Criação?a Eye wa tanga elivulu liaco lonjongole yocili. Eci yimue Ombangi ya Yehova ya vangula la Jim vokololo, eye wa tava oku u pasuisa, kuenje ceya oku sulila velilongiso Liembimbiliya. Jim wamamako lonjanga yalua kespiritu, noke wa litumbika ku Yehova, kuenje wa papatisiwa. Eye wa sapuilakovo vakuepata liaye eci a kala loku lilongisa. Noke, eci ceyililako ceci okuti, vamanjaye vavali veyavo oku linga Olombangi via Yehova, kuenda noke Jim weya oku kuata esumuluho lioku litumbika kupange wotembo yosi Kombetele yo ko Londres.
Ndaño Loku Suvukiwa, Handi Lopo va Sanjuka
16. (a) Momo lie upange wetu wokungula wa siatela oku endela ciwa? (b) Elungulo lipi Yesu a eca liatiamẽla kueci ciyilila komunu oku tava kolondaka viwa, pole ndamupi tu pondola oku amẽla komanu oco tu vangule lavo?
16 Momo lie upange wokungula u kasilili loku endela ndoco ciwa? Momo okuti, Akristão olombuavekua kumue lakamba vavo, va siata oku kuama lutate olonumbi via Yesu, wa popia hati: “Eci ndu . . . sapuili vowelema ci popeli vutanya, leci coloñuilui ci kalukili kilu liolonjo.” (Mateo 10:27) Pole, tu kevelela ohali ndomo Yesu a lungula hati: “Omunu o[ka] pakuila manjaye kokufa, isia o[ka] pakula omõlaye, omãla va[ka] katukila olonjali viavo ha va vi ipaisa.” Yesu wamisako vali hati: “Ko ka soki hoti, Weya oku nena ombembua kilu lieve. Sieyilile oku nena ombembua, te oku imba osipanta.” (Mateo 10:21, 34) Olondaka evi, Yesu ka vi popelele oco a tepe apata locipango. Pole, oku kundiwa kuolondaka viwa kua siata oku eca apako awa. Cimuamue haico ci kasi loku pita koloneke vilo lolondingupange via Suku. Eci tu pasuisa apata, onjongole yetu yeyi yokuti, omanu vosi vepata va tava kolondaka viwa. Omo liaco, tu seteka oku ame?la ku vosi vakuepata lumbombe, kuenda lesanju kuenje, cika ecelela okuti, esapulo lietu li koka vana “va noliwila [oku kuata] omuenyo ko pui.”—Ovilinga 13:48.
17. Ndamupi esapulo Liusoma lia siata oku tepisa vana va kasi loku teyuila usoma wa velapo wa Suku, kuenda ulandu upi u lombolola eci catiamẽla kondaka eyi?
17 Ondaka Yusoma yi kasi loku tepisa vana va kasi loku teyuila Usoma wa velapo wa Suku. Ndeci, konomuisa ndomo vakuetu tu fendelela lavo kumuamue va lekisa ocituwa ca litepa, omo va siatele oku feta ku ‘Kaisare ovina via Kaisare, pole ku Suku ovina via Suku’ koloneke vio Nacional Socialismo ko Alemanya. (Luka 20:25) Calitepa lasongui vakuatavo kuenda la vana va litukula hati, Akristão va kuete ukamba la vakuetavo Liakristão Vesanda, olondingupange via Yehova vi kuete utõi wocili, kuenda ka vi yongola oku tomba olonumbi Viembimbiliya. (Isaya 2:4; Marko 4:10; Yoano 17:16) Ulongisi umue ukãi ukuasapulo o tukuiwa hati Christine King, usonehi welivulu li tukuiwa okuti, (Ceci Cika Pita Luviali wo Nazismo Kuenda Atavo Okaliye), O Destino Nazista e As Religiões Mais Novas, wa popia hati: “Ndaño okuti kua pondiwa olohuluwa Violombangi via Yehova, cosi ombiali yo [Nazismo] ya yonguile oku linga, ka cowendele ciwa. Upange Wolombangi via Yehova wa kala loku amamako, kuenje kosãi ya Kupemba yunyamo wo 1945, ovio handi via kala, osimbu okuti, uviali waco wo Nacional Socialismo, ka wa kaleleko vali.”
18. Ocituwa omanu va Yehova va siata oku lekisa ndaño lelambalalo?
18 Omanu va Yehova va siata oku lekisa ocituwa cimue ci komohisa eci va liyaka lelambalalo. Ndaño okuti pamue olombiali vi komõha calua ekolelo lietu, eci ovio vi komohẽla vali enene ceci okuti, etu ka tu temi kuenda ka tu kala locikumbiti kutima. Ndeci, Olombangi via Yehova via puluka Kumondi wa pita ko Alemanha, olonjanja vialua okuti, vi lekisa esanju lia piãla eci vivaluka eci va siata oku pita laco. Ovo va kuliha okuti Yehova wa va iha “unene wa piãla.” (2 Va Korindo 4:7) Olombuavekua vi kasi pokati ketu, vi kuete ekolelo lia suapo liokuti, ‘olonduko viavo via sonehiwa kilu.’ (Luka 10:20) Kepandi liavo ku imila elavoko limue okuti ka li sumuisa, kuenda ekolelo liolondingupange via litumbika lombili yocili kupange wokungula, vina okuti elavoko liavo okukala palo posi, vi kuetevo ekolelo limuamue.—Va Roma 5:4, 5.
Pandikisa Kupange Wokungula
19. Ovoloño api a sunguluka Akristão va siata oku kuama kupange woku kunda?
19 Ka tua kulihile otembo ya kambaka Yehova aka ecelela handi kupange wokungula. Osimbu handi kuli otembo, tu kuete oku kuliha okuti, vakuopange wokungula vakuete ovoloño va siata oku kuama koku linga upange wavo. Kuendavo, tu kuete oku kolela okuti, nda tua kuama ovoloño añi añi atiamẽla kupange woku kunda ana okuti a setekiwa ale, ocili okuti tuka tambula asumuluho. Upostolo Paulu wa sapuila kakamba vaye Akristão hati: “Ndu peyeli okuti u setukuli ame.” (1 Va Korindo 4:16) Eci upostolo Paulu a lisanga lakulu vekongelo voko Efeso kimbo lio Miletu, wa va ivaluisa hati, eye ka kuatele owesi woku va longisa ‘volokololo lo volonjo.’ (Ovilinga 20:20, 21) Timoteo ekamba liupostolo Paulu, wa lilongisa olonjila ovapostolo va kuamaile, kuenje havio a kuama poku kuatisa va Korindo. (1 Va Korindo 4:17) Suku wa sumuluisa ovoloño vupostolo Paulu voku longisa, kuenje eye oka sumuluisavo epandi lietu tu kasi loku lekisa ndeci, kupange woku kunda olondaka viwa vonjo lanjo, koku linga apasu, koku linga alilongiso Embimbiliya, kuenda koku kundila omanu kolonepa viosi va sangiwa.—Ovilinga 17:17.
20. Ndamupi Yesu a lekisa okuti, upange walua wokungula konepa yespiritu wa kala povaka olondonge viaye, kuenda eci ca siata oku muiwa ndati vokuenda kuanyamo a pita ndopo?
20 Eci Yesu a mãla oku kundila ukãi umue woko Samaria ocipepi limbo lio Sukare kunyamo wa 30 K.K., eye wa popia weci catiamẽla kupange wokungula konepa yespiritu. Eye wa sapuila olondonge viaye hati: “Petuli ovaso ene. Vanji kovapia okuti a yelela ale oku ungula. U ungula o tambula ofeto, kuenje ungula epako liokomuenyo ko pui. Oco u imba ombuto, lu ungula, va yolelela kumuamue.” (Yoano 4:34–36) Ci mõleha soketi, Yesu wa limbukile ale eci nda ceya oku iyilila koku lisanga kuaye lukãi woko Samaria, momo valua veya oku kolela kokuaye omo lieci ukãi a popia catiamẽla ku Yesu. (Yoano 4:39) Vanyamo a pita ndopo, kolofeka vialua olombiali via siata oku ecelela Olombangi via Yehova oco vi kunde lelisanjo, kuenje, eci ca siata oku yulula ovapia okaliye vokungula. Kuenje eci ca siata oku sulila voku amamako kupange wespiritu wokungula. Ocili okuti, voluali luosi, tu kasi oku kuata asumuluho a komohisa osimbu tu amamako loku litumbika kupange wespiritu wokungula.
21 Momo lie tu kuetele esunga lioku amamako lupange wokungula?
21 Eci ovikulia vi yela, olondingupange vi sakalala lokungula lonjanga ovaima aco. Upange waco te va u linga muẽle lonjanga. Koloneke vilo, tu sukila oku talavaya lonjanga yalua, momo tu kasi “kotembo yesulilo.” (Daniele 12:4) Ocili okuti, tu sanga ovitangi, pole, kuli okungula kumue kua velapo ku kasi loku lingiwa lafendeli va Yehova okuti oku kua lingiwa kosimbu ku sule. (Isaya 9:3) Omo okuti, tulondingupange via sanjuka, tu amamiko lupange wokungula!
[Etosi pombuelo yemela]
a Lia sandekiwa Lolombangi via Yehova.
O Tambulula hẽ Ndati?
• Ndamupi Cime cokungula a tambulula epingilo lioku tuma vali olondingupange kupange wokungula?
• Ndaño okuti ‘tu suvukiwa,’ ocituwa cipi tu kuetele oku amamako loku lekisa?
• Momo lie tu sanjukila ndaño loku lambalaliwa?
• Momo lie tu kuetele oku pandikisa kupange wokungula locisimilo conjanga?
[Elitalatu kemela 15]
Oku pita kua vamanji volokololo kua enda loku kokela omanu kesapulo Liusoma
[Elitalatu kemela 15]
Etu tu kula, kuenda tu tapela, pole Suku eye o kulisa
[Alitalatu kemela 17]
Vosi va litumbika kupange wespiritu wokungula va kasi loku kuatisiwa lovangelo