Ndamupi o Tẽla Oku Kuatisa Umue ‘Omõla Ocisandui’?
“Yolela momo u . . . wa nyelile, yu wa sangiwa.”−LUKA 15:32.
1, 2. (a) Ndamupi amalẽhe vamue va siata oku linga kueci catiamẽla kocili Cukristão? (b) Ndamupi olonjali kuenda omãla va pita lovitangi viaco va siata oku liyeva?
“OCILI ndi ci siapo!” Hesumuokuolio ci nena kolonjali via sumba Suku, via siata oku likolisilako calua oku longisa omãla vavo oco vaendele vonjila Yukristão, oku yeve olondaka evi vomẽla womõla wavo! Amalẽhe vamue, eci va ‘siapo’ ocili, lacimue va vangula catiamẽla kocisimilo cavo. (Va Heveru 2:1) Valua amalẽhe vaco, va kasi ndomõla ocisandui wa tukuiwa volusapo lua Yesu, okuti wa tunda konjo ya isiaye, kuenje, wa enda kofeka yimue kupãla oku a sanduila ovipako viaye.−Luka 15:11–16.
2 Ndaño okuti onepa yalua Yolombangi via Yehova, ka via siatele oku kuata ovitangi viaco, kuava va siata oku liyaka lovitangi viaco, kakuli ondaka layimue yelembeleko okuti yi tẽla oku malako muẽle pe esumuo liavo. Cimue ka ci tẽliwavo oku ivaliwa, olohali omõla wa sina a pita lavio. Vutima waye, ci tava okuti ovisimilo viaye viu pisa. Volusapo lua Yesu, omõla ocisandui, noke eci vutue waye “mueya olondunge,” wa sanjuisa calua isiaye. Ndamupi olonjali la vakuavo vekongelo va pondola oku kuatisa omõla ocisandui oco vutue waye ‘muiye olondunge’?−Luka 15:17.
Esunga Lieci Omãla Vamue va Siatela Oku Nõlelapo Oku Siapo Ocili
3. Momo lie amalẽhe vamue va siatela oku nõlapo oku siapo ekongelo Liakristão?
3 Kuli olohulukãi vialua viamalẽhe okuti, va sanjuka calua oku vumba Yehova vekongelo Liakristão. Oco hẽ momo lie amalẽhe vamue va siatela oku nõlelapo oku siapo ocili? Ovo va siata oku sima hati, mbi va kasi loku pumba ocina cimue ciwa ci kasi loku eciwa loluali. (2 Timoteo 4:10) Ci tava okuti ovo pamue va sima okuti, eteyuilo lio vocunda ca Yehova lia tila calua. Ovisimilo vi pisa omo lioku linga ekandu, onjongole yalua yatiamẽla koku namulãla lakamba vãvi, ovina viaco evi vi pondola la, ale pamue onjongole yoku tavioku vetiya amalẽhe oco va tunde vocunda ca Yehova. Umalẽhe umue pamue,ci tava okuti o vumba ño Suku oco ka ka muiwe ndukuavituwa vivi lolonjali viaye, ale pamue Lakristão vakuavo.
4. Nye ca siata oku linga okuti amãla vamue va yapuka vocili?
4 Nda omõla o fetika oku sina loku lekisa ovituwa vimue vivi, eci ci lekisa okuti o kasi loku hongua kespiritu, kuenda ca leluka oku limbuka eci ci kasi vutima waye. (Olosapo 15:13; Mateo 12:34) Ndaño okuti, omõla wa yapuiwa omo liocina cimue civi, pamue ocituwa caco o kasi laco ale tunde osimbu, momo ka kuatele ‘ukulihiso wocili.’ (2 Timoteo 3:7) Ka ca sungulukile okuti omõla o fendela ño Yehova omo lionjongole yimue ka yi tundi kutima waye, pole, ca velapo ceci okuti, o lekisa ukamba wocili la Yehova. Nye hẽ ci pondola oku va kuatisa?
Amẽla ku Suku
5. Nye ca velapo oco amalẽhe va kuate ukamba wocili la Suku?
5 Ondonge Tiago wa soneha hati: “Ameli ku Suku kuenje eye amela[vo] kokuene.” (Tiago 4:8) Oco eci ci lingiwe, umalẽhe o sukila oku kuatisiwa oco a lekise onjongole Kondaka ya Suku. (Osamo 34:8) Tete, eye oka sukila “asenjele” valongiso Embimbiliya. Pole, osimbu eye amamako lokupa esilivilo Kondaka ya Suku, vokuenda kuotembo oka fetika oku maha “okulia kua kola” okuti o kuata elomboloko liocili kespiritu, kuenda oka linga ukulu wendamba kespiritu, kuenje eye ka yapukamo. (Va Heveru 5:11–14; Osamo 1:2) Umalẽhe umue okuti wa litumbikile muẽle calua kovituwa vivi violuali, wa popia hati, noke weya oku fetika oku sumbila calua ovina viespiritu. Nye hẽ co kuatisa oku siapo ovituwa viaco? Noke yoku u vetiya oco a tange Embimbiliya liosi, vokuenda kuotembo, weya oku fetika oku tanga Embimbiliya oloneke viosi. Ocili okuti, oku tanga Ondaka ya Suku eteke leteke ku kuatisa cocili, momo ku ecelela oku kuata ukamba wocili la Yehova.
6, 7. Ndamupi olonjali vi pondola oku kuatisa omãla vavo oco va sole Ondaka ya Suku?
6 Ciwa okuti, olonjali vi kuatisa omãla vavo oco va lekise onjongole Kondaka ya Suku. Ndaño okuti, va lingaile elilongiso liepata olonjanja viosi, omõla umue ufeko weya oku livala ukamba lolongangala. Kueci catiamẽla kelilongiso liavo, eye ivaluka hati: “Eci Isia a linga apulilo, atambululo aco ndeca ndi va tanga ño lonjanga pole si vanji kocipala caye.” Olonjali via lunguka ka vi tẽlisa lika ocipama celilongiso, pole vi kongelamovo uloño woku longisa. (2 Timoteo 4:2) Oco umalẽhe ope esilivilo kelilongiso liepata, o sukila oku yeva okuti wa kongeliwamovo. Ove unjali, nye ku lingila apulilo ana oku kulihisa ovisimilo viomõla wove oco o tale ndomo a tambulula volondaka viaye muẽle? Vetiya omõla oco ovipama vielilongiso a vi kapeko muẽle komuenyo waye.a
7 Handi vali, ecelela okuti elilongiso Liovisonehua li kala ombangulo yimue yi sanjuisa. Nda ci tava, pinga komãla oco va linge ondalama yovolandu amue Embimbiliya. Va kuatisa oco va kulihe ciwa ocitumãlo kuenda ovina viatiamẽla kofeka oku kua pita ovolandu aco a kasi oku lomboluiwa. Oku lekisa komãla olomapa kuenda olokuadru mu sangiwa olofeka viaco ci pondola oku va kuatisa. Loku kapako ovisimilo viaco evi, elilongiso liepata ci tava okuti, li lingiwa volonjila via litepa hailio li sanjuisa vali calua. Olonjali vi sukilavo oku konomuisa lutate ndomo ukamba wavo la Yehova u kasi. Osimbu vamamako lukamba wavo la Yehova, vaka tẽla oku kuatisavo omãla vavo.−Esinumuilo 6:5–7.
8. Ndamupi olohutililo vi pondola oku kuatisa umue oco a kuate ukamba wocili la Suku?
8 Ohutililoyi pondolavo oku kuatisa oco omunu a kale lukamba wocili la Suku. Omõla umue ufeko eci a kuata cimue ci soka 15: kanyamo, wa simile hati, pokati Kakristão ka pali laumue okuti o linga ekamba liaye, momo ka pa kalele umue o tava kovituwa viaye. (Tiago 4:4) Nye hẽ eya oku linga kueci catiamẽla kondaka eyi? Eye weya oku popia hati: “Tete nda likutilila ku Yehova kueci catiamẽla kovisimilo viange.” Noke, weya oku popia hati, olohutililo viaye, via tambuluiwa momo vekongelo Liakristão weya oku sangamo limue ekamba eye a kolela. Loku sima okuti Yehova wa kala loku u sanguila, noke wa fetika oku kuata ukamba wocili la Suku. Olonjali vi pondola oku kuatisa omãla vavo oco vi kale locituwa coku linga olohutililo vi tunda kovitima viavo. Eci olohutililo vi lingiwa vepata, olonjali vi kuete oku yulula ovitima viavo loku tukula ovitangi va kasi loku liyaka lavio kuenda ovisimilo viavo, oco omãla vavo va limbuke ukamba u kasi pokati kolonjali viavo la Yehova.
Kala Ukuepandi, Pole Kolapo Muẽle Ngõ
9, 10. Ongangu yipi Yehova a lekisa kueci catiamẽla koku linalisa la va Isareli va sina?
9 Eci omõla a fetika oku siapo ocili, tete o seteka oku kala ño lika liaye, kuenda ka yongola vali oku yevelela kelungulo liosi lieciwa lolonjali viaye liatiamẽla kovina viespiritu vo sapuila. Nda olonjali via sanga ocitangi caco, nye hẽ vi pondola oku linga? Ivaluka eci Yehova a linga la va Isareli yosimbu. Eye wa va yandulukile eci ci soka 900 kanyamo omo lioku “huka” kuavo. (Etundilo 34:9; 2 Asapulo 36:17–21; Va Roma 10:21) Ndaño okuti olonjanja viosi ovo va enda ‘loku nyika’ Yehova, lopo eye wa lekisile handi ‘ohenda’ kokuavo. “Olonjanja vialua wa likandangiya koku tema kuaye, ka wenguile onyeño yaye yosi.” (Osamo 78:38–42) Suku ka lueyele konepa layimue poku linalisa la va Isareli. Olonjali vi kuete ocisola, vi kuama ongangu ya Yehova, te vi kuata epandi lialua lomãla vavo nda okuti ka va pokola lonjanga kueci va longisiwa.
10 Oku likandangiya loku kuata epandi ka ku lomboloka okuti, omunu o sukila oku likala ovina viosi viatiamẽla kukamba. Yehova wa lekisa ongangu yiwa ndomo tu pondola oku likandangiya. Eye wa tuma tuma “olomunga viaye” olonjanja vialua. Yehova ‘wa kuatela ohenda omanu vaye,’ ndaño okuti “ovo va fuanguila olomunga via Suku, [kuenda] va sepula olondaka viaye.” (Yeremiya 36:15, 16) Eye wa vetiya va Isareli hati: “Omunu omunu a tinduke kolonjila viaye vivi.” Yeremiya 25:4, 5 Ocili okuti, Yehova ka lavisa ovihandeleko viaye via sunguluka. Va Isareli va longisiwa oco ‘vatiamẽle’ ku Suku, kuenda oco va pokole kolonumbi viaye.
11. Ndamupi olonjali vi pondola oku likandangiya, pole ndamupi vi nõlapo muẽle oku vetiya omãla vavo?
11 Olonjali vi pondola oku kuama ongangu ya Yehova koku likandangiya eci omõla wavo a yapukila vonjila ka ya sungulukile. Lelavoko liocili, ovo va pondola oku ecelela oco va sapele ciwa lomãla vavo. Osimbu olonjali viamamako loku pokola kolonumbi via sunguluka ci tava okuti, vi ‘vetiya’ omõla wavo oco a tiuke vali vocili.
Ceci Omõla Utito a Tundisiwa Vekongelo
12. Ocikele cipi olonjali vi kuete catiamẽla komõla utito va kasi laye konjo pole wa tundisiwa vekongelo?
12 Ci lingiwa hẽ ndati, nda omõla umue utito okuti o kasi handi lolonjali viaye, o likokela ovitangi vinene, kuenje noke o tundisiwa vekongelo omo lioku sina kuaye? Omo okuti, omõla o kasi handi lolonjali viaye, olonjali viaye vi kuete ocikele coku u longisa kuenda oku u pindisila Vondaka ya Suku. Ndamupi hẽ olonjali vi pondola oku ci linga?−Olosapo 6:20–22; 29:17.
13. Ndamupi olonjali vi pondola oku likolisilako loku totola kutima womõla wavo wa lueya?
13 Nda ci tava, ciwa okuti, oku longisa kuaco kuenda epindiso lieciwa poku lilongisa laye Embimbiliya pokolika. Ciwa okuti, onjali yi lavulula ovituwa viomõla loku seteka oku limbuka eci ci kasi kutima waye. Vipi hẽ ovina viaco vio honguisa kespiritu? (Olosapo 20:5) Locisola cocili ci tava hẽ oku limbuka eci ci kasi kutima waye? Olonumbi vipi hẽ via sunguluka ovio va pondola oku kuama? Upostolo Paulu wa tu likuminya hati: “Ondaka ya Suku yikasi lomuenyo, haiyo yikasi loku talavaya, kuenda yatua enene, okuti omoko yatua olonele vivali yisule. Ondaka yaco yi toma toke yitepa omuenyo letimba kuenda asokoluilo lupuma, haiyo yilimbuka ovisimilo locipango cutima.” (Va Heveru 4:12, NW) Ocili okuti, olonjali vi pondola oku linga cosi vi tẽla oku linga oco omãla vavo ka vaka kuate onepa koku linga eci civi. Olonjali, vi pondola oku seteka oku kuama onjila yimue yi tuala kuhayele wespiritu.
14. Nye hẽ omõla wa lueya a sukila oku linga tete oco a kuate vali ukamba wocili la Yehova, kuenda ndamupi olonjali vi pondola oku kuatisa omõla oco a kuame onjila yaco?
14 Umalẽhe wosi wa lueya o sukila oku pengulula ukamba waye la Yehova. Catete, ovo va sukila oku ‘likekembela akandu avo, oco va pongoloke.’ (Ovilinga 3:19; Isaya 55:6, 7) Oco omãla va kasi konjo va kuatisiwe, olonjali vi sukila oku ‘pandikisa loku longisa lumbombe’ oco okuti omõla wavo ka lingi vali ukualonamalãla. (2 Timoteo 2:24–26) Ovo va sesamẽla oku va “lungula” lekuatiso Liembimbiliya. Ondaka yo Helasi ya pongoluiwa hati, ‘oku “lungula,” ci tava oku yi pongoluisavo hati, ‘oku eca uvangi wa sunguluka.’ (Esituluilo 3:19: Yoano 16:8) Omo liaco, voku “lungula,” mua kongela oku lekisa uvangi wocili oco u vetiye omõla wa linga ekandu. Pole, ka ca lelukile oku ci linga. Puãi, olonjali vi pondola oku vetiya utima womõla wavo poku kuama olonjila via lua vi sangiwa Vembimbiliya oco va kuatise omõla wavo wa sina. Ovo va sukila oku seteka oku u kuatisa lepandi liocili, oco a ‘suvuke eviho, okuti o sola lika esunga.’ (Amosi 5:15) Ci tava okuti pamue, muiya olondunge kuenje o “puluka vonjanjo Yeliapu.”
15. Ndamupi ohutililo yi pondola oku kuatisa omõla wa lueya oco a kuate vali ukamba uwa la Yehova?
15 Olonjali visukila oku likutilila calua oco ku kale vali ukamba uwa la Yehova. Ocili okuti, lomue o kuete omoko yoku ‘likutililako’ umue okuti wa tundisiwa vekongelo Liakristão omo liekandu limue linene a linga okuti ka yongola oku likekembela. (1 Yoano 5:16, 17; Yeremiya 7:16–20; Va Heveru 10:26, 27) Pole, olonjali vi pondola oku pinga ekuatiso ku Yehova oco a va ihe uloño woku linalisa locitangi caco. (Tiago 1:5) Nda omõla wa tundisiwa vekongelo o lekisa uvangi woku likekembela, pole ka kuete ‘utõi woku ci linga kovaso a Suku,’ olonjali vi pondola oku u likutilililako loku pinga ku Suku okuti, nda wa sanga uvangi woku ecela oku lueya kuomõla, ocipango Caye ci lingiwe. (1 Yoano 3:21) Loku yevelela ohutililo eyi, ci tava okuti yi kuatisa omõla oco a limbuke Yehova nda Suku ukuahenda.b−Etundilo 34:6, 7; Tiago 5:16.
16. Ndamupi tu pondola oku kuatisa vakuepata va kuete omõla utito wa tundisiwa vekongelo?
16 Nda okuti omõla wa papatisiwa wa tundisiwa vekongelo, vamanji va kuete oku lunguka okuti ka ‘va li laye pamosi.’ (1 Va Korindo 5:11; 2 Yoano 10, 11) Eci ci pondola oku u kuatisa oco ‘a kuete olondunge,’ okuti noke o tambula vali ekuatiso vocunda ca Suku. (Luka 15:17) Nda o tiuka vocisoko ca Yehova ale sio, vamanji vekongelo, va pondola oku kolisa epata li kuete omõla wa tundisiwa vekongelo. Etu apuluvi osi tu pondola oku lekisa ‘ohenda, loku lekisa ocisola’ ku vakuepata liaye.−1 Petulu 3:8, 9.
Ndomo Omanu Vakuavo va Pondola Oku Kuatisa
17. Nye vamanji vekongelo va sukila oku ivaluka, eci va seteka oku kuatisa omõla umue o vela kespiritu?
17 Ci lingiwa hẽ ndati, nda omõla umue ka tundisiwile vekongelo Liakristão, pole wa hongua kekolelo? Upostolo Paulu wa soneha hati: “Nda ocimatamata cimosi ci tala ohali, ovimatamata viosi vi talela kumuamue laco ohali.” (1 Va Korindo 12:26) Vamanji vakuavo vekongelo, va pondolavo oku eca ekuatiso liavo komõla waco. Ocili okuti, ci sukila oku lunguka calua, momo omõla waco o vela kespiritu, o pondola oku yapula amalẽhe vakuavo. (Va Galatia 5:5–9) Vekongelo limue, akulu vamue va yonguile oku kuatisa amalẽhe vamue va honguele kespiritu, va laleka amalẽhe vaco oco va li kongele lavo okuti va yeveleko ovisikilo via siata calua la vakuavo. Ndaño okuti, amalẽhe va hongua kespiritu ca va sanjuisa kuenje va tava kelaleko liaco, ongangu yavo yivi yeya oku yapula vakuavo okuti noke veya muẽle oku liwekapo oku endaenda kolohongele viekongelo. (1 Va Korindo 15:33; Yuda 22, 23) Eci ci pondola oku kuatisa omõla o vela kespiritu, haku likongelako la vakuavo koku papala kuna okuti ka ku songuiwa lespiritu, pole, te ukamba una okuti u vetiya omõla oco a lekisa onjongole yocili kovina viespiritu.c
18. Ndamupi tu pondola oku kuama ongangu ya isia yomõla ocisandui wa tukuiwa volusapo lua Yesu?
18 Eci,omõla umue wa liwekelepo oku endaenda kolohongele, eya Vonjango Yusoma, ale pamue a enda kohongele yimbo, sokolola ño handi ndomo eye a liyevite. Anga hẽ ka tu u yolela nda isia yomõla ocisandui una wa tukuiwa volusapo lua Yesu? (Luka 15:18–20, 25–32) Umalẽhe umue okuti wa liwekelepo oku endaenda kolohongele viekongelo Viakristão, okuti noke wa endele kohongele yofeka, wa popia hati: “Nda kala locisimilo cokuti, lomue oka ndi yolela, pole, vamanji alume lakãi, vosi yavo va lupukila kokuange loku ndi yolela. Kuenda ca ndi vetiya calua.” Noke, eye wa fetika vali oku linga elilongiso Liembimbiliya, kuenje noke yotembo yimue weya oku papatisiwa.
Kuka Liwekepo
19, 20. Momo lie tu sukilila oku kuata ocisimilo ca sunguluka kueci catiamẽla komõla ocisandui?
19 Oku kuatisa omõla ‘ocisandui, oco a kuate vali olondunge,’ ci sukila epandi liocili, kuenda ci tava oku linga ocitangi cinene kolonjali kuenda komanu vakuavo. Pole, kuka liwekepo. “Ñala [Yehova] ka livala lohuminyo yaye ndeci vamue va tukula vati, O [kasi loku livala calua], puãi o pandikisa lene, momo ka yongola okuti umue o nyõleha, puãi o yongola okuti vosi va likekembela akandu avo.” (2 Petulu 3:9) Etu tua kolela muẽle eci Embimbiliya li tu sapuila hati, Yehova o yongola okuti, omanu vosi va likekembela oco va kuate omuenyo. Omo liaco, eye wa linga eliangiliyo oco omanu va linalise laye. (2 Va Korindo 5:18, 19) Epandi liaye, lia siata oku ecelela okuti, olohuluwa viomanu va kasi lokuiya ovo muẽle kokuaye.−Isaya 2:2, 3.
20 Eci hẽ, nda ka ci vetiya olonjali oku kuama olonjila viñi viñi vi sangiwa Vembimbiliya oco vi kuatise omãla va kasi ndocisandui oco va tiuke? Loku kuama ongangu ya Yehova, olonjali vi sukila oku likolisilako oku kuama onjila ya sunguluka yoku kuatisa omõla wavo oco a tiuke ku Yehova. Kakateli kolonumbi Viembimbiliya, kuenda seteki oku kuama ovituwa via Yehova ndeci, ocisola, esunga, kuenda uloño, osimbu wamamiko loku likutilila oco u tambuli ekuatiso liaye. Ndeci omãla vana va sinile calua okuti noke veya oku tava kelaleko liocisola ca Yehova lioku amẽla kokuaye, omõla wove ocisandui ci kale ulume ale ukãi ci tava okuti, o tiuka vali vocunda ca Suku oco a tambule ekuatiso liaye.−Luka 15:6, 7.
[Footnotes]
a Oco o sange olonumbi vikuavo vi lekisa ndomo o pondola oku longisa ciwa omãla vove, tanga Vutala Wondavululi, wosãi Yevambi Linene yunyamo wo 1999 okupisa kemẽla 23 toke 27.
b Olohutililo viaco, vilingiwila omõla utito wa tundisiwa vekongelo, ka ci tava okuti vi lingiwila vohongele yekongelo, momo ci tava okuti vakuavo ka va kulihile eci ca tundisisa omõla waco vekongelo.−Tanga Vutala Wondavululi, 15 yosãi ya Kupupu yunyamo wo 1980 kemẽla 32.
c Oco o kuate elomboloko lia sunguluka, tanga o Despertai! 22 yosãi ya Cembanima, yunyamo wo 1972 okupisa kemẽla 13 toke 16; 22 yosãi Yenyenye Linene yunyamo wo 1996, okupisa kemẽla 21 toke 23.
OHandi Ocivaluka?
• Nye hẽ okuti pamue oco ci linga ono yocitangi ci tundisa omãla vekongelo?
• Ndamupi amalẽhe va pondola oku kuatisiwa oco va lekise vali ukamba uwa la Yehova?
• Momo lie olonjali vi sukilila oku kuata epandi pole loku kolapo muẽle ngõ, poku kuatisa omõla wavo ocisandui?
• Ndamupi vamanji vosi vekongelo va pondola oku kuatisa omõla ocisandui oco a tiuke?
[Elitalatu yemẽla 22]
Okutanga Ondaka ya Suku ku kuete esilivilo liocili koku kuata ukamba uwa la Yehova
[Elitalatu yemẽla 22]
Ohutililo yokutima yi lingiwa lolonjali, yi kuatisa omãla oku limbuka ukamba u kasi pokati kolonjali viavo la Yehova
[Elitalatu yemẽla 22]
Ciwa okuti eci omõla ocisandui ‘a kuata olondunge,’ vioku tiuka, o tambuiwa lonjolela yocili
[Elitalatu yemẽla 22]
Kuama onjila ya sunguluka oco o kuatise omõla wove oku tiuka ku Yehova