Ndomo tu Pondola Oku Lekisa
Ocisola Cocili
“Ocisola oco ovihemba viomuenyo, ocisola omuenyo.” Eci oco calomboluiwa Lelivulu limue lia sonehiwa la Joseph Johnson kunyamo wo 1871
NDAMUPI omanu va pondola oku lilongisa ocisola? Anga hẽ va pondola oku ci lilongisa lekuatiso liuloño u tukuiwa hati, Psicologia? Poku tanga alivulu a eca olonumbi viatiamẽla kocisola? Poku tala olosinema vina vi lekisa omanu va lisole okuti va yongola oku likuela? Sio hacoko. Omanu, catete va pondola oku lilongisila ocisola poku kuama ongangu kuenda elongiso liolonjali viavo. Omãla vaka kuata elomboloko liocisola nda va kasi vepata limue li lekisa ocisola, nda va limbuka okuti olonjali viavo vi vaĩha okulia kuenda vi va teyuila, vi lekisa ukamba wocili poku lisapela lavo kuenda nda vava kapako calua komuenyo wavo okuti va soliwe calua lolonjali viavo. Ovo va pondolavo oku lilongisa ocisola nda olonjali viavo via va longisa oku pokola kolonumbi vieci ciwa leci cĩvi.
Ocisola cocili ka ci lomboloka lika oku kuata ohenda kuenda ocikembe lomanu. Oco ci lomboloka oku lekisa ovilinga vina vi pondola oku kuatisa vakuetu ndaño okuti vonjanja yaco ovo va mõleha ndava ka va yongola ocisola caco ndeci ca siata oku pita lamalẽhe poku va ĩha epindiso lina lieciwa locisola omo lioku lueya cimue. Ululiki eye wa lekisa ongangu yalipua yocisola komanu. Upostolo Paulu wa soneha ndoco: “Amõlange, ku ka lavise epokuiso lia Ñala, ndaño oku leñela eci o yambuiwa laye. Momo Yehova o pokuisa u a sole.”—Va Heveru 12:5, 6.
Ene alonjali, ndamupi u pondola oku setukula ongangu ya Yehova yoku lekisa ocisola kepata liene? Kuenda ongangu yukamba ulekisa pokati kene ove ulume lukãi wove yi kuete esilivilo lie?
Longisa Ocisola Poku Eca Ongangu
Nda okuti ove ulume umue okuele ale, anga hẽ wa siata oku lekisa ocisola ale oku kapako calua ukãi wove kuenda oku u tata ciwa lesumbilo? Nda okuti ove ukãi umue okuele, wa siata hẽ oku lekisa ocisola cove kuenda oku kuatisa ulume wove? Embimbiliya li lombolola okuti ulume kuenda ukãi vana okuti va likuele va sukila oku lisola kuenda oku li sumbila pokati. (Va Efeso 5:28; Tito 2:4) Poku ci linga, omãla vavo va pondola oku limbuka ovilinga viocisola Cakristão vonjanja yatete. Kuenje, eyi oyo onjila yoku longisa ocisola okuti yi pondola oku kuatisa calua!
Olonjali vi pondolavo oku vetiya ocisola vonjo nda ovo va kapako calua olonumbi via velapo viatiamẽla kovina vimue ndeci, ovitalukilo via sunguluka, oku lekisa ovituwa viwa kuenda oku kuata ovimãho via velapo komuenyo. Omanu vosi voluali va siata oku limbuka okuti Embimbiliya li pondola oku kuatisa calua kueci catiamẽla koku kuata olonumbi vina via velapo vepata. Omo liaco, ovo muẽle va siata oku limbuka okuti Embimbiliya olio “Ovitumasuku, kuenje vi silivila oku longisa, loku lungula, loku pindisa, loku ikisa esunga.” (2 Timoteo 3:16) Ocili okuti, Vohundo Yavelapo Yesu a lingila Komunda, mu sangiwa olonumbi vimue viatiamẽla komuenyo okuti vi kuete esilivilo liocili.—Mateo, kocipama 5 toke 7.
Eci epata liosi li likolisilako oku sandiliya olonumbi via Suku kuenda oku kuama ovihandeleko viaye, omunu lomunu oka kolapo kuenda omãla vaka kula locituwa coku lekisa vali ocisola kuenda esumbilo kolonjali viavo. Pole, nda vonjo yimue ka mu sangiwa olonumbi viatiamẽla ko ku yuvula ovituwa vina vĩvi violuali, ci tava okuti omãla va pondola oku sumua, oku kala vakualonyeño loku kala vakuesino.—Va Roma 2:21; Va Kolosai 3:21.
Nye hẽ ci popiwa kueci catiamẽla kolonjali vina okuti ovimbumba? Anga hẽ ka vi kuete vo epondolo lioku longisa komãla vavo eci catiamẽla kocisola? Sio, hacoko. Ndaño okuti ka kuli ocina cikuavo ciwa okuti oku kala lonjali yiwa yulume leyi yukãi ci sule, pole ovolandu a lekisa okuti nda vepata muli ukamba wocili ci tava okuti onjali yocimbumba yi longisa ciwa omãla vaye ndaño o kasi likaliaye. Nda ove u cimbumba likolisilako oku kapako olonumbi Viembimbiliya vonjo yove. Elivulu Liolosapo li tu sapuilako okuti: “Kolela Yehova lutima wove wosi. Ku ka tiamẽle kolondunge viove muẽle. U sumbila kolongenda viove viosi, kuenje eye o suñamisa olonjila viove,” kuenda oku songuila epata liove.—Olosapo 3:5, 6; Tiago 1:5.
Kuli amalẽhe valua va kuete ovituwa viwa okuti va kulila vepata limue li songuiwa locimbumba, kuenje cilo va kasi oku amamako oku vumba Suku lekolelo pokati kolohũlũkãi viakongelo Olombangi via Yehova a sangiwa voluali luosi. Owu owo uvangi u lekisa okuti ovimbumba vi pondolavo oku litunda ciwa koku longiwa ocisola komãla vavo.
Ndomo Omanu Vosi va Pondola Oku Lilongisa Ocisola
Embimbiliya lia lomboluile kosimbu okuti, “koloneke via sulako” omanu ‘ka va ka kuata ocikembe la vangandiavo,’ okuti ekambo liukamba una wa sunguluka wa siata oku kala pokati komanu vakuepata limosi. (2 Timoteo 3:1, 3) Pole, ndaño muẽle omanu vana va kulila vepata limue okuti ka muli ocisola la vakuepata, pole cilo va pondola oku li longisa ocisola. Ndamupi? Poku longisiwa la Yehova okuti eye Ono yavelapo yocisola haeye ukuakulekisa ocisola locikembe komanu vosi vana vo sandiliya lutima wavo wosi. (1 Yoano 4:7, 8) Ukualosamo umue wa lombolola hati: “[Ndaño okuti] tate la mai va njanduluka puãi Yehova o nambula.”—Osamo 27:10.
Yehova wa siata oku lekisa ocisola caye kokuetu lolonjila vialua. Kuenje, voku lekisa kuaco ocisola mua kongela olonumbi vieciwa la isia lekuatiso Liembimbiliya, ekuatiso liespiritu sandu kuenda ekuatiso lieciwa la vamanji Akristão. (Osamo 119:97-105; Luka 11:13; Va Heveru 10:24, 25) Omo liaco, tu konomuisi ndomo aliangiliyo ava atatu apondola oku ku kuatisa oku amamako oku kuatela ocisola Suku kuenda omanu vana tu lisungue lavo.
Olonumbi Via Suku Vieciwa Lonjali Yulume
Oco tu kuate ukamba wocili lomunu umue, tu sukila oku u kũlĩha ciwa ndomo eye a tuwa. Lekuatiso Liembimbiliya, Yehova wa siata oku li situlula eye muẽle ndomo a tuwa kuenje o tu laleka oco tu kuate ukamba wocili laye. Pole, oku tanga Embimbiliya olonjanja viosi ka ci tẽla. Etu tu sukila oku kapako alongiso aco komuenyo wetu kuenda oku kuata asumũlũho a tundilila koku kapako alongiso aco. (Osamo 19:7-10) Elivulu lia Isaya 48:17 li popia hati: “Ame ndi Yehova Suku yove, hu longisa eci cu ku kuatisa, hu songuila vonjila ya ku sungulukila.” Ocili okuti, Yehova okuti eye ongangu ya velapo yocisola o tu longisa eci ci tu kuatisa, pole eye ka ci lingila oco a tateke elianjo liomuenyo wetu lolonumbi kuenda ovihandeleko vimue ka vi kuete esilivilo.
Oku kuata ukũlĩhĩso wasuapo Wembimbiliya ci tu kuatisavo oku amamako oku lekisa ocisola komanu vosi. Embimbiliya li tu longisa ndomo Suku a tenda omanu kuenda li tu lekisa olonumbi tu sukila oku kuama poku kala ciwa la vakuetu. Lolonumbi viaco evi, etu tu pondola oku amamako oku lekisa ocisola komanu tu lisungue lavo. Upostolo Paulu wa lombolola hati: “Eci ndi likutilila ceci okuti, ocisola cene ci lue, lokulua kuaco kuendele pamosi lukũlĩhiso luño wosi.”—Va Filipoi 1:9.
Oco tu limbuke ndomo ocisola ci pondola oku vetiyiwa ‘lukũlĩhĩso wasuapo’, konomuisa olondaka via lomboluiwa kelivulu Liovilinga 10:34, 35 okuti: “Suku ka kuete ocame, puãi, volofeka viosi, [omunu] wosi u sumbila loku linga esunga, u sungulukila.” Nda okuti Suku o tava omanu omo lioku linga kuavo esunga kuenda oku u sumbila okuti ka tendi ekova liavo ale ofeka va citiwila, eci hẽ ka ci tu vetiyavo oku tenda vakuetu ndomo Suku a va tenda okuti ka tu lekisa ocame?—Ovilinga 17:26, 27; 1 Yoano 4:7-11, 20, 21.
Ocisola Epako Liespiritu Lia Suku
Ndeci otembo yondombo yi kuatisa ciwa koku ungula, cimuamue haico espiritu lia Suku okuti li pondola oku kuatisa omanu va pokola oku kuata ovituwa vina Embimbiliya li tukula hati, “epako liespiritu.” (Va Galatia 5:22, 23) Ocili okuti ocisola, olio epako liavelapo konepa eyi. (1 Va Korindo 13:13) Oco hẽ ndamupi tu pondola oku kuata espiritu lia Suku? Onjila yimue yi kuete esilivilo, oku linga ohutililo. Nda etu tua likutilila oku pinga espiritu lia Suku, eye oka tu lĩha. (Luka 11:9-13) Ove hẽ wa siata oku likutilila ‘olonjanja viosi’ oco o tambule espiritu sandu? Nda ove oco wa siata oku linga, limue epako lia velapo pokati ka osi, mua kongela ocisola okuti cika limõlehisa vali komuenyo wove.
Pole, kuli espiritu limue likuavo okuti ka li litava lespiritu lia Suku. Embimbiliya li litukula okuti, “espiritu lioluali.” (1 Va Korindo 2:12; Va Efeso 2:2) Espiritu liaco, evetiyo limue lĩvi okuti ono yalio Satana Eliapu “ombiali yoluali lulo” luomanu vana va litepa ku Suku. (Yoano 12:31) Ndeci ofela ya siata oku tumula oneketela kuenda ovinene, haico “espiritu lioluali” lulo lia siatavo oku vetiya olonjongole vĩvi vinyõla ocisola haivio vi sanjuisa lika etimba.—Va Galatia 5:19-21.
Omanu va yonjiwa lespiritu liaco lĩvi eci vatiamẽla enene kolonjongole vioku sandiliya ovokuasi, va sokolola lika eci ci sanjuisa etimba liavo, oku kuata ovituwa vi lekisa ungangala kuenda oku yapukila kovisimĩlo ka via sungulukele viatiamẽla kocisola cina ca siata voluali. Nda ove o yongola oku amamako locisola cocili, o sukila oku tamalala lespiritu lioluali. (Tiago 4:7) Omo liaco, ku ka kolele kongusu yove muẽle, pole pinga ekuatiso ku Yehova. Kuenje, espiritu liaye okuti oyo ongusu ya velapo voluali luosi yika ku ĩhavo utõi kuenda yika ku ĩhavo epondolo lioku litunda ciwa komuenyo wove.—Osamo 121:2.
Lilongisila Ocisola ku Vamanji Akristão
Ndeci omãla va lilongisila ocisola poku kuama ongangu yakulu konjo, vosi yetu ci kale amalẽhe ale akulu, tu pondola oku amamako oku lekisa ocisola poku kuata ukamba wocili la vakuetu Akristão. (Yoano 13:34, 35) Ocili okuti limue ekuatiso li pondola oku eciwa lekongelo Liakristão komunu lomunu ‘oku livetiya pokati loku kala locisola kuenda ovilinga viwa.’—Va Heveru 10:24.
Ocisola caco ci kuete esilivilo lialua komanu vana “va pekengua kuenda va sakalaisua” voluali lulo lua tu ñuala okuti ka lu kuete ocisola. (Mateo 9:36) Asapulo a siata oku lekisa okuti akulu vana vambata omuenyo umue u lekisa ukamba wocisola va pondola oku yuvula ovitangi viosi omunu a kala lavio vutila okuti ka kuatele ocisola vepata. Omo liaco, ci kuete esilivilo lialua Akristão vosi oku yolela lutima wavo wosi omanu vana veya oku likongela ndopo letu!
“Ocisola Lalimue Eteke ci Tokoka”
Embimbiliya li lombolola okuti, “ocisola lalimue eteke ci tokoka.” (1 Va Korindo 13:8) Oco hẽ ndamupi? Upostolo Paulu o tu sapuila hati: “Ocisola ci pandakaisa; ci lingainga ohenda. Ocisola ka ci kuete onya , ocisola ka ci lipandiya; ka ci litambela; ka ci lingi akutisasõi; ka ci lisandela ovina viaco muẽle; ka ci temisua; [kuenda] ka ci patekela onyeño.” (1 Va Korindo 13:4, 5) Ocili okuti, ocisola caco hacina cimueko covisimĩlo ale pamue cimue ci pita lika ombamba kutima. Ndaño okuti, omanu vana va siata oku lekisa ocisola caco va siatavo oku kuata ovitangi vina vi va sumuisa komuenyo wavo, pole ovo ka va ecelela okuti ovitangi viaco vi nyõla ocisola cavo va kuetele omanu. Ocili okuti ocisola caco “oco ci kutila cosi pamosi vomunga ya kanguka.”—Va Kolosai 3:12-14.
Kũlĩhĩsa ulandu wufeko umue Ukristão o kuete eci ci soka 17 kanyamo wo kofeka yo Koreya. Eci eye a fetika oku vumba Yehova Suku, epata liaye ka lia ci solele kuenje vo tundisa konjo yavo. Ndaño okuti eye co sumuisile calua, pole wa li kutilila oco Ondaka ya Suku kumosi lespiritu liaye viu kuatise oku kuata ovisimĩlo via sunguluka. Kuenje olonjanja vialua eye wa enda oku sonehela epata liaye ovikanda vimue vieyuka to ocisola a va kuetele. Noke, akuenje vavali vakota liaye veya oku fetika oku lilongisa Embimbiliya kuenje cilo va linga Akristão. Inaye kuenda manjaye ukuenje umalẽhe va tava oku lilongisa Embimbiliya. Kuenje, noke Isiaye una ka solele ndaño katito eci epata liaye lia kala oku lilongisa Embimbiliya, wa pongololavo utima waye. Omo liaco, ufeko waco wa linga tete ombangi ya Yehova wa soneha hati: “Vosi yetu tua kuela Akristão kuenje cilo epata lietu liosi li kasi oku fendelela kumosi, lia tẽla eci ci soka 23 komanu.” Hekuatisokuolio lia tunda koku lekisa ocisola!
Anga hẽ ove o yongola oku lilongisa ocisola cocili kuenda oku kuatisa omanu oku ci lingavo? Omo liaco, lilongisila ku Yehova momo eye Ono yavelapo yocituwa caco ciwa. Kakatela Kondaka yaye lutima wove wosi, likutilila oku pinga espiritu sandu kuenda olonjanja viosi likongaila la vamanji Akristão. (Isaya 11:9; Mateo 5:5) Ci nena esanju lialua oku kũlĩha okuti ndopo muẽle olondingaĩvi vika kunduiwa, kuenje kuka kala lika Akristão vana va siata oku lekisa ocisola cocili! Ocili okuti ocisola oco osapi yesanju kuenda yomuenyo.—Osamo 37:10, 11; 1 Yoano 3:14.
[Elitalatu kemẽla 5]
Oku li kutilila kuenda oku lilongisa Ondaka ya Suku cika tu kuatisa oku amamako oku lekisa ocisola cocili