Wa Siata hẽ Oku Sanjukila “Ocihandeleko ca Yehova”?

“Wa sumũlũha omunu . . . [una okuti] ovihandeleko via Yehova ovio a sanjukila.”​—OSAMO 1:1, 2.

1. Momo lie etu tuafendeli va Yehova tu kuetele esunga lioku sanjuka?

YEHOVA o kuatisa kuenda o sumũlũisa afendeli vaye vo kolela. Ocili okuti etu tua siata oku pita lovitangi vialua. Pole, omo okuti tu kasi oku vumba “Suku yesumũlũho,” eye o tu sumũlũisa. Kuenda lespiritu sandu liaye, o tu kuatisa oco tu kuate esanju liocili vutima. (1 Timoteo 1:11; Va Galatia 5:22) Esanju ekalo limue omunu a yeva vutima omo lioku tambula ale oku lavoka cimue ciwa. Isietu wo kilu wa siata oku tu ĩha ovina vialua viwa. (Tiago 1:17) Omo liaco, tu kuete esunga lioku sanjuka.

2. Olosamo vipi tuka konomuisa vocipama cilo?

² Velivulu Liolosamo tu sangamo calua ondaka esumũlũho. Ca piãla vali enene Kosamo yatete leyi yavali. Olondonge viatete via Yesu Kristu, via tukula Daviti hati eye usonehi wosamo yavali. (Ovilinga 4:25, 26) Usonehi wosamo yatete, wa fetika ocisungo caye lolondaka viti: “Wa sumũlũha omunu ka endaenda lalungulo olondingaĩvi.” (Osamo 1:1) Vocipama cilo leci ci kuãimo, tuka lilongisa ndomo Osamo ya 1 leyi ya 2 yi lekisa esunga lieci tu sanjukila.

Esunga Lieci tu Sanjukila

3. Ndomo Osamo 1:1 yi lekisa, momo lie omunu o pokola kovihandeleko via Suku a sanjukila?

³ Osamo 1 yi lekisa esunga lieci omunu o pokola kovihandeleko via Suku a sanjukila. Poku lekisa eci omunu waco a sanjukila, ukualosamo wa imba hati: “Wa sumũlũha omunu ka endaenda lalungulo olondingaĩvi, ka talayama vonjila ya vakuakandu, ka tumayala komangu ya vakuakupembula.”—Osamo 1:1.

4. Ongangu yipi yiwa Sakariya la Elisavete va tu sila?

⁴ Oco tu kuate esanju liocili, tu sukila oku kapako ovihandeleko via Yehova. Sakariya la Elisavete, va kuatele esumũlũho lioku kala olonjali via Yoano Upapatisi. Ovo va kala “vakuesunga kovaso a Suku, va endaenda lovihandeleko lovisila viosi via Ñala [Yehova] loku pua eko.” (Luka 1:5, 6) Nda tua yuvula oku “endaenda lalungulo olondingaĩvi” tu ka sumũlũisiwavo.

5. Nye ci ka tu kuatisa oku yuvula ‘onjila ya vakuakandu’?

⁵ Nda tua yuvula ovisimĩlo violondingaĩvi, ka tuka ‘talama vonjila ya vakuakandu.’ Eci ci lomboloka okuti tu sukila oku yuvula oku kala kovitumãlo vina va sole oku lingila upuepue layele avo. Oco hẽ nda tua yonjiwa oco tu likongele ku vakuakandu tu linga ndati? Tu sukila oku likutilila ku Suku oco a tu kuatise. Kuenda oku kapako olondaka viupostolo Paulu wa linga hati: “Ko ka kutiwili kokanga ka ya lisokele kumosi lava ka va tavele. Momo esunga leci hesungako ci kutiwila ndati pamosi? Utanya u livala ukamba we lowelema?” (2 Va Korindo 6:14) Nda tua kolela Suku kuenda tua “yela vutima,” tuka yuvula ovituwa via vakuakandu. Tuka kuata ovisimĩlo via sunguluka kuenda “ekolelo halioku luvikiyako.”—Mateo 5:8; 1 Timoteo 1:5.

6. Momo lie tu sukilila oku lunguka la vakuakupembula?

⁶ Oco tu sanjuise Yehova tu ‘sukila oku yuvula oku tumãla komangu ya vakuakupembula.’ Vamue va pembula ovihandeleko via Suku. Pole ‘koloneke vilo via sulako’ omanu vana va siapo efendelo liocili, va kasi oku amamako loku pembula vana va kuãi ovihandeleko via Suku oco va yapuise valua vocili. Upostolo Petulu wa lungula vamanji hati: “A vakuacisola . . . limbuki okuti, koloneke via sulako, kuiya vakuetombo loku tomba, va enda loloñeyi viavo vietimba, vati, ohuminyo yetukuluko lia Ñala yi kasi pi? Momo, tunde eteke akulu vetu va pekela, ovina viosi vi kasi ño ndeci via kala tunde kefetikilo lioluali.” (2 Petulu 3:1-4) Nda tua yuvula ‘oku tumãla komangu ya vakuakupembula,’ ka tuka pita lovitangi vi keya kokuavo.—Olosapo 1:22-27.

7. Nye tu sukilila oku kapako olondaka Viosamo 1:1?

⁷ Tu sukila oku kapako olondaka Viosamo yatete. Momo nda ka tua ci lingile, ekalo lietu kespiritu lika hongua. Kuenje tuka ivalako ovina viosi tua lilongisa vokuenda kuanyamo. Noke omuenyo wetu uka kala lãvi. Ocina catete ci lekisa oku hongua kespiritu oku kuama alungulo olondingaĩvi. Noke tu fetika oku endaenda lavo. Kuenda tu lingavo vakuakupembula. Oku livala ukamba lolondingaĩvi, ku vetiya oku kuama ovituwa vina ka vi taviwa la Suku. Kuenje ci nyõla ukamba wetu la Yehova Suku. (1 Va Korindo 15:33; Tiago 4:4) Lalimue eteke ka tu ka eceleli okuti tu pita lovitangi viaco.

8. Nye cika tu kuatisa oku pitisa kovaso ovina viespiritu?

⁸ Ohutililo yika tu kuatisa oku pitisa kovaso ovina viespiritu. Upostolo Paulu wa popia hati: “Lacimue ko ka ci kuateli ohele, puãi kovina viosi apingilo ene a sapuiwe ku Suku lolopandu volohutililo viene lalombelo ene. Kuenje ombembua ya Suku, yina ya piãla olondunge viosi, yi lava ovitima viene lovisimilo viene vu Kristu Yesu.” Oku sulako upostolo Paulu wa vetiya hati, cosi cocili, cosi ca sumbiwa, cosi cesunga, cosi ca pua evĩho, cosi ca posoka, cosi ci sivayaiwa, nda kuli esunga, kuenda nda kuli eci ci sesamela oku sivayiwa, sokololi ovina evi. (Va Filipoi 4:6-8) Omo liaco, tu kapiko elungulo liupostolo Paulu oco ka tu ka kale ndolondingaĩvi.

9. Ndaño okuti tu yuvula ovilinga violondingaĩvi, ndamupi tu likolisilako oku kuatisa omanu vosi?

⁹ daño okuti tu yuvula ovilinga violondingaĩvi, tu likolisilako oku va kundila olondaka viwa. Etu tu kuama ongangu yupostolo Paulu wa kundilile Feliki ombiali yo ko Roma. Eye wo kundila “esunga, lesuluviko, kuenda ekanga li laika oku iya.” (Ovilinga 24:24, 25; Va Kolosai 4:6) Etu tu kundila omanu vosi olondaka viwa Viusoma. Kuenda tu va tata lumbombe. Tua kolela okuti vana va “noliwila omuenyo ko pui” vaka tava. Kuenda vaka sanjukila ovihandeleko via Suku.—Ovilinga 13:48.

Tu Sanjukili Ovihandeleko Via Yehova

10. Nye ci ka tu kuatisa oku patekela vali ciwa eci tua lilongisa pokolika?

¹⁰ Catiamẽla komunu wa sumũlũha, ukualosamo wamisako hati: “Te ovihandeleko via Yehova ovio a sanjukila. O sokolola ovihandeleko viaye utanya luteke.” (Osamo 1:2) Etu tumanu va Suku tu ‘sanjukila ovihandeleko via Yehova.’ Eci tu mala oku linga elilongiso lio pokolika, tu “sokolola” olondaka tua tanga. Kuenda olonjanja vimue tu vi pitulula oku vi vangula. Nda tua ci linga, tuka patekela ciwa etosi tua tanga Vembimbiliya.

11. Nye tu sukilila oku tanga Embimbiliya “utanya luteke”?

¹¹ “Ukuenje wa kolelua haeye wa lunguka,” wa siata oku tu vetiya oku tanga Embimbiliya eteke leteke. (Mateo 24:45) Oco tu kũlĩhe ciwa eci Yehova a yongola oku sapuila omanu, ciwa okuti tu likolisilako oku tanga Embimbiliya “utanya luteke.” Eci ci lekisa okuti nda vokati kuteke ka tu kuete otulo, tu tanga Embimbiliya. Upostolo Petulu o tu vetiya hati: “Liveli ndoloñaña asenjele ovitima ana ka a kuete elimbi. A liveli okuti vu kulila kepopelo.” (1 Petulu 2:1, 2) Ove hẽ wa siata oku sanjukila oku tanga Embimbiliya utaya luteke? Wa siatavo hẽ oku sokolola eci wa tanga? Ukualosamo oco a lingaile.—Osamo 63:6.

12. Nda tu kasi oku sanjukila ovihandeleko via Yehova, nye tuka linga?

¹² Oco tu kuate asumũlũho ka a sulila, tu sukila oku amamako loku sanjukila ovihandeleko via Yehova. Ovio via sunguluka havio viesunga. Kuenje oku pokola kokuavio ku nena onima yalua. (Osamo 19:7-11) Ndonge Tiago wa popia hati: “Puãi, u o vanja vanja sui vocihandeleko ca kanguka, haico ceca umãmãle, kuenje o pandikisa laco okuti ka lingi ukuakuyeva lika loku ivala, o linga puãi ukuakulinga, eye o sumũlũisua lokulingainga kuaye.” (Tiago 1:25) Nda tu kasi oku sanjukila muẽle ovihandeleko via Yehova, ka tu ka pita eteke lalimue okuti ka tu konomuisa ovina viespiritu. Puãi tuka vetiyiwa oku sandiliya ‘ovina via longa via Suku.’ Kuenda oku pitisa kovaso ovopange Usoma wa Suku.—1 Va Korindo 2:10-13; Mateo 6:33.

Ukuesunga wa Soka Nduti

13-15. Omunu o sokisiwa ndati luti wa kũlĩwa kohulo yolui?

¹³ Poku tukula omunu ukuesunga, ukualosamo wa popiavo hati: “Wa linga nduti wa kũliwa kolondui viovava, haiwo wimaima epako liawo kuvo waco. Lemela liawo ka li uwuka. Cosi a linga o sumũlũha laco.” (Osamo 1:3) Etu tumanu va Yehova ka tua lipuile. Omo liaco, tua siatavo oku pita lovitangi ndevi omanu vosi va siata oku pita lavio. (Yovi 14:1) Etu pamue tu lambalaliwa kuenda tu pita lovitangi vikuavo vi nyika ekolelo lietu. (Mateo 5:10-12) Pole lekuatiso lia Suku, tuka tẽla oku pandikisa kovitangi viaco viosi. Kuenje tu kala nduti u kuete olombombo via pama u panamala kahunguhungu o fela.

¹⁴ Uti wa kũliwa kohulo yolui, ka uwuka, ndaño muẽle kuiya ocitenya. Nda tua sumba Yehova Suku, eye oka tu ĩha ongusu yoku pandikisa. Upostolo Paulu wa kolelele okuti Suku u kuatisa. Kuenje wa popia hati: “Nela ovina viosi [vu Yehova] u o ñolaisa.” (Va Filipoi 4:13) Nda tua tava oku songuiwa lespiritu sandu lia Yehova, ka tu ka hongua kespiritu, okuti ka tu imi apako. Kuenda ka tu ka liwekapo oku vumba Yehova. Pole tuka amamako oku ima apako kupange wa Suku. Kuenda tuka molehisavo apako espiritu komuenyo wetu.—Yeremiya 17:7, 8; Va Galatia 5:22, 23.

¹⁵ Ukualosamo wa tukula ondaka yo Heveru poku popia hati, ukuesunga “wa soka” nduti. Eye wa sokisa ukuesunga luti una wa kũlĩwa konele yolui. Ocili okuti, omunu ka li sokele luti. Pole, eposo liuti una wa kũlĩwa kohulo yolui, lia ivaluisa ukualosamo ekalo liwa lia vana va “sanjukila ovihandeleko via Yehova.” Nda tua sanjukila ovihandeleko via Yehova, oloneke vietu vika kala ndevi viuti. Eci ci lekisa okuti, tuka kala otembo ka yi pui.—Yoano 17:3.

16. Nye cika ecelela okuti ‘cosi tu linga tu sumũlũha laco’?

¹⁶ Nda tu amamako oku endela vonjila ya vakuesunga, Yehova oka tu kuatisa oku yula ayonjo kuenda ovitangi tu pita lavio. Kuenje tuka amamako lesanju kuenda oku ima apako kupange wa Suku. (Mateo 13:23; Luka 8:15) ‘Cosi tu linga tu sumũlũha laco.’ Ocimãho cetu ca velapo, oku linga ocipango ca Yehova. Nda tu amamako oku sanjukila ovihandeleko viaye, tuka litunda ciwa kespiritu. Momo ocipango ca Yehova otembo yosi ci tẽlisiwa. (Efetikilo 39:23; Yehosua 1:7, 8; Isaya 55:11) Ndaño muẽle ceci tu pita lovitangi, tu sanjukila ovihandeleko viaye. (Osamo 112:1-3; 3 Yoano 2)

Olondingaĩvi vi Mõleha Soketi vi Kasi Ciwa

17, 18. (a) Ukualosamo wa sokisa olondingaĩvi la nye? (b) Ndaño olondingaĩvi vi mõleha soketi vi kasi ciwa, momo lie tu popela okuti ekalo liavo li kasi kohele?

¹⁷ Onima yolondingaĩvi ya litepa calua leyi yolondingesunga. Olondingaĩvi vi mõleha soketi vi kasi ciwa. Pole kespiritu olohukũi. Eci tu ci limbukila kolondaka via kuamamo viukualosamo. Eye wa popia hati: “Olondingaĩvi . . . via linga ndovisiakiti vi enda lofela. Oco olondingaĩvi pekanga ka vi kolipo ndaño vakuakandu vohongele ya vakuesunga.” (Osamo 1:4, 5) Kũlĩhĩsa okuti ukualosamo wa popia hati, ukuesunga wa soka nduti wimaima apako okuti amẽla awo ka vowuka. Pole “olondingaĩvi hacoko.” Eye wa yonguile oku popia hati, osimbu okuti olondingesunga vika kala otembo ka yi pui, olondingaĩvi vika kunduiwa.

¹⁸ Ndaño okuti olondingaĩvi vi mõleha soketi vi kasi ciwa, ekalo liavo li kasi kohele. (Osamo 37:16; 73:3, 12) Ovo va kasi ndulume una ohuasi wa tukuiwa volusapo lua Yesu. Poku ta olusapo luaco, Yesu wa popia hati: “Lunguki kuenda liuviki kocipululu cosi, momo omunu, ndaño ohuasi enene, haimo omuenyo waye ko fukile.” Noke wa ta olusapo luaco hati, ovapia ohuasi yimue a ima ca lua. Kuenje wa likunda lutima waye hati, eci ndinga ceci, nungulula olosila viange oco nunge vimue vinene vali. Kuenje omo ndi soleka ovikulia viange viosi lovikuata viange. Kuenje mopia lutima wange siti, otima wange o kuete ovikuata via lua via solekiwila anyamo a lua, livala, lia, nyua, sanjuka. ‘Puãi Suku wa popia laye hati, uveke, uteke ulo va kupa omuenyo wove. Oco hẽ evi wa pongiya, vi linga vielie?’ Noke Yesu wa sulako loku popia hati: ‘Haico ci pita lomunu o soleka ukuasi palo posi, puãi ka kuete ukuasi wa Suku.’—Luka 12:13-21.

19, 20. (a) Lombolola ndomo kovaimbo va siata oku sasa epungu.

¹⁹ Olondingaĩvi ‘halohuasiko ku Suku.’ Omo liaco, vi kasi ño ndovisakiti ale ndovinene vi tunda kepungu. Kovaimbo eci epungu liupiwa vepia, li kapiwa pocimbandi. Noke li sasiwa, kuenje liyeleliwa oco ovinene vi tundeko. Oku yelela kuaco ku lingiwa kekumbi omo oco kuli ofela. Kuenje eci epungu li yeleliwa ovinene vi enda oku ku ila ofela. (Isaya 30:24) Poku yelela epungu li kupukila pocimbandi osimbu okuti ovinene viaco vienda lofela. (Ruti 3:2) Eci va limbuka okuti epungu liaco lia pekuiwa ciwa, li selekiwa volosila. Otembo yaco ovinene viosi via enda ale lofela.—Luka 22:31.

²⁰ Eci epungu li pekuiwa, olomema viaco vi siala pocimbandi. Pole ovinene vi enda lofela. Cimuamue haico ci pita la vakuesunga. Ovo vaka popeliwa. Pole olondingaĩvi vika kunduiwa. Cika tu sanjuisa calua eci olondingaĩvi vika kunduiwa. Pana okuti olondingaĩvi ka vi kasiko vali, omanu vana va pokola kovihandeleko via Yehova, vaka kuata asumũlũho alua kuenda omuenyo ko pui.—Mateo 25:34-46; Va Roma 6:23.

“Vakuesunga” va Sumũlũha

21. Yehova wa kũlĩha ndati ‘onjila ya vakuesunga’?

²¹ Osamo yatete yi sulako loku popia hati: “Yehova wa kũlĩha onjila ya vakuesunga, onjila ya vakuakandu puãi yi nyõleha.” (Osamo 1:6) Suku wa kũlĩha ndati ‘onjila ya vakuesunga’? Eci ci lomboloka okuti nda tua amamako oku endela vonjila yesunga, Isietu o kasi kilu oka limbuka omuenyo wetu wesunga. Kuenje oka tu tenda okuti tumanu vaye vo pokola. Kuenje tu eca kokuaye asakalalo etu osi lekolelo liokuti eye o tu kuatisa.—Esekiele 34:11; 1 Petulu 5:6, 7.

22, 23. Nye ci ka pita lolondingaĩvi kuenda la vakuesunga?

²²‘Onjila ya vakuesunga’ yika kala otembo ka yi pui. Pole olondingaĩvi vika kunduiwa. Eci Yehova aka nena esombiso ‘onjila’ yavo yi ka nyõleha. Tu sukila oku kolela kolondaka via soma Daviti wa popia hati: “Okasimbu kaño handi kuenje olondigaĩvi ka yi kalapo. Ndaño o vanjiliya pomangu yaye lutate, eye kepo. Ambombe puãi va piñala ofeka, kuenje va sanjukila okusalala kualua.”—Osamo 37:10, 11, 29.

²³ Nda tua ka kuata epuluvi lioku kala voluali luokaliye tuka sanjuka calua. Momo olondingaĩvi vika nyõliwa. Ambombe puãi vaka kala vombembua ka yi pui. Kuenje vaka amamako oku ‘sanjukila ovihandeleko via Yehova.’ Pole osimbu handi otembo yaco ka yeyile, ‘ku imbiwa oluiya lua Yehova.’ (Osamo 2:7a) Ocipama cikuãimo cika tu kuatisa oku limbuka eci ci lomboloka oluiya lua Yehova. Kuenda eci oluiya luaco luka lomboloka kokuetu lo komanu vosi.

O Tambulula Ndati?

• Momo lie omunu wa sumbila Suku a sumũlũhĩla?

• Nye ci lekisa okuti tua sanjukila ovihandeleko via Yehova?

• Omunu o pondola ndati oku kala nduti wa kũlĩwa kohulo yolui?

• Onjila ya vakuesunga ya litepa ndati leyi yolondingaĩvi?

[Ociluvialuvia kemẽla 11]

Olohutililo vi tu kuatisa oku yuvula oku livala ukamba lolondingaĩvi

[Ociluvialuvia kemẽla 12]

Momo lie Ukuesunga wa Soka Nduti