Ondaka ya Yehova yi Kasi Lomuenyo
Atosi Avelapo Vonepa Yatatu Leyi Yakuãla Yelivulu Liolosamo
UKUALOSAMO eci a likutilila ku Yehova wa pula hati: “Ocisola cove ka ci pui hẽ, ci lomboluiwa veyambo? Pamue ocili cove voku nyõlẽha?” (Osamo 88:11) Epulilo eli li kuete etambululo liokuti, sio, hacoko. Momo nda ka tu kuete omuenyo, ka tu tẽla oku sivaya Yehova. Esunga lieci tu kasilili lomuenyo, oku sivaya Yehova.
Onepa Yatatu leyi Yakuãla yelivulu Liolosamo, yopisa Kosamo 73 toke 106. Olonepa viaco vi tu ĩha esunga lioku sivaya Yehova Ululiki wetu kuenda oku kemanya onduko yaye. Oku sokolola ulandu wolonepa evi Viosamo, ci tu vetiya oku eca olopandu ‘Kondaka ya Suku’ kuenda oku vokiya ombili yetu yoku u sivaya. (Va Heveru 4:12) Omo liaco, tu konomuisi ulandu watete wonepa Yatatu leyi Yakuãla Yelivulu Liolosamo.
“AME PUÃI, CIWA OKU KALA OCIPEPI LA SUKU”
Ovipama viatete vi soka 11 vionepa yatatu yelivulu Liolosamo, via sonehiwa la Asafe ale lomanu vakuanjo yaye. Ocisungo catete ci lombolola eci ca kuatisa Asafe oku yuvula oku yapuisiwa lovisimĩlo vĩvi. Eye wa limbuka onjila ya sunguluka. Kuenje wa imba ocisungo hati: “Ame puãi, ciwa oku kala ocipepi la Suku.” (Osamo 73:28) Olosamo vi kuãi Vosamo 74, vi lekisa esumuo lioku nyõleha kuo Yerusalãi. Olosamo 75, 76, kuenda 77, vi tukula Yehova hati, eye Onganji yesunga, Upopeli wolondingesunga, haeye Ukuakuyeva olohutililo. Osamo 78, yi lombolola ulandu wa pita la va Isareli okupisa kotembo ya Mose toke kotembo ya Daviti. Osamo 79, yi lombolola esumuo lioku nyõliwa kuonembele. Osamo yikuãimo, yi lekisa ohutililo yoku yovuiwa kuomanu va Suku. Osamo 81, yi lekisa evetiyo lioku pokola ku Yehova. Osamo 82 kuenda 83, yi lombolola ohutililo yoku pinga ku Yehova oco a yambule olonganji viesanda lovanyali vomanu vaye.
Omãla va Kora va imba ocisungo hati: “Omuenyo wange wa livela, [kuenda u kuete] ongeva yovitali via Yehova.” (Osamo 84:2) Osamo 85, yi lekisa ohutililo yomanu va tunda kumandekua eci va pinga esumũlũho ku Suku. Osamo yaco, yi lekisa okuti, esumũlũho konepa yespiritu olio lia velapo. Daviti Vosamo 86, wa pinga ku Suku oco o lave kuenda oku u longisa. Osomo 87, yi lekisa ocisungo catiamẽla ko Siono. Osoma 88 yi lombolola ohutililo ya lingiwa ku Yehova lomanu vana va citiwila vo Siono. Osamo 89, yi lombolola ocisola ca Yehova ka ci pui, ndomo ca lekisiwa poku linga ocisila la Daviti. Osamo yaco ya sonehiwa la umue pokati kolonoño via kala kotembo ya Salomone o tukuiwa hati, Etã.—1 Olosoma 4:31.
Atambululo Kapulilo Embimbiliya:
73:9—‘Olondingaĩvi vi pisa ndati ovailu lovimẽla viavo, kuenda alimi avo a endela ndati voluali luosi’? Olondingaĩvi omo okuti, ka via sumbile omunu cikaile palo posi cikale omunu wokilu, ka vi kuete usumba woku popia etonãi Suku lovimẽla viavo. Kuenda ka vi kuetevo ohele yoku lundila vakuavo lelimi liavo.
74:13, 14—Otembo yipi Yehova a ‘sasõla ovitue viovimuandu vio Vokalunga loku nyanyõla ovitue Violongandu?’ “Fareo soma Yegito” wa tukuiwa hati: ‘Ongandu yinene yi kala kala vokati Kolui Nilu.’ (Esekiele 29:3) Ongandu yinene yi lomboloka Fareo. (Osamo 74:14) Oku sasõla ovitue viavo, ci lomboloka eci Yehova a kundula olohoka via Fareo poku yovola va Isareli Kegito.
75:4, 5, 10—Momo lie tu sukilila oku yuvula epela? Yehova o pandiya omanu vaye. Pole, onyõla epela liolondingaĩvi. Omo liaco, tu sukila oku lunguka okuti, ka tu lingi vakuepela. Yehova wa tu ĩha esumũlũho liovikele vekongelo. Pole, tu sukila oku ivaluka okuti, esumũlũho liaco lia tunda kokuaye.—Osamo 75:7.
76:10—“Onyeño yomanu yi sivaya” ndati Yehova? Eci Suku a ecelela okuti omanu va tu suvuka omo lioku kala afendeli vaye, noke eca etambululo. Ovitangi viosi tu liyaka lavio, vi pondola oku tu pindisa volonepa vialua. Olonjanja vimue Yehova ecelela okuti, tu tala ohali oco tu longisiwe. (1 Petulu 5:10) Pole, ‘vana vamamako lonyeño yavo, Suku o va nyõla.’ Oco hẽ, nye ci pita letu nda ohali yaco yi tu tuala kolofa? Olofa viaco, vi nenavo esivayo ku Yehova. Momo eci omanu va mola epandi lietu, va fetika oku eca esivayo Kokuaye.
78:24, 25—Momo lie omana va yi tukuila hati, “olomema viokilu” haiyo ‘okulia kuovangelo’? Olondaka evi ka vi lomboloka okuti, omana okulia kuovangelo. Oyo ya tukuiwa hati, “olomema viokilu,” momo ya tunda kilu. (Osamo 105:40) Omo okuti ovangelo va kasi kilu, ondaka ‘okulia kuovangelo,’ yi lomboloka okuti, Suku una o kasi kilu kumue lavo eye wa yeca. (Osamo 11:4) Eci Yehova a ecele omana ku va Isareli, wa cilinga lekuatiso liovangelo.
82:1, 6—Velie va tukuiwa hati ‘olosuku’ kuenda ‘omãla va Tõlo’? Olondaka evi vi tiamisiwila kolonganji via va Isareli. Momo va kala va kapitiya kondaka ya Suku haivo olomunga viaye.—Yoano 10:33-36.
83:2—Ondaka ‘oku petula ovitue’ yi lomboloka nye? Ondaka yaco yi lomboloka oku lekisa unene, woku linga cimue.
Ceci tu Lilongisilako:
73:2-5, 18-20, 25, 28. Ka tuka kuati onyeño omo liukuasi wolondingaĩvi loku kuama ovilinga viavo vĩvi. Olondingaĩvi vi kasi vonjila ya sielena. Ovio ndopo vi ‘nyolẽha.’ Olombiali omo okuti, ka vi kuete epondolo lioku malako evĩho, elikolisilo lietu lioku ci linga ka li kuata esilivilo. Eci tu liyaka levĩho, tu sukila oku ‘kala ocipepi la Yehova’ kuenda oku kuata ukamba Laye ndeci Asafe a linga.
73:3, 6, 8, 27. Tu sukila oku yuvula oku lipanda, oku livelisapo, oku sepula vakuetu, kuenda oku iva. Ndaño ovituwa viaco vi molẽha ndu okuti, via sunguluka kokuetu.
73:15-17. Eci tu liyaka lovisimĩlo vĩvi, tu sukila oku likandangiya oco ka tuka situlule ovisimĩlo viaco ku vakuetu. Oku situlula ovisimĩlo vĩvi, ku tepulula epandi lia vakuetu. Omo liaco, tu sukila oku sokolola lutate ocitangi caco, kuenda oku ci tetulula lekuatiso lia vamanji.—Olosapo 18:1.
73:21-24. Oku sumua omo lioku sokolola ekalo liwa liolondingaĩvi, ci kasi ndoku lekisa ocituwa covinyama ka vi sokolola. Momo ovisimĩlo viaco, vi vetiyiwa lolonjongole vietu. Omo liaco, tu sukila oku songuiwa lolonumbi via Yehova kuenda oku kolela okuti, eye o tu kuatisa. Yehova o tu ‘muisa ulamba’ omo liukamba wetu laye.
77:6. Voku lekisa esakalalo kovina viespiritu loku sandiliya olonumbi via Yehova, mua kongela oku sanda otembo yoku lilongisa kuenda oko solola ovina tua lilongisa. Omo liaco, tu sukila oku likolisilako oku ci linga.
79:9. Yehova o yeva olohutililo vietu. Capiãla enene nda tu lekisa esakalalo kesumbilo lionduko yaye.
81:13, 16. Oku yeva kondaka ya Yehova loku endela volonjila viaye, ci nena asumũlũho.—Olosapo 10:22.
82:2, 5. Omo liekambo liesunga, “oviseveto viosi violuali” via lisenga. Evĩho li tateka ekalo liwa liomanu.
84:1-4, 10-12. Ukualosamo wa lekisa esakalalo konjo yefendelo lia Yehova. Handi vali, wa kuatelevo esanju omo liesumũlũho lioku vumba Yehova. Omo liaco, tu sukilavo oku kuama ongangu yaye.
86:5. Oku kũlĩha okuti Yehova ‘ukuakuecela,’ ci tu vetiya oku eca olopandu kokuaye. Eye o kũlĩhĩsa ovilinga vieca esunga lioku lekisa ohenda komunu wosi wa likekembela.
87:5, 6. Anga hẽ vana vaka kala Voluali Luokaliye, vaka kũlĩha olonduko viomanu vosi va pindukila omuenyo wo kilu? Ovinimbu evi vi lekisa okuti, vaka kũlĩha muẽle olonduko viavo.
88:13, 14. Olonjanja vimue nda Yehova ka tambulula lonjanga olohutililo vietu, oyongola oku mola ndomo tu lekisa ekolelo kokuaye.
‘PANDULI YEHOVA, LOKU SIVAYA ONDUKO YAYE’
Kũlĩhĩsa esunga lioku sivaya Yehova ndomo lia lekisiwa vonepa yakuãla yelivulu Liolosamo. Vosamo 90, Mose wa tukula oku litepa ku kasi pokati kotembo ya Yehova Soma ka pui, kuenda omuenyo womanu. (1 Timoteo 1:17) Ndomo ca lekisiwa Vosamo 91:2, Mose wa tukula Yehova hati: “Eye ocivundilo cange, haeye ombonge yange.” Suku eye wa kala Ono yekolelo liaye. Osamo yikuãimo, yi tukula ovituwa viwa via Yehova, ovisimĩlo viaye via velapo, kuenda ovilinga viaye vi komõhisa. Olosamo vitatu via sulako vionepa eyi, vi fetika loku popia hati: “Yehova o viala.” (Osamo 93:1; 97:1; 99:1) Ukualosamo poku tukula Yehova hati eye Ululiki wetu, o tu laleka ‘oku eca olopandu kokuaye loku sivaya onduko yaye.’—Osamo 100:4.
Osoma ya sumbila Yehova, yendisa ndati uviali waye? Osamo 101, ya sonehiwa la Soma Daviti, yeca etambululo. Osamo yikuãimo yi tu sapuila okuti, Yehova “o yeva ohutililo yolosuke. [Kuenda] ka pembula alombelo avo.” (Osamo 102:17) Osamo 103, yi tukula Yehova hati, ukuacisola ka ci pui, haeye ukuahenda. Ukualosamo poku tukula ovina Yehova a lulika voluali, wa popia hati: “A Yehova, oviluvo viove via lua cimue. Viosi wa vi lulika lolondunge.” (Osamo 104:24) Ovisungo vivali via sulako vionepa Yakuãla Yelivulu Liosamo, vi sivaya Yehova omo liovilinga viaye vi komõhisa.—Osamo 105:2, 5; 106:7, 22.
Atambululo Kapulilo Embimbiliya:
91:1, 2.—‘Ocivundilo ca Tõlo’ ci lomboloka nye? Tu pondola ndati oku ‘tungamo’? Ocitumãlo caco ci lomboloka eliangiliyo lia Yehova lioku tu teyuila konepa yespiritu. Omanu vana ka va kolela Kokuaye, ka va kũlĩhĩle ocitumãlo caco. Yehova o linga lika ocivundilo cetu nda tua kolela kokuaye. Ekolelo liaco tu li lekisa poku u sivaya okuti, eye Soma ka Pui, kuenda poku kunda olondaka viwa Viusoma. Etu tua kolapo konepa yespiritu. Momo tua kũlĩha okuti, Yehova o tu kuatisa kapuluvi osi.—Osamo 90:1.
92:12—‘Olondingesunga vi pama ndati nduti weva’? Uti weva wa kũlĩhĩwa okuti, wa miuha ciwa kuenda ka u liwekapo oku ima apako. Omunu wosi ukuesunga, ka yapuka volonumbi via Yehova. Eye amamako oku ima ‘apako awa’ oku kongelamo ovilinga viwa.—Mateo 7:17-20.
Ceci tu Lilongisilako:
90:7, 8, 13, 14. Ovilinga vĩvi, vi nyõla ukamba wetu la Yehova. Kuenda tua kũlĩha okuti, lomue o tẽla oku seleka ekandu liaye kovaso a Yehova. Omo liaco, nda tua likekembela loku siapo ovilinga vietu vĩvi, Yehova o tu kuatela ohenda, locisola.
90:10, 12. Omo okuti, otembo yomuenyo wetu yitito, tu sukila oku ‘tenda oloneke vietu.’ Tu vi tenda ndati? Tu ci linga poku kuata ‘utima wolondunge’ okuti, otembo yetu ka tu yi pesila kovina ka vi kuete esilivilo. Pole, tu yi pesila koku linga ovina vi sanjuisa Yehova. Omo liaco, tu sukila oku pitisa kovaso ovina viespiritu kuenda oku pesila otembo kovina vi kuete esilivilo.—Va Efeso 5:15, 16; Va Filipoi 1:10.
90:17. Ca sunguluka oku pinga ku Yehova okuti, o “kolisa upange wovaka etu” poku sumũlũisa alikolisilo etu kupange woku kunda.
92:14, 15. Akulu vendamba va pama lika konepa yespiritu, poku kuata ombili yoku lilongisa Ondaka ya Suku, loku endaenda kolohongele. Kuenje va kuata esilivilo liocili vekongelo.
94:19. Eci tu kuata ‘atatahãi vutima,’ tu sukila oku tanga loku sokolola elembeleko li sangiwa Vembimbiliya. Momo poku cilinga, ci tu pamisa.
95:7, 8. Oku yevelela kelungulo Liembimbiliya loku lekisa epokolo, ci tu teyuila oku tĩlisa utima.—Va Heveru 3:7, 8.
106:36, 37. Ovinimbu evi Viembimbiliya, vi lekisa elitokeko li kasi pokati koku fendela oviteka loku lumba ovilumba kolondele. Ovio vi lekisa okuti, omunu wosi o fendela oviñumañuma, o yonjiwa lolondele. Omo liaco, Embimbiliya li tu lungula hati: “Lilavi koviteka.”—1 Yoano 5:21.
Ene Amanu “Sivayi Yehova”
Ovisungo vitatu via sulako vionepa Yakuãla Yelivulu Liolosamo, vi malusula lolondaka viokuti: Ene Amanu “Sivayi Yehova.” Osamo yasulako yonepa eyi Yakuãla, yi fetikavo lolondaka evi. (Osamo 104:35; 105:45; 106:1, 48) Ondaka yokuti, “Sivayi Yehova,” ya tukuiwa olonjanja vialua vonepa eyi Yakuãla Yelivulu Liolosamo.
Etu tu kuete esunga lioku sivaya Yehova. Okupisa Kosamo 73 toke 106, yi tu ĩha esunga lioku eca olopandu ku Yehova Isietu wokilu. Eci tu sokolola ovina a siata oku tu lingila levi aka tu linga kovaso, tu vetiyiwa oku ‘sivaya Yehova’ oloneke viosi.
[Elitalatu kemẽla 8]
Tu pondola lika oku yula evĩho poku ‘kala ocipepi la Yehova’ ndeci Asafe a linga
[Elitalatu kemẽla 9]
Olohoka via Fareo via lunduiwa Vokalunga Kakusuka
[Elitalatu kemẽla 9]
Ove hẽ wa kũlĩha esunga lieci omana ya tukuiwila hati, ‘okulia kuovangelo’?
[Elitalatu kemẽla 11]
Nye ci tu kuatisa oku yuvula ‘atatahãi vutima wetu’?