Ondaka ya Yehova yi Kasi Lomuenyo
Atosi a Velapo Velivulu Lia Hosea
APATA ekũi vuviali wa va Isareli a liwekelepo oku kuama efendelo liocili. Ndaño okuti kotembo ya Yerevoama yavali kua kala ukuasi walua, ukuasi waco weya oku tepuluka noke yolofa viaye. Noke kua pita ovitangi vialua. Pokati kolosoma epandu via piñala Yerevoama, vikuãla via pondiwa. (2 Olosoma 14:29; 15:8-30; 17:1-6) Hosea wa fetika upange waye wuprofeto kunyamo wo 804 Kotembo Yale, pole, vokuenda kueci ci soka 59 kanyamo a talavaya, vofeka mua pita ungangala walua.
Olohuela via Hosea via kala ocindekaise cohenda Yehova a kuatela ofeka ya va Isareli vakuesino. Hosea wa kala oku sandeka olondaka viatiamẽla kolohole via va Isareli kuenda esombiso liuviali wa Yuda. Olondaka viaco, wa vi soneha locikembe kuenda lunene u vetiya omanu oku likekembela. Ovio vi kasi lomuenyo havio vi kuete unene, momo vi sangiwa Vondaka ya Suku.—Va Heveru 4:12.
“KA KUELE UKÃI OCIPUEPUE”
Yehova wa sapuila Hosea hati: “Kuende, ka kuele ukãi ocipuepue.” Hosea wa pokola konumbi yaco kuenda wa cita omõla la Gomere. Pole, omãla vavali va kuamamo ka va kaile vaye. Pokati komãla vaco umue wo luka hati, Kasangiohenda, momo Yehova ka kuatelele vali ohenda va Isareli. Wavali wa tukuiwa hati, Hamanuvangeko, momo Yehova wa pembula omanu vaye omo liakandu avo.
Nye Yehova a yeva vutima omo liesino liomanu vaye? Eye wa sapuila Hosea hati: “Kuende vali. Ka sole ukãi wa soliwa lombaisi yaye, haye ocipuepue. U sola ndeci Yehova a sole omãla va Isareli, ndaño va imba ovaso kolosuku viñi.”—Hosea 3:1.
Atambululo Kapulilo Embimbiliya:
1:1—Momo lie Hosea a tukuila olosoma vikuãla vio ko Yuda osimbu okuti wa tukula lika yimosi yo ko Isareli? Momo kocikoti ca Daviti oko lika kua nõliwile olosoma vi viala omanu va Suku. Olosoma via vialele konano ka via tiamẽlele kocikoti ca Daviti.
1:2-9—Anga hẽ Hosea wa kuelele muẽle ukãi ocipuepue? Oco, wa kuelele. Hosea wa kuela muẽle ukãi wa kala ocipuepue. Uprofeto ka lekisile nda olondaka viaco via kala onjoi ale ocinjonde.
1:7—Otembo yipi va Yudea va yovuiwa loku lekisiwa ohenda? Olondaka viaco, via tẽlisiwa koloneke via Soma Esekiya kunyamo wo 732 Kotembo Yale. Yehova wa malako ohele va Asuria va kala oku kokela o Yerusãlai, poku tuma ungelo wa ponda eci ci soka 185.000 kasualali vuteke umosi. (2 Olosoma 19:34, 35) Yehova ka yovuile va Yuda “lohonji pamue losipata, pamue lovita, pamue lotuvalu, pamue lava vakuakuendela kotuvalu,” pole, wa va yovola lungelo.
1:10, 11—Omãla va Isareli “va likongela” ndati lomãla va Yuda nda uviali wa va Isareli wa kunduiwa kunyamo wo 740? Omanu va kala kuviali wo konano va tilila ko Yuda osimbu o Bavulono ka ya kunduile ofeka yo Yuda kunyamo wo 607. (2 Asapulo 11:13-17; 30:6-12, 18-20, 25) Eci va Yudea va tunda kumandekua kunyamo wo 537, pokati kavo, pa kala valua va tiamẽlele kusoma wo konano wa va Isareli.—Esera 2:70.
2:21-23—Olondaka Yehova a popia hati: “Ndu likũlĩsila ame muẽle vofeka. Ndingila ohenda,” vi lomboloka nye? Omõla watete Hosea a cita la Gomere, wa tukuiwa hati, Yesirele. (Hosea 1:4) Onduko yaco yi lomboloka okuti, “Suku oka imba ombuto.” Oyo, yi tiamisiwila koku ongolola omanu va Yehova kunyamo wo 537, kuenda oku va sopeka ndombuto vofeka ya va Yudea. Ofeka yaco, ya sukilile oku ima otiliku, ovinyu lulela momo ya kala upolokoso vokuenda kueci ci soka 70 kanyamo. Vupopi umue wocindekaise ocitumasuku caco ca lekisile okuti ovailu a tambulula ongongo, longongo yi tambulula otiliku lovinyu lulela. Kuenje, ilu li pinga ku Suku oco ombela yi loke. Eci ci lekisa okuti vana va tunda kumandekua ka va kaile onjala. Upostolo Paulu la Petulu, va tiamisila ocitumasuku celivulu lia Hosea 2:23, koku nõliwa kuolombuavekua.—Va Roma 9:25, 26; 1 Petulu 2:10.
Ceci tu Lilongisilako:
1:2-9; 3:1, 2. Ivaluka okuti Hosea wa amamako oku kala lukãi waye oco a linge ocipango ca Suku! Anga hẽ tuka yuvula oku pitisa kovaso olonjongole vietu oco tu linge ocipango ca Suku?
1:6-9. Ndeci Yehova a suvuka ukahokolo konepa yespiritu, hacovo konepa yetimba.
1:7, 10, 11; 2:14-23. Tu sukila oku kolela okuti olohuminyo via Yehova vika tẽlisiwa. Momo cosi a popele catiamẽla ku va Isareli la va Yuda, ca tẽlisiwa.
2:16, 19, 21-23; 3:1-4. Yehova ecela vana va likekembela lutima wosi. (Nehemiya 9:17) Omo liaco, tu sukila oku lekisa ocikembe kuenda ohenda ku vamanjetu ndeci Yehova a lingainga.
“YEHOVA O KUETE ONDAKA”
“Yehova o kuete ondaka lolonungi viofeka.” Momo lie? Momo “vofeka ka mũli esunga, ndaño ohenda, ndaño ukũlĩhĩso.” (Hosea 4:1) Va Isareli va enda oku nyana, oku ponda, loku linga ukahonga konepa yetimba kuenda kespiritu. Ovo ka va sandiliyile ekuatiso lia Suku, pole, va “vilikiya [va] Egito, [kuenda va] Asuria.”—Hosea 7:11.
Yehova wa lekisa esombiso liaye poku popia hati: “Isareli wa liwa.” (Hosea 8:8) Usoma wa Yuda wa kuatelevo ekandu. Kelivulu lia Hosea 12:2, tu tangako hati: “Yehova o kuete ondaka la Yuda, kuenje o yambula Yakoba ndeci ca soka lolonjila viaye. U fetuluinyila ovilinga viaye.” Ohuminyo ya Suku ya linga hati: ‘Ndi va yovola kunene wonjembo kuenda kokufa,’ ya tẽlisiwa.—Hosea 13:14.
Atambululo Kapulilo Embimbiliya:
6:1-3—Helie wa popia hati: “Enjui, tu tiukili ku Yehova”? Va Isareli va sukilile oku li vetiya pokati oco va tiukile ku Yehova. Nda va ci lingile, nda va lekisa okuti va likekembela akandu avo. Pole, ocisola cavo ca pita ombamba “ndelende . . . kuenda ndowume u loluka lonjanga.” (Hosea 6:4) Hosea eye wa kala oku vetiya oco va tiukile ku Yehova, momo va Isareli va kala kuviali wapata ekũi, va sukilile oku likekembela lutima wosi.
7:4—Ukahokolo va Isareli va enda oku linga wa sokisiwile ndati “ndofolono ya sanyisua”? Olondaka evi, vi lekisa evĩho lia kala vovitima viavo.
Ceci tu Lilongisilako:
4:1, 6. Oco tu amameko oku kala vocisola ca Yehova, tu sukila oku kuata ukũlĩhĩso watiamẽla kokuaye, kuenda oku kapako eci tua siata oku li longisa.
4:9-13. Yehova oka sombisa vana va lingainga ukahonga lava vo fendela lombambe.—Hosea 1:4.
5:1. Vana va kuete ovikele vekongelo lia Suku, va sukila oku yuvula alongiso esanda. Va sukilavo oku yuvula ovina vi kokela vakuavo ocilondokua kuenda efendelo liesanda.
6:1-4; 7:14, 16. Oku likekembela kuombambe, ka kua sungulukile. Oco omunu wa lueya a kuate ohenda ya Suku, o sukila oku likekembela lutima waye wosi, loku kapako olonumbi via Suku kuenda oku lekisa okuti wa velisapo efendelo liocili.—Hosea 7:16.
6:6. Omunu o linga ekandu o lekisa okuti ka sumbilile Suku. Ndaño o likolisilako oku linga ovina viespiritu, ka tẽla oku imula ekandu liaye.
8:7, 13; 10:13. Eci ca pita la va Isareli omo lioku fendela oviteka, ci lekisa ocili colondaka via linga hati: “Eci omunu a kũla haico a lombola.”—Va Galatia 6:7.
8:8; 9:17; 13:16. Ovitumasuku viatiamẽla kusoma wa va Isareli, via tẽlisiwa eci va Asuria va lundula olupale luo Samaria. (2 Olosoma 17:3-6) Tu sukila oku kolela okuti ovina viosi Suku a likuminya, vika tẽlisiwa. —Atendelo 23:19.
8:14. Kunyamo wo 607, Yehova wa tuma va Bavulono oku “yoka” ovaimbo a va Yudea, kuenje ofeka yaco kumue lo Yerusalãi ya siala upolokoso. (2 Asapulo 36:19) Ohuminyo ya Suku ya tẽlisiwa muẽle. —Yehosua 23:14.
9:10. Va Isareli ndaño va li tumbikile ku Suku, va “enda ko Baalepeore kuenje va litumbika [Kokuaye,] yu va livihisa ha va lisoki levi va sola.” Tu sukila ku kuata olondunge, poku yuvula ovituwa viavo vĩvi, kuenda oku likolisilako oku linga ocipango ca Yehova. —1 Va Korindo 10:11.
10:1, 2, 12. Poku fendela Suku, tu sukila oku yuvula ombambe. Nda tua ‘kũla esunga, tu kongula ohenda ya Suku.’
10:5. O Betawene, (yi lomboloka “Onjo Yovina Via Vĩha,”) ya kala onduko yoku sepula o Betele, (yi lomboloka “Onjo ya Suku.”) Eci ociñumañuma conãle ca kala vo Betawene cambatiwa kumandekua, olonungi vio Samaria va lisiõsiõla calua. Momo va pesela ocikuata cefendelo liavo. Oku kolela kocina cimue ka ci kuete unene woku li teyuila oco muẽle, ekambo liolondunge!—Osamo 135:15-18; Yeremiya 10:3-5.
11:1-4. Yehova otembo yosi otata omanu vaye locisola. Oku pokola ku Suku, ka ca tĩlile.
11:8-11; 13:14. Ondaka ya Yehova yatiamẽla koku tumbulula efendelo liocili, ‘ka ya tiukilile ño kokuaye, momo ya tẽlisiwa.’ (Isaya 55:11) Kunyamo wo 537, olomandekua via kala ko Bavulono, via tiukila ko Yerusalãi. (Esera 2:1; 3:1-3) Ovina viosi Yehova a popia vonduko yovaprofeto vaye, via tẽlisiwa.
12:6. Tu sukila oku likolisilako oku lekisa ocisola, lesunga kuenda oku imba ovaso ku Yehova.
13:6. Va Isareli “ve kuta oco ovitima viavo via tumba kuenje va [ivala Yehova.]” Omo liaco, tu sukila oku yuvula ocituwa coku litunula.
“OLONJILA VIA YEHOVA VIA SUÑAMA”
Hosea wa pinga hati: “A Isareli, tiukili ku Yehova Suku yene, momo wa kupukili akandu ene.” Eye wa pañinya omanu oco va popie la Yehova hati: “Tupe evĩho liosi, tambula esunga li sialapo kuenje tu ku lumbila olondaka viovimẽla vietu, olonãle havioko.”—Hosea 14:1, 2.
Omanu vakuakandu va sukilile oku amẽla ku Yehova, loku tava kolonumbi viaye, kuenda oku eca ovilumba viavo. Momo lie? “Momo olonjila via Yehova via suñama kuenje vakuesunga va endelamo.” (Hosea 14:9) Tu sanjuka calua poku mola okuti koloneke vilo via sulako omanu valua “va pongoloka ha va sandi Yehova Suku yavo”! —Hosea 3:5.
[Elitalatu kemẽla 15]
Eci Yehova a linga la va Isareli, ca lekisiwa leci ca pita lolohuela via Hosea
[Elitalatu kemẽla 17]
Uviali wapata ekũi wa va Isareli wa sulila eci o Samaria ya kunduiwa kunyamo wo 740