Upi Ongangu Kovaprofeto—Hosea
1. Epulilo lipi o pondola oku lipula ove muẽle?
1 “Alikolisilo api nda nõlapo oku linga omo liupange wa Yehova?” Citava okuti wa lipulile ale ondaka eyi noke yoku sokolola kocisola kuenda kohenda ya Yehova. (Osa. 103:2-4; 116:12) Hosea wa linga ovina viosi Yehova o tumile ndaño ca sukilile alikolisilo alua. Tu kuama ndati ongangu ya Hosea?
2. Tu kuama ndati ongangu yiwa ya Hosea yoku pandikisa kupange woku kunda?
2 Kunda Ndaño Kotembo Yovitangi: Esapulo lia Hosea tete lia tiamisiwila kuviali wapata akũi a va Isareli, vana va silepo efendelo liocili. Soma Yerevoama II wa enda oku linga ovina ka via sungulukile kovaso a Yehova kuenda wa amamako lefendelo lionãle lina lia fetikiwile la Yerevoama I. (2 Olos. 14:23, 24) Olosoma vina via kuamamo, via amamako oku vĩhisa efendelo liocili liuviali wapata ekũi, toke eci va nyõliwa kunyamo wo 740 O.Y. Pole, ndaño okuti, kua kala efendelo liesanda, Hosea wa amamako oku vumba Yehova lekolelo nduprofeto vokuenda kueci ci soka 59 kanyamo. Etu hẽ, tua nõlapo oku amamako oku kunda unyamo lunyamo ndaño omanu ka va lekisa onjongole ale tu lambalaliwa?—2 Tim. 4:2.
3. Poku pongiya olondaka vioku fetika ombangulo, momo lie tu sukilila oku sokolola ekalo liomanu vocikanjo cetu?
3 Sokolola Ohenda ya Yehova: Yehova wa sapuila Hosea oco a kuele “ukãi ocipuepue.” (Hos. 1:2) Ndaño ukãi waye Gomere, wo citila omõla umosi, citava okuti noke wa cita omãla vavali lulume ukuavo. Onjongole ya Hosea yoku ecela ukãi waye, ya situlula ohenda ya piãla Yehova a kuatela va Isareli poku ecela eci va likekembela. (Hos. 3:1; Va Rom. 9:22-26) Ove hẽ, wa nõlapo oku yuvula oku tẽlisa olonjongole viove oco o kuatise omanu vosi oku kũlĩha ohenda ya Yehova?—1 Va Kor. 9:19-23.
4. Alikolisilo api tu sukila oku linga omo liupange wa Yehova?
4 Afendeli vamue va Yehova va siata oku likolisilako oku siapo ovopange ana va fetiwa olombongo vialua, oco va pesile otembo yalua kupange woku kunda. Vakuavo va siata oku nõlapo oku yuvula oku kuela ale oku yuvula oku cita omãla oco va pitise kovaso upange Usoma. Eci tu sokolola omuenyo wa Hosea, tu sima okuti, ‘lalimue eteke nda tua tẽla oku linga ovina eye a linga.’ Omo liaco, osimbu tu sokolola kohenda ya piãla ya Yehova, loku kolela kespiritu sandu liaye oco li tu pamise, tu nõlipo oku linga upange wosi a tu ĩha ndeci Hosea a linga.—Mat. 19:26; Va Fil. 2:13.