Sanga Ekavuluko Kovina Viespiritu

“Likapi okanga yange . . . oco vu sanga ekavuluko vovitima viene.”​—⁠MAT. 11:⁠29.

1. Eliangiliyo lipi Suku a lingile Komunda Sinai, kuenda momo lie?

VOCISILA Covihandeleko ca tumbikiwa Komunda Sinai, mua kongelele oku lava Esambata. Vonduko ya Mose, Yehova wa tuma oku sapuila va Isareli hati: “Oloneke epandu o linga upange wove. Eteke liepanduvali o puyuka oco ongombe yove locimbulu cove vi mõle epuyuko, kuenda omõla upika wove ukãi lukombe va kavuluke.” (Etu. 23:​12) Omo okuti Yehova wa kapeleko vana va kala vemehi Liocihandeleko caco, wa linga eliangiliyo liokuti, afendeli vaye va kuata eteke ‘liekavuluko.’

2. Va Isareli va kuatisiwa ndati poku lava Esambata?

² Anga hẽ eteke Liesambata lia kala lika eteke liepuyuko? Sio, eteke liaco, lia nõliwile oco va Isareli va fendele Yehova. Oku puyuka keteke Liesambata, ca ecele kasongui vepata epuluvi lioku longisa epata liavo oku ‘endela vonjila ya Yehova loku linga esunga locili.’ (Efet. 18:​19) Eteke liaco lia ecelele apata oku kala pamosi lakamba loku sokolola ovilinga via Yehova, kuenda oku lingila kumosi ovina vi nena esanju. (Isa. 58:​13, 14) Ca velapo ceci okuti, Esambata lia kala ulembo wekavuluko liocili, lina li ka tẽlisiwa vokuenda Kuohulukãi Yanyamo Yuviali wa Kristu. (Va Rom. 8:​21) Nye ci popiwa koloneke vilo? Akristão vocili va yongola oku endela volonjila via Yehova, pi va pondola oku sanga ekavuluko, kuenda va kuata ndati ekavuluko liaco?

Sanga Ekavuluko Poku Kuata Ukamba la Vamanji

3. Akristão vatete va li kuatisa ndati pokati, kuenda onima yipi va tambula?

³ Upostolo Paulu, wa lekisa okuti, ekongelo li kasi ‘ndongunji yi talamisa ocili hailio onjaka yaco.’ (1 Tim. 3:​15) Akristão vatete, va tambuile ekuatiso liaco poku likolisa pokati kuenda oku lipamisa locisola. (Va Efe. 4:​11, 12, 16) Eci Paulu a kala ko Efeso wa kolisiwa poku pasuisiwa la vamanji vekongelo lio ko Korindo. Kũlĩhĩsa esanju eye a kuata eci a popia hati: “Nda yolela okuiya kua Stefana la Fortunato la Akaiko, . . . momo va kavuluisa utima wange.” (1 Va Kor. 16:​17, 18) Handi vali, eci Tito a endele ko Korindo oku kuatisa vamanji, Paulu wa sonehelavo ekongelo liaco hati: “Ene vosi wa tulisi utima waye.” (2 Va Kor. 7:​13) Koloneke vilo, Olombangi Via Yehova via siatavo oku sanga ekavuluko poku li pamisa pokati la vamanji.

4. Olohongele vi tu kavuluisa ndati?

⁴ Ove wa kũlĩha okuti, oku endaenda kolohongele, ci nena esanju lialua. Kolohongele viaco, tu pondola ‘oku kuata epuluvi lioku likolisa pokati, kuenda oku pamisa ekolelo lietu.’ (Va Rom. 1:​12) Ukamba wetu la vamanji, wa velapo vali okuti una tu kuetele vana tua siata oku li sanga lavo olonjanja vimue u sule. Vamanji akamba vetu vocili, tu va kuetele ocisola, kuenda tua va sumbila. Tu sanjuka calua kuenda tu pamisiwa poku li sanga lavo olonjanja viosi kolohongele vietu vokuenda kuosemana.​—⁠File. 7.

5. Oku kala la vamanji kolohongele vimbo levi viofeka vi tu kavuluisa ndati?

⁵ Ekavuluko likuavo, li tunda kolohongele vimbo kuenda viofeka, vina via siata oku lingiwa unyamo lunyamo. Kolohongele viaco, ka tu tambula lika ovava omuenyo a sangiwa Vondaka ya Suku, pole, vi tu ĩhavo epuluvi lioku lianja la vamanji. (2 Va Kor. 6:​12, 13) Nye tu sukila oku linga nda tu kuete osõi yoku kala pokati komanu? Onjila yimue yoku kũlĩha vamanji, oku lieca olumue kovopange a siata oku lingiwa kolohongele viofeka. Manji umue ukãi, noke yoku kuatisa akombe va endele kohongele yofeka, wa popia hati: “Sia kũlĩhĩle omanu valua kocitumãlo caco, pole nda kũlĩhĩle lika epata liange, kuenda akamba vamue. Noke poku kuatisa kupange woku yelisa, ndeya oku kũlĩha vamanji valua! Kuenje, nda kuata esanju lialua!”

6. Tu kuata ndati ekavuluko osimbu tu kasi koloneke vietu viepuyuko?

⁶ Va Isareli va kuatele ocituwa coku enda ko Yerusalãi kocipito ca enda oku lingiwa olonjanja vitatu vunyamo. (Etu. 34:​23) Poku ci linga, va enda oku siapo ovapia avo, lolomĩlu, kuenje, va linga ungende woku pita vatapalo eyuka oneketela. Pole, poku pitila vonembele, va enda oku kuata ‘esanju lialua’ omo lioku “sivaya Yehova” kumue la vakuavo. (2 Asa. 30:​21) Koloneke vilo, vamanji valua va siatavo oku kuata esanju poku linga ungende kumue lapata avo oco va ka nyule o Betele Yolombangi Via Yehova yi kasi ocipepi lavo. Koloneke viove viepuyuko o pondola hẽ oku linga eliangiliyo lioku nyula o Betele kumue lepata liove?

7. (a) Olomapalo vi pondola oku tu kuatisa ndati? (b) Nye ci sukiliwa oco ovitalukilo vi nene esanju?

⁷ Oku kala kumosi lepata kuenda akamba, poku linga ovitalukilo ci nenavo esanju. Soma Salomone wa popia hati: “Ciwa komunu ceci, oku lia loku nyua loku sanjukila upange waye, ca velapo ka kuli.” (Uku. 2:​24) Oku lingila kumosi la vamanji olomapalo vimue, ka ci kavuluisa lika etimba, puãi ci vokiya ocisola cetu, kuenda ci tu kuatisa oku kũlĩha ciwa vamanji. Oco ovitalukilo viaco vi nene esanju, ciwa okuti vi lingiwa locimunga citito kuenda oku kũlĩhĩsa okuti kuli umue o ci songuila, ca piãla enene nda ku kala ovinyua vi koluisa.

Upange Woku Kunda u Nena Ekavuluko

8, 9. (a) Lombolola oku litepa ku kasi pokati kesapulo lia Yesu leli lia vakuavisonehua la va Fariseo. (b) Tu kuatisiwa ndati poku kundila omanu esapulo Liembimbiliya?

⁸ Yesu wa kuatele ombili kupange woku kunda, kuenda wa vetiya olondonge oku kuama ongangu yaye. Uvangi waco wa lekisiwa volondaka a popia hati: “Okungula kua lua puãi olondingupange viñamiñami. Pingi ku Cime cokungula oco a tume olondingupange koku ungula kuaye.” (Mat. 9:​37, 38) Esapulo ‘liolondaka viwa’ Yesu a kunda, lia kavuluisa omanu. (Mat. 4:23; 24:​14) Esapulo liaco lia litepele lolonumbi via tĩla va Fariseo va enda oku kisika komanu.​—⁠Tanga Mateo 23:​4, 23, 24.

⁹ Eci tu kundila omanu esapulo Liusoma, tu va kavuluisa konepa yespiritu, kuenda ci tu kuatisavo oku vokiya elomboloko liocili li sangiwa Vembimbiliya. Ukualosamo wa popia hati: “Sivayi Yehova. Momo Suku yetu ukuahenda kuenje oku wimbila ovisungo viesivayo oco ciwa.” (Osa. 147:⁠1) O pondola hẽ oku vokiya esanju liove li tunda koku sivaya Yehova poku kuatisa omanu?

10. Onima yiwa kupange woku kunda yi tiamisiwila hẽ konjongole omanu va lekisa kesapulo tu va kundila? Ci lombolola.

¹⁰ Ocili okuti, kovikanjo vimue omanu va siata oku lekisa onjongole yalua kesapulo liolondaka viwa, osimbu okuti, kovikanjo vikuavo ka va tava. (Tanga Ovilinga 18:​1, 5-8.) Nda o kasi vocikanjo cimue okuti omanu ka va lekisa onjongole yalua kesapulo Liusoma, tiamisila utima kovisimĩlo viokuti, o kasi oku tẽlisa ocikele coku kunda. Ivaluka okuti, elikolisilo liove lioku sapula onduko ya Yehova ha liolivovako. (1 Va Kor. 15:​58) Omanu oku tava kolondaka viwa ka ca tiamẽlele kokuetu. Pole, tu sukila oku kolela okuti, Yehova o vetiya vakuavitima via sunguluka oco va kuate epuluvi lioku tava kesapulo Liusoma.​—⁠Yoa. 6:⁠44.

Elilongiso Liepata li Nena Ekavuluko

11. Ocikele cipi Yehova a eca kolonjali, kuenda vi ci tẽlisa ndati?

¹¹ Olonjali via sumba Suku vi kuete ocikele coku longisa omãla vavo ca tiamẽla ku Yehova kuenda kolonjila viaye. (Esin. 11:​18, 19) Nda wunjali, anga hẽ wa sokiya otembo yoku longisa omãla vove ovilongua via Isietu wo kilu? Oco o tẽlise ocikele caco, loku kuatisa epata liove kovina va sukila, Yehova wa siata oku tu ĩha okulia kualua kuespiritu, ku sangiwa valivulu, volorevista, volovidio, kuenda volokasete vioku yevelela.

12, 13. (a) Elilongiso Liepata koñolosi li pondola oku kuatisa ndati apata? (b) Olonjali vi limbuka ndati okuti elilongiso liavo liepata li kasi oku va nenela ekavuluko?

¹² Ukuenje wa kolelua haeye wa lunguka, wa lingavo eliangiliyo Lielilongiso Liepata koñolosi. Eliangiliyo liaco lia sokiyiwila oku lilongisa Embimbiliya lepata osemana loseman. Vamanji valua va siata oku limbuka okuti eliangiliyo liaco lia vokiya ukamba pokati kavo, kuenda va kasi oku pamisa ukamba wavo la Yehova. Pole, olonjali vi pondola oku limbuka ndati okuti elilongiso liavo liepata li kasi oku va nenela ekavuluko kespiritu?

¹³ Elilongiso Liepata, ka citava okuti, li lingiwa lesumuo okuti, vakuepata ka va lianji. Momo tu fendela ‘Suku yesanju,’ kuenda eye o yongola okuti, tu kuata esanju kefendelo lietu. (1 Tim. 1:11; Va Fil. 4:⁠4) Oku sokiya eteke likuavo koñolosi oco tu sapele ovina viatiamẽla Kembimbiliya, ci nena asumũlũho alua. Olonjali vi sukila oku lekisa esunguluko poku longisa, kuenda oku kuama olonjila via litepa vielilongiso. Epata limue lia sokiya okuti, omõla wavo o kuete ekũi lianyamo o tukuiwa hati, Brandon, o lombolola ulandu umue losapi hati: “Momo Lie Yehova a Nõlela Onyoha Oco yi Kale Ocindekaise ca Satana?” Osapi eyi ya sumuisa Brandon momo o sole calua olonyoha kuenda eci a limbuka okuti ovio vi tiamisiwila ku Satana, co tekavisa kutima. Apata amue olonjanja vimue a linga olondalama viopiwa Vembimbiliya, kuenje omumu lomunu vepata o tambula ocikele coku tanga onepa yaye Vembimbiliya, ale va kuama onepa yikuavo. Oku kuama onjila eyi, ka ci nena lika esanju komãla vove pole, ci va kuatisavo oku kapa kovitima viavo olonumbi Viembimbiliya.a

Yuvula Ovina vi Tepulula Ombili Yove

14, 15. (a) Asakalalo lekambo lioku kolapo, via livokiya ndati koloneke vilo via sulako? (b) Ovitangi vipi vikuavo tu pondola oku liyaka lavio?

¹⁴ Koloneke vilo via sulako, asakalalo lekambo lioku kolapo via livokiya calua voluali lulo lua vĩha. Omanu valua va siata oku liyaka lekambo liupange kuenda uhukũi. Vana va talavaya, va limbuka okuti olombongo va nganyala ka vi tẽla oku tekula epata. (Ci sokisa lelivulu lia Hagai 1:​4-6.) Olosipayu kuenda asongui vakuavo, ka va tẽla oku malako ungangala lovina vikuavo via vĩha, ndaño va siata oku likolisilako oku ci linga. Omanu valua va siata oku sumua omo liovitangi viavo.​—⁠Osa. 38:⁠4.

¹⁵ Akristão vocili, va siatavo oku liyaka lovitangi, kuenda asakalalo oluali lua Satana. (1 Yoa. 5:​19) Olonjanja vimue, va siata oku lambalaliwa osimbu va amamako oku pandikisa lekolelo ku Yehova. Yesu wa popia hati: “Nda va fũkĩlisa ame, ene vo fũkĩlisivo.” (Yoa. 15:​20) Pole, ndaño ‘tu kangisiwa, ka tu yandulukiwa.’ (2 Va Kor. 4:⁠9) Momo lie?

16. Nye ci tu kuatisa oku amamako lesanju?

¹⁶ Yesu wa popia hati: “Enjui kokuange, vosi wa sovoloki kuenda wa lemiwi kuenje ndu kavuluisi.” (Mat. 11:​28) Oku kuata ekolelo kocisembi ca Kristu ci tu kuatisa oku kolela ku Yehova. Nda tua ci linga, tu kuata “unene wa piãla.” (2 Va Kor. 4:⁠7) Espiritu sandu lia Suku, “oñuatisi” yi pamisa ekolelo lietu okuti, ka tu pandikisa lika kovitangi kuenda kelambalalo, pole, li tu kuatisavo oku amamako lesanju.​—⁠Yoa. 14:26; Tia. 1:​2-4.

17, 18. (a) Ovituwa vipi tu sukila oku yuvula? (b) Nye ci iyilila koku pitisa kovaso olomapalo?

¹⁷ Koloneke vilo, Akristão vocili va sukila oku lavulula oco ka va ka yapuisiwe layele oluali lulo lua vĩha. (Tanga Va Efeso 2:​2-5.) Nda ka tua lavuluile, tu yapuisiwa ‘loloñeyi vietimba, loñeyi yovaso, kuenda oku litunila ovina viomuenyo waluo.’ (1 Yoa. 2:​16) Pamue tu tava kuhembi wokuti, oku tẽlisa oloñeyi vietimba ci nena ekavuluko. (Va Rom. 8:⁠6) Omanu vamue va siata oku litumbika koku sipa eliamba, kuholua, koku tala vana va kasi epolõla lava va linga ukahonga, olomapalo viungangala, kuenda ovina vikuavo vi vetiya oloñeyi viavo vietimba. Satana wa siata oku ‘yonja’ omanu poku va vetiya oku likavuluisa loloñeyi vĩvi.​—⁠Va Efe. 6:⁠11.

¹⁸ Ocili okuti, oku lia, loku nyua, kuenda oku linga olomapalo vi nena esanju, ca sunguluka nda vi lingiwa lonjila yimue yiwa. Pole, ka tu ka eceleli okuti ovina viaco tu vi pitisa kovaso komuenyo wetu. Oku lekisa esunguluko loku lisuluvika kovina viaco, ci kuete esilivilo ca piãla enene koloneke vilo. Oku litumbika kolonjongole vietu muẽle, ci pondola oku tu yapuisa, noke tu kuata ‘owesi pamue tu kala ndava ka va imi apako kuenje ka tu kuata ukũlĩhĩso watiamẽla ku Ñala yetu Yesu Kristu.’​—⁠2 Pet. 1:⁠8.

19, 20. Tu kuata ndati ekavuluko liocili?

¹⁹ Nda tua tiamisila utima wetu kolonumbi via Yehova, tu limbuka okuti asanju oluali lulo ka a ka kala otembo yalua. Mose wa limbukile ohele yaco, etu tu sukilavo oku ci linga. (Va Hev. 11:​25) Ekavuluko liocili halio li nena esanju ka li pui, li tunda koku linga ocipango ca Isietu wo kilu.​—⁠Mat. 5:⁠6.

²⁰ Tu amamiko oku kuata ekavuluko kovina viespiritu. Nda tua ci linga, ci tu kuatisa “oku imbapo oku tomba Suku lovipango violuali, . . . osimbu tu talamela elavoko liesumũlũho, hailio etukuluko liulamba wa Suku Tõlo kuenda Upopeli wetu Yesu Kristu.” (Tito 2:​12, 13) Omo liaco, tu amamiko loku ambata okanga ya Yesu, poku pokola kokuaye kuenda kolonumbi viaye. Nda tua ci linga, tu kuata esanju liocili, kuenda ekavuluko!

[Atosi pombuelo yamẽla]

O Tambulula Ndati?

• Afendeli va Yehova, va kuata ndati ekavuluko koloneke vilo?

• Upange woku kunda u tu kavuluisa ndati etu muẽle, la vana tu kundila?

• Nye asongui vapata va sukila oku linga, oco va limbuke okuti, elilongiso liavo liepata li kasi oku va nenela ekavuluko?

• Ovina vipi vi pondola oku tepulula ombili yetu kespiritu?

[Elitalatu kemẽla 26]

Nda tua likapa okanga ya Yesu, tu kuata ekavuluko