Wa Siata hẽ Oku Fetika Elilongiso Liembimbiliya Konjanja Yatete?
Eci tu sapela lomanu oco tu fetike lavo Elilongiso Liembimbiliya, vamue va siata oku tambulula hati, ka va yongola, ale va kasi oku lilongisa Embimbiliya ketavo liavo. Omo ka va kũlĩhĩle okuti ovina tu kasi oku lilongisa Vembimbiliya via litepa latavo akuavo, ka va limbuka ovina viwa va kasi oku pumba. Osimbu kua fetikile elilongiso Liembimbiliya, momo lie ku pitila akukutu amue oco o lekise ndomo elilongiso liaco li lingiwa onjanja yatete? Kũlĩhĩsa ndoco: Nda o tẽla oku teleka ciwa, ku sapuila lika omanu okuti, ndi teleka ciwa, pole, eca okulia kuaco kokuavo oco va ku mahe! Cimuamue haico o sukila oku linga vokuenda kuakukutu amue, poku kuama olonumbi vi sangiwa Vupange Wetu Wusoma, wosãi ya Susu wo 2006, kemẽla 6:
“[Tanga Isaya 33:24.] Noke pula ndoco: O tava hẽ okuti, olondaka evi eteke limue vi ka tẽlisiwa? [Ecelela etambululo.] Ndi yongola oku ku lekisa etosi limue li kuete esilivilo liatiamẽla kondaka eyi.” Eca komunu waco elivulu Embimbiliya li Longisa, kuenda tuvula kemẽla 36, ocinimbu 22. Linga epulilo li kasi kombuelo yemẽla, noke pinga kokuaye oco a sandiliye etambululo, osimbu o tanga ocinimbu caco. Noke linga vali epulilo, kuenda yevelela etambululo liaye. Kuenje, tanga laye ocinimbu cikuavo Cembimbiliya. Linga epulilo li ka tambuluiwa kepasu likuavo, kuenda sokiya laye eteke o ka tiuka vali. Nda wa kuama onjila eyi, ci lekisa okuti, wa fetika ale Elilongiso Liembimbiliya!