Otembo Yonjivaluko Epuluvi Lioku Vokiya Upange Woku Kunda!
1. Esunga lipi tu kuete lioku vokiya upange wetu woku kunda vosãi Yelombo, ya Kupupu kuenda Kupemba?
1 Ove hẽ o pondola oku vokiya upange wove woku kunda vokuenda kuotembo Yonjivaluko? Kovitumãlo vimue, kuli uvo uwa, kuenda otembo yina okuti ekumbi li tumãla oku iñila. Akundi vana va ka kala koloneke viepuyuko kupange ale kosikola, citava okuti va litumbika kupange woku kunda. Oku upisa keteke 2 ya Kupupu, tu ka eca otuikanda tuoku laleka omanu oku ka kala kumue letu Konjivaluko keteke 17 ya Kupupu. Handi vali, tu ka likolisilako oku vetiya onjongole ya vana va ka kala Konjivaluko kuenda oku va laleka oku iya kohundo yilikasi yi ka lingiwa vosemana 25 ya Kupupu. Omo liaco, kuli esunga lialua lioku vokiya upange wetu woku kunda vokuenda kuosãi Yelombo, ya Kupupu kuenda Kupemba.
2. Epuluvi lipi tu kuete lioku vokiya upange wetu woku kunda?
2 Akundi Vasokamo: Onjila yimue yoku vokiya upange wetu, oku talavaya ndakundi vasokamo. Omo okuti vosi yetu tu kuete otembo yitito, te tu linga esokiyo liwa kuenda apongoloko a sukiliwa. (Olosap. 21:5) Tu sukila oku tepulula otembo tu pesila kovopange ana ka a kuete esilivilo lialua. (Va Fil. 1:9-11) Momo lie ku sapuilako vakuene vekongelo onjongole yove oco o limbuke nda ovo va yongolavo oku talavaya ndakundi vasokamo?
3. Nye apata a pondola oku linga oco va talavaye calua koku kunda?
3 Kefendelo liene Liepata ciwa okuti vu sapela eci catiamẽla kovimãho viene. (Olosap. 15:22) Nda vosi vepata va li kuatisa pokati, citava okuti vamue va talavaya ndakundi vasokamo osãi yimosi ale vialua. Nye ci lingiwa nda esokiyo liaco ka li tẽliwa? Epata li pondola oku linga esokiyo lioku talavaya calua koku kunda koloñolosi ale kesulilo liosemana.
4. Asumũluho api eyilila koku vokiya upange wetu woku kunda kotembo Yonjivaluko?
4 Yehova wa kapako upange wetu kuenda o sanjukila alikolisilo etu. (Va Hev. 6:10) Oku eca ku Yehova eci tu kuete kuenda komanu, ci tu nenela esanju lialua. (1 Asa. 29:9; Ovil. 20:35) O pondola hẽ oku vokiya upange wove woku kunda kotembo Yonjivaluko kuenda oku sanjukila asumũluho eyililako?