Sanjukila Osãi Yocipito Conjivaluko!
1. Tu pondola ndati oku vokiya esanju lietu kotembo Yocipito Conjivaluko?
1 Ove hẽ, o pondola oku vokiya esanju liove vokuenda kuosãi Yelombo, ya Kupupu kuenda ya Kupemba? O ci linga poku pesila otembo yalua kupange woku kunda, poku kala ukundi wa sokamo. O ka vokiya ndati esanju liove?
2. Onima yipi yi tunda koku pesila otembo yalua kupange woku kunda?
2 Vokiya Esanju Liove: Yehova wa tu lulika lonjongole yoku kuata esanju li tunda koku lilongisa ovina viatiamẽla kokuaye. (Mat. 5:3) Eye o tu lekisavo onjila yi tu kuatisa oku kuata esanju li tunda koku kuatisa omanu. (Ovil. 20:35) Upange woku kunda, u tu ecelela oku fendela Suku kuenda oku kuatisa omanu. Ocili okuti, oku pesila otembo yalua kupange woku kunda, ci tu nenela esanju lialua. Omo liaco, nda tua likolisilako oku kunda tu loñoloha. Oku loñoloha, ku tu kuatisa oku kuata ekolelo kuenda oku yuvula usumba poku kundila omanu. Tu kuete apuluvi alua o ku kunda kuenda oku longisa omanu Embimbiliya. Upange woku kunda u tu nenẽla esanju lialua.
3. Momo lie osãi Yelombo leyi ya Kupupu vi tu kuatisila oku kala akundi va sokamo?
3 Osãi Yelombo leyi ya Kupupu, vi ka tu kuatisa oku kala akundi vasokamo okuti, tu pondola oku nõla nda tu talavaya 30 ale 50 kolowola via kisikiwa. Tu ka fetika Vocasapalo keteke 22 yosãi Yelombo, toke Sengunda 14 yosãi ya Kupupu keteke Liocipito Conjivaluko. Tu ka eca o tuikanda tuoku laleka omanu oco va ende konjivaluko. Vamanji vakongelo, va ka sanjuka calua omo liupange woku kunda tu ka linga “lutima umuamue” oco tu kundile omanu vosi vocikanjo kotembo ya sokiyiwa.—Sof. 3:9.
4. Nye tu sukila oku linga nda tu yongola oku kala akundi va sokamo?
4 Lipongiya Selo: Nda kua ci lingile handi, yilo oyo otembo yoku konomuisa ovina o yongola oku linga, oco o pesile otembo yalua kupange woku kunda vokuenda kuosãi yimosi ale olosãi vialua. Likutilila oco o tẽlise upange waco. (Tia. 1:5) Sapela lepata liove kumue la vamanji vekongelo catiamẽla kupange waco. (Olosap. 15:22) Ndaño okuti o kuete upange walua, pole, o pondola oku kuata esanju li tunda koku kala ukundi wa sokamo.
5. Onima yipi tu ka kuata nda tua pesila otembo yalua kupange woku kunda kotembo Yocipito Conjivaluko?
5 Yehova o yongola okuti afendeli vaye va kuata esanju. (Osa. 32:11) Nda tua likolisilako oku vokiya upange wetu woku kunda kotembo Yonjivaluko, tu kuata esanju, kuenda tu sanjuisavo Isietu o kasi kilu.—Olosap. 23:24; 27:11.