O ka Litumbika hẽ Kupange Wakundi Vasokamo?
1. Momo lie otembo Yonjivaluko epuluvi limue liwa lioku vokiya upange wetu woku kunda?
1 Otembo Yonjivaluko, epuluvi limue liwa lioku vokiya upange wetu woku kunda. Oyo otembo yoku sokolola ocisola calua Yehova a tu kuetele coku eca Omõlaye oco a linge ocisembi. (Yoa. 3:16) Eci ci tu vetiyiwa oku eca olopandu lutima wosi, loku kuata onjongole yoku sapuilako omanu ovina viatiamẽla ku Yehova, kuenda eci a kasi oku lingila omanu vosi kilu lieve. (Isa. 12:4, 5; Luka 6:45) Tu ka kuata epuluvi limue liesanju lioku laleka akamba lomanu vakuavo vocikanjo cetu oco va kale kumue letu Konjivaluko. Noke tu ka likolisilakovo oku pasuisa omanu vana va kala Konjivaluko. O yongola hẽ oku vokiya upange wove woku kunda poku kala ukundi wasokamo kosãi Yelombo, ya Kupupu ale ya Kupemba?
2. Momo lie tu popela tuti, osãi Yelombo epuluvi limue liwa lioku litumbika kupange wakundi vasokamo?
2 Osãi Yelombo Osãi Yimue Yilikasi: Osãi Yelombo yi ka kala osãi yimue yiwa yoku lisonehisa kupange wakundi vasokamo. Vana va kuete epondolo, citava oku nõla olowola via sokiyiwila akundi vasokamo ndeci, 30 ale 50 kolowola. Nda ekongelo li kasi oku nyuliwa la mitavaso kosãi Yelombo, vamanji vana va lisonehisa kupange wakundi vasokamo, va ka kala konjango yi lingiwa lakundi votembo yosi kuenda ava valikasi. Ndeci tua siata oku linga anyamo osi, upange woku eca otuikanda tuoku laleka omanu Konjivaluko yi ka lingiwa Vovali keteke 26 Yelombo wo 2013, u ka fetika keteke 1 Yelombo. Handi vali, osãi Yelombo yi kuete asulilo olosemana vitãlo. Momo lie ku sokoluila ovina o pondola oku linga kepuluvi liaco lilikasi?
3. Tu pondola oku linga ndati esokiyo oco tu vokiye upange wetu woku kunda?
3 Linga Esokiyo Cilo: Lilo olio epuluvi lioku konomuisa esokiyo liove loku limbuka apongoloko o sukila oku linga oco o lisonehise kupange wakundi vasokamo. Omo okuti ekuatiso liepata li kuete esilivilo, Kefendelo liene Liepata koñolosi, sapeli ovina viatiamẽla kocimãho o kuete loku linga esokiyo liaco. (Olosap. 15:22) Nda ku pondola oku lisonehisa kupange wakundi vasokamo ku ka sumue. Citava hẽ oku linga esokiyo lioku enda kupange woku kunda voloneke vina o kuete epondolo lioku ci linga? O pondola hẽ oku enda kupange woku kunda keteke likuavo vosemana?
4. Onima yipi tu ka kuata poku vokiya upange wetu kosãi Yelombo, ya Kupupu, leyi ya Kupemba?
4 Osimbu tu vokiya upange upange woku kunda kosãi Yelombo, ya Kupupu, leyi ya Kupemba, tu ka kuata esanju lonjolela yi tunda koku vumba Yehova kuenda koku kuatisa omanu. (Yoa. 4:34; Ovil. 20:35) Eci ca velapo vali ceci okuti, ocituwa cetu coku lieca olumue ci ka sanjuisa Yehova.—Olosap. 27:11.