O Pondola hẽ Oku Setukula Ombili ya Yehova Kuenda ya Yesu Vokuenda Kuotembo Yocipito Conjivaluko?

1.Alikolisilo api Olombangi Via Yehova via siata oku linga vokuenda Kuocipito Conjivaluko?

¹ Yehova o lekisa ombili poku tẽlisa ocipango caye. Poku tukula asumũluho amue Usoma wa Suku, kelivulu lia Isaya 9:7 ku lombolola ndoco: “Ombili ya Yehova Ukualohoka yi ka ci linga.” Cimuamue haico okuti, omõla a Suku vokuenda kupange waye woku kunda palo posi, wa lekisa ombili kefendelo liocili. (Yoano 2:13-17; 4:34) Unyamo lunyamo vokuenda Kuocipito Conjivaluko, akundi valua voluali luosi va likolisilako oku setukula ombili ya Yehova kuenda ya Yesu poku vokiya upange wavo woku kunda. O pondolavo oku kuama ongangu yavo?

2. Oku kuata ombili kupange woku kunda ci ka tu vetiya oku linga nye oku upisa keteke 14 kosãi Yelombo?

² Upange Woku Laleka Omanu Oku Enda Kocipito Conjivaluko: Unyamo ulo, upange woku laleka omanu oku enda Kocipito Conjivaluko ci ka fetika Vocasapalo keteke 14 Yelombo. Linga esokiyo cilo oco o lekise ombili yoku vokiya upange wove woku kunda. Akongelo a ka linga esokiyo lioku tokeka ovikanjo viavo votembo ya sokiyiwa. Oku ci linga, ci tu vetiya oku laleka omanu tu longisa Embimbiliya, omanu vana tua kundila akamba vetu tu talavaya lavo, epata, akamba vetu kosikola, kuenda omanu vakuavo poku eca kokuavo okokanda kamue ale oku va lekisa onumbi yetu yo jw.org.

3. Tu vokiya ndati upange woku kunda vokuenda kuosãi Yelombo kuenda ya Kupupu?

³ Oku Kala Akundi Vasokamo: Oku lekisa ombili kupange woku kunda ci ka tu vetiya oku vokiya upange wetu woku kunda. Ocili okuti vamanji valua va pondola oku kala akundi vasokamo vokuenda kuosãi Yelombo kuenda Kupupu, okuti tu nõla oku eca ci soka 30 kolowola. Vokuenda kuefendelo liene liepata, ale poku linga elilongiso lio pokolika, likutilila oco o kũlĩhĩse ndomo o ci linga. (Olosap. 15:22) Ombili yove o lekisa kupange woku laleka omanu, yi pondolavo oku kuatisa vakuetu oku kalavo vakuambili. Nda wa sokiya ciwa otembo yove oco o vokiye upange wove woku kunda, o ka setukula ombili ya Yesu.—Mar. 6:31-34.

4.Onima yipi yi tunda poku setukula ombili ya Yehova kuenda ya Yesu?

⁴ Oku setukula ombili ya Yehova leyi ya Yesu vokuenda Kuocipito Conjivaluko ci nena asumũluho. Omanu valua vocikanjo va ka yeva esapulo liusoma. Tu ka kuata ovolandu awa lesanju omo lioku vumba Yehova kuenda oku kuatisa vakuetu. (Ovil. 20:35) Yehova kuenda Omõlaye va ka sanjukila ombili tu lekisa.