Anton Petrus/Moment via Getty Images
AMAMAKO OKU LAVULULA!
Anga hẽ ci Tẽliwa Oku Yuvula Uyaki Voluali Luosi?—Nye Embimbiliya li Popia?
Vokuenda kueci ci soka 30 kanyamo a pita, omanu valua va limbuka okuti ukamba u kasi pokati kolofeka wa kolelepo loku mioñoluiwa. Pole, ocisimĩlo caco ci kasi oku pongoloka omo liovolandu okaliye a kasi oku pita koloneke vilo.
“Omanu va sakalala loku sima okuti uyaki u kasi oku lingiwila vo Gaza u ka tẽhela volofeka vikuavo ndeci, ko Isareli, ko Hezbollah oku fetikila kongave yo ko Levanone.”—Reuters, 6 ya Susu, 2024.
“Ovimunga viasualali vio ko Irão vi kasi oku linga uyaki kovitumãlo via litepa kuenda o irão vocipikipiki ya fetika vali oku panga ovota anene. Handi vali, o Rusia kuenda o China cilo pokati kavo pali ukamba. Coci eci ci lekisa okuti olofeka vikuavo vi kasi kohele.”—The New York Times, 7 ya Susu, 2024.
“Uyaki wo ko Rusia u kasi oku amamako oku nyõla o Ukrania.”—Asapulo Olonações Unidas, 11 ya Susu, 2024.
“Oku livokiya kuolombongo kuenda kuasualali ko China, lepela lio Taiwan kuenda ukuse u kasi pokati ko Beijing lo Washington, vi situlula okuti pokati kavo ndopo pakala uyaki.”—Ukanda Wasapulo Kofeka yo Japãu, 9 ya Susu, 2024.
Anga hẽ Embimbiliya li popia cimue catiamẽla kehonguo liaco liolofeka tu lete koloneke vilo? Anga hẽ eci ci ka koka uyaki voluali luosi?
Embimbiliya lia popele ale catiamẽla kovolandu aco
Embimbiliya ka lia tetele onimbu catiamẽla kuyaki tu lete koloneke vilo. Pole, lia tukula uyaki ũvi u kasi oku lingiwa koloneke vilo kuenda u kasi oku “imũla ombembua kilu lieve.”—Esituluilo 6:4.
Elivulu lia Daniele lia popele okuti “kotembo yesulilo,” olosoma violuali vi “ka lisinda” ale oku liyakela unene. Vuyaki waco mua kongela oku angiliya asualali valua kuenda oku pesela “ovokuasi” ale olombongo vialua.—Daniele 11:40, 42, 43.
Uyaki umue u kasi oku iya
Embimbiliya lia popele ale okuti ovitangi violuali vi ka livokiya calua. Yesu wa popele hati, “ku iya ohali ya piãla” okuti, ka ya la pita tunde kefetikilo lioluali toke cilo kuenda ka yi ka pitako vali.” (Mateo 24:21) “Ohali ya piãla” yi ka sulila vuyaki u tukuiwa okuti Harmagedo, okuti “uyaki u ka pita keteke linene lia Suku Ukuonene Wosi.”—Esituluilo 16:14, 16.
O Harmagedo yi ka popela omanu, ka yi ka va nyõla. Pocakati cuyaki waco, Suku o ka nena esulilo liolombiali viomanu, vina via siata oku koka ovoyaki alua a nyõla. Oco o sange ovolandu a lekisa ndomo o Harmagedo yi ka nena ombembua ka yi pui, tanga ovipama vi kuãimo: