‘Yehova o ka tu Pamisa’—Ndamupi?

1. Afendeli va Suku vo kosimbu va tẽla oku kuata ndati ongusu?

EMBIMBILIYA olonjanja vialua li tukula alume vo kosimbu vakuekolelo okuti, vakuotõi kuenda va pama. Pole, vana va pamele calua ka va li tendaile okuti va pama. Ndeci, vapuluvi amue Soma Daviti wa enda oku liyeva okuti ‘wa pama calua ndomunda’ pole, olonjanja vimue wa “kala lusumba.” (Osa. 30:7) Samisone wa kuatele ongusu yalua omo liekuatiso liespiritu lia Suku. Ndaño ndoco wa kũlĩhĩle okuti nda ka kuatele ekuatiso liaco, eye ‘nda wa pua ongusu loku kala ndalume vosi vakuavo.’ (Olong. 14:5, 6; 16:17) Alume vaco vakuekolelo va pamele momo Yehova wa ecele unene kokuavo.

2. Momo lie Paulu a popela okuti, eci ndi hongua oco ñuata vali ongusu? (2 Va Korindo 12:9, 10)

² Upostolo Paulu wa kũlĩhĩlevo okuti, wa sukilile unene wa Yehova. (Tanga 2 Va Korindo 12:9, 10.) Ndeci ca siata oku pita letu, Paulu wa kala oku liyaka locitangi cimue coku vela. (Va Gal. 4:13, 14) Olonjanja vimue, wa sukililevo oku likolisilako calua oco a linge ovina via sunguluka. (Va Rom. 7:18, 19) Vapuluvi amue wa enda oku kuata usumba kueci ca ponduile oku lipita laye. (2 Va Kor. 1:8, 9) Ndaño ndoco, eci Paulu a enda oku hongua, oco a liyevaile okuti wa pama. Ndamupi? Yehova wa enda oku wĩha ongusu a sukilile oco a tẽle oku pandikisa kovitangi.

3. Apulilo api tu konomuisa vocipama cilo?

³ Yehova wa likuminyavo oku tu ĩha ongusu oco tu pandikise. (1 Pet. 5:10) Pole, oco tu tambule ekuatiso liaco tu sukila oku linga onepa yetu. Ndocindekaise, o mutore owo u kuatisa ekãlu oku talavaya. Pole, nda ongendisi ka yi sengi kocimalẽho ci ecelela ekãlu oku enda, olio ka liendi. Cimuamue haico okuti, Yehova o yongola oku tu ĩha ongusu tu sukila, pole, tu sukilavo oku linga alikolisilo etu. Nye Yehova a tu ĩha oco a tu pamise? Nye tu sukila oku linga oco tu tambule ongusu yaco? Tu kũlĩhĩsa atambululo apulilo a-a poku konomuisa ndomo Yehova a pamisa uprofeto Yona, Maria ina ya Yesu kuenda upostolo Paulu. Tu konomuisavo ndomo Yehova a kasi oku pamisa afendeli vaye koloneke vilo.

OHUTILILO KUENDA ELILONGISO

4. Tu tambula ndati ongusu yi tunda ku Yehova?

⁴ Onjila yimue yi tu kuatisa oku tambula unene wa Yehova, oku likutilila kokuaye. Yehova o ka tambulula ohutililo yetu poku tu ĩha “unene wa piãla.” (2 Va Kor. 4:7) Tu tambulavo ongusu tu sukila, poku tanga Embimbiliya kuenda oku sokolola lutate kueci tua tanga. (Osa. 86:11) Esapulo Yehova a eca kokuetu okuti li sangiwa Vembimbiliya, li “kuete unene.” (Va Hev. 4:12) Eci o likutilila ku Yehova loku tanga Ondaka yaye, o tambula ongusu o sukila oco o tẽle oku pandikisa, oku amamako lesanju kuenda oku tẽlisa ocikele cimue ka ca lelukile. Kũlĩhĩsa ndomo Yehova a pamisa uprofeto Yona.

5. Momo lie Yona a sukilile ongusu?

⁵ Uprofeto Yona wa sukilile utõi. Eye wa tilila kocitumãlo cimue ocipãla noke yoku tambula ocikele cimue ka ca lelukile ku Yehova. Omo lielinga liaco, eye nda wa pumba omuenyo waye kehunguhungu limue linene loku kapa kohele omuenyo womanu vakuavo. Eci vakuanaviyu vo wimba vokalunga eye wa wila vocitumãlo cimue okuti nda lalimue eteke a simĩlemo okuti, vimo liombisi yimue yinene. Osima okuti Yona wa liyeva ndati? Anga hẽ wa simĩle okuti omo a fila? Eye wa simĩle okuti Yehova wo yanduluka? Citava okuti Yona wa yeva esakalalo lialua.

6. Nye ca pamisa Yona osimbu a kala vimo liombisi? (Yona 2:1, 2, 7)

⁶ Nye Yona a linga oco a tambule ongusu eci a kala likawaye vimo liombisi yaco? Ocina catete a linga, oku likutilila ku Yehova. (Tanga Yona 2:1, 2, 7.) Yona wa sinilile Yehova, pole, wa kolelele okuti Yehova wa laikele oku tambulula ohutililo yaye yumbombe yoku likekembela. Eye wa sokololavo kovisonehua vimue eye a tangele. Tua ci kũlĩha ndati? Vohutililo yaye yi sangiwa kocipama 2 celivulu liambata onduko yaye, wa tukula olondaka vialua vi sangiwa Kosamo. (Ndeci, sokisa Yona 2:2, 5 Olosamo 69:1; 86:7.) Eci ci eca uvangi wokuti Yona wa kũlĩhĩle ciwa ovisonehua. Kuenje poku sokolola kovinimbu viaco, vokuenda kuoseteko yaye, Yona wa kuata ekolelo liokuti Yehova wa laikele oku u kuatisa. Yehova wa yovola Yona kuenda noke wa lipongiyila oku tẽlisa ocikele Yehova o wĩhile.—Yona 2:10–3:4.

7-8. Nye ca pamisa manji Zhiming vokuenda kuotembo a kala oku liyaka lovitangi?

⁷ Ulandu wa Yona u pondola oku tu kuatisa eci tu kasi oku liyaka locitangi cimue ka ca lelukile. Ndeci, bmanji umue wo ko Taiwan, o tukuiwa Zhiming, o kasi oku liyaka lovitangi vialua vioku vela. Handi vali, vamue pokati kepata liaye va siata oku u tata lãvi omo lioku kala Ombangi ya Yehova. Pole, eye wa tambula ongusu ya Yehova omo lioku likutilila kuenda oku lilongisa. Eye wa popia hati: “Olonjanja vimue eci ovitangi vi kala ndu okuti ka vi kuete esulilo, ndi sakalala calua okuti si tiamisila utima kovina ndi kasi oku lilongisa.” Ndaño ndoco, manji Zhiming ka liwekapo. Eye wamisako hati: “Catete ndi likutilila ku Yehova.” Noke ndi kapa vovatũi ocimalẽho coku yevelela ovisungo Viusoma. Pamue ndimba levando toke eci utima u tula. Noke ndi fetika oku lilongisa.

⁸ Elilongiso lio pokolika lia kuatisa calua manji Zhiming. Ndeci, osimbu a kala oku kaya omo lioku pelaliwa, ondotolo yimue yo sapuila okuti eye wa sukilile oku kapiwa osonde, momo osonde yaye ya tepulukile calua. Pole, vuteke osimbu manji Zhiming ka pelaliwile, wa tanga ulandu wa manji umue wa pitavo locitangi caco. Osonde yaye ya tepulukile vali calua okuti ya manji Zhiming yi sule. Ndaño ndoco eye ka tavele oku kapiwa osonde, pole, wa kaya. Ulandu waco wa pamisa manji Zhiming oku amamako lekolelo.

9. Nda okuti o kasi oku liyaka lesakalalo omo liekalo limue ka lia lelukile nye o sukila oku linga? (Talavo oviluvialuvia.)

⁹ Ove hẽ wa lipitile ale locitangi cimue ca tĩla calua okuti kua tẽlele oku sapuilako Yehova ndomo o liyevite? Ca pitile ale love okuti wa sumua calua kuenje kua kuatele vali ombili yoku lilongisa? Ivaluka okuti Yehova wa kũlĩha ciwa ovitangi o kasi oku liyaka lavio. Kuenje ndaño wa linga ohutililo yimue yi teta onimbu, kolela okuti Yehova oka ku ĩha ovina o sukila. (Va Efe. 3:20) Nda o kuete evalo lialua lio ketimba ale wa sumua calua kuenda ku tẽla vali oku tanga Embimbiliya, yevelela ovipama Viembimbiliya via ngalavaliwa kuenda alivulu akuavo. Handi vali, o pondolavo oku kuatisiwa poku yevelela ovisungo, ale oku tala olovideo vi sangiwa vo jw.org. Eci o likutilila ku Yehova loku sanda atambululo Vembimbiliya kuenda valivulu etu, ci kala ndu okuti ove wa laleka Yehova oco a ku pamise. Kuenje Yehova o ci linga.

VAMANJI VA KU PAMISA

10. Vamanjetu va pondola oku tu pamisa ndati?

¹⁰ Yehova o pondola oku vetiya vamanji oco va ku pamise. Ovo va pondola oku tu “kolisa calua” eci tu liyaka lovitangi, ale ceci tu kuete ocitangi coku tẽlisa ocikele cimue. (Va Kol. 4:10, 11) Etu tu sukila akamba, ca piãla enene “kotembo yohali.” (Olosap. 17:17) Eci tu hongua, vamanjetu va pondola oku tu kuatisa konepa yo ketimba, kovisimĩlo kuenda kespiritu. Tu kũlĩhĩsa ndomo Maria ina ya Yesu a pamisiwa la vakuavo.

11. Momo lie Maria a sukililile ongusu?

¹¹ Maria wa sukilile ongusu oco a tẽlise ocipango ca Yehova. Sokolola ndomo eye a sakalalele noke lioku tambula ocikele ka ca lelukile kungelo Gabriele. Maria handi ka kuelele, pole, wa laikele oku mina. Eye ka la kuata omãla, pole, wa sukilile oku tata omõla umue wa laikele oku linga Mesiya. Omo okuti ka la lala lulume, eye nda wa tẽla oku lombolola ndati ondaka yaco ku Yosefe?—Luka 1:​26-33.

12. Maria wa tẽla oku kuata ndati ongusu a sukilile? (Luka 1:39-45)

¹² Maria wa tẽla ndati oku kuata ongusu oco a tẽlise ocikele caco ka ca lelukile? Eye wa pinga ekuatiso komanu vakuavo. Ndeci, eye wa pinga kungelo Gabriele olonumbi vikuavo viatiamẽla kocikele caco. (Luka 1:34) Noke wa linga ungende umue toke “kofeka yolomunda” ko Yuda oco a ka nyule ngandiaye Elisavete. Epasu liaco lia kuata onima yiwa. Elisavete wa pandiya Maria kuenda wa vetiyiwa la Yehova oku tukula ocitumasuku cimue catiamẽla komõla wa Maria. (Tanga Luka 1:39-45.) Maria wa popia okuti Yehova wa “lekisa unene lovaka aye.” (Luka 1:46-51) Yehova wa vetiya Gabriele kuenda Elisavete oco va pamise Maria.

13. Nye ca li pita la manji umue ko Bolivia eci a pinga ekuatiso ku vamanji?

¹³ Ndeci Maria, o pondolavo oku pamisiwa lomanu vakuavo va fendela Yehova. Manji umue ukãi o tukuiwa Dasuri o kasi ko Bolívia, wa sukilile oku pamisiwa. Eci isiaye a limbukiwa okuti o kuete uvei umue u koka ohele, manji Dasuri wa nõlapo oku kala laye kosipitali. (1 Tim. 5:4) Pole, oku ci linga ka ca lelukile. Eye wa popia hati: “Olonjanja vimue nda enda oku sima okuti si ci tẽla vali.” Anga hẽ eye wa pinga ekuatiso limue? Kefetikilo sio. Eye wa lombolola hati: “Sia yonguile oku sakalaisa vamanji. Ame nda enda oku sima ndoco: ‘Yehova eye o nyĩha ongusu ndi sukila.’ Pole, nda limbuka okuti oku liamuha la vamanji ca kala ndu okuti nda kala oku tetulula ovitangi lika liange.” (Olosap. 18:1) Noke manji Dasuri wa nõlapo oku sonehela vamue pokati kakamba vaye loku va lomboluilako ocitangi caye. Eye hati: “Ndi pandula calua ndomo vamanji va ndi pamisa. Va ndi nenela okulia kosipitali loku ndi tangelako ovisonehua vimue Viembimbiliya via ndi pamisa calua. Eci ca ñuatisa oku limbuka okuti sia kale lika wange. Etu tu panga onepa kepata linene lia Yehova okuti, epata limue li lieca olumue oku kuatisa, oku lila love kuenda va tu pamisa oco tu amameko oku vumba Yehova.”

14. Momo lie tu sukilila oku tava ekuatiso liakulu vekongelo?

¹⁴ Onjila yimue Yehova a kuama yoku tu pamisa, pocakati cakulu vekongelo. Ovo olombanjaile vimue Yehova a tu ĩha oco va tu pamise, loku leluisa ovitangi vietu. (Isa. 32:1, 2) Omo liaco, eci o kuata esakalalo limue sapuilako akulu vekongelo. Ku ka kuate ohele yoku tava ekuatiso liavo. Pocakati cakulu vekongelo Yehova o pondola oku ku pamisa.

ELAVOKO LIETU LIO KOVASO YOLONEKE

15. Elavoko lipi Akristão vosi va kuete?

¹⁵ Elavoko lietu lio kovaso lina lia kunamẽla Vembimbiliya, li tu pamisa kuenda li tu ĩha ongusu. (Va Rom. 4:3, 18-20) Akristão vosi, va kuete elavoko limue li komõhisa lioku kala otembo ka yi pui, ci kale voluali luokaliye palo posi, ale Vusoma wa Suku kilu. Elavoko lietu li tu kuatisa oku pandikisa kovitangi, koku kunda olondaka viwa kuenda koku tẽlisa ovikele viosi tu tambula vekongelo. (1 Va Tes. 1:3) Elavoko liaco, olio lia pamisa upostolo Paulu.

16. Momo lie Paulu a sukililile ongusu?

¹⁶ Paulu wa sukilile ongusu yalua. Vovikanda viaye a sonehela va Korindo, eye wa lisokisa ndombia yotuma ya leñela. Eye wa “sipatiwile” wa “sakalaisua,” wa “lambalaliwa” kuenda wa liyeva ndu okuti wa “kupuiwa posi.” Olonjanja vialua omuenyo waye wa kala kohele. (2 Va Kor. 4:8-10) Paulu wa soneha olondaka evi vokuenda kungende waye watatu wumisionaliu kuenda ka kũlĩhĩle okuti noke liungende waco wa laikele oku ka liyaka lovitangi vinene. Eye wa laikele oku kuatiwa locimunga cimue comanu, oku kala vonaviyu ya vomba kuenda oku kala vokayike vokuenda kuotembo yimue.

17. Nye ca enda oku pamisa Paulu vokuenda kuovitangi viaye? (2 Va Korindo 4:16-18)

¹⁷ Paulu wa kuata ongusu yoku pandikisa omo wa tiamisilile utima kelavoko liaye. (Tanga 2 Va Korindo 4:16-18.) Eye wa sapuila va Korindo okuti etimba liaye lia laikele oku “nyõleha,” pole, ndaño ndoco ka laikele oku sumua. Paulu wa tiamisilile utima kovina vio kovaso. Elavoko liaye liomuenyo ko pui oko kilu lia kala ‘liulamba wa piãla calua’ kuenje eci co kuatisa oku liyaka lohali yosi kuenda ovitangi. Paulu wa enda oku sokolola kelavoko liaco kuenje wa liyevaile okuti o kasi “oku tumbuluiwa eteke leteke.”

18. Elavoko lia pamisa ndati manji Tihomir kuenda epata liaye?

¹⁸ Elavoko lio kovaso yoloneke lia pamisa manji Tihomir o kasi ko Bulgária. Kanyamo a pita huvaye o tukuiwa Zdravko wa fa omo lioku li tusula locendelo. Kuenje manji Tihomir wa sumuĩle calua. Oco va kuatisiwe poku liyaka lesumuo liaco, eye kumue lepata liaye va siata oku sokolola ndomo epinduko li ka kala. Eye wa popia hati: “Tua siata oku sokolola apa tu ka sanga Zdravko, okulia tu ko lingila, omanu tu ka laleka tete oco tu lingile kumosi ocipito, eci eye a ka pinduka kuenda ulandu tu ko lomboluila wo koloneke vilo via sulako.” Manji Tihomir wa popia okuti oku tiamisila utima kelavoko liaco, oco ca siata oku pamisa epata liaye oku amamako oku pandikisa kuenda oku talamẽla otembo ya sunguluka ya Yehova yoku pindula huvaye.

19. Nye o sukila oku linga oco o pamise elavoko liove? (Talavo ociluvialuvia.)

¹⁹ O pondola oku pamisa ndati elavoko liove? Nda elavoko liove oku kala palo posi otembo ka yi pui, tanga ovolandu a tukuiwa Vembimbiliya atiamẽla koluali luokaliye kuenda oku sokolola kovolandu aco. (Isa. 25:8; 32:16-18) Sokolola ndomo omuenyo u ka kala voluali luokaliye kuenda sokolola ndu okuti omo o kasi ale. Ndeci, helie o kasi oku mola? Ovileñi vipi o kasi oku yeva? O kasi hẽ oku liyeva ndati? Oco o kuatisiwe oku sokolola oluali luokaliye, tala oviluvialuvia vimue valivulu etu, ale yevelela ovisungo losapi ndeci: Oluali Luokaliye Luo Luiya, Sokolola Kasumũlũho tu ka Kuata Kovaso Yoloneke ale Sokolola Kotembo. Nda olonjanja viosi tua sanda otembo yoku sokolola ndomo omuenyo u ka kala voluali luokaliye, ovitangi vietu vi ka kala ‘vio katembo kamue katito.’ (2 Va Kor. 4:17) Elavoko Yehova a tu ĩha olio li pondola oku tu pamisa.

20. Eci tu hongua tu pondola oku kuata ndati ongusu?

²⁰ Ndaño pamue tu liyeva okuti tua hongua, pole, tua kũlĩha okuti ‘Suku o ka tu ĩha vali ongusu.’ (Osa. 108:13) Yehova o tu ĩha cosi tu sukila oco tu tambule ongusu yi tunda kokuaye. Omo liaco, nda o sukila ekuatiso oco o tẽlise ocikele cimue, poku liyaka locitangi cimue, ale oku amamako lesanju, sapela la Yehova vohutililo kuenda kuama olonumbi viaye pocakati celilongiso liove lio pokolika. Tava ekuatiso kuenda evetiyo lia vamanji. Olonjanja viosi sanda otembo yoku sokolola ndomo omuenyo u ka kala kovaso yoloneke. Nda wa ci linga, ndomo ci sangiwa ku Va Kolosai 1:11, ‘ove o ka pamisiwa lunene wosi ndomo ci likuata lulamba waye wa piãla oco okuti, wamamako lepandi lesanju.’