Tu Kuami Ongangu Ya Yesu kristu
“U o linga hati, ndi kala vu [Suku], co sesamẽla oku endaenda ndeci [Yesu] a endaenda.”—1 YOANO 2:6.
1, 2. Nye ca kongela voku tulukila ku Yesu?
UPOSTOLO Paulu wa popia hati: “Tu lupuki lepandi okulitunda tu kasi lakuo. Eci tu lupuka tu tulukili ku Yesu u wa linga usovoli wekolelo lietu.” (Va Heveru 12:1, 2) Oco tu endele vonjila ya Yehova, tu sukila oku kuama ongangu ya Yesu Kristu.
2 Ondaka ‘oku tulukila’ ndomo ya lomboluiwa Vovisonehua vio Helasi, yi lomboloka oku ‘luluvalela kovaso okuti ku vanji konele yikuavo.’ Elivulu limue lia lombolola okuti: ‘Kolomapalo vioku lupuka ko Helasi, omunu wa enda oku yuvula oku vanja konyima. Momo nda wa vanja konyima ale konẽle yikuavo, eci a mõla owiñi womanu vocila, o yapula utima waye vonjila. Kuenje ka tẽlisa vali ocimãho caye.’ Cimuamue haico ci pita Lukristão. Oku tiamisila utima kovina vikuavo, ku tateka oku kula kespiritu. Omo liaco, tu sukila oku tulukila ku Yesu Kristu. Oco hẽ, nye tu sukila oku linga poku tulukila ku Yesu ‘usovoli’ wekolelo lietu? Kelimi lio Helasi, ondaka ‘usovoli’ yi lomboloka ‘mitavaso umue eca ongangu yiwa komanu.’ Omo liaco, oku tulukila ku Yesu, ci lomboloka oku kuama ongangu yaye.
3, 4. (a) Oco tu endaende ndeci Yesu a endaenda, tu sukila oku linga nye? (b) Apulilo api tu sukila oku lipula?
3 Embimbiliya li popia hati: “U o linga hati, ndi kala vu [Suku], co sesamẽla oku endaenda ndeci [Yesu] a endaenda.” (1 Yoano 2:6) Etu tu pondola lika oku kuata ukamba la Yehova poku pokola kovihandeleko via Yesu ndeci eye a pokola ku Isiaye.—Yoano 15:10.
4 Oco tu endaende ndeci Yesu a endaenda, tu sukila oku kũlĩha okuti, eye Usongui wetu, kuenda oku kuama volomãhi viaye. Omo liaco, tu sukila oku lipula ndoco: Koloneke vilo, ndamupi Yesu a kasi oku tu songuila? Ndamupi tu pondola oku kuama volomãhi viaye? Ekuatiso lipi li tunda koku kuama ongangu ya Yesu?
Ndomo Kristu a Songuila Olondonge Viaye
5. Osimbu Yesu ka endele kilu, wa likuminyile nye kolondonge viaye?
5 Yesu eci a pinduka, wa limolẽhisa kolondonge viaye osimbu handi ka endele kilu. Kuenje wa va ĩha ocikundi cupange umue wa velapo. Eye wa va sapuila hati: “Kuendi, ka tavisi [omanu] kolofeka viosi oco va linge olondonge. Va papatisili vonduko ya Tate la Mõla, kuenda espiritu sandu. Va longisi oku linga ovina viosi ndo kundiki. Kuenje ame ñasi kumue lene oloneke viosi toke kesulilo lioluali.” (Mateo 28:19, 20) Koloneke vilo via sulako Yesu o kasi ndati kumue lolondonge viaye?
6, 7. Ndamupi Yesu a kasi oku tu songuila lekuatiso liespiritu sandu?
6 Yesu wa popia hati: ‘Espiritu sandu lina Isia a tuma vonduko yange, olio liu longisi ovina viosi, kuenda liu wivaluisi ovina viosi nda popia lene.’ (Yoano 14:26) Espiritu sandu lia Yehova olio lia siata oku tu songuila koloneke vilo kuenda oku tu kolisa. Olio lia siatavo oku tu kuatisa oku kuata elomboloko liovina ‘via longa vi sangiwa Vondaka ya Suku.’ (1 Va Korindo 2:10) Ovituwa viwa ndeci: Ocisola, esanju, ombembua, epandi, unu, esunga, ekolelo, umbombe, [kuenda] esuluviko, via tiamẽla kapako espiritu. (Va Galatia 5:22, 23) Lekuatiso lia Yehova, tu pondola oku kuata ovituwa viaco.
7 Osimbu tuamamako oku lilongisa Embimbiliya loku pokola kolonumbi viaco, espiritu lia Yehova li tu kuatisa oku kuata ukũlĩhĩso, luloño, kuenda olondunge. (Olosapo 2:1-11) Handi vali, li tu kuatisavo oku pandikisa kayonjo kuenda kovitangi. (1 Va Korindo 10:13; 2 Va Korindo 4:7; Va Filipoi 4:13) Akristão va vetiyiwa ‘oku liyelisa kovina viosi vi vĩhisa etimba levi vi vĩhisa utima kuenda oku suisapo oku kola kuavo.’ (2 Va Korindo 7:1) Etu tu liyelisa lika ketimba lekuatiso liespiritu sandu lia Suku. Koloneke vilo Yesu o kasi oku tu songuila lekuatiso liespiritu sandu lia Yehova.—Mateo 28:18.
8, 9. Ndamupi Yesu a kasi oku songuila ekongelo lekuatiso ‘liukuenje wa kolelua?’
8 Koloneke vilo Yesu o kasi oku tu songuilavo lekuatiso liekongelo. Eye poku lombolola otembo yoku tukuluka kuaye kuenda yesulilo lioluali, wa popia hati: “Helie ukuenje wa kolelua haeye wa lunguka okuti cime caye wo kundika vakuanjo yaye vosi oku va . . . iha okulia kuavo kotemho ya tukuiwa? Ukuenje waco wa sumũlũha nda cime caye, eci eya, u sanga oku linga ndeci a kundikiwa. Mopia lene siti, ocili, u kundika cosi a kuete.”—Mateo 24:3, 45-47.
9 Yesu Kristu eye ‘cime’ caco. Ocisoko Cakristão olombuavekua, ovo ‘ukuenje waco.’ Ovo va tambula ocikele coku endisa upange wa Yesu palo posi. Va tambulavo ocikele coku pongiya okulia kuespiritu oco kueciwe komanu va Yehova. Pokati kocisoko colombuavekua, pali akulu vamue va noliwa va tukuiwa hati, Osungu Yolombangi via Yehova. Ovo va kuete ocikele coku endisa upange woku kunda kuenda oku eca okulia kuespiritu kotembo ya sokiyiwa. Omo liaco, Yesu o kasi oku songuila akongelo lekuatiso Liakristão olombuavekua kuenda Ocisoko Cakulu vaco.
10. Ocituwa cipi tu sukila oku lekisa kakulu vekongelo, kuenda momo lie?
10 Yesu o kasivo oku songuila omanu va Yehova lekuatiso liakulu vekongelo. Ovo va kuete ocikele coku kuatisa Akristão oco va linge upange woku longisa. Kuenda va kuetevo ocikele coku pamisa ekongelo lia Kristu. (Va Efeso 4:8, 11, 12) Catiamẽla kokuavo, elivulu lia Va Heveru 13:7, li popia hati: ‘Ivaloki asongui vene, ava vo sapuilili ondaka ya Suku. Sokololi ovilinga viomuenyo wavo. Setukuli ekolelo liavo.’ Akulu vekongelo va kuete ocikele coku songuila ekongelo. Omo okuti, va kuãi ongangu ya Yesu Kristu, tu sukilavo oku kuama ongangu yavo. (1 Va Korindo 11:1) Etu tu pondola oku lekisa olopandu vietu poku pokola kokuavo.—Va Heveru 13:17.
11. Koloneke vilo ndamupi Yesu a kasi oku songuila olondonge viaye? Voku endaenda la Yesu mua kongela nye?
11 Koloneke vilo, Yesu o kasi oku songuila omanu va Yehova lekuatiso liespiritu sandu, ‘ukuenje wa kolelua,’ kuenda akulu vekongelo. Voku endaenda ndeci Yesu a endaenda, mua kongela oku kuata elomboloko lioku songuila kuaye ekongelo kuenda oku pokola kolonumbi viaye. Mua kongelavo oku lekisa ovituwa ndevi viaye. Upostolo Petulu wa popia hati: “Oco wa kovongiwili. Kristu wo taleli ohali, kuenje wo sili ongangu yokuti vu kuama volomãhi viaye.” (1 Petulu 2:21) Oco hẽ ndamupi tu kuama ongangu ya Yesu?
Lekisa Esunguluko Poku Songuila Ekongelo
12. Ongangu yipi ya Yesu akulu vekongelo va sukila oku kuama?
12 Yesu wa tambula ku Isiaye omoko yoku songuila ekongelo. Pole, wa lekisa esunguluko locikele caco. Omo liaco, akulu vekongelo, va sukilavo oku lekisa ‘esunguluko komanu vosi.’ (Va Filipoi 4:5; 1 Timoteo 3:2, 3) Omo okuti, va kuete ocikele coku songuila ekongelo, va sukila oku kuama ongangu ya Kristu poku endisa upange waco.
13, 14. Akulu vekongelo va pondola ndati oku kuama ongangu ya Yesu yoku vetiya vakuavo oku vumba Suku?
13 Yesu wa kũlĩhĩle okuti, olondonge viaye ka via lipuile. Omo liaco, ka va kisikile oku linga ovina ka va tẽla. (Yoano 16:12) Pole, wa va vetiya ‘oku likolisilako’ oku linga ocipango ca Suku. (Luka 13:24) Eye wa cilinga poku lekisa ongangu yiwa kokuavo kuenda oku vetiya ovitima viavo. Koloneke vilo, akulu vekongelo va sukila oku yuvula ocituwa coku sepula vakuavo va kasi oku vumba Suku. Pole, va sukila oku vetiya vamanji oku sola Yehova la Yesu kuenda oku sola vakuavo.—Mateo 22:37-39.
14 Yesu ka lavisile omanu omo a kuata omoko yoku va songuila. Eye ka tumbikile ovihandeleko vialua haivio via tĩla komanu. Pole, wa enda loku vetiya ovitima viomanu lolonumbi vina viopiwa vovihandeleko via Mose. (Mateo 5:27, 28) Akulu vekongelo va sukilavo oku kuama ongangu ya Yesu yoku yuvula oku tumbika olonumbi viavo muẽle ku vamanji. Catiamẽla kuwalo kuenda kolomapalo, ovo va sukila oku kuama olonumbi via Yehova vi sangiwa kelivulu lia Mika 6:8; 1 Va Korindo 10:31-33; 1 Timoteo 2:9, 10.
Lekisa Esanju Kuenda Ocituwa Coku Ecela
15. Yesu wa tatele ndati olondonge viaye eci via enda oku lueya?
15 Eci Yesu a kala palo posi, wa tata ciwa olondonge viaye ndaño okuti ka via lipuile. Cimuamue haico tu sukila oku linga. Kũlĩhĩsa ovolandu avali a pita la Yesu kuteke waye wa sulako palo posi. Eci a pitila vocumbu co Gesemane, ‘wambata Petulu la Tiago kuenda Yoano’ kocitumãlo cimue. Kuenje wa popia lavo hati: “Lavululi.” Noke “wamako kamue, kuenje wa wila posi oku likutilila.” Eci a tiuka, “wa va sanga va pekela.” Nye Yesu a linga? Eye wa popia hati: “Utima u kasi lombili puãi etimba lia leñela.” (Marko 14:32-38) Yesu ka temelẽle olondonge viaye. Pole, wa lekisa ocikembe kokuavo. Vuteke waco, Petulu wa likala Yesu olonjanja vitatu. (Marko 14:66-72) Eci Yesu a pinduka, nye a linga la Petulu? Embimbiliya li popia hati: ‘Ñala wa pinduka kuenje wa molẽha ku Simono Petulu.’ (Luka 24:34) Noke liamisako hati: “Eye wa molẽha ku Kefa, noke kekũi liaco la vavali.” (1 Va Korindo 15:5) Yesu ka kuatelele onyeño Petulu. Pole, wo wecela kuenje wa pamisa ekolelo liaye. Noke wa eca kokuaye ocikele cupange wa velapo.—Ovilinga 2:14; 8:14-17; 10:44, 45.
16. Ndamupi tu pondola oku kuama ongangu ya Yesu eci vakuetu va tu lueyela?
16 Eci vamanji va tu lueyela, tu sukilavo oku lekisa esunguluko kuenda oku va ecela ndeci Yesu a linga. Momo vosi yetu ka tua lipuile. Petulu wa vetiya vamanjaye hati: “Ene vosi, kali lutima umuamue. Lingi vakuahenda. Kali locisola coku sola vakuene. Lingi ambombe kuenda asima. Ko ka fetuluinyi evĩho levĩho, pamue etuka letuka, cene oku likutilila loku kuatisa.” (1 Petulu 3:8, 9) Pole, olonjanja vimue citava okuti, manji umue o tu popia lãvi kuenda ka lekisa esunguluko kokuetu loku ecela. Oco hẽ, nye tu sukila oku linga? Vosi yetu tu kuete ocikele coku kuama ongangu ya Yesu.—1 Yoano 3:16.
Pitisa Kovaso Ocipango ca Suku
17. Nye ci lekisa okuti Yesu wa pitisile kovaso ocipango ca Suku?
17 Kuli vali onepa yikuavo tu sukila oku kuama ongangu ya Yesu. Eye komuenyo waye wa kapeleko calua upange woku kunda Usoma. Noke yoku kundila ukãi umue u Samaria ocipepi limbo lio Sukare, wa sapuila olondonge viaye hati: “Okulia kuange oku linga ocipango cu wa numa kuenda oku suisapo upange waye.” (Yoano 4:34) Yesu oku linga ocipango ca Yehova wa ku sokisile lokulia kuaye. Omo liaco, tu sukila oku kuama ongangu ya Yesu yoku pitisa kovaso ocipango ca Suku. Tu sukilavo oku yuvula ovina ka vi kuete esilivilo lialua komuenyo.
18. Asumũlũho api a tunda koku vetiya omãla oku litumbika kupange wakundi votembo yosi?
18 Eci olonjali vi kuatisa omãla vavo oku iñila kupange wakundi votembo yosi, va kuata asumũlũho alua. Isia umue wa vetiyile omãla vaye volonjamba oku iñila kupange wakundi votembo yosi tunde vutila. Noke eci va mala oku tanga kosikola, va litumbika kupange waco. Manji yaco poku ivaluka esumũlũho liaye, wa popia hati: ‘Omãla vetu va siata oku tu sanjuisa calua. Omo liaco, tu tava kolondaka viukualosamo wa popia hati: Omãla ombanjaile yimue ya tunda ku Yehova.’ (Osamo 127:3) Oco hẽ, ekuatiso lie omãla va siata oku kuata poku litumbika kupange wakundi votembo yosi? Onjali yimue yukãi yi kuete omãla vatãlo ya popia hati: ‘Upange wakundi votembo yosi, wa siata oku kuatisa omãla vange oku pamisa ukamba wavo la Yehova. Wa siatavo oku va kuatisa oku loñoloha kelilongiso lio pokolika, kuenda oku pesila otembo yavo kovina vi kuete esilivilo. Handi vali, wa siata oku va kuatisa oku pitisa kovaso ovina viespiritu. Pokati kavo lomue o kasi oku livela omo lionjila yaco va nõla.’
19. Ovimaho vipi amalẽhe va sukila oku kũlĩhĩsa lutate?
19 Ene amalẽhe, nye wa sokiyi oku linga kovaso yoloneke? Anga hẽ u kasi oku sanda oku litumbika lika kovopange oluali lulo? Ale wa sokiyi oku litumbika kupange wakundi votembo yosi? Upostolo Paulu wa popia hati: “Endaendi lutate nda vakualondunge. Ko ka endaendi ndava va kamba olondunge. Kolisiko oku yukisa oloneke viene leci cesunga lika, momo oloneke vilo via vĩha.” Noke wamisako hati: “Ko ka lingi aveke, puãi limbuki ocipango ca Yehova.”—Va Efeso 5:15-17.
Amamako Lekolelo
20, 21. Yesu wa lekisa ndati ekolelo kolondonge viaye? Ndamupi tu kuama ongangu yaye?
20 Voku endaenda ndeci Yesu a endaenda, mua kongela oku kuama ongangu yekolelo liaye. Catiamẽla kokuaye Embimbiliya li popia hati: “Ndaño wa kaile nda Suku, haimo ka sandele ulamba woku lisokisa la Suku. Puãi wa lipesela eye muẽle, wa linga ndupika, wa citiwa lesetahãlo liomunu. Kuenje, omo a citiwa ndomunu, oco wa liketisa, kuenje wa pokola toke kokufa, [poku valeliwa kuti].” Yesu omo liekolelo, wa teyuila uviali wa Yehova poku pandikisa kovina viosi viatiamẽla kocipango Caye. Eye wa lekisa epokolo ku Yehova toke poku fila kuti. Omo liaco, tu sukilavo oku kuama ‘ongangu yaye’ yoku pokola kocipango ca Suku.—Va Filipoi 2:5-8.
21 Yesu wa lekisilevo ekolelo kolondonge viaye. Ndaño okuti va enda oku u lueyela, pole, wa va sola ‘toke kesulilo’ liupange waye palo posi. (Yoano 13:1) Omo liaco, ka tuka eceleli okuti, ovituwa vĩvi via vakuetu vi tu vetiya oku kala vakuaku sepula.
Amamako Oku Kuama Ongangu ya Yesu
22, 23. Oku kuama ongangu ya Yesu ku nena esumũlũho lie?
22 Omo okuti, ka tua lipuile ka tu pondola oku kuama ongangu yasuapo ya Yesu. Pole, tu sukila oku likolisilako oku yi kuama. Voku kuama ongangu ya Yesu mua kongela oku kũlĩha ndomo a songuila ekongelo kuenda oku pokola kolonumbi viaye.
23 Oku kuama ongangu ya Yesu, ku nena asumũlũho alua. Tu kuata esanju lialua omo lioku pitisa kovaso ocipango ca Suku. (Yoano 5:30; 6:38) Tu kuatavo utima wa yela kuenda oku eca ongangu yiwa ku vakuetu. Yesu wa laleka omanu vana va kava haivo va lemiwa oco veye kokuaye okuti va sanga ekavuluko vovitima viavo. (Mateo 11:28-30) Nda tua kuama ongangu ya Yesu, tuka kavuluisavo vakuetu poku kuata ukamba lavo. Omo liaco, tuamamiko oku endaenda ndeci Yesu a endaenda.
Ivaluka Eci Tua Lilongisa?
• Koloneke vilo ndamupi Yesu a kasi oku songuila olondonge viaye?
• Ndamupi akulu vekongelo va pondola oku kuama ongangu ya Yesu yoku songola?
• Ndamupi tu kuama ongangu ya Yesu eci vakuetu va tu lueyela?
• Amalẽhe va pondola ndati oku pitisa kovaso ocipango ca Suku?
[Elitalatu kemẽla 15]
Akulu vekongelo va tu kuatisa oku pokola ku Yesu
[Elitalatu kemẽla 16]
Ene amalẽhe, ovimaho vipi vio kovaso wa sokiyi komuenyo wene?