Apulilo Valingiwa Lavakuakutanga
Eci Yesu a kala la Nikodemu wa popia laye hati: “Lomue wa londa kilu, te u wa loka kilu, okuti Mõlomanu.” Nye Yesu a yonguile oku popia lolondaka evi?—Yoano 3:13.
Otembo yaco Yesu wa kala palo posi, kuenda ka londele handi kilu. Omo liaco, eci tua kũlĩha catiamẽla ku Yesu kuenda ulandu wolondaka evi, ci tu vetiya oku kuata elomboloko liocisimĩlo caye.
Yesu osimbu ‘handi keyile palo posi,’ wa kala kilu kumosi la Isiaye. Pole, noke Yehova wa sondoluila omuenyo waye vimo lia Maria, kuenje wa citiwa letimba liositu. (Luka 1:30-35; Va Galatia. 4:4; Va Heveru. 2:9, 14, 17) Noke liolofa viaye, wa pinduiwa letimba liespiritu kuenje wa tiukila ku Yehova. Osimbu handi Yesu ka file, wa likutilila ku Yehova hati: “A Tate, muise ulamba kovaso ove. Muise ulamba una nda kaile lawo kumue love, osimbu oluali ka lua lulikiwile.”—Yoano 17:5; Va Roma 6:4, 9; Va Heveru 9:24; 1 Petulu 3:18.
Eci Yesu a vangula la Nikodemu, u Fariseo una wa kala ulongisi ko Isareli, Eye ka tiukilile handi kilu. Kuenda ka kua kaile omunu umue wa fa okuti, wa enda kilu. Yesu wa lombolola okuti, Yoano Upapatisi wa velapo omo lioku kala uprofeto wa Suku. Pole, “u o sule vusoma wokilu [wa velapo okuti], Yoano o sule.” (Mateo 11:11) Upostolo Petulu wa lombolola okuti, Soma Daviti wa fa kuenda o kasi veyambo. Eye ka endele kilu. (Ovilinga 2:29, 34) Omo liaco, omanu vana va fa osimbu handi Yesu ka file, ndeci, Daviti, la Yoano Upapatisi, kuenda vakuavo vakuekolelo, ka va endele kilu. Momo, eci ovo va fa, Yesu ka yuluile handi onjila yoku pindula omanu oco va ende kilu. Upostolo Paulu wa popia hati, Yesu eye tete wa tu yuluila onjila yokaliye yoku enda kilu.—Va Heveru 6:19, 20; 9:24; 10:19, 20.
Yesu eci a sapuila Nikodemu hati: “Lomue wa londa kilu, te u wa loka kilu, okuti Mõlomanu,” otembo yaco handi ka file. Oco hẽ olondaka viaye vi lomboloka nye? (Yoano 3:13) Tu kulĩhĩsi ulandu wa kongela vombangulo ya Yesu la Nikodemu.
Eci Nikodemu a endele ku Yesu kuteke, wo sapuila hati: “Mopia love siti, ocili [okuti], omunu ka tẽla oku mola usoma wa Suku, te wa citiwa evali.” (Yoano 3:3) Nikodemu poku tambulula Yesu, wo pula hati: ‘Omunu o citiwa ndati evali?’ Anga hẽ iñila vali vimo lia inaye oco a citiwe onjanja yavali? Eye ka kuatele elomboloko lielongiso liatiamẽla Kusoma wa Suku. Anga hẽ kua kala onjila yikuavo yoku lilongisa eci catiamẽla kondaka yaco? Ka ca tavele okuti, Nikodemu o longisiwa ovisimĩlo viomanu viatiamẽla kondaka yaco. Kuenda lomue wa kuata epondolo lioku u longisa ovina viatiamẽla kusoma wa Suku. Momo otembo yaco, lomue omunu wa endele kilu okuti, o tẽla oku lombolola eci catiamẽla koku iñila Vusoma wa Suku. Yesu eye lika wa kuata epondolo lioku longisa Nikodemu kuenda omanu vakuavo. Momo eye lika wa tundile kilu kuenda wa kuata uloño woku longisa omanu ovina viaco.
Ulandu wa lomboluiwa vocipama cilo, u lekisa esilivilo lioku li longisa Ondaka ya Suku. Poku tanga Embimbiliya, citava okuti, tu sanga ovinimbu vimue via tatama oku kuata elomboloko liaco. Pole, ka tuka kuati atahãi loku sima okuti, Embimbiliya ka lilombolola ocili. Nda tu yongola oku kuata elomboloko liovinimbu vimue Viembimbiliya, tu sukila oku konomuisa ovinimbu vikuavo. Handi vali, oku konomuisa ulandu waco, ku ecelela okuti, tu kuatavo elomboloko lia suapo.