Embimbiliya li ku Kuatisa Oku Sanga Esanju
NDAÑO okuti, Embimbiliya ka li lombolola olonumbi violondotolo, pole, li lekisa ovitangi vi tunda kovisimĩlo vĩvi. Kuenda li lombololavo esilivilo lioku kuata ovisimĩlo viwa. Olio li popia hati: “Utima wa sanjuka ovihemba viwa; utima wa nyumãla u kukutisa akepa.” Noke liamisako hati: “Nda wa konyoha keteke liohali, ci lomboloka okuti ongusu yove yitito.” (Olosapo 17:22; 24:10) Esumuo li pondola oku tu nenela ehonguo. Kuenda ka li tu vetiya oku pongoloka ale oku sanda ekuatiso ku vakuetu oco tu yuvule ovisimĩlo vĩvi.
Esumuo li tatekavo omunu oku amamako kespiritu. Omanu vana va kuete ovisimĩlo viokuti ka va silivila, va siata oku sima okuti lalimue eteke vaka kuata ukamba la Yehova. Kuenda va simavo okuti, ka va sesamẽla oku tambula esumũlũho li tunda Kokuaye. Manji Simone wa tukuiwa vocipama catete, wa kuatele atatahãi atiamẽla kukamba waye la Yehova. Pole, poku tanga Embimbiliya, tu limbuka okuti, Yehova wa kapako omanu vana va likolisilako oku linga ocipango caye.
Suku o Kuatisa Omanu va Sumua
Embimbiliya li tu sapuila okuti, “Yehova [o kasi] ocipepi la vakuavitima via teka. O popela ava va kasi lovitima via [sumua].” Ocili okuti, Yehova ka yanduluka vakuavitima ‘via teka haivo va sumua.’ Pole, wa likuminya oku ‘tumbulula ovitima viomanu va sunguluka kuenda viava vonjuka.’—Osamo 34:18; 51:17; Isaya 57:15.
Otembo yimue, Yesu wa limbukile okuti olondonge viaye via sukilile oku kũlĩha okuti, Yehova olete ovina viwa vi kasi vutima womanu Vaye. Volusapo luaye, wa popia hati, omanu ka va kapeleko olonjila vitito. Pole, ku Yehova olonjila viosi vi kuete esilivilo. Eye wa lombololavo okuti, Yehova wa kũlĩha ovina viosi viatiamẽla komanu. Kuenda wa tenda esinga liosi liovitue viavo. Noke wamisako hati: “Ko ka kuati ohele, momo wa velipo olongungu [ale olonjila] via lua.” (Mateo 10:29-31)a Yesu wa lekisa okuti, omanu vana vakuekolelo, va kuete esilivilo ku Yehova. Omo liaco, upostolo Petulu o tu ivaluisa hati: “Suku ka kuete ocame, puãi, volofeka viosi, [omunu] wosi u sumbila loku linga esunga, u sungulukila.”—Ovilinga 10:34, 35.
Kuata Ovisimĩlo Via Sunguluka
Embimbiliya li tu vetiya oku kuata ovisimĩlo via sunguluka viatiamẽla kekalo lietu. Upostolo Paulu wa popia hati: “Locali [nda tambula], ndu lunguli omunu omunu, siti: Ko ka lisokololi ene muẽle loku lituna ka kua sungulukile, puãi omunu omunu a likũlĩhĩse lolondunge vi tunda kekolelo Suku o wĩha.”—Va Roma 12:3.
Tu sukila oku yuvula oku li sokolola etu muẽle. Momo ocituwa caco ci tu tuala koku kuata epela loku sima okuti, tua velapo vakuetu. Tu sukilavo oku yuvula ovisimĩlo viokuti, ka tu kuete esilivilo. Omo liaco, tu sukila oku kuata ovisimĩlo via sunguluka loku limbuka okuti ka tu tẽla oku linga ovina viosi momo ka tua lipuile. Manji umue ukãi wa lombolola ondaka yaco hati: ‘Ame si kuete ovituwa vĩvi. Pole, si litendi ndomunu wa velapo pokati ka vakuetu. Momo nda siatavo oku lueya. Kuenda voluali ka muli omunu ka lueya.’
Ka ca lelukile oku yula ovisimĩlo vĩvi. Momo pamue ovisimĩlo viaco tu kasi lavio vokuenda kuanyamo alua. Pole, lekuatiso lia Yehova tu pondola oku pongolola ovituwa vietu kuenda oku kuata ovisimĩlo via sunguluka komuenyo wetu. Embimbiliya li tu vetiya oku likolisilako oku ci linga. Olio li popia hati: “Nda wa luli omunu wale una wa tiama komuenyo wale, haiwo wa vĩha loloñeyi [vĩvi violuali lulo], kuati ovitima viokaliye okuti vu linga omanu vokaliye. Wali omunu wokaliye una wa tungiwa lesetahãlo lia Suku lesunga kuenda oku kola.”—Va Efeso 4:22-24.
Poku likolisilako oku ‘kuata utima wokaliye,’ ci tu kuatisa oku yuvula ovisimĩlo vĩvi. Kuenje tu kuata ovisimĩlo viwa. Manji Lena wa tukuiwa vocipama catete, wa simĩle okuti, lacimue ci tẽla okupa vutima waye ovisimĩlo viokuti ka kuete esilivilo. Kuenda lacimue ci tẽla oku u kuatisa oku pongolola ovisimĩlo viaco vĩvi. Oco hẽ olonumbi vipi Viembimbiliya via kuatisa manji Lena, la Simone, kuenda omanu vakuavo oku yula ovisimĩlo viavo vĩvi?
Olonumbi Viembimbiliya vi Kuatisa Oku Sanga Esanju
Embimbiliya li popia hati: “Tuika Yehova ocitele cove kuenje eye oku kuatisa.” (Osamo 55:22) Ohutililo yi tu kuatisa oku sanga esanju. Manji Simone wa popia hati: ‘Eci ndi sumua, ndi pinga ekuatiso ku Yehova. Eye wa siata oku ndi kuatisa kovitangi viange viosi. Nda siatavo oku tambula kokuaye olonumbi vioku pandikisa lovitangi viaco.’ Ukualosamo o tu vetiya oku sapuilako Yehova ovitangi vietu. Eye o tu ivaluisavo okuti, Yehova o tu tata kuenda tu sesamẽla ekuatiso liaye. Kuteke wocipito Copaskoa kunyamo wa 33, olondonge via Yesu via sumuĩle calua. Momo wa va sapuilile okuti otembo yaye yoku tiukila kilu ya kala ocipepi. Pole, wa va vetiya oku likutilila ku Yehova. Eye wa popia hati: “Pingi, kuenje vu ci tambula, oco onjolela yene yi suepo.”—Yoano 16:23, 24.
“Esumũlũho li tunda koku eca olio lia lua, eli li tunda koku tambula li sule.” (Ovilinga 20:35) Olondaka via Yesu vi eca uvangi wokuti, ocituwa coku eca ci nena esanju liocili. Oku kuama olonumbi evi Viembimbiliya, ci tu kuatisa oku yuvula ovisimĩlo viokuti, ka tu kuete esilivilo. Eci tu kuatisa vakuetu leci tu limbuka ndomo va sanjukila ekuatiso liaco, tu sanjuka calua. Manji Lena wa limbuka okuti oku kundila omanu olondaka viwa Viusoma, co kuatisa kolonepa vivali. Eye wa popia hati: ‘Catete, ci ndi nenela esanju lina Yesu a tukula. Cavali, ndi tambula olopandu vi tunda ku vakuetu, kuenje ndi kuata esanju lialua.’ Nda tua kuatisa vakuetu, tuka limbuka ocili colondaka vielivulu Liolosapo 11:25 li popia hati: “U o nyuisa nyuisa ovava, o nyuisiwavo.”
‘Ukuahali o sumua ño oloneke viosi, pole ukuotima wa sanjuka o lialia elau.’ (Olosapo 15:15) Vosi yetu tua siata oku nõla ndomo tu litenda etu muẽle. Kuenda tua kũlĩha ekalo lietu. Pamue tu sima okuti ovina viosi vĩvi, kuenje tu sumua calua. Pamue tu nõlapo oku kuata ovisimĩlo via sunguluka kuenje tu sanjuka. Kuenda tu kala ndomunu umue ‘o lialia elau.’ Manji Simone wa popia hati: ‘Ndi likolisilako oku kuata utima wa sunguluka, kuenda oku linga elilongiso lio pokolika. Ndi likolisilakovo oku linga upange woku kunda, kuenda oku likutilila olonjanja viosi ku Yehova. Ndi sanda otembo yoku kala pokati komanu va sanjuka kuenda oku kuatisa vakuetu va sumua.’ Ovituwa evi ovio vi kuatisa omunu oku sanga esanju komuenyo. Embimbiliya li tu vetiya hati: “Yoleli Yehova. Nyamuli, ene wakuesunga. Ululi, ene vosi wakuavitima via sunguluka.”—Osamo 32:11.
“Ekamba [lina] li sola olonjanja viosi, . . . li linga manjove koloneke viohali.” (Olosapo 17:17) Oku sapuila ekamba lietu ovitangi tu kasi oku liyaka lavio, ci tu kuatisa oku yuvula ovisimĩlo vĩvi. Kuenda ci tu kuatisavo oku tetulula ovitangi tu kasi lavio osimbu handi ka via nyõlele ekalo lietu. Oku sapela la vakuetu ci tu kuatisa oku kuata utima wa sunguluka poku liyaka lovitangi. Manji Simone wa popia hati: ‘Oku sapuilako vakuetu ovitangi viange, ca siata oku ndi kuatisa calua. Omo liaco, tu sukila oku sapuilako vakuetu esumuo li kasi vutima wetu. Olonjanja vimue, poku cilinga, tu sanga ekavuluko vutima.’ Kuenje tu limbuka ocili colondaka vielivulu Liolosapo li popia hati: “Ohele vutima womunu yu petamisa, ondaka yohenda puãi yu petula.”—Olosapo 12:25.
Ceci o Sukila Oku Linga
Vocipama cilo, tua lilongisa olonumbi vimue Viembimbiliya vi tu kuatisa oku yuvula ovisimĩlo ka via sungulukile oco tu kuate esanju. Citava okuti o kasivo oku liyaka lovisimĩlo viokuti, ku kuete esilivilo. Omo liaco, tu ku vetiya oku konomuisa Embimbiliya oco li ku kuatise. Lilongisa oku kuata ovisimĩlo via sunguluka viatiamẽla kekalo liove, kuenda kukamba wove la Yehova. Nda wa pokola kolonumbi Viondaka ya Suku, oka kuata esanju kovina viosi o linga.
[Etosi pombuelo yemẽla]
a Ovinimbu evi Viembimbiliya, via lomboluiwa Vutala ulo Wondavululi, okupisa kemẽla 19 toke 20.
[Elitalatu kemẽla 7]
Oku pokola kolonumbi Viembimbiliya, ci nena esanju