Tuamamiko Oku Lekisa Ukamba Voluali Lulo Ka Lu Kuete Ocisola

“Ndu handeleki siti, Lisoli pokati.”​—⁠YOA. 15:⁠17.

1. Momo lie Akristão vatete va sukilile oku amamako lukamba wavo?

YESU vuteke wa sulako womuenyo waye palo posi, wa vetiya olondonge viaye oco viamameko lukamba wavo. Vuteke waco wa va sapuilavo hati, ocisola va likuetele pokati, oco ceca uvangi wokuti, olondonge viaye. (Yoa. 13:​35) Ovapostolo va sukilile oku amamako lukamba wavo, oco va pandikise kovitangi va kala oku lavoka, kuenda oku tẽlisa upange Yesu a va kundika. Akristão vatete, veya oku kũlĩhĩwa lomanu, omo liekolelo liavo ku Suku kuenda ocisola ca kala pokati kavo.

2. (a) Nye tua nõlapo oku linga, kuenda momo lie? (b) Apulilo api tu konomuisa vocipama cilo?

² Koloneke vilo, tua sanjuka calua oku kuata ukamba la vamanji voluali luosi, ndeci Akristão vatete va lingile! Tua nõlapo oku pokola konumbi ya Yesu yoku lekisa ocisola ku vakuetu. Pole, koloneke vilo via sulako, omanu valua ka va siatele oku lekisa ocikembe ku vangadiavo. (2 Tim. 3:​1-3) Ovo ka va lekisa ukamba wocili, kuenda va siata oku tẽlisa lika olonjongole viavo. Pole, oco omanu va limbuke okuti, Tuakristão vocili, tu sukila oku yuvula ocituwa caco. Omo liaco, tu konomuisi apulilo amue ndeci: Nye tu sukila oku linga oco tu kuate ukamba wocili? Tu pondola ndati oku kuata akamba vawa? Otembo yipi tu sukila oku tepa ukamba? Nye tu sukila oku linga oco tu pamise ukamba wetu?

Nye ci tu Kuatisa Oku Linga Ukamba Wocili?

3, 4. Nye ci tu kuatisa oku pamisa ukamba wetu, kuenda momo lie?

³ Oco tu pamise ukamba wetu, tu sukila oku sola Yehova. Soma Salomone wa soneha hati: “Ndaño omunu o yula ongendalika, vavali va tẽla oku u tamãlala; ukolo wa ketikiwa lutatu ko tepa lombili.” (Uku. 4:​12) Ukamba wetu u pondola lika oku amamako nda tua kongelamo Yehova.

⁴ Ndaño omanu vana ka va sole Yehova va pondola oku kuata ukamba, pole, afendeli Vaye, va pondola oku kuata ukamba wocili. Ocisola va kuetele Suku, ci va vetiya oku pamisa ukamba wavo. Nda pokati kavo peya ovitangi, va vi tetulula lonjila yimue yi sanjuisa Yehova. Ndaño olonjanja vimue ovanyãli va Suku va seteka oku nyõla ukamba Wakristão vocili, pole, noke va limbuka okuti, ka va tẽla oku tepa ukamba waco. Ovolandu a lekisa okuti, afendeli va Yehova, va siata oku pondiwa omo lioku likala oku pakula vamanjavo.​—⁠Tanga 1 Yoano 3:⁠16.

5. Momo lie Ruti la Naomi va kuatela ukamba wocili?

⁵ Tu pondola lika oku kuata esanju, nda tua linga ukamba la vana va fendela Yehova. Tu konomuisi ulandu wa Ruti la Naomi. Embimbiliya li lombolola okuti, ovo va kuata ukamba umue u komõhisa. Nye ca va kuatisa oku pamisa ukamba wavo? Ruti wa lekisa esunga liaco, poku sapuila Naomi hati: “Omanu vove va linga omanu vange, Suku yene o lingavo Suku yange. . . . Yehova a ci niuwile loku vandekako vali nda hakufako lika ku nepisa love.” (Ruti 1:​16, 17) Ruti la Naomi, va lekisile ocisola ku Suku, kuenda va ecelela okuti, ci va kuatisa oku li sumbila pokati. Omo liaco, Yehova wa va sumũlũisa.

Ndomo tu Kuata Ukamba Wocili

6-8. (a) Nye o sukila oku linga oco o kuate ukamba wocili la vamanji? (b) O lekisa ndati onjongole ku vamanji oco va linge akamba vove?

⁶ Ulandu wa Ruti la Naomi u lekisa okuti, tu sukila oku likolisilako oco tu kuate ukamba wocili. Oku sola Yehova oyo onjila ya velapo yoku kuata ukamba wocili. Pole, tu sukila oku pitisa kovaso olonjongole via vakuetu oco tu pamise ukamba wetu. Ndaño tu fendela kumuamue Yehova la va kota lietu kuenda vamanji vakuavo vekongelo, pole, tu sukila oku amamako loku pamisa ukamba wetu. Tu pondola ndati oku kuata ukamba wocili?

⁷ Lekisa onjongole ku vakuene. Upostolo Paulu, wa vetiya vamanji vekongelo lio ko Roma, oco va kuate ocituwa coku ‘poka akombe.’ (Va Rom. 12:​13) Voku nõla onjila tu yongola oku kuama, mua kongela ovina vialua. Cimuamue haico catiamẽla koku poka akombe okuti, tu sukila oku linga aliangiliyo alua. Lomue o pondola oku tẽlisa onjongole yove yoku yekisa akombe. (Tanga Olosapo 3:27.) O pondola oku lekisa ocituwa coku poka akombe, poku laleka vamanji vamue okuti, veya konjo yove oco u lile kumosi lavo. Anga hẽ, o pondola oku ci linga olonjanja vialua poku laleka vamanji vamue?

⁸ O pondolavo oku linga ukamba la vakuene, poku kuata ocituwa coku laleka va manji oco o talavaye lavo kupange woku kunda. Poku kundila konjo lanjo, nda manji enda laye wa fetika oku vangula catiamẽla kocisola caye la Yehova, ci ku vetiye oku kuata ukamba laye.

9, 10. Ongangu yipi Paulu a tu sila, kuenda tu yi kuama ndati?

⁹ Amamako oku lekisa ocisola. (Tanga 2 Va Korindo 6:​12, 13.) Anga hẽ, wa siata oku sima okuti, vekongelo ka muli la umue o pondola oku linga ekamba liove? Ale wa siata oku sima okuti, ku pondola oku linga ukamba la vamanji? Upostolo Paulu, wa tu sila ongangu yiwa yoku lekisa ocisola komanu. Otembo yimue Paulu ka simĩle okuti, oka kuata ukamba la va Yudea. Pole, noke, wa linga ‘upostolo ukualofeka.’​—⁠Va Rom. 11:⁠13.

¹⁰ Paulu, ka lingile lika ukamba lomanu va kuete anyamo amuamue laye. Ndaño wa kala ukulu wa Timoteo, kuenda va kuata ovituwa via litepa, pole, va kala akamba vocili. Koloneke vilo, amalẽhe valua, va siatavo oku kuata ukamba la vamanji vana okuti akulu vavo. Ufeko umue o tukuiwa hati, Vanessa, eci a kuata ci pitahãla 20 kanyamo, wa popia hati: “Ekamba liange, li kuete eci ci pitahãla 50 kanyamo. Nda siata oku vangula laye ovina ndi sole oku sapela lakamba vana tu kuete anyamo amuamue. Eye, wa siata oku ndi kuatisa calua.” Va fetika ndati ukamba waco? Vanessa wamisako loku popia hati: “Nda likolisilako oku kuata ukamba laye.” Ove hẽ, o yongola oku kuata ukamba la vamanji vana okuti, ka wa lisokeli kanyamo? Nda wa ci linga, Yehova oka sumũlũisa elikolisilo liove.

11. Ulandu wa Yonatão la Daviti, u tu longisa nye?

¹¹ Kala ukuacili. Salomone wa soneha hati: “Ekamba li sola olonjanja viosi, kuenje li linga manjove koloneke viohali.” (Olosap. 17:​17) Eci Salomone a soneha olondaka evi, wa ivaluka ukamba isiaye Daviti a kuata la Yonatão. (1 Sam. 18:⁠1) Soma Saulu, wa yonguile okuti, omõlaye Yonatão o piñala omangu yusoma ko Isareli. Pole, Yonatão wa tava okuti, Yehova o nõla Daviti oco a linge osoma. Eci Daviti a vialekiwa komangu yusoma, Yonatão ka temẽle, ndeci Saulu a linga. Eye, ka sumuile omo liesumũlũho Daviti a tambula, kuenda ka tavele kalundi Saulu a linga atiamẽla ku Daviti. (1 Sam. 20:​24-​34) Anga hẽ, tua siata oku kuama ongangu ya Yonatão? Nda akamba vetu va tambula ovikele vekongelo, tua siata hẽ, oku sanjuka? Tua siata hẽ, oku kuatisa akamba va liyaka lovitangi? Nda va tu sapuila ondaka yimue yĩvi yatiamẽla kekamba lietu, tu tava hẽ lonjanga kesapulo liaco? Tu kuete hẽ ocituwa coku teyuila ekamba lietu ndeci Yonatão a linga?

Otembo tu Sukila Oku Tepa Ukamba

12-14. Ovitangi vipi vamue va lilongisa Embimbiliya va siata oku liyaka lavio, kuenda tu va kuatisa ndati?

¹² Nda umue tu longisa Embimbiliya wa fetika oku linga apongoloko, o liyaka locitangi coku siapo akamba vaye vosimbu. Citava okuti, o kuete akamba vana ka va pokola kolonumbi Viembimbiliya. Pamue, kosimbu wa enda oku pita otembo yalua lakamba vaco. Noke, wa limbuka okuti, akamba vaco va sole oku linga ovina vi pondola oku u yapula, kuenje, o nõlapo oku li tepa lavo. (1 Va Kor. 15:​33) Pamue o sima okuti, nda wa li tepa lavo, o linga ohembi.

¹³ Nda o kasi oku lilongisa Embimbiliya, kuenje o liyaka locitangi caco, ivaluka okuti, ekamba liocili, li sanjuka calua poku limbuka apongoloko o kasi oku linga. Kuenje, li lekisavo onjongole yoku lilongisa ovina viatiamẽla ku Yehova. Pole, akamba vãvi, va fetika oku ku popia lãvi omo lioku liwekapo ‘oku endaenda lavo kayele kuna va siata oku linga umbondo.’ (1 Pet. 4:​3, 4) Ocili okuti, kua kembele akamba vove, pole, ovo va linga olohembi.

¹⁴ Nda vana va lilongisa Embimbiliya va yandulukiwa lakamba vavo ka va sole Suku, vamanji va sukila oku linga lavo ukamba. (Va Gal. 6:​10) Ove hẽ, wa kũlĩha vamue va lilongisa Embimbiliya okuti, va siata oku enda kolohongele? O pondola hẽ, oku linga lavo ukamba?

15, 16. (a) Nye tu sukila oku linga nda ekamba lietu lia liwekapo oku fendela Yehova? (b) Tu lekisa ndati ocisola cetu ku Suku?

¹⁵ Nye o sukila oku linga, nda ekamba liove ka li yongola vali oku fendela Yehova, kuenje, o sesamẽla oku tundisiwa vekongelo? Ocitangi caco, ci nena esumuo lialua. Manji umue ukãi okuti, ekamba liaye lia liwekapo oku fendela Yehova, wa lombolola ocitangi caco, poku popia hati: “Nda sumuile calua, momo nda simĩle okuti, ekamba liange lia pama kespiritu, pole, nda limbuka okuti, lia hongua. Nda kuata ovisimĩlo viokuti, wa kala lika oku fendela Yehova oco a sanjuise epata liaye. Noke, nda fetika oku konomuisa ovisimĩlo viange. Ndi kasi hẽ, oku fendela Yehova lutima wa sunguluka?” Nye ca kuatisa manji oku yuvula ovisimĩlo viaco? Noke, wamisako loku popia hati: “Nda likutilila ku Yehova, oco a ndi kuatise. Kuenje, nda lekisa kokuaye okuti, ndi kuete ocisola calua laye, kuenda si kasi oku u fendela, omo liakamba nda sanga vocisoko caye.”

¹⁶ Nda tua sumua omo lia vana va nõlapo oku linga akamba voluali, tu nyõla ukamba wetu la Suku. Ndonge Tiago wa popia hati: “Ka wa kũlĩhili okuti ukamba wa livali loluali owo ukuse la Suku? . . . Wosi o yongola oku linga ekamba lioluali o lilingisa unyali wa Suku.” (Tia. 4:⁠4) Nda ekamba lietu lia tundisiwa vekongelo, tu sukila oku lekisa ocisola ku Suku, kuenda oku kolela Kokuaye. (Tanga Osamo 18:25.) Manji wa tukuiwa ndeti vocipama cilo, wa teta onimbu loku popia hati: “Nda limbuka okuti, ka tu pondola oku kisika omunu oku sola Yehova, loku lekisa ocisola kokuetu. Pole, omunu eye o kuete omoko yoku nõla eci a yongola oku linga.” Nye tu sukila oku linga oco tu kuate akamba vawa okuti, vamamako vekongelo?

Amamako Oku Pamisa Ukamba Wove

17. Nye akamba vocili va sukila oku linga poku sapela la vakuavo?

¹⁷ Oku sapela, ku pamisa ukamba. Nda wa tanga ulandu Wembimbiliya watiamẽla ku Ruti la Naomi, Daviti la Yonatão, kuenda, Paulu la Timoteo, o limbuka okuti, akamba vawa ndaño va lianja poku sapela, pole, va li sumbila pokati. Paulu wa lekisa ndomo tu sukila oku sapela la vakuetu, poku soneha hati: “Upopi wene u kale lumbombe loku singiwa lomongua.” Eye wa lekisa ndomo tu sukila oku sapela lomanu “vakualuali” okuti, Halombangiko Via Yehova. (Va Kol. 4:​5, 6) Poku sapela la vana okuti Halombangiko Via Yehova, tu sukila oku lekisa esumbilo kokuavo. Omo liaco, tu sukila oku lekisa esumbilo lia velapo kakamba vetu va kasi vekongelo!

18, 19. Tu tenda ndati elungulo tu tambula ku manji umue ekamba lietu, kuenda ongangu yipi akulu vekongelo ko Efeso va tu sila?

¹⁸ Akamba vocili, va kapako ovisimĩlo via vakuavo, kuenda va sapela ovina vi pamisa ukamba wavo. Soma Salomone wa soneha hati: “Ulela lelemba liwa vi sanjuisa utima; lelungulo liekamba li sanjuisa omunu.” (Olosap. 27:⁠9) O tenda ndati elungulo lieciwa lekamba liove? (Tanga Osamo 141:⁠5.) Nda ekamba liove lia ku lungula catiamẽla kocituwa cimue cĩvi o kasi oku lekisa, nye o sukila oku linga? Anga hẽ o sumua, ale o limbuka okuti, wa ku lungula omo liocisola a ku kuetele?

¹⁹ Upostolo Paulu, wa sanjukilile ukamba a kuata lakulu vekongelo vo ko Efeso. Eye wa kũlĩhĩle vamue pokati kavo eci va linga Akristão. Vohundo ya sulako a linga, wa va vetiya lalungulo amue. Va tendele ndati alungulo aco? Akamba va Paulu ka va sumuile. Pole, va sanjukila ocisola Paulu a lekisa kokuavo, kuenda poku liusika laye, va lila calua poku limbuka okuti, ka vaka li sanga vali laye.​—⁠Ovil. 20:​17, 29, 30, 36-38.

20. Nye ekamba ukuacisola a sukila oku linga?

²⁰ Akamba vocili, va tava kalungulo va tambula, kuenda va lungulavo vakuavo. Tu sukila oku lavulula poku ‘linga olomĩlu.’ (1 Va Tes. 4:​11) Tu sukilavo oku limbuka okuti, ‘omunu lomunu oka lilombolola ku Suku.’ (Va Rom. 14:​12) Pole, manji ukuacisola, o lungula ekamba liaye catiamẽla koku pokola kolonumbi via Yehova. (1 Va Kor. 7:​39) Nye o sukila oku linga, nda ekamba liove ka lia kuelele li fetika oku namulãla la umue okuti, Hambangiko ya Yehova? Anga hẽ, o kuata ohele yoku u lungula omo lioku sima okuti, o sumua? Nye o sukila oku linga, nda ekamba liaco ka lia tavele kelungulo? Manji ukualondunge, o sapela lakulu vekongelo, oco va kuatise ekamba liaye o kasi oku kuama onjila ka ya sungulukile. Pole, tu sukila oku lekisa utõi woku ci linga. Nda tua ci linga, ekamba lietu li kuatisiwa locisola ca Yehova.

21. Nye vosi yetu olonjanja vimue tua siata oku linga, pole, momo lie ci kuetele esilivilo oku pamisa ukamba wetu la vamanji?

²¹ Tanga Va Kolosai 3:​13, 14. Citava okuti, akamba vetu va sumua omo ‘liolondaka vĩvi’ tua popia, ale pamue va popiavo ovina vimue vi tu sumuisa. Ndonge Tiago wa soneha hati: “Etu vosi tuakuaku lueya lueya lovina via lua.” (Tia. 3:⁠2) Ukamba wocili u limbukiwila kongecelo tu eca olonjanja viosi tu lilueyela lekamba lietu. Oku pamisa ukamba wetu poku sapela, kuenda oku liecela pokati, ci kuete esilivilo lia velapo! Nda tua lekisa ocisola caco, tu vetiyiwa oku likuata ‘omunga ya kanguka.’

O Tambulula Ndati?

• Tu pondola ndati oku kuata akamba vawa?

• Otembo yipi tu sukila oku tepa ukamba?

• Nye tu sukila oku linga, oco tu pamise ukamba wetu?

[Elitalatu kemẽla 18]

Nye ca kuatisa Ruti la Naomi oku amamako lukamba wavo?

[Elitalatu kemẽla 19]

Anga hẽ, o kuete ocituwa coku yekisa akombe?