Ene Alume, Kuami Ongangu Ya Kristu Yoku Lekisa Ocisola!
YESU keteke lia sulako liomuenyo waye palo posi, wa sapuila ovapostolo vaye hati: “Ndu wihi ocihandeleko cokaliye cokuti, lisoli pokati. Ndeci ame ndo soli, haico ene, lisolivo pokati. Kokulila kuene pokati oko omanu vosi va limbukila okuti vulondonge viange.” (Yoa. 13:34, 35) Omo liaco, etu Tuakristão tu sukilavo oku lekisa ocisola ku vakuetu.
Upostolo Paulu poku sapuila alume Akristão wa popia hati: “Ene alume, soli akãi vene ndeci Kristu a sola ekongelo, kuenje wa li liecela.” (Va Efe. 5:25) Ulume Ukristão o pondola oku kapako ndati onumbi eyi Yovisonehua nda ukãi waye wa litumbikavo ku Yehova?
Kristu o Sole Calua Ekongelo
Embimbiliya li popia hati: “Ca sesamela alume oku sola akãi vavo ndatimba avo muele. U o sole ukãi waye o lisole eye muele. Momo lomue wa la suvuka etimba liaye muele, puãi o li tekula loku li lava ndeci Kristu [a] lava ekongelo liaye.” (Va Efe. 5:28, 29) Kristu wa solele calua olondonge viaye, kuenda wa vi tata ciwa. Ndaño ka via lipuile, pole, wa lekisa ocisola kokuavo. Omo lionjongole a kuata yoku “kolisa ekongelo liaye okuti li lekisua kokuaye lulamba,” wa tiamisilile utima waye kovituwa viavo viwa.—Va Efe. 5:27.
Ulume o sukila oku lekisa ocisola kukãi waye volondaka kuenda kovilinga, ndeci Kristu a sola ekongelo. Nda ukãi o tatiwa ciwa lulume waye, o limbuka okuti wa kapiwako, kuenda o soliwe calua. Ndaño o kuete onjo yiwa lovina viosi a sukila, pole, nda ulume waye ko kapeleko, o sumua calua kuenda o limbuka okuti ka soliwe.
Ulume o lekisa ndati okuti o sole ukãi waye? O ci linga poku u lekisa ku vakuavo lesumbilo kuenda oku situlula ovituwa viaye viwa loku eca olopandu omo liekuatiso a siata oku tambula kokuaye. Nda ukãi wa linga upange umue okuti wa kuatisa epata, ulume o sukila oku ci sapula ku vakuavo. Nda va kasi pokolika, ukãi o sukila oku limbuka ocisola culume waye. Akãi va sole calua ovina vimue ndeci: Oku va kuata peka, kapepe, oku yola lavo, kuenda oku va pandiya omo liovina va siata oku linga.
‘Ka Kuatele Osõi Yoku va Tukula Hati Vamanjaye’
Yesu Kristu, ka kuatele ‘osõi yoku tukula olondonge viaye olombuavekua hati vamanjaye.’ (Va Hev. 2:11, 12, 17) Nda ove ulume Ukristão okuti wa kuela, ivaluka okuti, ukãi wove manjove kespiritu. Citava okuti, osimbu ka kuelele, tete wa litumbika ku Yehova kuenda wa papatisiwa, ale wa ci linga noke yolohuela. Vekongelo poku eca etambululo, manji una o kasi oku endisa ocipama caco kembumbua wa siata oku tukula ukãi wove hati, “Manji.” Ukãi wove manjove kespiritu, cikale Vonjango Yusoma ale konjo. Omo liaco, o sukila oku sumbila ukãi wove loku lekisa ocisola kokuaye, cikale konjo ale Vonjango Yusoma.
Nda o kuete ovikele vekongelo, olonjanja vimue ka ca lelukile oku vi tẽlisa kumosi levi viepata. Oku likuatisa kumosi lakulu vakuavo vekongelo kuenda oloñuatisi viakulu vekongelo, loku eca ovikele ku vakuene, ci ku kuatisa oku sanga otembo yoku kala lukãi wove una o sukila ekuatiso liove. Ivaluka okuti vekongelo muli vamanji valua va pondola oku tẽlisa ocikele cove cupange, pole, ove lika wa tokekisiwa lukãi wove kolohuela.
Handi vali, ove utue wukãi wove. Embimbiliya li popia hati: “Utue wulume Kristu; utue wukãi ulume waye.” (1 Va Kor. 11:3) O pondola ndati oku tẽlisa ocikele caco? O ci linga locisola okuti, ku pitulula olondaka evi loku kisika ukãi wove oco aku sumbile. Oco o songuile ciwa epata liove, o sukila oku kuama ongangu ya Yesu Kristu yatiamẽla koku tata ciwa ukãi wove.—1 Pet. 2:21.
“Ene Wakamba Vange”
Yesu wa tukula olondonge viaye hati, akamba vaye. Eye wa va sapuila hati: “Siu tukuli vali akuenje, momo ukuenje ka kũlĩhile eci ñala yaye a lingainga, puãi ndo tukuli akamba, momo ndo sapuili ovina viosi nda yeva ku Tate.” (Yoa. 15:14, 15) Yesu kumue lolondonge viaye, va enda oku sapela ciwa. Ovo va endavo oku likuatisa kovopange. ‘Yesu kumue lolondonge viaye,’ va lalekiwile kocipito cimue cuvala wa lingiwa vo Kanana. (Yoa. 2:2) Ovo va kuatele ocitumãlo cimue va solele calua oku enda okuti, vocumbo co Gesemane. Embimbiliya li popia hati: “Yesu wa endaendako olonjanja via lua lolondonge viaye.”—Yoa. 18:2.
Ukãi o sukila oku limbuka okuti, ulume waye o kuete ukamba wocili laye. Ulume lukãi waye, va sukila oku lingila kumosi ovopange! Oku vumbila kumosi Yehova. Oku lilongisila kumosi Embimbiliya. Oku enda kovitumãlo vimue, oku sapela lokulila kumosi. Eci ci lekisa okuti, olohueli vi sukila oku kala akamba vawa.
‘Wa va Sola Toke Kesulilo’
Yesu ‘wa sola olondonge viaye toke kesulilo.’ (Yoa. 13:1) Alume vamue, ka va siatele oku kuama ongangu ya Kristu yoku lekisa esumbilo kakãi vavo. Ovo pamue va litepa ‘lakãi vavo vombutulua,’ kuenje va kuela amalẽhe.—Mal. 2:14, 15.
Alume vamue, va siata oku kuama ongangu ya Kristu ndeci manji Willi a linga. Omo okuti ukãi wa manji Willi wa kala oku vela, wa sukilile oku tatiwa vokuenda kuanyamo alua. Manji Willi wa tenda ndati ocitangi caco? Eye wa popia hati: “Olonjanja viosi nda siata oku tenda ukãi wange ndombanjaile ya tunda ku Suku, kuenda oku u sanjukila calua. Cimue ci soka 60 kanyamo konyima, nda lingile ohuminyo yoku u tata ci kale kotembo yiwa ale kotembo yohali. Nda siata oku ivaluka ohuminyo yaco.”
Ene alume Akristão, kuami ongangu ya Kristu yoku lekisa ocisola. Tati ciwa akãi vene va sumbila Suku, kuenda va tendi okuti va manjene kespiritu, haivo akamba vene.
[Elitalatu kemẽla 20]
Anga hẽ, o kuete ukamba wocili lukãi wove?
[Elitalatu kemẽla 20]
‘Amamako oku sola ukãi wove’