Ocipama 21

Ocipango ca Yehova ci Kuete Ocimãho Cavelapo

1, 2. (a) Yipi onjongole ya Yehova lomanu? (b) Velie va kongeliwa kepata li likuete omunga kafendeli va Suku?

YEHOVA locisola caye, o yongola okuti omanu vosi va li kuata omunga koku u fendela loku kuata eyovo li komohĩsa omo lioku kala omãla Vaye. Eci oco vana va sole esunga va yongolavo.

² Yehova wa fetika oku tẽlisa onjongole eyi eci a fetika oku lulika ovina. Tete wa lulika Omõlaye una okuti tunde eci a pinduiwa o kasi loku “ tuisa ocinyi culamba wa Suku. Ovituwa viaye haivio ovituwa via Suku.” (Va Heveru 1:​1-3) Omõla waco wu eye lika wa lulikiwa muẽle la Yehova. Omo liaco, ovina vikuavo ndeci angelo kilu kuenda omanu palo posi, va lulikiwa vonduko Yomõla waco. (Yovi 38:7; Luka 3:38) Vosi yavo va kala epata limuamue voluali luosi. Kokuavo, Yehova wa kala Suku Yoluali Luosi, haeye Isiavo ukuacisola.

3. (a) Vosi yetu tua piñala nye ku va Isietu vatete? (b) Eliangiliyo lipi liocisola Yehova a lingila ovitumbulukila via Adama?

³ Eci olonjali vietu viatete via pisiwila kolofa omo liekandu, veya oku tundisiwa vo Edene kuenje Suku wa va imba onyima. Ovo va siapo oku panga onepa yepata lia Suku. (Efetikilo 3:​22-24; Esinumuĩlo 32:​4, 5) Vosi yetu tu vi tumbulukila viavo, omo liaco tua citiwa lonjongole yoku linga ekandu. Pole, Yehova wa kũlĩhĩle okuti vamue pokati kovitumbulukila via Adama la Heva vaka sola esunga. Omo liaco, wa linga eliangiliyo limue liocisola okuti omo va kuatela “eyovo liulamba womãla va Suku.”​—⁠Va Roma 8:​20, 21

Va Isareli va Pumba Ekalo Liwa

4. Esumũlũho lipi Yehova a ecele ko Isareli yo kosimbu?

⁴ Pana okuti papita 2.500 kayamo tunde eci Adama a lulikiwa, Yehova wa eca komanu esumũlũho lioku livala ukamba Laye. Eye wa nõla va Isareli yo kosimbu oco va linge omanu vaye kuenda wa va ĩha Ocihandeleko caye. (Efetikilo 12:​1, 2) Eye wa va lingisa ofeka kuenda vonduko yavo omo Suku a tẽlisila ocipango caye. (Esinumuĩlo 14:​1, 2; Isaya. 43:⁠1) Omo okuti, ovo va kala kupika wekandu kuenda wokufa, ovo ka va kuatele esanju li komohĩsa ndeli Adama la Heva va kuatele tete.

5. Ndamupi va Isareli va pumba ekalo liavo liwa la Suku?

⁵ Va Isareli va kuata ekalo limue liwa la Suku. Va kuatavo ocikele coku sumbila Yehova nda Isiavo loku talavaya ndomo mu litava locipango caye. Yesu wa tukula esilivilo lioku tẽlisa ekisika liaco. (Mateo 5:​43-48) Pole, va Isareli ka va ci lingile. Osimbu va Yudea va popia hati “tu kuete Isietu umuamue, Suku,” Yesu wa popia okuti ovilinga viavo kuenda espiritu va lekasaile ka vi litava leci ovo va vangula. (Yoano 8:​41, 44, 47) Kunyamo wo 33 KK, Ocihandeleko kuenda ekalo liwa va Isareli va kuatele, via malusuiwa la Suku. Eci hẽ ci lomboloka okuti omanu lalimue eteke vaka kuata ukamba uwa la Suku?

Oku Kongeliwa ‘Kuovina Viokilu’

6. “Ocipango” ca Suku Paulu a tukula kelivulu lia Va Efeso 1:​9, 10, ci kuete ocimãho ce?

⁶ Upostolo Paulu wa lekisa okuti vamue pokati komanu vaka kuata ukamba umue ulikasi la Suku. Ndeci, catiamẽla kesokiyo Yehova a lingila vana va kuete ekolelo okuti vaka kala vakuepata Liaye, Paulu wa soneha hati: “[Suku] wa tu lumbuluila elumbu liocipango caye ca sunguluka ndeci a panga ale. Ocipango caco caye ceci, Wa panga okuti, eci otembo yaco yiya, oco ovina viosi, okuti evi viokilu levi vioposi, vi kongeliwa kuenje vi lingiwa vu Kristu.” (Va Efeso 1:​9, 10) “Ocipango” eci ci kasi tu vu Yesu Kristu. Vonduko ya Yesu, omanu va tualiwa vekalo limue li taviwa la Suku. Etendelo limue litito pokati kavo, va kuete elavoko lioku ka kala kilu. Etendelo liomanu valua vaka kala palo posi oloneke ka vi pui.

7. Velie ‘ovina viokilu’?

⁷ Tete, okupisa ko Pendekoste yunyamo wo 33 KK, eluluvalo lia eciwa “kovina viokilu” ci lomboloka okuti, kua vana vaka viala la Kristu Vusoma wokilu. Ovo va tukuiwa la Suku okuti vakuesunga omo liekolelo va kuetele ocilumba ca Yesu. (Va Roma 5:​1, 2) Vokuenda kuotembo va Yudea kuenda Vakualofeka veya oku kongeliwamovo kuenje va soka 144.000 komanu. (Va Galatia 3:​26-29; Esituluilo 14:⁠1) Pokati kavo, vatito va sangiwa palo posi.

Oku Kongeliwa ‘Kuovina Vioposi’

8. ‘Ovina vioposi’ velie? Kuenda ukamba upi va kuete la Yehova?

⁸ Vocipango caco mu kasivo oku kongeliwa ‘kuovina vioposi.’ Olohuluwa viomanu valua etaili, va kasi loku kongeliwa lelavoko lioku kala palo posi otembo ka yi pui. Va kasi loku kemanya onduko ya Yehova loku u fendela kumosi lava vaka kala kilu. (Isaya 2:​2, 3; Sofoniya 3:⁠9) Ovo va suñama ku Yehova nda “Isia” omo va limbuka okuti Eye, eye ono yomuenyo. Kuenda va kuete ekalo li taviwa Laye omo liekolelo va kuetele kosonde ya pesiwa ya Yesu. (Esituluilo 7:​9, 14) Omo okuti handi ka va lipuile, oku kũlĩhĩwa muẽle ciwa ndomãla va Suku, ku keya koloneke viokovaso.

9. Elavoko lipi elivulu lia Va Roma 8:21 lieca komanu?

⁹ Ava, va kuete elavoko lioku kala palo posi va kasi loku lavoka eci ovilulikilo viosi vika “panduluiwa kupika wenyõleho.” (Va Roma 8:21) Eyovo liaco, lika fetika eci handi Yesu kuenda olohoka viaye viokilu ka va nenele ohali yalua, yina yika sulila vo Harmagedo. Eci cika lomboloka enyõleho lioluali lũvi lua Satana, kuenje kuka kuama asumũlũho Wuviali wa Kristu Wohũlũkãi Yanyamo.​—⁠Esituluilo 19:​17-21; 20:⁠6.

10. Omanu va Yehova vaka imba ocisungo cipi cesivayo?

¹⁰ Cika kala esanju lialua eci omanu va Yehova palo posi vaka likuata omunga oku pitulula esanju liomanu va Suku kilu vana va popia hati : “A Yehova Suku Tõlo, ovilinga viove vinene kuenda vi komohisa cimue. A Soma yolofeka, olonjila viove via suñama kuenda viocili. A Yehova u ka tava oku ku sumbila loku tumbangiya onduko yove, helie? Momo ove lika o kola. Olofeka viosi viya, vi ku fendela, momo oku tetulula kuove kua moleha.” (Esituluilo 15:​3, 4) Omanu vosi va Yehova vaka likuata omunga koku fendela lika Suku yocili. Toke muẽle ava vafa vaka pinduiwa kuenje vaka kuata epuluvi lioku kongela olondaka viavo koku sivaya Yehova.​—⁠ Ovilinga 24:⁠15.

Eyovo li Komohĩsa li Kasi Kovaso

11. Eyovo lipi likomohĩsa ava vaka puluka kohali yalua vaka kuata?

¹¹ Noke yohali yalua, okuti yika sulila vo Harmagedo lokupa evĩho voluali, Satana Eliapu kaka kala vali “osuku yoluali lulo.” Afendeli va Yehova ka vaka liyaka vali layonjo aye. (2 Va Korindo 4:4; Esituluilo 20:​1, 2) Etavo liesanda ka lika tondaka vali Yehova, kuenda ka lika vetiya vali omanu oku kuata olonepele. Omanu va Suku vana vakuacili ka vaka talisiwa vali ohali lolombiali omo liekambo liesunga. Heyovokuolio likomohĩsa lika kalako!

12. Ndamupi vosi vaka yovuiwa kekandu kuenda kovina viyililako?

¹² Omo okuti Yesu eye “Kameme ka Suku, u upa akandu oluali,” oka kapako esilivilo liocilumba caye oco o pe akandu omanu. (Yoano 1:29) Yesu wa ci lekisa eci a kala palo posi momo wa ecela akandu omanu, kuenda wa sakola omanu. (Mateo 9:​1-7; 15:​30, 31)Yesu Kristu, omo okuti eye Soma Yusoma wa Suku kilu, oka linga ocikomo poku sakula olomeke, ovitende, ovisitatuĩ, ovilema, kuenda ava va kuete ovoveyi akuavo. (Esituluilo 21:​3, 4) Vosi vana okuti vakuepokolo va ko piwa ‘ocihandeleko cekandu’ kuenje ovilinga viavo kuenda ovisimĩlo viavo vika va sanjuisa, vika sanjuisavo Suku. (Va Roma 7:​21-23) Eci Ohũlũkãi Yanyamo yi pita, vaka lipua, kuenje vaka kala ‘ocisetahãlo’ ca Suku yocili.​—⁠Efetikilo 1:⁠26.

13. Kesulilo Liuviali Wohũlũkãi Yanyamo Kristu oka linga nye? Kuenda nye cikeyililako?

¹³ Pana okuti Kristu wa lingisa okuti omanu va lipua, eye oka eca omoko yaye yoku viala ku Isiaye. Embimbiliya liti: Eye oka “eca usoma ku Suku, haeye Isia, pana okuti wa imula ovoviali osi lovosoma osi kuenda unene wosi. Momo Kristu o viala toke a kapa ovanyali vaye vosi vemẽhi liolomãi viaye.” (1 Va Korindo 15:​24, 25) Uviali Wohũlũkãi Yanyamo uka tẽlisa ocimãho calio, kuenje ka kuka sukiliwa vali uviali wekuatiso okuti owo uka kala pokati ka Yehova lomanu. Omo okuti ekandu kuenda okufa vi kopiwako kuenje omanu vaka yovuiwa, esukila lia Yesu lioku kala Onjovoli lika pua. Embimbiliya li lombolola hati: “Oco Omõlaco layevo o pokola ku Suku, u wa pokuisile k’Omõla ovina viosi, okuti koviluvo viosi Suku eye Fũ.”​—⁠1 Va Korindo 15:⁠28.

14. Omanu vosi vana vaka lipua vaka pokola kulie? Kuenda momo lie?

¹⁴ Noke, omanu vaka lipua kuenda vaka kuata epuluvi lioku lekisa okuti va nõla oku vumba Suku yocili otembo ka yi pui. Omo liaco, eci handi okuti Yehova ka va tendele ndomãla vaye, omanu vosi vakuepokolo Yehova oka va pitisa voseteko yimue ya sulako. Satana lolondele viaye vaka panduluiwa. Kuava va sole muẽle Yehova, kaku keyilila ũvi . Pole, vana okuti omo liesino va tomba Yehova vaka nyõliwa muẽle pe kumue la Satana kuenda olondele viaye.​—⁠Esituluilo 20:​7-10.

15. Ekalo lipi lika kala pokati kovilulikilo viosi via Yehova?

¹⁵ Vosi vana va lipua okuti va teyuila omoko ya Suku yoku viala vokuenda kuoseteko yasulako, Yehova oka va lingisa omãla vaye. Okupisa opo, ovo vaka kala velianjo liulamba womãla va Suku ndepata lia Suku voluali luosi. Ovilulikilo vi kasi kilu levi vi kasi posi, viosi vika litokeka vali koku fendela lika Suku wocili. Ocipango ca Yehova cika tẽlisiwa! O yongola hẽ oku panga onepa kepata eli liasanjuka ndeti voluali luosi? Nda o yongola tu ku vetiya oku kapako eci Embimbiliya lia popia kelivulu lia 1 Yoano 2:17 hati: “Oluali lu takata loñeyi yaluo puãi u o lingainga ocipango ca Suku o kala oloneke ka vi pui.”

Apulilo Voku Pitulula

• Ukamba upi wa kala pokati ka Yehova lafendeli vaye osimbu handi ka kua pitile esino vo Edene?

• Ocikele cipi omanu va Suku va kuete?

• Velie vaka kala omãla va Suku? Kuenda eci cendisiwila ndati pamosi locipango ca Yehova catiamẽla kelitokeko liefendelo?

[Elitalatu kemẽla 190]

Omanu vakuepokolo vaka kuata omuenyo vocumbo ceposo voluali luosi