Sanjukila Ondaka ya Suku

WA SUMŨLŨHA omunu una okuti “ovihandeleko via Yehova ovio a sanjukila.” Omunu waco, o tanga tanga Ondaka ya Suku “utanya luteke.” (Osa. 1:1, 2) Ove hẽ o kuete esumũlũho liaco? Ndamupi o pondola oku vokiya esanju liove li tunda koku tanga Ondaka ya Suku?

Yevelela Osimbu Yehova a Vangula

Kuka tange ño olondaka. Kala ndu okuti o lete eci ci kasi loku lomboluiwa vulandu o kasi loku tanga. Kala ndu okuti o yevite olondaka viava va kasi loku tukuiwa. Osimbu amamako loku tanga ovipama viatete Viembimbiliya, yevelela ndomo Yehova a li situlula eye muẽle naito la naito, kuenda konomuisa ndomo a lulika oluali oco mu kale omanu. Yevelela ndomo eye a sapuila Komõlaye Omesele Yupange, okuti otembo ya pitilapo yoku lulika omanu vatete. Kala ndu okuti o lete Adama la Heva, okuti va kasi loku lekisa esino, noke Suku o va sombisa, kuenje o va tundisa Vofeka Yelau. (Efetikilo, kocipama 1 toke 3) Ove o komõha, eci o tanga okuti, kilu kua tunda ondaka yimue ya tukula Yesu Kristu hati, Omõla wongunga wa Suku, o soliwe calua, una wa tumiwile palo posi, oku eca omuenyo waye oco a yovole omanu. (Mat. 3:16, 17) Seteka oku sokolola ndomo upostolo Yoano a liyeva, eci a yeva ondaka ya Yehova, ya popia hati: “Tala, ovina viosi ndi vi lingisa viokaliye.” (Esit. 21:5) Ocili okuti oku tanga Ondaka ya Suku ndoco, ku nena esanju lia piãla!

Amamako loku tanga ondaka ya Suku, kuenje oka kũlĩha ciwa okuti Yehova, Omunu umue wa velapo haeye o komohĩsa. Ove oka vetiyiwa oku amẽla Kokuaye, momo eye o tu sole calua kuenda o tu tata lohenda. Nda tua likolisilako lumbombe oku linga ocipango caye, eye o tu kuatisa, o tu lekisa ndomo tu kuata esanju kuenda ndomo tu litunda ciwa kovina viosi tu linga.​—Yeh. 1:8; Osa. 8:1; Isa. 41:10.

Nda wa pesila otembo yalua koku tanga Embimbiliya, oka kuata esanju lialua osimbu amamako loku kuata ukũlĩhĩso wocipango ca Suku catimẽla kokuove. Pole, esanju liaco ka li sulila lika opo, puãi likamamako vali. Eci oku tanga kuove kuka ku ĩha ekuatiso liosi o sukila oco o tẽle oku tetulula ovitangi lolondunge, oka kala ndukualosamo wa popia hati: “Ovihandeleko viove vi komohaisa, oco utima wange u pokola kokuavio.” (Osa. 119:129) Ove oka sanjukavo osimbu oka amamako loku limbuka ndomo ovihandeleko Viembimbiliya viuku kuatisa oku pongolola ovisimĩlo viove, lolonjongole viove oco vi litave locipango ca Suku.​—Isa. 55:8, 9.

Embimbiliya li tu lekisa onjila yi tu teyuila kovitangi, kuenda li tu lekisavo onjila ya sunguluka. Osimbu tu amamako loku tanga Embimbiliya, tuka limbuka okuti, Yehova Onjali yimue ya kũlĩha okuti, nda tua ecelela oku yapuisiwa lolonjongole vietimba, kuka tu iyilila ovitangi. Eye ka yongola okuti tu pita lovitangi vina viyilila koku lavisa ovihandeleko viaye via velapo. Eye o kuete ocikembe letu kuenda o yongola okuti tu ambata omuenyo umue uwa. Oku tanga kuetu Ondaka yaye, ku tu kuatisa oku limbuka okuti, esumũlũho limue linene, eye oku kala Suku yetu haeye Isietu wokilu.

Tanga Embimbiliya Oloneke Viosi

Catiamẽla komunu o tanga Ondaka ya Suku eteke leteke, ukualosamo wa popia hati: “Cosi a linga o sumũlũha laco”. (Osa. 1:3) Ocili okuti, etu ka tua lipuile, kuenda tu kasi voluali lũvi lua Satana Eliapu, una o likolisilako oku sandiliya onjila yoku tu yapuisa. Pole, ndaño ndoco, oku tanga kuetu Ondaka ya Suku kuenda oku kuama eci tu tanga, cika tu kuatisa kovina viosi viatiamẽla kelitokeko lietu la Yehova.

Omo okuti tu kasi vayonjo a tundilila voluali lulo lua kuka, oku litekula lovisimĩlo Viululiki wetu, ndaño muẽle vokatembo kamue ño katito veteke, ci tu ĩha ongusu yocili. Vamue va kala vokayike omo liekolelo liavo, va kuata lika ovinimbu vimue Viembimbiliya via sonehiwile vocipama cimue cukanda wasapulo. Ovo va teta ovinimbu viaco, noke va patekela eci vi popia, kuenje va enda loku vi sokolola. Yehova wa sumũlũisa oku likolisilako kuavo, momo va linga eci ekalo liavo lia va ecelela koku kuata ukũlĩhĩso Wondaka ya Suku. (Mat. 5:3) Kotembo yilo, valua pokati ketu tua lisanja vali calua okuti kotembo yavo ci sule. Omo liaco, ka tuka simi okuti oku tanga ño lonjanga ovinimbu vimue Viembimbiliya vokuenda kueteke, ku keyilila cimue ci komohĩsa. Tuka sumũlũisiwa lika nda tua sokiya ciwa otembo yetu loku pitisa kovaso oku tanga ovinimbu vimue Viembimbiliya eteke leteke, loku vi sokolola kuenda oku vi kapako vomuenyo wetu.

Ocili okuti, cosi tua sokiya ci tava okuti ci nyõliwa. Nda ceya oku pita letu, tu kuete oku pitisa kovaso ovina vi kuetepo vali esilivilo. Ocili okuti, locipango cetu muẽle, ka tu piti eteke liosi ale oloneke vivali okuti ka tu nyui ovava. Omo liaco, ndaño tueya oku pita lovitangi vimue vomuenyo wetu, handi lopo tu kuete oku sokiya otembo yoku li kavuluisa Londaka ya Suku.​—Ovil. 17:11.

Tanga Cosi ci Sangiwa Vondaka ya Suku

Ove hẽ wa tanga ale Embimbiliya liosi tunde kefetikilo toke kesulilo? Vamue va siata oku sima okuti, ca va luila enene oku upisa oku tanga kocipama catete celivulu Liefetikilo toke kocipama ca sulako celivulu Liesituluilo. Ava va siata oku tanga Embimbiliya liosi, va sole oku fetikila Kovisonehua vio Helasi Viakristão. Momo lie? Momo, ci va lelukila vali oku limbuka ndomo vopa esilivilo kalivulu aco Embimbiliya oco va kuame vali ciwa volomãhi via Kristu. Ale pamue, momo okuti Ovisonehua via Kristão vio Helasi, vi molẽha soketi ka vialuile ño enene oku vi tanga. Ovio onepa ño yakuãla Yembimbiliya. Pole, pana okuti va mãla oku tanga 27 kalivulu aco, va fetika oku tanga 39 kalivulu atiamẽla Kovisonehua vio Heveru. Eci ca siata oku va nenela esanju lialua. Vokuenda kuotembo, eci va mãla oku tanga Ovisonehua vio Heveru, oku tanga Embimbiliya ku pongoloka muẽle ocituwa cavo. Kuenje, va tuihinya oku tanga Ovisonehua vio Helasi Viakristão onjanja yavali, noke ka va liwekelepo vali. Oku tanga Ondaka ya Suku, ku kalevo ocituwa cove vokuenda kuomuenyo wove wosi.

Vepata liove ale vekongelo omu ove watiamẽla, muli hẽ umue okuti ka tẽla oku tanga? Momo lie ku sokiyila otembo yoku tangela omunu waco Embimbiliya olonjanja viosi? Ove oka kuatisiwa, kuenda omunu waco oka kuatisiwavo osimbu a sokolola eci a yeva, loku ci kapako vomuenyo waye.​—Esit. 1:3.

Vokuenda kuotembo, oka tẽla oku li sokiyila ovimãho vialua viatiamẽla koku tanga Embimbiliya. Vimue pokati kovimãho viaco, vika ku kuatisa oku limbuka elitokeko li sangiwa pokati kolonepa viñi viñi Viembimbiliya. Nda Embimbiliya liove li kuete atukulo pombuelo yemẽla, ci tava okuti aku lekisa ulandu wondongosi watiamẽla kesapulo liaco, kuenje cika ku kuatisa. Atukulo aco, aka ku kuatisa oku limbuka eci ca vetiya oku sonehiwa kuolonepa viñi viñi vielivulu Liolosamo, leci ca vetiyavo oku sonehiwa kuovikanda viovapostolo va Yesu Kristu. Elivulu Estudo Perspicaz das Escrituras, li kuete esapulo liondongosi li lombolola eci catiamẽla komanu, kovitumãlo, kuenda kovituwa viomanu va tukuiwa Vembimbiliya. Velivulu liaco, mu sangiwa olo mapa vi lombolola eci catiamẽla koku tẽlisiwa kuovitumasuku via sonehiwa Vembimbiliya. Vi lekisavo olosoma lovaprofeto va kala kotembo yimuamue. Kuenda vi lekisa otembo kua tẽlisiwa ovolandu añi añi a sangiwa Vembimbiliya.

Osimbu amamako loku sokolola eci o kasi loku lilongisa, oka kuata elomboloko lieci ovina vimue via pitila pokati komanu va Suku. Oka limbukavo esunga lieci Yehova a tatela omanu vaye ndeci a va tata. Handi vali oka limbukavo ndomo Yehova a tenda ovilinga violombiali, viowiñi kuenda viomunu lomunu. Eci cika ku kuatisa oku kuata elomboloko lia velapo liovisimĩlo viaye.

Esapulo Liembimbiliya, lika kuata vali esilivilo kokuove, osimbu o konomuisa olofeka oku kua pita ovolandu aco. Olo mapa violofeka via tukuiwa Vembimbiliya, vi lekisa kocitumãlo oku kua pita ulandu lulandu kuenda ocinãla ci sangiwa pokati kovitumãlo viaco. Ndeci, oku ci tala ciwa, pi hẽ va Isareli va yokela o Kalunga Kakusuka? Oku sanjavala Kuofeka Yohuminyo kua kala ndakupi? Ungende upi Yesu a linga eci a kala palo posi oco a tẽlise upange waye woku kunda? Ovina vipi via posoka upostolo Paulu a mõla kovongende aye a enda loku linga, kupange waye wumisionariu? Olo mapa, lalomboluilo a lekisa ndomo olofeka viaco via kala, a lekisa atosi amue okuti aka eca ongusu koku tanga kuove Embimbiliya. Pi hẽ o pondola oku sanga olo mapa vi lekisa olofeka via sonehiwa Vembimbiliya? Vimue vi sangiwa vo Tradução do Novo Mundo das Escrituras Sagradas. Velivulu Estudo Perspicaz mu sangiwa eci ci soka 70 kolo mapa, kuenda kesulilo lio volume yatatu, ku sangiwa O Índice yolo mapa. Tala vo Índice das Publicações da Torre de Vigia oco o sange olo mapa vikuavo. Nda okuti alivulu a tukuiwa ndeti ka a kasi velimi li ku lomboloka, seleka olo mapa via siata oku sandekiwa vorevista Utala Wondavululi, oco viu ku kuatise koku tanga kuove Embimbiliya.

Ndomo ca sonehiwa Vovisonehua vio Heveru, Soma Daviti wa sivaya Yehova loku popia hati: “A Suku, ovisimilo viove ndi vi sole ca lua. Oku vi tenda via lua muẽle.” (Osa. 139:17) Kovisonehua vio Helasi Viakristão, upostolo Paulu wa sivaya Yehova, omo Eye “wa tuila vovitima vietu ha tuisa ukũlĩhiso wulamba wa Suku wokocipala ca Yesu Kristu.” (2 Va Kor. 4:6) Otembo Daviti a kala komuenyo, lotembo upostolo Paulu a kala komuenyo, va li sila ocinãla covita vialua vianyamo, pole kavalikavo va sanjukilile Ondaka ya Suku. Ove ci tava okuti oka sanjukavo, nda wa sokiya otembo yoku tanga cosi Yehova a ku kapela Vembimbiliya.