Ovangelo, “Aspiritu Vakuakuvumba”
“Havosiko he, aspiritu vakuakuvumba va tumiwila oku vumba ava va piñala eyovo?”—VA HEV. 1:14.
1. Elembeleko lipi tu sanga kelivulu lia Mateo 18:10; kuenda lia Va Heveru 1:14?
YESU KRISTU wa lungula vosi va yongola oku kapela ocilondokua olondonge viaye hati: “Kali lutate okuti ka vu sepuisa kamue kava vatito, momo mopia lene siti, kilu ovangelo vavo va vanja ño-o hũ kocipala ca Tate o kasi kilu.” (Mat. 18:10) Catiamẽla kovangelo vakuekolelo, upostolo Paulu wa soneha hati: “Havosiko he, aspiritu vakuakuvumba va tumiwila oku vumba ava va piñala eyovo?” (Va Hev. 1:14) Ovinimbu evi vi lekisa okuti, Suku o pondola oku tuma ovangelo vaye oco va kuatise omanu. Nye Embimbiliya li tu sapuila catiamẽla kovangelo? Va tu kuatisa ndati? Ongangu yaco yi tu longisa nye?
2, 3. Ovikele vipi ovangelo va kuete?
2 Kilu, kuli ovangelo valua vakuekolelo. Vosi yavo, ‘va kuete unene wa piãla kuenda va kasi oku tẽlisa ondaka ya Suku.’ (Osa. 103:20; tanga Esituluilo 5:11.) Ovo va kuete olonjongole via litepa, lovituwa ndevi via Suku, kuenda elianjo lioku nõla eci va yongola oku linga. Va sokiyiwa vovisoko vialitepa, kuenda va kuete ocikele ca velapo veliangiliyo lia Suku. Mingeli (okuti oyo onduko Yesu a tambula kilu,) eye ungelo wavo wavelapo. (Dan. 10:13; Yuda 9) “Uveli pokati koviluvo viosi,” haeye “Ndaka,” ale Kapitiya ka Suku, wa kuatisa Yehova koku lulika ovina vikuavo.—Va Kol. 1:15-17; Yoa. 1:1-3.
3 Noke liungelo wavelapo, kuli va serafi, va sapula oku kola kua Yehova, kuenda va kuatisa omanu vaye oku li yelisa kespiritu. Kulivo va keruvi va teyuila uviali waye. (Efet. 3:24; Isa. 6:1-3, 6, 7) Ovangelo vakuavo, va kuete ovikele via litepa koku tẽlisa ocipango ca Suku.—Va Hev. 12:22, 23.
4. Nye ovangelo va linga eci oluali lua sevetiwa? Nda omanu va sumbilile elianjo liavo lioku linõlela, nda va kuata onima yipi?
4 Eci ‘oluali lua sevetiwa,’ ovangelo vosi va yolela kuenda va tẽlisa ovikele viavo viupange, osimbu ongongo ya kala oku pongiyiwa oco yi linge ocitumãlo comanu. (Yovi 38:4, 7) Yehova eci a lulika omunu, “wo kambisa naito lovangelo,” pole, wo lulika ‘lesetahãlo’ Liaye oco a situlule ovituwa Viululiki waye. (Va Hev. 2:7; Efet. 1:26) Adama la Heva nda va sumbilile elianjo liavo lioku linõlela eci va yongola oku linga kumue lomãla vavo, nda va vamamako lesanju vocumbo celau palo posi, loku panga onepa kepata lia Yehova.
5, 6. Ocitangi cipi ca pita kilu, kuenda nye Suku a linga oco ci tetuluiwe?
5 Ovangelo va kola va sumuile calua poku mola usuanji wa katuka pokati komãla va Suku. Umue pokati kavo ka sanjukilile vali oku sivaya Yehova, momo wa yonguilevo oku fendeliwa. Omo liaco, wa li lingisa Satana, (ci lomboloka, “Ukuesino”) omo lioku lingila usuanji uviali wa Yehova, kuenda oku seteka oku sovola uviali waye. Noke yoku kemba, wa vetiya Adama la Heva oku likongela kokuaye oco va lingilevo usuanji Ululiki wavo ukuacisola.—Efet. 3:4, 5; Yoa. 8:44.
6 Yehova wa nõlapo oku sombisa Satana ndomo ca lekisiwa vocitumasuku catete Cembimbiliya, poku popia hati: “Ñapa ukuse pokati kene, love lukãi, lo pokati kombuto yove lombuto yaye. Eye [oka] sasõla utue wove, kuenje ove u lumana kocisendemãi.” (Efet. 3:15) Omo liaco, wa lekisa okuti pokati ka Satana, ‘lukãi’ wa Suku, paka kala ukuse. Ocisoko covangelo vo kilu Yehova wa ci tenda ndukãi waye o soliwe. Ocitumasuku caco ceca elavoko, ndaño ovina via kongela ‘velumbu liaco li kola’ vieya oku situluiwa vokuenda kuotembo. Suku wa likuminya okuti, umue pokati kocisoko caye kilu, oka nyõla olondingaĩvi viosi, kuenda vonduko yaye, ‘ovina viokilu levi vioposi,’ vika kongeliwa kumuamue.—Va Efe. 1:8-10.
7. Koloneke via Noha, nye ovangelo vamue va linga, kuenda nye Yehova a linga lavo?
7 Koloneke via Noha, ovangelo vamue “va tunda kocitumalo cavo” kilu, kuenje va lipongolola vatimba ositu, oco va tẽlise olonjongole viavo vĩvi palo posi. (Yuda 6; Efet. 6:1-4) Omo liaco, Yehova wa va kapa vowelema, oco va likongele la Satana kuenje va linga ‘olohoka vĩvi viovangelo,’ haivo ovanyali vomanu va Suku.—Va Efe. 6:11-13; 2 Pet. 2:4.
Ovangelo va Siata Oku tu Kuatisa Ndati?
8, 9. Yehova wa siata oku tuma ndati ovangelo oco va kuatise afendeli vaye?
8 Omanu vamue ndeci, Avirahama, Yakoba, Mose, Yehosua, Isaya, Daniele, Yesu, Petulu, Yoano, kuenda Paulu, va kuatisiwa lovangelo. Ovangelo vaco va tẽlisa esombiso lia Suku, kuenda va eca ovitumasuku lolonumbi, oku kongelamo Ocihandeleko Suku a ecele ku Mose. (2 Olos. 19:35; Dan. 10:5, 11, 14; Ovil. 7:53; Esit. 1:1) Omo okuti cilo tu kuete Embimbiliya liosi, ovangelo ka va sukila vali oku tu lomboluila esapulo li tunda ku Suku. (2 Tim. 3:16, 17) Omo liaco, ovangelo va kuete upange walua woku tẽlisa ocipango ca Suku kuenda oku kuatisa afendeli vaye.
9 Embimbiliya li tu sapuila hati: “Ungelo wa Yehova o ñuala ava vo sumbila ha va popela.” (Osa. 34:7; 91:11) Omo liocitangi ca votuiwa catiamẽla kepokolo liomanu, Yehova wa ecelela okuti Satana o tu seteka lovitangi vialua. (Luka 21:16-19) Pole, Suku wa kũlĩha okuti, poku pandikisa kovitangi viaco, tu eca uvangi wokuti, tua kolela kokuaye. (Tanga 1 Va Korindo 10:13.) Ovangelo va lavulula loku teyuila omanu ndomo ci likuata locipango ca Suku. Ovo va popela Sadrake, Mesake, Aved-Nego, Daniele, kuenda Petulu. Pole, ka va teyuilile Stefano la Tiago kolofa eci va pondiwa lovanyãli. (Dan. 3:17, 18, 28; 6:22; Ovil. 7:59, 60; 12:1-3, 7, 11) Ovitangi viomanu va tukuiwa ndeti, via pita vapuluvi a litepa. Cimuamue haico ca siata oku pita koloneke vilo. Vamanji vamue va kala kocila coku kangisila omanu ko Alemanya va pondiwa, pole, valua pokati kavo Yehova wa va popela kolofa.
10. Ndaño ovangelo va siata oku tu teyuila, ekuatiso lipi likuavo tu pondola oku tambula?
10 Ovisonehua ka vi longisa okuti, omunu lomunu voluali o kuete ungelo u teyuila. Pole, tu likutilila ku Suku lekolelo liokuti, “nda tu pinga cimue ca sungulukila ocipango caye eye o tu yeva.” (1 Yoa. 5:14) Ocili okuti, Yehova o pondola oku tuma ungelo umue oco a tu kuatise, pole, ekuatiso citava okuti li yilila volonepa via litepa. Vamanji va pondola oku vetiyiwa oku tu kuatisa kuenda oku tu lembeleka. Suku o pondola oku tu ĩha olondunge longusu yoku pandikisa ‘losongo vetimba,’ yi tu talisa ohali ‘ndungelo wa tumiwa la Satana.’—2 Va Kor. 12:7-10; 1 Va Tes. 5:14.
Kuama Ongangu ya Yesu
11. Ovangelo va kuatisa ndati Yesu, kuenda poku pandikisa lekolelo ku Suku wa lekisa nye?
11 Konomuisa ndomo Yehova a tuma ovangelo vaye oco va kuatise Yesu. Ovo va sapula oku citiwa kuaye, epinduko liaye, kuenda vo kuatisa eci a kala palo posi. Ovangelo nda va kuatisa Yesu okuti kambatiwa lovanyali kuenda oku pondiwa. Pole, Yehova wa tumile lika ungelo umosi oco a pamise Yesu. (Mat. 28:5, 6; Luka 2:8-11; 22:43) Ndomo ca lekisiwa vocipango ca Yehova, Yesu wa fa ndocilumba kuenda wa eca uvangi wokuti, omunu wa lipua o pondola oku pandikisa lekolelo ku Suku ndaño lovitangi. Noke Yehova wa pindula Yesu oco a kuate omuenyo ko pui kilu, kuenje wo wiha ‘omoko’ yoku viala ovina viosi, kuenda oku ecelela okuti ovangelo va pokolavo kokuaye. (Mat. 28:18; Ovil. 2:32; 1 Pet. 3:22) Yesu wa lekisa okuti, eye onepa yavelapo ‘yombuto’ ‘yukãi’ wa Suku.—Efet. 3:15; Va Gal. 3:16.
12. Kovina vipi tu sukila oku kuama ongangu ya Yesu yoku lekisa esuluviko?
12 Yesu wa kũlĩhĩle okuti, ka ca sungulukile oku kapa Yehova voseteko, loku lavoka okuti ovangelo vo teyuila ndaño wa lekisa ovilinga vĩvi. (Tanga Mateo 4:5-7.) Omo liaco, tu kuami ongangu ya Yesu poku “kala lesuluviko” okuti, ka tu likokela ovitangi ocipango, pole, tu pandikisa kelambalalo.—Tito 2:12.
Ceci tu Lilongisa Kovangelo Vakuekolelo
13. Ulandu wa Yesu u sangiwa kelivulu lia 2 Petulu 2:9-11, u tu longisa nye?
13 Upostolo Petulu poku pisa vana ‘va tomba’ olombuavekua via Yehova, wa tukula ongangu yiwa yovangelo vakuekolelo. Ovangelo ndaño va kuete unene walua, pole, lesumbilo liocili va yuvula oku pisa ‘loku sepula Yehova.’ (Tanga 2 Petulu 2:9-11.) Omo liaco, tu sukilavo oku yuvula oku pisa vakuetu, loku lekisa esumbilo ku vana va tambula ocikele coku songuila ekongelo, kuenda oku ecelela okuti Yehova Onganji Yavelapo o tetulula ovitangi viosi.—Va Rom. 12:18, 19; Va Hev. 13:17.
14. Ovangelo va tu ĩha ongangu yipi yoku lekisa umbombe?
14 Ovangelo va Yehova va tu ĩha ongangu yiwa yoku lekisa umbombe koku linga upange. Ovangelo vamue, va likala oku situlula olonduko viavo komanu. (Efet. 32:29; Olong. 13:17, 18) Ndaño kilu kuli ovangelo valua, pole, Embimbiliya li tukula lika onduko ya Mingeli, kuenda Gabrieli. Ovina evi vi kuete esilivilo kokuetu, momo vi tu teyuila koku eca esivayo kovangelo. (Luka 1:26; Esit. 12:7) Eci upostolo Yoano a kekamẽlele oku fendela ungelo, ungelo waco wo sapuila hati: “Ku ka ci linge. Ame ndindingupange kumue love lava vasitue love.” (Esit. 22:8, 9) Efendelo lietu kumue lolohutililo, vieciwa lika ku Suku.—Tanga Mateo 4:8-10.
15. Ongangu yovangelo yoku lekisa epandi yi tu longisa nye?
15 Ovangelo va lekisavo ongangu yiwa yoku pandikisa. Ndaño va kuete onjongole yoku kũlĩha elumbu liovina vi kola via Suku, pole, elumbu liaco ka lia lomboluiwile ku vosi pokati kavo. Embimbiliya li popia hati: “Ovangelo va livela oku lengelela vovina viaco.” (1 Pet. 1:12) Nye va linga? Ovo va kevelela lepandi toke eci Suku ‘lolondunge viaye vi likasi’ a ‘situluila ovina viaco vekongelo.’—Va Efe. 3:10, 11.
16. Ovituwa vietu vi kuatisa ndati ovangelo?
16 Akristão vana va liyaka lovitangi, va “linga etalula kovaso . . . ovangelo.” (1 Va Kor. 4:9) Ovangelo va sanjuka calua poku mola ovilinga vietu viekolelo kuenda va sanjukila oku likekembela kuomunu umue ukuakandu. (Luka 15:10) Ovituwa viwa viakãi Akristão vi letiwevo lovangelo. Embimbiliya li lekisa okuti, “ukãi co sesamela oku futa ndokuti ovangelo va limbukilako omoko ya veyaye.” (1 Va Kor. 11:3, 10) Ovangelo va sanjuka calua poku limbuka okuti, afendeli vosi va Suku oku kongelamo akãi, va pokola ku vana va kuete ocikele coku songuila ekongelo, kuenda epata. Epokolo liaco, li vetiya ovangelo oku lekisa esumbilo ku Suku.
Ovangelo va Kuatisa Upange Woku Kunda
17, 18. Momo lie tu popela okuti ovangelo va pondola oku tu kuatisa kupange woku kunda?
17 Ovangelo va kongeliwavo vovina vimue vi komõhisa vi kasi oku pita vokuenda ‘kueteke lia Ñala.’ Vovina viaco mua kongela oku tumbikiwa Kusoma kunyamo wo 1914, kuenda ulandu wa “Mingeli lovangelo vaye” va tundisa Satana kilu kumue lolondele viaye. (Esit. 1:10; 11:15; 12:5-9) Upostolo Yoano wa mola “ungelo . . . wa kala loku palala vokati kilu. Wambata esapulo liwa liotembo ka yi pui oku sapula komanu va tunga kilu lieve.” Ungelo waco wa popia hati: “Sumbili Suku. U wihi ulamba, momo owola yaye yoku tetulula yeya. Fendeli u wa lulika ilu losi lokalunga kuenda olono viovava.” (Esit. 14:6, 7) Afendeli va Yehova va kasi oku kuatisiwa lovangelo kupange woku kunda olondaka viwa viatiamẽla Kusoma wa tumbikiwa, ndaño lelambalalo Lieliapu.—Esit. 12:13, 17.
18 Koloneke vilo, ovangelo ka va tu songuila komanu vakuavitima via sunguluka poku sapela letu ndeci ungelo umue a vanguile la Filipu oco a kundile kalei woko Etiopia. (Ovil. 8:26-29) Pole, ovolandu alua koloneke vilo, a lekisa okuti, ovangelo va siata oku kuatisa kupange woku kunda Usoma, kuenda oku tu songuila komanu vana “va noliwila omuenyo ko pui.”a (Ovil. 13:48) Omo liaco, tu sukila oku likolisilako oku talavaya kupange woku kunda oco tu songuiwe komanu va yongola oku “fendela Isia vespiritu locili”!—Yoa. 4:23, 24.
19, 20. Ocikele cipi ovangelo va kuete kovolandu atiamẽla “kesulilo lioluali”?
19 Catiamẽla koloneke vilo, Yesu wa popia hati, “kesulilo lioluali,” ovangelo vaka “tepa vakuevĩho la vakuesunga.” (Mat. 13:37-43, 49) Ovangelo va kuete ocikele kupange wa sulako woku kongeliwa kuomanu, kuenda oku kapa olondimbukiso kolombuavekua. (Tanga Mateo 24:31; Esit. 7:1-3) Yesu o kasi oku kuatisiwa lovangelo kupange woku “tepa olomeme lolohombo.”—Mat. 25:31-33, 46.
20 “Ñala Yesu [oka] tukuluka tunde kilu lovangelo vaye va pama,” kuenje, vosi “ka va kũlĩhile Suku, lava ka va tava kondaka yiwa ya Ñala yetu Yesu,” vaka nyõliwa. (2 Va Tes. 1:6-10) Eci Yoano a mola ulandu waco vocinjonde, wa lombolola okuti, Yesu wa endela kokavalu kayela, kuenda wa kuamiwa lolohoka viokilu via endelavo kotuvalu tu yela oco va linge uyaki wesunga.—Esit. 19:11-14.
21. Ungelo wambata “peka osapi yonjembo lelienge linene,” oka linga nye ku Satana kumue lolondele viaye?
21 Yoano wa “[molavo] ungelo wa kala loku tunda kilu, wambata peka osapi yonjembo lelienge linene.” Ungelo waco, Mingeli wavelapo okuti, una oka kapa vokayike Eliapu kumue lolondele viaye. Kesulilo Liohulukãi Yanyamo Yuviali wa Kristu, vaka kutuluiwa vokatembo kamue eci omanu vosi va lipua vaka pita voseteko ya sulako. Noke, Satana kumue lomanu vosi vakuesino, vaka nyõliwa. (Esit. 20:1-3, 7-10; 1 Yoa. 3:8) Vosi va lingila usuanji Suku, vaka nyõliwavo.
22. Ovangelo va kongeliwa ndati kovina vika pita kovaso yoloneke, kuenda tu tenda ndati ovikele viavo?
22 Eyovo lietu koluali lulo lua Satana li kasi ocipepi. Ovangelo vaka kuata ocikele ca velapo kovolandu aka kemãlisa uviali wa Yehova, kuenda oku tẽlisiwa kuocipango caye catiamẽla komanu kuenda koluali. Ovangelo vakuesunga, ovo “aspiritu vakuakuvumba, va tumiwila oku vumba ava va piñala eyovo.” Omo liaco, tu eca olopandu ku Yehova Suku wa tuma ovangelo vaye va siata oku tu kuatisa volonepa via litepa koku linga ocipango caye, oco tu kuate omuenyo ko pui.
[Atosi pombuelo yamẽla]
a Tanga elivulu losapi hati, Testemunhas de Jeová—Proclamadores do Reino de Deus, kemẽla 549-551.
O Tambulula Ndati?
• Ovangelo va sokiyiwa ndati?
• Nye ovangelo vamue va linga koloneke via Noha?
• Suku wa siata ndati oku tuma ovangelo oco va tu kuatise?
• Koloneke vilo, upange upi ovangelo va kuete?
[Elitalatu kemẽla 21]
Ovangelo va sanjukila oku tẽlisa ocipango ca Suku
[Elitalatu kemẽla 23]
Ndeci ca pita la Daniele, ovangelo va lavulula loku teyuila omanu ndomo ci likuata locipango ca Suku
[Elitalatu kemẽla 24]
Kuata utõi, momo ovangelo va kasi oku tu kuatisa kupange woku kunda Usoma!
[Olofoto Via Eciwa]
Globe: NASA photo