Usongui Wetu Koloneke Vilo
“Wa tundila oku yula loku amamako oku yula.” —ESIT. 6:2.
1, 2. (a) Upange wa Kristu ndosoma tunde kunyamo wo 1914 wa tukuiwa ndati Vembimbiliya? (b) Nye Kristu a kasi oku linga tunde eci a vialekiwa komangu yusoma?
KRISTU wa vialekua Ndosoma Yuviali wa Yehova kunyamo wo 1914. Oco hẽ, nye ove o sima ca tiamẽla kokuaye? Eye o kasi hẽ lika komangu yusoma oku luluvalela ilu lieve oloneke viosi loku lavulula ndomo ekongelo li kasi oku kula? Nda eci oco ocisimĩlo cetu, tu sukila oku linga apongoloko. Elivulu Liolosamo leli Liesituluilo li tukula Yesu ndosoma ya pama yi kasi oku endela kokavalu ya “tundila oku yula loku amamako oku yula.”—Esit. 6:2; Osa. 2:6-9; 45:1-4.
2 Ocina catete Kristu a linga noke yoku vialekiwa, oku yula “Ocinyõha lovangelo vaco.” Ungelo unene Mingeli haeye Kristu, wa tundisa Satana lolondele viaye kilu kuenje wa va imba palo posi. (Esit. 12:7-9) Noke, omo okuti Yesu eye “omunga yocisila” ca Yehova, weya la Isiaye oku kũlĩhĩsa uhayele wonembele yespiritu. (Mal. 3:1) Eye wa sombisa Etavo liesanda, okuti onepa ya velapo yo ‘Bavulono Yinene,’ momo li kuete eko liosonde kuenda li lingainga ukahonga konepa yespiritu omo lioku litenga vopulitika.—Esit. 18:2, 3, 24.
Kristu wa Yelisa Ukuenje Waye Palo Posi
3, 4. (a) Upange upi Kristu a tẽlisa ndomunga ya Yehova? (b) Ekonomuiso lia lingiwa vonembele lia lekisa nye, kuenda Ndutue wekongelo, ocikele cipi Yesu a eca?
3 Ekonomuiso Yehova ‘lomunga’ yaye va linga, lia lekisa okuti vocitali conembele yespiritu palo posi mua sangiwile ocimunga cimue Cakristão vocili, cina okuti ka ca pangele onepa Ketavo liesanda. Pole Akristão vaco olombuavekua okuti “omãla va Lewi,” va sesamẽlele oku yelisua. Uprofeto Malakiya wa popele hati: “[Yehova] o tumãla ndu o setaika opalata ha yi yelisa, kuenje o yelisa omãla va Lewi. O va yelisa muẽle londalu ndeci va yelaisa ulu lopalata, oco va lumbe ocilumba ku Yehova lesunguluko.” (Mal. 3:3) Yehova wa tuma “omunga [yaye] yocisila” okuti Kristu Yesu, oco a yelise o Isareli yespiritu.
4 Kristu wa sanga okuti Akristão vaco olombuavekua va kala oku likolisilako oku eca okulia kuespiritu votembo ya tukuiwa ku vakuanjo yaye. Tunde kunyamo wo 1879, ndaño lovitangi, ovo va siata oku sandeka vorevista yilo ocili Cusoma wa Suku ci sangiwa Vembimbiliya. Yesu wa popele okuti poku “tukuluka” kuaye oco a kũlĩhĩse vakuanjo yaye vokuenda ‘kuesulilo lioluali,’ wa laikele oku sanga ukuenje umue eca ‘okulia votembo ya tukuiwa.’ Eye wa laikele oku tukula ukuenje waco okuti wa sumũlũha loku “u kundika cosi a kuete” palo posi. (Mat. 24:3, 45-47) Omo Kristu eye Utue wekongelo Liakristão, wa eca “[k]ukuenje wa kolelua haeye wa lunguka” ocikele coku tata ovikuata Viaye viosi Viusoma palo posi. Eye ecaeca olonumbi ku “vakuanjo” yaye okuti olombuavekua, kuenda “olomeme vikuavo” lekuatiso Yosungu Yolombangi Via Yehova.—Yoa. 10:16.
‘Ilu Lieve Lia Yelela Oku Ungula’
5. Upange upi upostolo Yoano a mola vocinjonde caye?
5 Vocinjonde upostolo Yoano a kuata, wa mola ocina cikuavo Soma Mesiya a laikele oku linga ‘keteke lia Ñala,’ noke lioku vialekiwa kunyamo wo 1914. Yoano wa soneha hati: “Oco nda vanja kuenje nda mola elende li yela. Kelende kua tumala umue wa setahala omõla omunu. Kutue waye kua kala ekolowa liulu, lo peka omila ya tua.” (Esit. 1:10; 14:14) Yoano wa yeva ondaka yungelo wa tunda ku Yehova, kuenje wa tumiwa oku imba omila yaye omo ‘ilu lia yelela oku ungula.’—Esit. 14:15, 16.
6. Ulandu upi Yesu a tukula u ka tẽlisiwa vokuenda kuotembo?
6 Ondaka oku ‘ungula ilu lieve,’ yi tu ivaluisa olusapo lua Yesu luotiliku losoka. Yesu wa litukula eye muẽle okuti ulume wa kũla ombuto yiwa locimaho coku ungula otiliku, okuti “omãla vusoma” haivo Akristão olombuavekua va ka viala laye Vusoma. Puãi vokati kuteke, unyali, okuti “Eliapu,” wa waya osoka vocumbo caco okuti, “omãla veliapu.” Cime caco wa handeleka akuenje vaye oku ecelela otiliku oku kulila kumosi losoka toke kotembo yoku ungula okuti, ‘esulilo lioluali.’ Votembo yaco eye o ka tuma angelo vaye oku tepisa otiliku losoka.—Mat. 13:24-30, 36-41.
7. Ndamupi Kristu a kasi oku ‘ungula ilu lieve’?
7 Oco ocinjonde ca Yoano ci tẽlisiwe, Yesu o kasi oku songuila upange woku ungula voluali luosi. Oku ‘ungula ilu lieve’ kua fetika loku ongolola ocisupe co 144.000 ‘comãla vusoma,’ haivo “otiliku” Yesu a tukula volusapo luaye. Oku litepa ku kasi pokati Kakristão vocili lava vesanda, kua limbukiwa eci Uyaki Watete Voluali Luosi lua pua, momo uyaki waco, wa vetiya onepa yavali yoku ‘ungula ilu lieve’ okuti—oku ongolola olomeme vikuavo. Ava havoko “omãla vusoma” puãi, “owiñi wakahandangala” va ka kala olonungi Viusoma. Ovo va tunda “kolofeka viosi, kuenda kapata osi, . . . kuenda vakualimi osi.” Ovo va pokola Kusoma wa Mesiya, una okuti Yesu Kristu kumue lo 144.000 ‘kolosandu’, va ka viala vusoma waco.—Esit. 7:9, 10; Dan. 7:13, 14, 18.
Ndomo Akongelo a Kasi Oku Songuiwa
8, 9. (a) Nye ci lekisa okuti Kristu ka lete lika ekongelo vocosi, puãi o konomuisa ovilinga viomunu lomunu? (b) Ndomo ca lekisiwa kemẽla 26, ovina vipi “via longa via Satana” tua handelekiwa oku yuvula?
8 Vocipama ca pita tua konomuisa ndomo kocita catete Kristu a konomuisa uhayele wespiritu wekongelo lekongelo. Koloneke vilo, Kristu Usongui wetu, wa linga Osoma kuenda wa tambula “uviali wosi wokilu lowu wokilu lieve,” kuenje o kasi oku songuila akongelo voluali luosi lalume va nõliwa. (Mat. 28:18; Va Kol. 1:18) Yehova wo “linga utue wovina viosi viekongelo.” (Va Efe. 1:22) Eci ci lekisa okuti, eye o lete ovina viosi vi lingiwa vokati kueci ci soka 100.000 kakongelo Olombangi via Yehova voluali luosi.
9 Yesu wa sapuila ekongelo lio ko Tuatera hati: “Omõla a Suku, u o kasi lovaso a soka lulienge wondalu, . . . [wa] kũlĩha ovilinga viove.” (Esit. 2:18, 19) Eye wa pisa omanu va kala vekongelo liaco omo liukahonga, kuenda efendelo lioviteka, poku va lungula hati: “Ame ndukuakupendusula volonulo lo vovitima, haime ndu muisi omunu omunu eci ca sesamela ovilinga viene.” (Esit. 2:23) Olondaka viaco vi lekisa okuti Kristu ka lete lika ovina viekongelo vocosi, puãi o konomuisa ovilinga viomunu lomunu. Yesu wa pandiya Akristão va Tuatera omo ka va lilongisile “ovina via longa via Satana.” (Esit. 2:24) Koloneke vilo, eye o pandiya amalẽhe lakulu, va yuvula oku lilongisa “ovina via longa via Satana” vo Internet, lolovideo geime vi lekisa ungangala kuenda oku yapuisiwa lovisimĩlo violuali. Kuenje, eye o sanjukila Akristão vosi va likolisilako oku kuama ongangu yusongui wavo kolonepa viosi viomuenyo wavo!
10. Koloneke vilo, Kristu o songuila ekongelo vonduko yelie, kuenda nye alume vaco va sukila oku limbuka?
10 Kristu o songuila locisola ekongelo liaye posi vonduko yakulu va nõliwa. (Va Efe. 4:8, 11, 12) Kocita catete, akulu vekongelo vosi va kala olombuavekua. Velivulu Liesituluilo va tukuiwa ndolombungululu vi kasi peka lia Kristu. (Esit. 1:16, 20) Pole, koloneke vilo, onepa ya velapo yakulu vekongelo ya tiamẽla kolomeme vikuavo. Omo okuti ovo va nõliwa lekuatiso liespiritu sandu kuenda lohutililo, ovo va tendiwavo ndomanu va kasi oku songuiwa leka lia Kristu. (Ovil. 20:28) Alume vaco puãi, va limbuka okuti Kristu o kasi oku songuila oloñame viaye palo posi Losungu Yolombangi Via Yehova okuti, onepa yimue yitito yopiwa Kakristão olombuavekua.—Tanga Ovilinga 15:6, 28-30.
“Enju, a Ñala Yesu”
11. Momo lie tu yonguila okuti Usongui wetu iya lonjanga?
11 Vesituluilo lia eciwa kupostolo Yoano, Yesu wa popia olonjanja vialua okuti o kasi oku iya lonjanga. (Esit. 2:16; 3:11; 22:7, 20) Ocili okuti, eye o keya oco a sombise o Bavulono Yinene kuenda oluali luosi lua Satana. (2 Va Tes. 1:7, 8) Osimbu tu lavoka oku tẽlisiwa kuovitumasuku viaco, upostolo Yoano o tu vetiya oku vilikiya lolukandi hati: “Enju, a Ñala Yesu.” Etu tu kasi koloneke vilo via sulako violuali lulo, tu ka mola oku iya Kusongui wetu haeye Soma Yusoma o ka kemanya onduko ya Isiaye loku tumbangiya Uviali wa Suku.
12. Olofela vi ka amamako oku tutuiwa toke eci Kristu a ka tẽlisa upange upi?
12 Osimbu handi Yesu ka kunduile ocisoko ca Satana palo posi, omunu wa sulako ketendelo lio 144.00 komanu vosi va panga onepa ko Isareli yespiritu, tete o ka tambula onima yaye. Embimbiliya li lekisa okuti olofela vi ka amamako oku tutuiwa toke eci etendelo lio 144.000 li tẽlisiwa, kuenje, noke oco oluali lua Satana lu nyoliwa.—Esit. 7:1-4.
13. Oku tukuluka kua Kristu ku ka limbukiwa ndati vonepa yatete “yohali ya piãla”?
13 Oku “tukuluka” kua Kristu kunyamo wo 1914 ka kua limbukiwile lomanu vosi palo posi. (2 Pet. 3:3, 4) Ndopo muẽle, eye o ka lekisa oku tukuluka kuaye poku sombisa ovisoko viosi vi sangiwa voluali lulo lua Satana. Oku kunduiwa kulume “ukuakutomba ovihandeleko,” okuti asongui Vetavo Liesanda, ku ka fetika “letukuluko liaye.” (Tanga 2 Va Tesalonike 2:3, 8.) Eci ci ka eca uvangi wokuti Kristu eye wa nõliwa la Yehova ha kala Onganji. (Tanga 2 Timoteo 4:1.) Oku kunduiwa kuonepa ya velapo yo Bavulono Yinene, oko ku ka livanga kenyoleho liatavo osi esanda a kasi voluali lulo. Yehova o ka vetiya ovitima viasongui voluali lulo oco va kundule muẽle pe ocipuepue caco. (Esit. 17:15-18) Enyoleho liaco li ka kala onepa yatete “yohali ya piãla.”—Mat. 24:21.
14. (a) Momo lie otembo yonepa yatete yohali ya piãla yi ka tepuluiwa? (b) “Ondimbukiso ya Mõlomanu” yi ka lomboloka nye komanu va Yehova?
14 Yesu wa lekisa okuti otembo yohali yaco yi ka tepuluiwa omo liomanu “va noliwa,” okuti Akristão olombuavekua va ka sangiwa handi palo posi votembo yaco. (Mat. 24:22) Yehova, ka ka ecelela okuti oku kunduiwa kuetavo liesanda ku kokela Akristão olombuavekua lolomeme vikuavo ovitangi. Yesu wamisako hati: “kovaso yoloneke yohali yaco,” kekumbi lo kosãi kuenda kolombungululu, ku ka kala ondimbukiso, kuenje “ondimbukiso ya Mõlomanu yi tukuluka kilu.” Eci ondimbukiso yaco yi moleha, “apata osi okilu lieve a lila.” Puãi olombuavekua, vana va kuete elavoko lioku enda kilu, kumue lomanu va kuete elavoko lioku kala palo posi, ka va ka lila. Ovo va ka ‘petula ovaso avo, lovitue viavo, omo eyovo liavo li kasi ocipepi.’—Mat. 24:29, 30; Luka 21:25-28.
15. Upange upi Kristu a ka linga eci a keya?
15 Osimbu handi ka tundile oku yula, kuli vali ocina cikuavo Molõmanu a ka linga tete. Ocitumasuku caco citi: “Eci Mõlomanu eya lulamba waye kumue lovangelo vosi, oco o tumala kocalo culamba waye. Kuenje olofeka viosi vi kongelua kokuaye. Oco omanu vaco o va tepa pokati okuti va likaila, ndeci ungombo a tepa olomeme lolohombo. O kapa olomeme kondio, olohombo kepĩli.” (Mat. 25:31-33) Olondaka viaco vi tiamisiwila Kesombiso Kristu a ka linga, lioku tepa “olofeka viosi” vovisoko vivali okuti: “olomeme,” vana va kuatisa vamanjaye kespiritu (Akristão olombuavekua palo posi) kuenda “olohombo,” okuti, vana “ka va tava kondaka yiwa ya Ñala yetu Yesu.” (2 Va Tes. 1:7, 8) Olomeme, okuti “vakuesunga,” va ka tambula ‘omuenyo ko pui’ palo posi, pole, “olohombo,” vienda “keyambulo ka li pui,” okuti kenyoleho.—Mat. 25:34, 40, 41, 45, 46.
Yesu o ka Tẽlisa Upange Waye
16. Kristu Usongui wetu o ka tẽlisa ndati oku yula kuaye?
16 Pana okuti etendelo liolosoma lovitunda lia tẽlisiwa, kuenda olomeme via nõliwa ale haivio via kapiwa kondio yaye ha vi popeliwa, Kristu o ka “tundila oku yula.” (Esit. 5:9, 10; 6:2) Kumue lolohoka viovangelo, kuenda vamanjaye va pinduiwa, eye o ka kundula ovisoko viosi viopulitika, violomĩlu, kuenda viasualali omo via tiamẽla koluali lulo lua Satana. (Esit. 2:26, 27; 19:11-21) Oku yula kua Kristu ku ka tẽlisiwa eci oluali lulo lua Satana lu nyoliwa. Kuenje, o ka imba Satana lolondele viaye vonjembo ohulukãi yanyamo.—Esit. 20:1-3.
17. Vokuenda Kuohulukãi Yanyamo Wusoma wa Kristu pi eye a ka songuila olomeme vikuavo, kuenda nye tu sukila oku linga?
17 Poku tukula “owiñi wakahandangala” wolomeme vikuavo, vina vi ka puluka kohali ya piãla, upostolo Yoano wa lekisa okuti “Kameme o kasi kocalo eye o linga ungombo wavo, haeye o va songuila kolono viovava omuenyo.” (Esit. 7:9, 17) Ocili, vokuenda Kuviali waye Wohulukãi Yanyamo, Kristu o ka amamako oku songola olomeme vikuavo, vina via tava kocili condaka yaye, kuenda o ka vi songuila kovava omuenyo ko pui. (Tanga Yoano 10:16, 26-28.) Omo liolohuminyo evi, tuamamiko oku kuama Usongui wetu cilo, kuenda voluali luokaliye Yehova a tu likuminya!
Patekela Eci Tua Lilongisa
• Upange upi Kristu a linga noke lioku vialekiwa komangu yusoma?
• Kristu o kasi oku songuila akongelo vonduko yelie?
• Volonjila vipi Kristu Usongui wetu a keya lonjanga?
• Ndamupi Kristu a ka amamako oku tu songuila voluali luokaliye?
[Elitalatu kemẽla 29]
Oku kunduiwa kuoluali lua Satana ku ka lekisa etukuluko lia Kristu