Elomboluilo Limue Okuti Olonjeveleli Viupako Elilongiso

OCO elomboluilo liove li kale limue okuti olonjeveleli viupako elongiso, ove o sukila oku linga vali calua okuti hakuvangulako lika ondaka yimue yi kuete esilivilo. Lipula ndoco: ‘Momo lie olonjeveleli evi vi sukilila oku yeva ondaka eyi? Nye ndi ka popia okuti cika lingisa olonjeveleli oku limbuka okuti vopa muẽle esilivilo kolondaka via lomboluiwa?’

Vosikola, nda wa noliwila oku linga ocindekaise cimue ci lekisa ndomo kueciwa uvangi komunu umue, onjeveleli yove oyo yika kala ndomunu o kasi loku kundila. Olonjanja vikuavo, ove okuete oku vangula lekongelo liosi.

Ceci Olonjeveleli Via Kũlĩha Ale. Lipula ove muẽle, ‘Nye olonjeveleli via kũlĩha ale catiamẽla kondaka eyi?’ Ndoco, oka pondola oku nõla apa o kuete oku fetikila. Nda ove o kasi loku vanguila vekongelo lina okuti muli Akristão valua akulu vendamba kespiritu, kuka pitulule ño ovina via kũlĩhĩwa ale lavo viatiamẽla kocili Cembimbiliya. Amisako oku lombolola ocili caco. Ocili okuti, nda pokati kolonjeveleli pali vana okuti veya onjanja yatete Vonjango Yusoma, ove o kuete oku kapako asukila ovimunga viaco vivali.

Sokiya ongendo yelomboluilo liove loku yi tiamisila kueci olonjeveleli viove via kũlĩha ale. Nda velomboluilo liove wa kongelamo atosi amue okuti a kũlĩhĩwa ale la valua pokati kolonjeveleli, teta onimbu poku a lombolola. Pole, poku lombolola ovisimĩlo vina okuti viokaliye ku valua pokati kolonjeveleli, vi vangula levando oco okuti ci va lomboloka ciwa.

Kelomboluilo Kupiwa Elongiso. Oku vangula cimue okuti omanu vopako elongiso, halonjanja viosiko okuti ci lomboloka oku vangula cimue cokaliye. Olohundi vimue, vi kuete ocituwa coku lombolola olonepa vimue viocili Cembimbiliya lulelu okuti valua pokati kolonjeveleli haico muẽle ci va lomboloka lonjanga.

Kupange woku kunda, ka ci tẽla ño oku tukula ocina cimue cokaliye ci lekisa muẽle ocili okuti tu kasi koloneke via sulako. Tanga Embimbiliya oco o lekise elomboloko liovina viaco vi kasi loku pita. Oku linga ndoco, omunu oka kundila, o kopako elongiso liocili. Cimuamue haico, eci o tukula atosi amue a tiamẽla kocihandeleko ca viala ovina via lulikiwa, ale ceci catiamẽla komuenyo wovinyama ale wovikũla, ocimãho cove ka ci ka kale lika coku lekisa ovina vimue via tiamẽla kuloño okuti omunu o kasi loku kundila ka la vi yeva. Pole, ocimãho cove te ci kala coku tokekisa uvangi wovina via lulikiwa leci Embimbiliya li popia oco o lekise okuti kuli Ululiki o tu kuetele ocisola. Eci cika kuatisa omunu wa kundila oku tala ovina locisimĩlo cimue ciñi.

Oku vanguila ondaka yimue pokati kolonjeveleli vimue okuti via siata oku yeva ale ondaka yaco olonjanja vialua, ci linga ekatanga. Pole, oco o kale ulongisi umue uwa, o sukila oku lilongisa ndomo o tetulula ciwa ekatanga liaco. Ndamupi hẽ eci ci lingiwa?

Oku konomuisa ku kuatisa. Vohundo yove kuka kongelemo lika ovina viya ño vovisimĩlo viove, puãi upa esilivilo kovimalẽho vioku konomuisa via tukuiwa kemẽla 33 toke 38. Kapako olonumbi vi sangiwako viatiamẽla kovimãho okuete oku likolisilako oku tẽlisa. Koku konomuisa kuove, ove pamue o sanga esapulo limue okuti ka lia kũlĩhĩwile calua liatiamẽla kondaka yi kasi oku lomboluiwa. Ale pamue o sanga esapulo limue liokaliye vovikanda viasapulo, li lekisa ciwa etosi wa sokiya oku ka lombolola.

Osimbu amamako oku konomuisa ocipama oka lombolola, vetiya ovisimĩlo viove loku li pula ndoco, nye? momo lie? otembo yipi? pi? helie? kuenda ndamupi? Ndeci pamue ci tava okuti o li pula ndoco: Momo lie okuti eci ocili? Ndamupi ndi pondola oku cimbila uvangi? Ovina vipi vi taviwa calua lomanu okuti ca tĩla komanu vamue oku kuata elomboloko liocili eci Cembimbiliya? Momo lie eci ci kuetele esilivilo? Ndamupi eci ci pongolola omuenyo womunu? Ongangu yipi yi lekisa esumũlũho liyilila koku ci kapako? Ocili eci Cembimbiliya ci lekisa nye kueci catiamẽla koku tuwa kua Yehova? Loku ci tiamisila kocipama oka lombolola, ove ci tava okuti o pula ndoco: Otembo yipi eci ca pita? Koloneke vilo elongiso lipi tupako? Oco elomboluilo liove li kale limue li sanjuisa, ci tava okuti o linga apulilo amue pokati kapulilo a-a kuenda oku a tambulula vokuenda kuohundo yove.

Ohundo yove pamue yi kisika oku tanga ovisonehua vimue okuti via kũlĩhĩwa ale ciwa lolonjeveleli viove. Nye o pondola oku linga oco ovisonehua viaco vi kale vimue okuti olonjeveleli viupako elongiso? Ku ka vi tange ño; puãi vi lombolola.

Poku lombolola ocisonehua cimue okuti ca kũlĩhĩwa ale, kupiwa vali elongiso nda wa ci tepa pokati, loku tepamo ovinimbu vina viatiamẽla kosapi yohundo yove kuenda oku vi lombolola. Tala ocisonehua cimue ndeci Mika 6:⁠8. “Esunga” lia tukuiwa vocinimbu eci hẽ olio nye? Olonumbi vielie viesunga vi kasi loku lomboluiwa vocisonehua eci? Ndamupi o pondola oku lombolola eci ci lomboloka “oku linga esunga”? Ale ‘oku sola ohenda’? esuluviko hẽ nye? Ndamupi o lombolola ocipama caco oku ci tiamisila komunu umue ukulu? Ocili okuti, ovipama oka lombolola vohundo yove, te via tiamisiwila kosapi yohundo, kocimãho cove, kolonjeveleli, kuenda kotembo ya sokiyiwila ohundo yove.

Olonjanja vialua, ci kuatisa oku situlula upopi umue volondaka via leluka. Omanu vamue va komõha eci va lilongisa eci ci lomboloka ondaka “usoma” ya tukuiwa kelivulu lia Mateo 6:10. Ndaño okuti omunu umue Ukristão ale vokuenda kuanyamo alua, eye oka kuatisiwa oku kuata elomboloko liwa liocisonehua cimue Cembimbiliya poku wivaluisa elomboloko liolondaka vimue. Eci ci limbukiwila koku tanga 2 Petulu 1:5-8 loku situlula olondaka viñi viñi via tukuiwamo. Ndeci: ekolelo, esunga, ukũlĩhĩso, esuluviko, epandi, esumbilo lioku sumbila Suku, ocisola coku sola vamanji, kuenda ocisola. Eci vulandu umuamue mu tukuiwa olondaka vina okuti elomboloko liavio lia li setahãla, ciwa oku vi situlula oco ci kuatise oku vi tepisa. Ndeci olondaka olondunge, ukũlĩhĩso kuenda uloño, via tukuiwa kelivulu Liolosapo 2:1-6.

Ndaño wa situlula ño ocisonehua caco, olonjeveleli viove vika liyeva muẽle okuti viopako elongiso. Omanu valua okuti va komõha, eci va limbuka okuti oluali luka takata lua tukuiwa kelivulu 1 Yoano 2:17, oluali luomanu vana va tomba Suku; ca piãla enene eci va tanga Osamo 104:5 ya linga hati: “Ove wa seveta oluali koviseveto vialuo okuti ka lu sengiwa vali.” Kepuluvi limue, Yesu wa komohĩsile va Sadukeo poku tukula eci ca sonehiwa kelivulu Lietundilo 3:6, eci ovo va tukowaile okuti oco va tava, kuenje noke wa ci tiamisila kepinduko liava va fa.​—Luka 20:37, 38.

Olonjanja vimue, ciwa oku tukula ulandu wosi watiamẽla kocisonehua cimue Cembimbiliya, vekalo ocisonehua caco ca sonehiwila, kuenda omunu wa kala loku vangula ale yu wa kala loku yevelela. Va Fariseo va kũlĩhĩle ciwa Osamo 110. Pole, Yesu wa tiamisila ovisimĩlo viavo ketosi limue li sangiwa kocinimbu catete. Eye wa pula hati: “Wa sokeli ndati Kristu? Omõla elie? Vo kumbulula vati, Omõla a Daviti. Wa va pula vali hati, Nda oco, ci kasi ndati okuti Daviti, oku popia le espiritu, wo tukula Ñala, hati, [“Yehova, NW”] wa popia la Ñala yange, hati, Tumala kondio yange, toke ñapa ovanyali vove vemehi liolomãi viove? Nda Daviti wo tukula Ñala, o linga ndati omõlaye?” (Mateo 22:41-45) Eci o situlula ovisonehua ndeci Yesu a linga, oka kuatisa omanu oku tanga vali lutate Ondaka ya Suku.

Eci hundi a tukula otembo eci elivulu limue Liembimbiliya lia sonehiwa, ale otembo eci ovina vimue via pita, eye te wa lombololavo ekalo lia kala kotembo yaco. Poku ci linga, olonjeveleli vika kuata vali elomboloko liwa liesilivilo lielivulu liaco ale liovina viaco via pita.

Oku sokisa ku kuatisavo oco okuti eci o popia omanu vopako elilongiso. Ci tava okuti o lekisa oku litepa kuocisimĩlo cimue ci taviwa calua lomanu leci Embimbiliya li popia catiamẽla kocisimĩlo caco. Ale ci tava okuti o sokisa ovolandu avali Embimbiliya a lisetahãla. Anga hẽ pali oku litepa? Momo lie? Nye tua lilongisako? Poku cilinga olonjeveleli viove vi tenda ondaka yaco locisimĩlo cimue ciñi.

Nda wa nõliwa oco oka vangule eci catiamẽla konepa yimue yupange woku kunda, ohundo yove yika kala yimue okuti omanu va kopako elilongiso nda wa fetika loku tukula atosi a velapo ovina oka vangula. Vangula eci ci sukila oku lingiwa, lesunga lieci ci sukilila oku lingiwa, kuenda ndomo eci ci tiamisiwila kovimãho vietu Tulombangi via Yehova. Noke lombolola, pi, otembo yipi, kuenda ndomo ku lingiwa upange waco.

Nda hẽ ohundo yove yi kisika oku vangula eci catiamẽla ‘kovina via longa via Suku’? (1 Va Korindo 2:10) Nda wa fetika loku tukula kuenda oku lombolola olonepa vimue via velapo viondaka yaco, cika leluka vali oku kuata elomboloko liatosi akuavo atiamẽlako. Kuenda nda wa sulako loku pitulula atosi amue ovina wa lombolola ale, olonjeveleli viove vika kolela muẽle okuti via lilongisako cimue.

Olonumbi Viomuenyo Wukristão. Olonjeveleli viove vi kopako vali esilivilo lia velapo nda ove wa va kuatisa oku tala ndomo olondaka vi sangiwa vohundo yove vi kapiwako vovimuenyo viavo. Poku konomuisa ovisonehua vi sangiwa vohundo yove, lipula ndoco, ‘Momo lie olondaka evi via eceliwa oku pitila toke koloneke vietu vilo?’ (Va Rom. 15:4; 1 Va Kor. 10:11) Sokolola ovitangi vimue okuti pamue vamue pokati kolonjeveleli va kasi oku liyaka lavio kuenda vi konomuisa loku kapako alungulo lolonumbi Viembimbiliya. Vohundo yove, situlula Ovisonehua poku lekisa ndomo ovio vi pondola oku kuatisa omunu oku litunda ciwa kovitangi viaco. Ku ka vangule ño vocosi. Vangula muẽle eci catiamẽla kovituwa vimue ale kovilinga vimue.

Poku fetika, vohundo o kasi loku pongiya, kapako onumbi yimosi ale vivali pokati kolonumbi vi sangiwa konano. Eci o loñoloha vali kapako olonumbi vikuavo. Vokuenda kuotembo oka limbuka okuti olonjeveleli viove vika lavoka olohundo viove lesanju, loku kolela okuti vaka yeva cimue okuti va kopako esilivilo.