Ovoyaki Kuenda Apongoloko Otembo a Kasi Oku Vokiya Ekambo Liokulia—Nye Embimbiliya li Popia?

Uyaki ko Ukrania kuenda ovitangi viapongoloko otembo, a kasi oku vokiya ekambo liokulia voluali luosi. Ovitangi viaco vi kasi oku livokiya capiãla enene kolofeka vina kuli uhukũĩ walua, kuna okuti ka ca lelukile omanu oku sanga eci va lia.

“Ovoyaki, apongoloko otembo, oku tĩla kuocinyi kuenda ovina vikuavo, vi kasi oku koka okuti okulia ka ku imi kuenda ku kala ekambo liokulia.”—António Guterres, Oñuatisi yo ONU, 17 Yevambi Linene, 2023
“Olonoño vi tava okuti, nda okuti ofeka yo Rússia ya siapo omunga yoku tuma okulia, ci ka koka ekambo lialua liokulia voluali luosi kuenje kolofeka vina kuli uhukũĩ walua, okulia kua ka tĩla calua, capiãla enene konano yo Áfrika kuenda ko Oriente Médio.”—Atalayar.com, 23 Yevambi Linene, 2023.

Kulĩhĩsa eci Embimbiliya li popia, catiamẽla kekambo liokulia kuenda ovina vi ka lipita kovaso yoloneke.

Embimbiliya lia popele ale okuti ku ka kala ekambo liokulia

Yesu wa popele hati: “Momo ofeka yi ka katukila ofeka kuenda usoma u katukila usoma, ku ka kala onjala.”—Mateo 24:7.
Elivulu Liesitululilo, li popia eci catiamẽla kalume vakuala vocindekaise va kasi oku endele kolokavalu. Umue pokati kalume vaco o lomboloka ovoyaki. Noke o kuãimo ulume ukuavo endela kokavalu okuti o lomboloka onjala ale otembo yimue okuti ka ku ka kala okulia kualua kuenda ondando yokulia yi ka livokiya calua. “Kuenje nda mola okavalu ka tekãva kuenda u wa tumãlako o kuete ombalãsa peka. Nda yeva ondaka yimue . . . ya popia yiti: ‘Okilu yimosi yotiliku yi landiwa lofeto yeteke limosi kuenda olokilu vitatu viosevata, lofeto yeteke yimosi.’”—Esituluilo 6:5, 6, Epongoluilo Liocimunga Coku Pongolola Embimbiliya Kelimi Lioputu.

Ovitumasuku evi Viembimbiliya viatiamẽla kekambo liokulia, vi kasi oku tẽlisiwa koloneke vilo okuti, otembo yimue Embimbiliya li tukula hati, “oloneke via sulako.” (2 Timoteo 3:1) Oco o lilongise ovina vikuavo viatiamẽla “koloneke via sulako” kuenda alume vakuãla va endela kolokavalu via tukuiwa kelivulu Liesituluilo, tala ovideo losapi hati, O Mundo Mudou Desde 1914 kuenda tanga ocipama losapi hati, “Olokavalu Vikuãla Via Tukuiwa Kelivulu Liesituluilo—Vi Lomboloka Nye?”

Ndomo Embimbiliya li pondola oku kuatisa

Vembimbiliya mu sangiwa olonumbi viwa vi tu kuatisa oku liyaka lovitangi ka via lelukile ndeci, oku livokiya kuondando yokulia kuenda ekambo liokulia. Tala vimue pokati kolonumbi viaco vocipama losapi hati, “Como Viver Com Menos Dinheiro?.”
Embimbiliya li ecavo kokuetu elavoko liokuti ovina vi ka pongoloka. Olio li likuminya okuti kovaso yoloneke, “ku ka kala olomema vialua kilu lieve” kuenda omanu vosi va kuata okulia kualua. (Olosamo 72:16) Oco o lilongise ovina vikuavo viatiamẽla kohuminyo yaco kuenda esunga lieci ya koleliwa, tanga ocipama losapi hati, “O Pondola Oku Kolela Kekalo Liwa Lio Kovaso Yoloneke.”