August

Jokaphiyọ ẹkpo eghanghanre ivẹ rehẹ owọ rẹ ota obenu na: (1) Evwata rẹ ihwo hirharokuẹ ebẹnbẹn. (2) Jihova sivwin avwanre nẹ ebẹnbẹn rẹ avwanre. Idjerhe vọ yen Jihova vwo ruẹ ọtiọyen? Ọyehẹ rọ vwọ chọn avwanre uko vwọ vwẹ ẹro abavo vwo ni eyeren nana. Dede nẹ Jihova veri nẹ ihwo re vwẹ ẹga kẹ che vwo aghọghọ, ọ dia ọyen e che vwo yeren akpọ rẹ ebẹnbẹn kanre enẹna-a. (Aiz 66:14) Ọ vuẹ avwanre nẹ a tẹnrovi obaro na—rọ dia ọke avwanre che vwo yeren akpọ rọ guọnọre nẹ a riavwerhen rọyen bẹdẹ. (2Kọ 4:16-18) Asaọkiephana ọ je chọn avwanre uko a sa vwọ reyọ ẹga vwọ kẹ. (Uvw 3:22-24) Die yen e se yono vwo nẹ idje rẹ idibo ri Jihova re fuevun vwẹ ọke rẹ awanre kugbe ọke rẹ avwanre na? Ọkievo e se hirharoku ebẹnbẹn re rhẹro rọye-en. Ẹkẹvuọvo, a da vwẹroso Jihova, o che bicha avwanre ọkieje.—Un 55:22. w23.04 14-15 ¶3-4

Avwanre se yono nẹ udje ri Josẹf vẹ Meri, ri muọghọ kẹ ogangan rẹ usuon ọke rọ tobọ vwọ bẹn kẹ ayen rẹ ayen vwo ru ọtiọyen. (Lu 2:1-6) Ọke rẹ evun ri Meri vwọ gba emeranvwe irhirin re, ọ vẹ Josẹf de hirharoku ẹdia ọvo rọ davwen ẹmienyo rayen ni. Ọgọstọs, rọ dia osun ri Rom, de jurhi nẹ ihwo eje kpo orere rayen rere e se vwo kere ayen. Ọnana cha nẹrhẹ Josẹf vẹ Meri yan oyan ogrongron kpo Bẹtlẹhẹm, oyan ro gron te imaili 93 vwẹ idjerhe rọ vọnre vẹ igbenu. Oyan yena dia obo re lọhọre-e, marho vwọ kẹ Meri. Ọ sa dianẹ ayen ro ẹnwan kpahen omakpokpọ ri Meri vẹ ọmọ rọhẹ evun rọyen. Kẹ, evun uvwiẹ da rha miavwọn rọ vwọ yanran na vwo? Mesaya re veri na yehẹ uwevwiẹ rọyen. Ọnana cha djẹ ayen urhi rẹ igọmẹti na ẹyọrọn? Josẹf vẹ Meri vwẹ uphẹn kẹ erọnvwọn nana ọvuọvo nẹ ọ djẹ ayen urhi na ẹyọrọ-ọn. Fikirẹ ẹmienyo rayen, Jihova de bruphiyọ kẹ ayen. Meri te Bẹtlẹhẹm gberhẹnẹdẹ, vwiẹ ọmọ rẹ oma rọyen nabọ gan, ji ru orugba rẹ aroẹmrẹ ri Baibol!—Mai 5:2. w23.10 8 ¶9; 9 ¶11-12

Kẹ ọ da rha dianẹ oshọ ru wọ vwọ kpahenphiyọ onọ vwẹ uyono mu we vwo? Wọ sa mrẹ ukẹcha siẹrẹ wọ de muegbe ro fiotọ. (Isẹ 21:5) Wọ da nabọ vwo ẹruo rẹ obo re che yono na fiotọ, ọ rha cha bẹn wọ vwọ rionbọ je kpahenphiyọ onọ-ọ. Vwọba, jẹ ẹkpahọnphiyọ wẹn dia kprẹn. (Isẹ 15:23; 17:27) Ẹkpahọnphiyọ da dia kprẹn, a rha ro ẹnwan rọye-en. Wo djephia nẹ wọ nabọ muegbe wo ji vwo ẹruọ rẹ obo re yono na fiotọ siẹrẹ wọ da reyọ eta romobọ wẹn vwọ kpahenphiyọ enọ. Ọ da dianẹ wọ vwẹ iroroẹjẹ nana vwo ruiruo, jẹ oshọ ji mu we wọ vwọ kpahenphiyọ onọ vrẹ obọ ọvo yẹrẹ abọ ivẹ vwo? Jẹ o muwẹro nẹ ẹgbaẹdavwọn wẹn wo vwo ru asan rẹ ẹgba wẹn teri pha ghanghanre vwẹ ẹro ri Jihova. (Lu 21:1-4) Wo vwo ru asan rẹ ẹgba wẹn teri ọ dia o mudiaphiyọ nẹ wo che ru vrẹ oma wẹ-ẹn. (Fil 4:5) Riẹn asan rẹ ẹgba wẹn muru, bru ẹkẹn kẹ oma, je nẹrhovwo rhe Jihova nẹ ọ kẹ wẹ ẹwẹn ri dọe wo se vwo ruo. Ẹsosuọ, tẹnrovi obo wọ sa vwọ kpahenphiyọ onọ ọvo rọ pha kprẹn. w23.04 21 ¶6-8

Ọyinkọn Pọl reyọ avwanre vwo dje isodje re vwẹ ẹro kpẹn ri muegbe fia hẹrhẹ ofovwin. Ọkieje yen a vwọ guọnọ nẹ isodje muegbe hẹrhẹ ofovwin. Ọtiọyen yen ọ je hepha vwọ kẹ avwanre. Avwanre muegbe hẹrhẹ ẹdẹ ri Jihova womarẹ e vwo ku ophapha rẹ udu rẹ esegbuyota vẹ ẹguọnọ phiyọ kugbe erhu rẹ usivwin. Ophapha rẹ udu sẹro udu rẹ isodje. Ọtiọyen esegbuyota vẹ ẹguọnọ je sẹro ubiudu rẹ udje na. E cha chọn avwanre uko vwọ ga Ọghẹnẹ ji nene Jesu ọkieje. Esegbuyota kẹ avwanre imuẹro nẹ Jihova cha hwosa kẹ avwanre siẹrẹ a da vwẹ udu rẹ avwanre eje vwọ guọnọ. (Hib 11:6) O che mu avwanre vwọ fuevun kẹ Osun avwanre Jesu, ọ da tobọ dianẹ e che chirakon ebẹnbẹn. Avwanre se ru esegbuyota avwanre gan vwo chirakon rẹ ebẹnbẹn akpeyeren womarẹ e vwo yono nẹ udje rẹ ihwo re yọnregan dede nẹ ayen hirharoku omukpahen yẹrẹ uweren ọgangan. A da vwẹrokere ihwo ri yeren akpọ ri kekpe ji phi Uvie na phiyọ ẹdia rẹsosuọ, ka sa kẹnoma kẹ imuoshọ re herọ siẹrẹ a da vwọ tua ekuakua rẹ akpeyeren. w23.06 10 ¶8-9

Omaẹriẹnsuon ọyen ẹgba re se vwo suẹn iroro vẹ oborẹ ohwo ruẹ. Jẹ, a je guọnọ omaẹriẹnsuon e se vwo ru obo ri yovwirin, ma rho ọ da dianẹ obo re che ru na bẹnre yẹrẹ owenvwe na rhe avwanre-e. Karophiyọ nẹ omaẹriẹnsuon ọyen ọvo usun omamọ rẹ ẹwẹn na, ọtiọyena rẹ Jihova nẹ ọ chọn wẹ uko womarẹ ẹwẹn ọfuanfon na wo se vwo vwo uruemu ọghanghanre yena. (Lu 11:13; Ga 5:22, 23) Wọ hẹrhẹ ọke rẹ erọnvwọn eje vwo shephiyọ tavwe-en. Vwẹ akpọ nana re de yerẹn na, o vwo ọke vuọvo erọnvwọn eje che vwo shephiyọ-ọ. A da hẹrhẹ ọke erọnvwọn eje vwo shephiyọ, a cha sa yanmu ẹkẹn re bru kẹ oma-a. Avwanre se jẹ owenvwe e vwo e de no nẹ ọ cha bẹn ra vwọ yanmu ẹkẹn re bru kẹ oma. Ọ da dia ọtiọyen yen ẹdia wẹn hepha, wọ sa reyọ erọnvwọn itete vwọ tonphiyọ? Ọ da dianẹ ẹkẹn wo bru kẹ oma ọyen wo vwo vwo uruemu oyoyovwin ọvo, diesorọ wo rhe djephia vwẹ idjerhe sansan? Ọ da dianẹ ẹkẹn wo bru kẹ oma ọyen wo vwo se Baibol re, wọ sa rhuẹrẹ ọke vwọ tuọnphiyọ ememerha? w23.05 29 ¶11-13

Jihova womarẹ ukoko rọyen vwọ chọn avwanre uko rere a sa ra yan vwẹ “Idjerhe Ọfuanfon” na vwẹ ẹdẹ re koba na. (Aiz 35:8; 48:17; 60:17) A sa tanẹ siẹrẹ ohwo de rhiabọreyọ uyono ri Baibol, jẹ o vwo uphẹn rọ vwọ yan vwẹ “Idjerhe Ọfuanfon” na. Evo yan kri vwọ tavwen ayen ki vrẹn nẹ idjerhe na-a. Efa vwo owenvwe rẹ ayen vwọ yan vwẹ idjerhe na bẹsiẹ ayen vwo te asan rẹ ayen ra. Kẹ tivọ yen ayen ra? Vwọ kẹ ihwo ri vwo iphiẹrophiyọ rẹ odjuvwu, “Idjerhe Ọfuanfon” na sun ayen kpo “paradaisi rẹ Ọghẹnẹ” vwẹ obo odjuvwu. (Ẹvw 2:7) Vwọ kẹ ihwo ri vwo iphiẹrophiyọ rẹ otọrakpọ na, idjerhe yena cha nẹrhẹ ayen dia ihwo re gbare vwẹ oba rẹ ẹgbukpe 1,000 ri Kristi na. Ọ da dianẹ wọ yan vwẹ idjerhe yena asaọkiephana, wo nẹ obuko-o. Wo ji vrẹn no bẹsiẹ wo vwo te akpọ ọkpokpọ na-a! w23.05 17 ¶15; 19 ¶16-18

Ọyen obo ri fori wo vwo roro kpahen obo ri Jihova ru kẹ wẹ kidie o che mu we vwo brorhiẹn wọ vwọ vwomakpahotọ kẹ. (Un 116:12-14) Baibol na tare nẹ Jihova ọyen Ọghẹne rẹ “emu esiri eje kugbe okẹ ọgbagba ejobi.” (Jem 1:17) Okẹ rọ ma rho kparobọ rọ vwọ kẹ avwanre yen izobo rẹ ọmọ rọyen, Jesu. A mrẹ vwo dje okẹ nanaa! Ọtanhirhe na nẹrhẹ ọ lọhọ kẹ avwanre e se vwo vwo oyerinkugbe ọkpẹkpẹkpẹ vẹ Jihova. Ọ je kẹ avwanre iphiẹrophiyọ ra vwọ dia bẹdẹ. (1Jọ 4:9, 10) Omaẹvwọkpahotọ wẹn vwọ kẹ Jihova ọyen odjephia nẹ wo vwo ọdavwaro kpahen ẹguọnọ rọ ma rho ro djephia kẹ wẹ, eriyin ji te ebruphiyọ rọyen efa ri te we obọ re.—Urh 16:17; 2Kọ 5:15. w24.03 5 ¶8

Kirobo rẹ oma ru Lọt, ọtiọyen oma ji ru avwanre siẹrẹ a da mrẹ erharhe iruemu rẹ akpọ na titẹ nonẹna. Kidie nẹ ọ riẹnre nẹ Ọsẹ avwanre rọhẹ odjuvwu vwo utuoma kpahen oka rẹ orharhe iruemu tiọyena, “ofu rẹ ọfanrhiẹ rẹ ihwo umwemwu” na de dje mamọ. (2Pi 2:7, 8) Oshọẹdjẹ vẹ ẹguọnọ rẹ Ọghẹnẹ ro vwori, da nẹrhẹ Lọt sen uruemu rẹ ọfanrhiẹn rẹ ihwo re riarierẹ phiyọ. Nonẹna ihwo ri ghwe muọghọ kẹ yẹrẹ nene iwan ri Jihova ri shekpahen ẹfuọ-ọn, yen riariẹ avwanre phiyọ. Dedena, avwanre de vwo ẹguọnọ kugbe oshọẹdjẹ rẹ Ọghẹnẹ avwanre je sa dia fuanfon vwọrẹ uruemu. Ọtiọyena, Jihova chọn avwanre uko womarẹ uchebro rọhẹ ọbe rẹ Isẹ. Inenikristi eje, te imitete te ekpako sa mrẹ erere vwo nẹ uchebro rẹ aghwanre rọhẹ evun rọyen. Avwanre de vwo oshọẹdjẹ ri Jihova, a cha jomaotọ vwọ kẹnoma kẹ erharhe igbeyan. w23.06 20 ¶1-2; 21 ¶5

Ọ sa dianẹ ihwo rẹ orua wẹn vwọso wẹ re yẹrẹ wọ reyọ ekuakua rẹ ugboma vwo ze wo se vwo phi Uvie na phiyọ ẹdia rẹsosuọ vwẹ akpeyeren wẹn. (Mt 6:33) Ọ da dia ọtiọyen, o se muwẹro nẹ Jihova vwo oniso rẹ iruo esiri wẹn. (Hib 6:10) Ọ je sa dianẹ, wọ mrẹ orugba rẹ eta ri Jesu tare nẹ: “O vwo ohwo vuọvo rọ yanjẹ iwevwin yẹrẹ iniọvo eshare yẹrẹ iniọvo eya yẹrẹ oni yẹrẹ ọsẹ yẹrẹ emọ yẹrẹ idju vwo fiki mẹ kugbe fikirẹ iyẹnrẹn esiri na ro che jẹ ayen evwo abọ 100 asaọkiephana vwẹ uvwrẹ ọke nana-a—iwevwin, iniọvo eshare, iniọvo eya, ini, emọ, kugbe idju, vẹ omukpahen—kugbe arhọ ri bẹdi bẹdẹ vwẹ eyeren rọ cha na.” (Mk 10:29, 30) Ebruphiyọ nana eje ri te we obọ re na vrẹ erọnvwọn buebun ru wo vwo ze dibi dibi.—Un 37:4. w24.03 9 ¶5

Iniọvo ri Judia hirharoku owẹnvwe ọgangan. Iniọvo rẹ ukoko rẹ Antiọk “de brorhiẹn kirobo rẹ ẹgba rẹ ohwo ọvuọvo muru, rẹ ayen vwọ vwẹ okẹ rẹ ukẹcha vwo rhe iniọvo re dia Judia.” (Iru 11:27-30) Dede nẹ iniovọ rẹ owẹnvwe te oma na dia ugbo oshesheri, Inenikristi rehẹ Antiọk vwo owenvwe rẹ ayen vwọ vwẹ ukẹcha kẹ ayen. (1Jọ 3:17, 18) Nonẹna, avwanre de nyo nẹ emu ri kpregede te iniọvo rẹ avwanre oma, e ji se dje arodọnvwẹ phia. A sa vwẹ ukẹcha phia kpakpata—ọkiọvo a sa nọ ekpako na kpahen oborẹ avwanre se ru, e ji se ru itetoro vwo bicha iruo rẹ akpọeje, yẹrẹ nẹrhovwo kẹ ihwo rẹ oghwọrọ na te oma. Vwọba, iniọvo na je sa guọnọ ukẹcha ayen sa vwọ mrẹ oborẹ ayen guọnọre. Ọke rẹ Ovie rẹ avwanre, Jesu Kristi, de rhi guẹdjọ rẹ ihwo je mrẹ nẹ avwanre ihwo ri gbe arodọnvwẹ, ko se se avwanre nẹ a rhe “riuku rẹ Uvie” na.—Mt 25:34-40. w23.07 4 ¶9-10; 6 ¶12

Jesu vwẹrokere uruemu ra vwọ nuẹ ro rhe Jihova. E ji ro rhe akpọ na rhi ghwoghwo ota kẹ “igodẹ rẹ uwevwin rẹ Izrẹl ri ghwruru.” Ẹkẹvuọvo o dje uruemu ra vwọ nuẹ phia ọke ro vwo ruiruo na. Vwẹ ẹde ọvo, aye ọvo rọ dia ohwo rẹ Izrẹ-ẹl da rẹ nẹ o sivwin ọmọtẹ rọyen rẹ “ẹwẹn rẹ Idẹbono gboja kẹ.” Jesu gbe arodọnvwẹ kẹ aye na o de sivwin ọmọtẹ rọyen. (Mt 15:21-28) Roro kpahen udje ọfa. Vwẹ ọtonphiyọ rẹ iruo aghwoghwo rọyen, Jesu da ta: “Kohwo kohwo rọ sen vwẹ . . . , ke me je siọn.” (Mt 10:33) Ẹkẹvuọvo, ọ sen Pita rọ tare nẹ ọyen vughe re-e abọ erha soso? Ẹjo. Jesu riẹnre nẹ Pita ohwo rọ fuevun nẹ obo ro ruru na je da. Jesu vwo vrẹn nẹ ushi nu, ọ da vwomaphia kẹ Pita, ọ sa dianẹ ọ vuẹ rẹ nẹ ọyen vwo ghovwo ji vwo ẹguọnọ rọyen. (Lu 24:33, 34) Jihova Ọghẹnẹ vẹ Jesu Kristi ayen ihwo re nuẹ. Kẹ avwanre vwo? Jihova guọnọre nẹ avwanre dia ihwo re nuẹ. w23.07 21 ¶6-7

Imuẹro vọ yen avwanre sa vwọ kẹ ihwo ri vwo ewẹn ivivẹ nẹ ive rẹ Ọghẹnẹ kpahen Iparadaisi na che rugba? Ẹsosuọ, Jihova komobọ yen ve ive na. Ọbe rẹ Evwọphia da ta: “Ohwo ro chidia ekete na da tanẹ: “Nighere! Mi ruẹ erọnvwọn eje phiyọ ekpokpọ.’ ” O vwo aghwanre, ẹgba kugbe owenvwe ro vwo ru orugba rẹ ive rọyen. Ọrivẹ, vwọ kẹ Jihova, orugba rẹ ive rọyen eje muẹro kerẹsiẹ ra da mrẹ nẹ i rugba nure. Ọnana yen sorọ rọ vwọ tanẹ: “Eta nana uyota, a sa vwẹroso ayen. . . . E phia re!” Ọrerha, Jihova da ton orọnvwọn phiyọ o ruo re, kọyensorọ rọ vwọ ta: “Mẹvwẹ yen Alfa kugbe Omẹga na.” (Ẹvw 21:6) Jihova che djephia nẹ Eshu ọyen ọvwọrofian, ọ cha sa dobọ rẹ ọhọre ri Jihova ji-i. Ọtiọyena, ohwo da tanẹ, “Ọnana cha sa phia-a,” gbe se Ẹvwọphia 21:5, 6 ji djefiotọ kẹ. Dje kẹ ohwo na nẹ Jihova yen vwẹ imuẹro nana vwọ kẹ avwanre, imuẹro re se vwo dje ọbe rọ ghwobọphiyọ.—Aiz 65:16. w23.11 7 ¶18-19

Jihova ve ive yena kẹ Ebraham ọke ọ vwọ hẹ ẹgbukpe 75 jẹ o ji vwo ọmọ-ọ. Kẹ Ebraham mrẹ orugba rẹ ive yena? Ọ dia eje-e. Rọ vwọ shariẹ Urhie ri Yufretis wanvrẹ je hẹrhẹ ẹgbukpe 25 nu, vwọrẹ igbevwunu Sera de vwiẹ ọmọ re se Aizik vwọ kẹ Ebraham, ẹgbukpe 60 vwọ wan nu, o de ji mu ivwrọmọ ivẹ Isọ kugbe Jekọp. (Hib 6:15) Ẹkẹvuọvo Ebraham mrẹ ọke rẹ uvwiẹ rọyen vwọ dia ẹgborho rode je reyọ Otọ rẹ Ive na vwọ riuku-u. Dedena, Ebraham vwo oyerinkugbe ọkpẹkpẹkpẹ vẹ Ọmemama rọyen. (Jem 2:23) Mavọ yen oma cha vwerhen Ebraham te, siẹrẹ o de vrẹnushi je mrẹvughe nẹ womarẹ edirin vẹ esegbuyota rọyen, ẹgborho rẹ akpọ na eje da rhe mrẹ ebruphiyọ! (Jẹ 22:18) Die yen e yono norhe? A cha sa mrẹ orugba rẹ ive ri Jihova ejobi enẹna-a. Ẹkẹvuọvo e de vwo edirin kerẹ Ebraham, e se vwo imuẹro nẹ Jihova cha hwosa kẹ avwanre enẹna ji ru vrẹ ọtiọyen vwẹ akpọ ọkpokpọ ro veri na.—Mk 10:29, 30. w23.08 24 ¶14

Ọke rẹ Ovie Uzaya vwọ hẹ eghene, ọ vwomakpotọ. Ọ nabọ vwo “oshọẹdjẹ rẹ Ọghẹnẹ.” Dino ẹgbukpe 68 rọ dia akpọ na yẹn Jihova vwo bruba vwọ kẹ. (2Ik 26:1-4) Uzaya phi ẹgborho rẹ ivwighrẹn buebun kparobọ je nabọ gbogba riariẹ Jerusalẹm phiyọ rere ivwighrẹn vwo jẹ ẹruọ. (2Ik 26:6-15) Aphro herọ-ọ nẹ oma nabọ vwerhen Uzaya fikirẹ erọnvwọn eje Ọghẹnẹ cha rọ uko vwo ru. (Agh 3:12, 13) Ọkieje yẹn Ovie Uzaya vwọ vuẹ ihwo oborẹ ayen che ru. Kẹ ọ sa dianẹ ọnana nẹrhẹ o no nẹ o se ru kemu kemu rọ guọnọ ru eje? Ẹdẹ ọvo Uzaya da ro uwevwin rẹ ẹga na, vwọ rẹ omaephuo ọ da davwẹngba rọ vwo torhẹ insẹns vwẹ enu rẹ agbada na rọ dia iruo ra vwọ kẹ ivie-e. (2Ik 26:16-18) Orherẹn rode Azaraya davwẹngba rọ vwọ kpọvi, ẹkẹvuọvo ivun de miovwo. Ọ da ohwo nẹ, Uzaya fuevun te oba-a ọtiọyena Jihova da vwẹ oti vwo mu. (2Ik 26:19-21) Ọ dianẹ ọ vwomakpotọ jovwo, akpeyeren rọyen ra dia ọtiọye-en! w23.09 10 ¶9-10

A vwọ tobọ reyọ ẹwẹn ọfuanfon na vwọ jẹ reyọ nu, Pita ji nene ovwiẹrẹ rọyen muabọ. Vwẹ 36 C.E., Ọghẹnẹ de ji Pita bru Kọniliọs rọ dia Ọgiye, vwẹ ẹdẹ yena Ọghẹnẹ da reyọ ẹwẹn Ọfuanfon na vwọ jẹreyọ, vwo djephia nẹ “Ọghẹnẹ ghwomaphiyọ ẹbẹre ọvo jẹ ọvo vwo-o” nẹ Igiye je sa vwomaba ukoko rẹ Inenikristi. (Iru 10:34, 44, 45) Ghwe vwo nẹ ọke yena yanran, Pita ko nene Igiye na riemu kuẹgbe odedede rọ dia obo rọ cha rhọnvwe ru jovwo-o. Jẹ, ihwo ri Ju evo re dia Inenikristi rorori nẹ ọyen dia obo ri fori ayen vẹ Igiye na vwọ riemu kugbe-e. Iniọvo nana evo da rhe Antiọk, Pita rhe nene Igiye ri kurhẹriẹ na riemu kuẹgbe-e, rere ivun vwo jẹ iniọvo re dia ihwo ri Ju na emiovwo. Ọyinkọn Pọl vwọ mrẹ uruemu rẹ omeru ri Pita ọ da ghwọkuo vwẹ azagba. (Ga 2:13, 14) Dede nẹ Pita vwiẹre vwẹ ẹdia nana, ofu djere-e. w23.09 22 ¶8

Vwọrẹ uyota, wọ da fuẹrẹn oma wẹn, wọ sa mrẹ asan evo ro de fo nẹ wo ru yovwinphiyọ, ẹkẹvuọvo wo jẹ ofu dje we-e. “Ọrovwori na ohwo esiri,” ọ cha cha wẹ uko vwo ru yovwinphiyọ. (1Pi 2:3) Ọyinkọn Pita kẹ avwanre imuẹro nẹ, “Ọghẹnẹ . . . ko ru uyono rẹ ovwan re, o che ru ovwan gan.” O vwo ọke ọvo ri Pita vwo roro nẹ ọyen muwan ro vwo sikẹrẹ Ọmọ rẹ Ọghẹnẹ-ẹ. (Lu 5:8) Ẹkẹvuọvo womarẹ ukẹcha rẹ ẹguọnọ ri Jihova kugbe Jesu, Pita da wian gangan vwọ dia odibo ri Kristi. Ọtiọyena, a da rhọnvwe kẹ Pita nẹ ọ “ro Uvie ri bẹdẹ rẹ Ọrovwavwanre kugbe Osivwin rẹ avwanre, Jesu Kristi.” (2Pi 1:11) Ọyena ghini okposa dẹn! Wọ da wian gangan kerẹ Pita je vwẹ uphẹn kẹ Jihova nẹ o yono uwe, wo ji che vwo osa rẹ arhọ ri bẹdi bẹdẹ. ‘Usivwin che te we obọ fikirẹ esegbuyota wẹn.’—1Pi 1:9. w23.09 31 ¶16-17

Itabanako awanre na vwo otegodo ọvo—asan ro rhiephiyọ rhuarho, ra gbogba riariẹ rẹ irherẹn na de ruiruo ra vwọ kẹ ayen. Agbada rẹ ẹrovwo ọrhuarho re de ze izobo rẹ ẹtorhẹ na hẹ evunrẹ otegodo na, ọtiọyen ji te oze rẹ ẹrovwo rẹ ame hepha rẹ irherẹn na vwo ruẹ oma rayen fuan tavwen ayen ki vwobọ vwẹ ẹga ọfuanfon. (Ey 30:17-20; 40:6-8) Nonẹna, i ri chekọ vwẹ usun rẹ iniọvo ri Jesu ra vwẹ ẹwẹn ọfuanfon jẹreyọ fuevun ga vwẹ otegodo rọhẹ obevun rẹ uwevwin rẹ ẹga na re rhiẹromrẹ-ẹ rọhẹ otọrakpọ na. Oze rode rẹ ame hepha vwẹ itabanako na kugbe uwevwin rẹ ẹga na, ọyen ẹkarophiyọ ọghanghanre vwọ kẹ ayen kugbe Inenikristi eje rẹ ayen vwọ fon vwọrẹ uruemu kugbe ẹga rẹ ayen vwọ kẹ Jihova. Kẹ tivọ yen “otu gbidigbidi” na da vwẹ ẹga kẹ Ọghẹnẹ? Ọyinkọn Jọn mrẹ ayen ri “mudia obaro rẹ ekete na” ro ghwe shephiyọ vẹ otegodo rọhẹ otafe rọhẹ otọrakpọ na rẹ ayen da “vwẹ ẹga ọfuanfon kẹ te ason te uvo vwevunrẹ uwevwin rẹ ẹga rọyen.” (Ẹvw 7:9, 13-15) Ọyen emu rẹ omavwerhovwẹn re vwo vwobọ vwẹ ọrhuẹrẹphiyotọ rẹ ẹga ọfuanfon ri Jihova! w23.10 28 ¶15-16

Idjerhe ọvo ri Jihova wan vwẹ ọbọngan kẹ avwanre yen womarẹ ekpako na. (Aiz 32:1, 2) Ọtiọyena siẹrẹ wọ da ro ẹnwan, vuẹ ekpako na kpahọn. Ayen da vwẹ ukẹcha kẹ wẹ, rhiabọreyọ. Jihova se ru we gan womarẹ eshare nana. Iphiẹrophiyọ rehẹ Baibol na ra vwọ dia bẹdi bẹdẹ—vwẹ Iparadasi vwẹ otọrakpọ na yẹrẹ vwẹ odjuvwu sa kẹ avwanre ẹgba. (Ro 4:3, 18, 19) Iphiẹrophiyọ avwanre cha avwanre uko vwo chirakon rẹ edavwini, ghwoghwo iyẹnrẹn esiri na, ji ruiruo sansan ra vwọ kẹ avwanre vwẹ ukoko na. (1Tẹ 1:3) Iphiẹrophiyọ yena je vwẹ ọbọngan kẹ ọyinkọn Pọl. O hirharoku “okeke ọgangan,” ‘ẹwẹn rọyen tighiri,’ ‘e mukpahọn,’ ‘a teyenrọ she.’ Ọ tobọ vwo ọke rẹ arhọ rọyen vwọ hẹ ẹdia rẹ imuoshọ. (2Kọ 4:8-10) Iphiẹrophiyọ rẹ ọyinkọn Pọl tẹnrovi kẹ rẹ ẹgba vwo chirakon rẹ edavwini. (2Kọ 4:16-18) Pọl tẹnrovi iphiẹrophiyọ rẹ arhọ ri bẹdẹ ro vwori vwẹ odjuvwu. Pọl roro kpahen iphiẹrophiyọ yena, ọ da nẹrhẹ ohwo rọ hepha vwẹ obevun, “kpokpọ phiyọ kẹdi kẹdẹ.” w23.10 15-16 ¶14-17

Wọ da nẹrhovwo, roro sẹ ọyen ọke ro fori ri Jihova vwọ kpahenphiyọ ẹrhovwo wẹn E se roro nẹ ofori nẹ Jihova kpahenphiyọ ẹrhovwo avwanre ichichiyin yena. Dedena, Jihova riẹn ọke ro fori rọ vwọ kpahenphiyọ ẹrhovwo avwanre. (Hib 4:16) Ọ da dianẹ Jihova kpahenphiyọ ẹrhovwo avwanre ichichiyin yena-a, e se roro nẹ ọ guọnọ kpahenphiyọ-ọ. Ẹkẹvuọvo, ọ sa dianẹ ọke ro fori nẹ ọ vwọ kpahenphiyọ ẹrhovwo avwanre ‘Ji te-e.’ Kerẹ udje, roro kpahen eghene oniọvo ọshare rọ nẹrhovwo nẹ e jẹ ọga rọyen kpo Ẹkẹvuọvo ọga rhọnvwe kpo-o. Ọ da dianẹ Jihova sivwinro vwẹ idjerhe rẹ igbevwunu, Eshu sa tanẹ oniọvo ọshare na ga Jihova kidie nẹ Jihova sivwinro. (Job 1:9-11; 2:4) Vwọba, Jihova rhuẹrẹ ọke phiyọ ro che vwo si ọga eje no. (Aiz 33:24; Ẹvw 21:3, 4) Tavwen ọke yena ki te, e jẹ avwanre roro nẹ Jihova che sivwin avwanre vwẹ idjerhe rẹ igbevwunu-u. Ọtiọyena, ofori nẹ oniọvo na rẹ Jihova nẹ ọ kẹ ọyen ẹgba, ufuoma vẹ ẹwẹn ri dọe ro se vwo chirakon rẹ ebẹnbẹn rọyen na je fuevun ga Jihova. w23.11 24 ¶13

Obo ri Samsin ruru na ghene bra mamọ, jẹ ọ dobọ rẹ ẹga rọ vwọ kẹ Jihova ji-i. Ọ gbẹn idjerhe ọfa ro vwo nene ihwo ri Filistia na họnre kidie ọyen oborẹ Ọghẹnẹ guọnọre. (Igu 16:28-30) Samsin da rẹ Jihova nẹ, jẹ me sa “choja rẹ ibiẹro mẹ ive na vwẹ uyovwi rẹ ihwo ri Filistia na.” Ọghẹnẹ rẹ uyota na da kpahenphiyọ ẹrhovwo ri Samsin je rhoma reyọ ẹgba rọyen vwọ kẹ. Udje nana, Samsin de hwe ihwo ri Filistia buebun vrẹ obo ri jovwo. Dede nẹ Samsin rioja rẹ obo ro ruru na, ọ dobọ rẹ ega rọ vwọ kẹ Jihova ji-i. Ọ da dianẹ e ru obo re chọre rọ nẹrhẹ a ghwọku avwanre yẹrẹ nẹrhẹ uphẹn rẹ ẹga va avwanre abọ, e jẹ a dobọ rẹ ẹga ri Jihova jẹ-ẹ. Karophiyọ nẹ, Jihova muegbe ro vwo ghwovwo avwanre. (Un 103:8, 9) O toro oruchọ rẹ avwanre-e, Jihova cha kẹ avwanre ẹgba re vwo ru ọhọre rọyen kirobo ro ru kẹ Samsin. w23.09 6 ¶15-16

Akoechiro wẹn cha nẹrhẹ Jihova rhiabọreyọ owẹ. Ọ dia ọnana mudiaphiyọ nẹ oma vwerhen Jihova siẹrẹ wo de hirharokuẹ ebẹnbẹn yẹrẹ edavwini-i. Ukperẹ ọtiọyen, oma vwerhọn kidie nẹ wọ fuevun chirakon. Ọ vwerhoma ra vwọ riẹn nẹ akoechiro avwanre nẹrhẹ Jihova ghọghọ. (Un 5:12) Karophiyọ nẹ Ebraham chirakon rẹ edavwini ọ da nẹrhẹ ọ mrẹ aroesiri rẹ Ọghẹnẹ. Jihova niro kerẹ ugbeyan Rọyen o de se ọvwata. (Jẹ 15:6; Ro 4:13, 22) Ọ je sa dia ọtiọyen kẹ avwanre. Ọ dia uche rẹ iruo re ru vwẹ ẹga rọyen yẹrẹ uphẹn rẹ ẹga ra riavwerhen rọyen yen muo vwo rhiabọreyọ avwanre-e. Ẹkẹvuọvo, o ruẹ ọtiọyen siẹrẹ a da fuevun. Avwanre eje se chirakon o toro ikpe, ẹdia yẹrẹ ẹgba rẹ avwanre vwori-i. Wọ fuevun chirakon rẹ ebẹnbẹn enẹna? Ọ da dia ọtiọyen, karophiyọ nẹ obo wo ruẹ na nẹrhẹ oma vwerhen Jihova. A da rien nẹ Ọghẹnẹ rhiabọreyọ avwanre, ọnana sa nẹrhẹ iphiẹrophiyọ avwanre ganphiyọ. w23.12 11 ¶13-14

Ofori nẹ ọshare rọ dia Onenikristi nabọ riẹn obo re nene ihwo efa ta ota kuẹgbe. Ọshare rọ tẹn ona rẹ otaẹtakuẹgbe nabọ kerhọ, je davwẹngba vwo vwo ẹruọ rẹ oborẹ ihwo roro vẹ oborẹ oma ruẹ ayen. (Isẹ 20:5) Ọ sa riẹn oborẹ oma ruẹ ihwo womarẹ o vwo vwo oniso rẹ oborẹ ayen ta ota wan, epharo rayen kugbe oborẹ ayen ghwa oma wan. Wo se vwo ru ọtiọyen, ofori nẹ wẹ vẹ ihwo ghwọrọ ọke kugbe. Ọ da dianẹ ọkieje yen wọ vwọ vwẹ ekuakua re ghwa iyẹnrẹn vwo si evuẹ yẹrẹ ta ota kẹ ihwo, ọ sa nẹrhẹ wọ mrẹ bẹnbẹn wo vwo nene ihwo ru wọ mrẹ ta ota kugbe. Ọtiọyena, rhie uphẹn phiyọ wẹ vẹ ihwo ru wo mrẹ vwọ ta ota kugbe. (2Jọ 12) Ofori nẹ oniọvo ọshare ro tedje davwẹngba vwọ vwẹrote oma rọyen kugbe orua rọyen. (1Ti 5:8) Ofori nẹ wọ tẹn ona ọvo rọ cha vwẹ ukẹcha kẹ wẹ vwọ mrẹ iruo ru wo che ru. (Iru 18:2, 3; 20:34; Ẹf 4:28) Dia ọgbowian ro muomaphiyọ iruo rọyen, rọ je davwẹngba vwo ruiruo rọyen fiotọ. Wo de ru ọtiọyen, o muẹro nẹ wọ cha mrẹ iruo ji ruiruo na ọke grongron. w23.12 27 ¶12-13

Baibol na da ta ota kpahen “ẹdẹ rẹ Ọrovwohwo,” o mudiaphiyọ ọke ri Jihova cha vwọ ghwọrọ ivwighwrẹn rọyen je vwẹ usivwin kẹ ihwo rọyen. Vwẹ ọke awanre Jihova ghwọrọ ẹgborho evo. (Aiz 13:1, 6; Izi 13:5; Zẹf 1:8) Vwẹ ọke rẹ avwanre na, “ẹdẹ rẹ Ọrovwohwo” cha tonphiyọ vẹ oghwọrọ ri Babilọn Rode ji kuphiyọ vwẹ ofovwin rẹ Amagidọn. E se vwo sivwin rhọ vwẹ “ẹdẹ” yena, ko fori nẹ e muegbe enẹna. Ọ diẹ Jesu tare nẹ e muegbe hẹrhẹ “ukpokpogho rode” na ọvo-o, ẹkẹvuọvo e “muegbe ọkieje.” (Mt 24:21; Lu 12:40) Vwẹ ileta rẹsosuọ ẹwẹn ọfuanfon na mu ọyinkọn Pọl vwo si rhe iniọvo ri Tẹsalonaika, ọ reyọ idje buebun vwọ chọn iniọvo na uko vwo muegbe hẹrhẹ ẹdẹ rode ri Jihova. Pọl riẹnre nẹ ọ dia ọke yena yen ẹdẹ ri Jihova cha vwọ rhe-e. (2Tẹ 2:1-3) Dedena, o jiriro kẹ iniọvo na nẹ ayen muegbe hẹrhẹ ẹdẹ na kerẹsiẹ a da mrẹ nẹ ọ cha rhe odẹ rọ cha na, avwanre je sa reyọ uchebro rọyen na vwo ruiruo. w23.06 8 ¶1-2

Vwẹ ukpe ri 1978, a da bọn egenege gogorogo ro vwo iwevwin 60 vwẹ Tokyo, Japan. Ihwo buebun roro nẹ o vwo obo re cha yọnrọn uwevwin na-a, kidie etọ muẹ bẹrẹ vwẹ orere na. Die yen nẹrhẹ uwevwin nana se mudia vi gogorogo? Ihwo re tẹn ona rẹ ebanbọn sa uwevwin na vi otọ kokoroko ji ruo rọ sa vwọ nuẹ siẹrẹ otọ de kpogho. Inenikristi pha kerẹ uwevwin yena. Vwẹ idjerhe vọ? O fori nẹ Onenikristi riẹn ẹdia rọ da sa nuẹ vẹ ẹdia ro de jẹ nuẹ. Siẹrẹ a da ta ota kpahen irhi vẹ iwan ri Jihova, o fori nẹ Onenikristi mudia gan, o yeghe-e. Ọ dia ohwo rọ “fobọ nyẹmẹ” o chukoku irhi ri Jihova-a. Ẹkẹvuọvo, o fori nẹ ọ “nuẹ,” siẹrẹ uphẹn na da herọ yẹrẹ a da guọnọ nẹ o ru ọtiọyen. (Jem 3:17) Onenikristi ro vwo ẹro abavo cha kẹnoma kẹ uruemu re vwo si ọrhan yẹrẹ rhọvwan phiyọ emueje. w23.07 14 ¶1-2

Jesu yọnregan vwọso Eshu rọ dia Idẹbono na rọ davwenrọ ni rere o vwo jẹ evun ẹfuọn kẹ Ọghẹnẹ. (Mt 4:1-11) Eshu muegbe rọ vwọ nẹrhẹ Jesu ru umwemwu ro vwo jẹ osa rẹ ọtanhirhe na ẹhwa. Jesu ji chirakon rẹ edavwini efa ọke ro vwo ruẹ iruo aghwoghwo rọyen vwẹ otọrakpọ na. Ivwighrẹn rọyen mukpahọn je davwẹngba rẹ ayen vwọ teyọn hwe. (Lu 4:28, 29; 13:31) O chirakon ri jẹgba rẹ idibo rọyen. (Mk 9:33, 34) Ro vwo hirharoku ọdavwini ọgangan, e hwere ehwe rẹ oja je reyọ vwọ jehwẹ. Ọyena vwọ wan nu, a da teyọn hwe vwẹ idjerhe rẹ ophọphọvwe. (Hib 12:1-3) O chirakon rẹ ọdavwini rọ koba vwẹ akpeyeren rọyen ababọ rẹ ochọnvwe ri Jihova. (Mt 27:46) O phẹnre dẹn nẹ, Jesu rioja gangan ọ sa vwọ hwosa rẹ ọtanhirhe na. Siẹrẹ e de roro kpahan owenvwe ri Jesu vwori rọ vwọ vwẹ arhọ rọyen kpahotọ kẹ avwanre, o rhe fo nẹ ọnana mu avwanre vwo vwo ẹguọnọ okokodo kpahọn? w24.01 10-11 ¶7-9

E de vwo edirin ọ sa nẹrhẹ a vẹ ihwo efa vwo uvi rẹ oyerinkugbe. Ọ je cha avwanre uko vwọ nabọ kerhọ kẹ ihwo efa siẹrẹ ayen da ta ota kẹ avwanre. (Jem 1:19) Edirin ji toroba ufuoma. Ọ je cha cha avwanre uko vwọ kẹnoma kẹ uruemu re vwo bru okpakpa ta yẹrẹ ru obo ri je fo siẹrẹ a da hẹ ẹdia rẹ okeke. E de vwo edirin, a cha fobọ muophu siẹrẹ ohwo de ru obo ri nẹrhẹ ivun miovwin avwanre-e. Ukperẹ e vwo ru orukeri, avwanre che rhe “chirakon rẹ ohwohwo ji vwo ghovwo ohwohwo ọphẹ.” (Kọl 3:12, 13) Edirin je sa cha avwanre uko vwo bru omamọ erhiẹn. Ukperẹ re vwo bru okpakpa brorhiẹn jẹ e ji roro te tavwe-en, edirin cha nẹrhẹ a ghwọrọ ọke ru ehiahiẹ je frẹkotọ roro kpahen orhiẹn na tavwen e ki bro. Kerẹ udje, a da guọnọ iruo re che ru, e se vwo ẹwẹn re vwo rhiabọreyọ ọrẹsosuọ ra mrẹre. Ẹkẹvuọvo, e de vwo edirin, a cha ghwọrọ ọke vwo roro kpahen oborẹ oyerinkugbe avwanre vẹ orua avwanre ji te Jihova cha dia siẹrẹ e de rhiabọreyọ iruo na. E de vwo edirin, ka sa kẹnoma kẹ orhiẹn-ebro re chọre. w23.08 22 ¶8-9

O da diane ofu dje we fikirẹ urhurusivwe rẹ ugboma wẹn, wo de roro kpahen ive ru wo ve kẹ Jihova ọke wọ vwọ vwomakpahotọ kẹ, ọ sa kẹ wẹ ẹgba vwọ họnre vwọso ọdavwini. Vwẹ idjerhe vọ? Wọ sen oma wẹn ọke wọ vwọ vwomakpahotọ kẹ Jihova. Ọnana mudiaphiyọ nẹ wọ sen ojevwe rẹ ugboma wẹn kugbe kemu kemu rọ cha nẹrhẹ wo ru obo ri che miovwo Jihova ivun. (Mt 16:24) Ọtiọyena wo de hirharoku ọdavwini, o rhe fo nẹ wọ ghwọrọ ọke vwo roro kpahen obo ru wo che ruu. Kidie wo brorhiẹn rẹ obo ru wo che ru jovwo re, ọyen ọ ru wọ vwọ fuevun kẹ Jihova. Wọ cha davwẹngba wo vwo ru obo re vwerhen Jihova oma ọkieje. Wo de ru ọtiọyen kẹ wọ cha dia kerẹ Job. Dede nẹ o hirharoku edavwini egangan, jẹ ọ tare vẹ imuẹro nẹ: “Mi se ku ase mẹ fia-a!”—Job 27:5. w24.03 9 ¶6-7

Jihova “Ọghẹnẹ rẹ ẹguọnọ” na, vẹ avwanre herọ! (2Kọ 13:11) O vwo ọdavwẹ rẹ avwanre ohwo ọvuọvo. O mu avwanre ẹro nẹ ‘ẹguọnọ rọye rọ rhẹriẹ-ẹ gba avwanre riariẹ.’ (Un 32:10) Re vwo roro kokodo kpahan obo ri Jihova dje ẹguọnọ rọyen phia vwọ kẹ avwanre ye, ọ cha nẹrhẹ avwanre mrẹ nẹ Jihova ghene vwẹrote avwanre mamọ, ọ je cha nẹrhẹ e sikẹrẹ phiyọ. E se rhie evun ta ota kẹ vwẹ ẹrhovwo je vuẹ oborẹ ẹguọnọ rọyen ghanre kẹ avwanre te. A sa vuẹ obo ri kpokpo avwanre ẹwẹn, kidie o mu avwanre ẹro nẹ o vwo ẹruọ rẹ avwanre nẹ o ji vwo owenvwe rọ vwọ cha avwanre uko. (Un 145:19) Kirobo ra dia erhanre vwẹ ọke rẹ ekpahen ye, ọtiọyen avwanre je guọnọ sikẹrẹ Jihova fikirẹ ẹguọnọ rọyen. Dede nẹ ẹguọnọ ri Jihova vọnre ve ẹgba, jẹ ọ je vọn vẹ arodọnvwẹ. Ọtiọyena gbe jẹ oma vwerhen owẹ kidie Jihova vwo ẹguọnọ wẹ. E jẹ avwanre eje djephia nẹ e vwo ẹguọnọ rẹ Ọghẹnẹ womarẹ a vwọ tanẹ: “Me guọnọ Ọrovwohwo na”!—Un 116:1. w24.01 31 ¶19-20

Ọ dia Jesu de vuẹ ihwo nẹ odẹ rẹ Ọghẹnẹ yen Jihova ọvo-o, o ji ru erọnvwọn efa. Ihwo ri Ju ri Jesu yonori riẹn odẹ rẹ Ọghẹnẹ jovwore. Ẹkẹvuọvo Jesu kobaro rọ vwọ dia “ohwo ro .  . . djisẹ Rọyen.” (Jọ 1:17, 18) Kerẹ udje, ẹbẹre ra vwẹ Hibru si vwẹ Baibol na djerephia nẹ Jihova ọyen ohwo rọ ria ehrọre ro ji gbe arodọnvwẹ. (Ey 34:5-7) Jesu ru uyota na phẹn vrẹ obo ri jovwo ọke ro vwo kpe itẹ rẹ ọmọ rẹ osoghoro na vẹ ọsẹ rọyen. Ọke rẹ avwanre de se kpahen ọsẹ na rọ kparo mrẹ ọmọ rọyen ro kurhẹriẹ “ọke rọ je vwọ hẹ ugboko,” ọ da djẹ bro ra, gbanọ, ji vwo ghovwo nẹ otọ rẹ ẹwẹn rhe, jẹ avwanre djephia nẹ e vwo ẹruo rẹ ehrọre vẹ arodọnvwẹ ri Jihova. (Lu 15:11-32) Jesu dje oka rẹ ohwo rẹ Ọsẹ rọyen ghene hepha. w24.02 10 ¶8-9

Jihova vwẹ uchebro kẹ ihwo rẹ ofu dje, je nẹrhẹ ẹwẹn rayen totọ. Idjerhe vọ yen avwanre sa vwọ vwẹrokere Jihova vwo gbe arodọnvwẹ je vwẹ uchebro kẹ ihwo efa? Idjerhe ọvo re se vwo ru ọtiọyen yen e vwo vwo iruemu re sa nẹrhẹ avwanre gbe arodọnvwẹ kẹ ihwo efa je bọn ayen gan. Erhọ yen evo usun rẹ iruemu nana? Die yen cha vwẹ ukẹcha kẹ avwanre vwọ sẹro rẹ ẹguọnọ avwanre rere e se “rhe bru ohwohwo uche” ọkieje? (1Tẹ 4:18) Ofori nẹ e vwo iruemu kerẹ erorokẹ, ẹguọnọ rẹ iniọvo kugbe uruemu esiri. (Kọl 3:12; 1Pi 3:8) Mavọ yen iruemu nana sa vwọ cha avwanre uko? Siẹrẹ arodọnvwẹ vẹ iruemu efa re họherọ da dia usun rẹ iruemu avwanre, e che se siomauko e vwo jẹ ọbọngan ẹ vwọ kẹ ihwo re guọnerọ-ọ. Kirobo ri Jesu tare, “obo re vọn evunrẹ ubiudu na yen unu na ta. Ohwo esiri reyọ erọnvwọn esiri nẹ evunrẹ efe esiri ro kokori cha.” (Mt 12:34, 35) A da vwẹ uchebro rẹ iniọvo avwanre guọnọre vwọ kẹ ayen ọyen idjerhe ọghanghanre e vwo djephia nẹ e vwo ẹguọnọ rayen. w23.11 10 ¶10-11

Ofori nẹ a nokpẹn rẹ ukẹcha siẹre a da guọnọ vwo ẹruọ rẹ aroẹmrẹ rọhẹ Baibol na. Roro kpahen udje nana. Vwẹ ẹwẹn roro nẹ wo kpo asan ru wo ghwe vughe-e, ẹkẹvuọvo wẹ vẹ ugbeyan wẹn rọ nabọ vughe asan na yen gba yanran na. O vughe asan rẹ ovwan hepha na kugbe asan rẹ idjerhe ọvuọvo sun ohwo ra. Aphro herọ-ọ, oma cha vwerhen owẹ nẹ ugbeyan wẹn na rhọnvwere nẹ ọyen che nene uwe! Vwẹ idjerhe vuọvo na, Jihova riẹn ọke rẹ avwanre de yerẹn na kugbe obo re cha phia vwẹ obaro na. Ọtiọyena, e se vwo vwo ẹruọ rẹ aroẹmrẹ rehẹ Baibol na, ofori nẹ a vwomakpotọ nokpẹn rẹ ukẹcha ri Jihova. (Da 2:28; 2Pi 1:19, 20) Kirobo rẹ emiọvwọn guọnọ erhuvwu rẹ emo rayen ye, ọtiọyen Jihova je guọnọ nẹ avwanre yeren omamọ rẹ akpọ. (Jer 29:11) Ẹkẹvuọvo vwọ fẹnẹ ihworakpọ, Jihova sa ta obo re cha phia vwẹ obaro na gbagba. Ọ reyọ ihwo evo vwo si aroẹmrẹ rọyen phiyotọ vwẹ Baibol na rere avwanre sa vwọ riẹn kpahen erọnvwọn eghanghanre re cha vwẹ obaro tavwen e ke phia.—Aiz 46:10. w23.08 8 ¶3-4