Oborẹ Jihova Kpahenphiyọ Ẹrhovwo Avwanre Wan

1-2. Die yen e se roro kpahen ẹrhovwo avwanre?

O VWO ọkiọvo wo vwo roro sẹ Jihova kpahenphiyọ ẹrhovwo wẹn? Ọ da dia ọtiọyen, ọ dia owẹ ọvo yen vwo oka rẹ iroro yena-a. Iniọvo avwanre buebun ji vwo iroro yena, marho siẹrẹ ayen de hirharokuẹ ebẹnbẹn. Avwanre da rioja, a je sa mrẹ bẹnbẹn ra vwọ riẹn oborẹ Jihova kpahenphiyọ ẹrhovwo avwanre wan.

² E ja fuẹrẹn oboresorọ a sa vwọ vwẹroso Jihova nẹ ọ cha kpahenphiyọ ẹrhovwo rẹ idibo rọyen. (1Jọ 5:15) A je cha ta ota kpahen enọ nana: Diesorọ e vwo roro ọkiọvo nẹ Jihova kpahenphiyọ ẹrhovwo avwanre-e? Idjerhe vọ yen Jihova vwọ kpahenphiyọ ẹrhovwo avwanre nonẹna?

JIHOVA SA KPAHENPHIYỌ ẸRHOVWO AVWANRE VWẸ IDJERHE RE RHẸRO RỌYE-EN

3. Diesorọ Jihova vwọ guọnọ nẹ a nẹrhovwo rhe?

³ Ọbe Ọfuanfon na kẹ avwanre imuẹro nẹ Jihova vwo ẹguọnọ avwanre mamọ nẹ o ji ni avwanre ghanghanre. (Heg 2:7; 1Jọ 4:10) Ọyensorọ ọ vwọ vuẹ avwanre nẹ a nokpẹn rẹ ukẹcha rọyen womarẹ ẹrhovwo. (1Pi 5:​6, 7) Ọ guọnọ chọn avwanre uko vwọ dia igbeyan rọyen ji phi ebẹnbẹn re hirharokuẹ kparobọ.

4. Mavọ yen avwanre ru riẹn nẹ Jihova kpahenphiyọ ẹrhovwo rẹ idibo rọyen? (Ni uhoho na.)

⁴ Abọ buebun vwẹ Baibol na, yen avwanre vwo se mrẹ nẹ Jihova kpahenphiyọ ẹrhovwo rẹ idibo rọyen. Udje ohwo ọvo ọtiọyen yen Ovie Devid. O hirharokuẹ ivwighrẹn buebun ri muoshọ vwẹ akpeyeren rọyen, ọkieje yen ọ je vwọ yare ukẹcha ri Jihova vwẹ ẹrhovwo. Vwẹ ẹdẹ ọvo, ọ rẹ Jihova nẹ: “Nyo ẹrhovwo mẹ, E Ọrovwohwo; kerhọn rẹ orẹ mẹ! Vwẹ evun rẹ ọvwata wẹn nyo, vwe vwẹ evun rẹ ọvwata wẹn!” (Un 143:1) Jihova kpahenphiyọ ẹrhovwo ri Devid, o de sivwo. (1Sa 19:​10, 18-20; 2Sa 5:​17-25) Devid tare vẹ imuẹro nẹ: “Ọrovwohwo si kẹrẹ otu ri sere ejobi.” Avwanre ji se vwo imuẹro tiọyena.​—Un 145:18.

5. Vwẹ ọke rẹ awanre, ọkieje yen Jihova vwọ kpahenphiyọ ẹrhovwo rẹ idibo rọyen ghwe vwo nene oborẹ ayen guọnọre? Djunute udje ọvo. (Ni uhoho na.)

⁵ Ọ dia oborẹ avwanre guọnọre yen Jihova nẹ vwọ kpahenphiyọ ẹrhovwo avwanre-e. Ọnana yen obo re ghwa phia kẹ ọyinkọn Pọl. Ọ rẹ Jihova nẹ o si “unwe” re vwo duvwo no. Vwẹ abọ erha soso, Pọl rẹ Jihova nẹ o si obẹnbẹn nana no. Jihova kpahenphiyọ ẹrhovwo yena? E, jẹ ọ dia ghwe vwo nene obo ri Pọl guọnọre-e. Ukperẹ o vwo si obẹnbẹn na no, Jihova da vwẹ ẹgba vwọ kẹ rọ sa vwọ fuevun ga ọkieje.​—2Kọ 12:​7-10.

6. Diesorọ e se vwo roro ọkievo nẹ Jihova kpahenphiyọ ẹrhovwo avwanre-e?

⁶ Ọkievo, Jihova je sa kpahenphiyọ ẹrhovwo avwanre vwẹ idjerhe re rhẹro rọye-en. Avwanre vwo imuẹro nẹ Jihova riẹn obo ri me yovwin rọ sa vwọ vwẹ ukẹcha kẹ avwanre. O se ru “emu ejobi rẹ avwanre nọre eyẹ rẹ avwanre roro.” (Ẹf 3:20) Fikirẹ ọnana, ọ sa kpahenphiyọ ẹrhovwo avwanre vwẹ idjerhe yẹrẹ ọke re rhẹro rọye-en.

7. Diesorọ o vwo fo re vwo wene obo ra nẹrhovwo kpahen? Djunute udje ọvo.

⁷ Re vwo vwo ẹruọ rẹ ọhọre ri Jihova phiyọ ye, ọ sa nẹrhẹ e wene obo ra nẹrhovwo kpahan. Roro kpahen udje ri Martin Poetzinger. Rọ ghwa vwọ rọvwọn nu, e de mu Oniọvo Poetzinger phiyọ uwodi vwẹ ọko rẹ oja ri Nazi. Ẹsosuọ, ọ ka rẹ Jihova nẹ ọ chọn ọyen uko o se vwo nẹ ọko rẹ oja na rere ọ sa vwọ vwẹrote aye rọyen ji vwobọ vwẹ iruo rẹ aghwoghwo na. Ẹkẹvuọvo, udughwrẹn ivẹ vwọ wan nu, ọ mrẹ emu vuọvo ro djerephia nẹ Jihova kpahenphiyọ ẹrhovwo rọyen ro vwo vrẹn nẹ ọko rẹ oja na-a. Ọtiọyena ọ da rhoma ton ẹrhovwo ẹnẹ phiyọ: “Jihova biko, dje oborẹ wọ guọnọre nẹ mi ru kẹ vwẹ.” O de roro kpahen oborẹ iniọvo efa rehẹ ọko rẹ oja na hirharokuẹ. Buebun rayen je ro ẹnwan kpahen eya vẹ emọ rayen. Oniọvo Poetzinger da je nẹrhovwo: “Jihova, wẹ kobiruo vwọ kẹ owian ọkpokpọ nana wọ vwọ kẹ vwẹ na. Chọn vwẹ uko vwọ vwẹ ọbọngan kẹ iniọvo mẹ ji phiuduphiyọ ayen awọ.” Ọnana yen oborẹ o ruru ẹgbukpe irhirin efa rọ vwọ hẹ ọko rẹ oja na!

8. Emu ọghanghanre vọ yen o fori nẹ a karophiyọ siẹrẹ a da nẹrhovwo?

⁸ Ofori nẹ a karophiyọ nẹ ọhọre ri Jihova che rugba vwo nene ọke rọ rhuẹrẹ phiyọ. Ọhọre yena churobọ si obo ro che vwo si ebẹnbẹn eje re so ojaẹriọ kẹ ihworakpọ no kare kare​—ebẹnbẹn kerẹ oghwọrọ ri kpregede, ega, kugbe ughwu. Jihova che ru ọhọre rọyen na gba womarẹ Uvie rọyen. (Da 2:44; Ẹvw 21:​3, 4) Bẹsiẹ ọke yena vwo te, Jihova vwẹ uphẹn kẹ Eshu nẹ o sun akpọ na.b (Jọ 12:31; Ẹvw 12:9) Enẹna, ọ da dianẹ Jihova si ebẹnbẹn rẹ ihworakpọ no, kọ cha họhọ nẹ Eshu nabọ riẹn akpọ na suẹn. Ọtiọyena ra vwọ hẹrhẹ Jihova ro vwo ru ive rọyen gba na, ọ dia o mudiaphiyọ nẹ ọ kpairoro vrẹ avwanre-e. E ja fuẹrẹn idjerhe evo rẹ Jihova vwọ chọn avwanre uko.

IDJERHE SANSAN RẸ JIHOVA VWỌ KPAHENPHIYỌ ẸRHOVWO NONẸNA

9. Idjerhe vọ yen Jihova sa vwọ chọn avwanre uko siẹrẹ a da guọnọ brorhiẹn? Djudje rọyen.

⁹ Ọ kẹ avwanre aghwanre. Jihova veri nẹ ọyen cha kẹ avwanre aghwanre ra guọnọre re vwo bru omamọ orhiẹn. Avwanre guọnọ aghwanre ro nẹ obọ rẹ Ọghẹnẹ rhe marho siẹrẹ e de brorhiẹn ro se wene akpeyeren avwanre, kerẹ a vwọ rọvwọn yẹrẹ ra vwọ dia kpogono. (Jem 1:5) Roro kpahen obo re phia kẹ oniọvo aye Maria rọ je rọvwọ-ọn.c Ọ ga kerẹ ọkobaro ọkieje ọke rọ vwọ mrẹ oniọvo ọshare ọvo. Ọ da ta: “Ugbeyan avwanre vwọ kpẹkpẹ phiyọ ye, kẹ avwanre rhi vwo ẹguọnọ rẹ ohwohwo. Me riẹnre nẹ o vwo orhiẹn ro fori nẹ mi bru. Me nẹrhovwo mamọ kpahen ẹdia na. Me guọnọ odjekẹ ri Jihova, jẹ me riẹnre nẹ ọ dia Jihova yen che brorhiẹn na kẹ vwẹ-ẹ.” Oniọvo aye na mrẹvughe nẹ Jihova kpahenphiyọ ẹrhovwo rọyen rọ vwọ kẹ aghwanre. Vwẹ idjerhe vọ? Ro vwo ruẹ ehiahiẹ vwẹ ẹbe rẹ ukoko na, ọ da mrẹ iyovwinreta re kpahenphiyọ enọ ri rhe re ẹwẹn. Ọ je reyọ uchebro aghwanre rẹ oni rọyen vwọ kẹ. Uchebro yena chọn Maria uko vwọ fuẹrẹn iroro rọyen. Ukuotọ rọyen, o de rhi brorhiẹn rẹ aghwanre.

10. Vwo nene obo rehẹ Filipae 4:​13, die yen Jihova che ru vwọ chọn idibo rọyen uko? Djunute udje ọvo. (Ni uhoho na.)

¹⁰ Ọ kẹ avwanre ẹgba e se vwo chirakon. Jihova cha kẹ avwanre ẹgba e se vwo chirakon rẹ edavwini kirobo rọ je chọn ọyinkọn Pọl uko. (Se Filipae 4:13.) Roro kpahen oborẹ Jihova chọn oniọvo ọshare re se Benjamin uko vwo chirakon rẹ ebẹnbẹn. Asan rẹ ihwo rẹ ofovwin djẹ nẹ uwevwin dia wẹ Africa, ọyen Benjamin vẹ orua rọyen diare ọke rọ vwọ hẹ eghene. Ọ da ta: “Ọkieje yen me vwọ nẹrhovwo rhe Jihova, je vuẹ nẹ ọ kẹ vwẹ ẹgba mi se vwo ru obo re vwerhọn oma. Jihova kpahenphiyọ ẹrhovwo mẹ rọ vwọ kẹ vwẹ ẹwẹn re dọe, uduefiogbere mi vwo ghwoghwota, kugbe ẹbe rẹ ukoko na ri mi se re chọn vwẹ uko vwo mudia gan.” Ọ da je ta: “Mi vwo se kpahen oborẹ iniọvo efa rhiẹromrẹ kugbe oborẹ Jihova chọn ayen uko vwo chirakon nẹrhẹ mi vwo ẹwẹn me vwọ fuevun ọkieje.”

11-12. Idjerhe vọ yen Jihova vwọ reyọ iniọvo rẹ ukoko na vwọ kpahenphiyọ ẹrhovwo avwanre? (Ni uhoho na.)

¹¹ Ọ reyọ iniọvo rẹ ukoko na vwọ chọn avwanre uko. Ason rọ koba tavwen ọ ke reyọ arhọ rọyen vwọ kpahotọ, Jesu nẹrhovwo mamọ. Ọ rẹ Jihova nẹ e jẹ ihwo vwẹ ẹro rẹ ohwo ro muọghọ kẹ Ọghenẹ yẹrẹ odẹ rọye-en vwo ni ọye-en. Ukperẹ o vwo ru nene obo rọ nọre, Jihova da chọn Jesu uko womarẹ amakashe ro jiri nẹ ọ ra vwẹ ọbọngan vwọ kẹ. (Lu 22:​42, 43) Jihova je sa reyọ iniọvo rẹ kọn bru avwanre rhe yẹrẹ ri se avwanre vwẹ ifonu vwọ bọn avwanre gan. Avwanre eje sa reyọ kuphẹn kuphẹn ro rhiephiyọ vwọ ta “ota esiri” kẹ iniọvo avwanre.​—Isẹ 12:25.

¹² Roro kpahen obo re phia kẹ oniọvo aye re se Miriam. Udughwrẹn evo ọshare rọyen vwo ghwu nu, ọyen ọvo kọyen hẹ uwevwin, ọnana da nẹrhẹ ofu dje o de rhi she ọkuọrọn. Ọkieje yen ọ vwọ viẹ je guọnọ ohwo rọ cha ta ota kẹ. Ọ da ta: “Mi rhe vwo ẹgba mi vwo se ohwo vuọvo-o, ọtiọyena me da nẹrhovwo rhe Jihova. Re me vwọ viẹ je nẹrhovwo na, ifonu mẹ de hworo. Ugbeyan rọ kẹrẹ ovwẹ rọ je dia ọkpako yen se vwe na.” Ọkpako na vẹ aye rọyen da nabọ bru Miriam uche. O muro ẹro dẹn nẹ Jihova yen ruro oniọvo nana vwo se ọyen.

13. Djudje rẹ oborẹ Jihova sa vwọ reyọ ihwo re dia idibo rọye-en vwọ kpahenphiyọ ẹrhovwo avwanre.

¹³ Ọ sa reyọ ihwo re dia idibo rọye-en vwọ chọn avwanre uko. (Isẹ 21:1) Ọkievo, Jihova kpahenphiyọ ẹrhovwo rẹ ihwo rọyen womarẹ ukẹcha rẹ ihwo re dia idibo rọye-en. Kerẹ udje, ọ reyọ Ovie Artaxerxes vwọ kpahenphiyọ oyare rẹ Nehimaya ro vwo rhivwin kpo Jerusalẹm rere ọ sa vwọ rhoma bọn orere na. (Ne 2:​3-6) Nonẹna, Jihova je sa reyọ ihwo re dia idibo rọye-en vwọ chọn avwanre uko siẹrẹ a da guọnọ ukẹcha.

14. Ọbọngan vọ yen wọ mrẹ vwo nẹ ikuegbe ri Soo Hing na rhe? (Ni uhoho na.)

¹⁴ Ọniọvo aye re se Soo Hing mrẹvughe nẹ Jihova reyọ idọktọ rọyen vwọ chọn ọyen uko. Abọ buebun yen ọmọshare rọyen muọga rẹ afọnrhe. Ọke rẹ ọmọ na vwo vwo asidẹnti ọgangan, ọ vẹ ọshare rọyen da dobọrẹ iruo rayen ji rere ayen sa vwọ vwẹrote. Ọnana da nẹrhẹ igho kanre ayen. Soo Hing tare nẹ o rorori nẹ ọyen che se chirakon rẹ ebẹnbẹn na ọfa-a. Ọ da ta ọdavwẹ rọyen kẹ Jihova je vuẹ nẹ ọ chọn ọyen uko. Idọktọ rayen da guọnọ idjerhe rọ vwọ chọn ayen uko. Ayen da mrẹ ukẹcha vwo nẹ obọ rẹ igọmẹti rhe kugbe uwevwin rẹ igho rọyen kpotọ rẹ ayen sa dia. Ọyena vwọ wan nu, Soo Hing da ta: “Avwanre ghene mrẹ ukẹcha ri Jihova vwẹ ẹdia nana. Ọyen ghini ohwo ‘ro nyo ẹrhovwo’ ” na.​—Un 65:2.

Ọ GUỌNỌ ESEGBUYOTA E SE VWO VWO ỌMRẸVUGHE RẸ ẸKPAHỌNPHIYỌ RI JIHOVA JI RHIABỌREYỌ

15. Die yen chọn oniọvo aye ọvo uko vwọ mrẹvughe nẹ Jihova kpahenphiyọ ẹrhovwo rọyen?

¹⁵ Ọ dia ọkieje yen Jihova vwọ kpahenphiyọ ẹrhovwo avwanre vwẹ idjerhe rẹ igbevwunu-u. Ẹkẹvuọvo ẹkpahọnphiyọ rẹ avwanre mrẹ eyen oborẹ avwanre ghwa guọnọ a sa vwọ fuevun kẹ Ọsẹ avwanre rọhẹ odjuvwu. Ọtiọyena vwo oniso rẹ oborẹ Jihova kpahenphiyọ ẹrhovwo wẹn wan. Oniọvo aye re se Yoko rorori nẹ Jihova kpahenphiyọ ẹrhovwo rọye-en, ọtiọyena ko siẹ obo rọ nokpẹn rọyen mi Jihova phiyotọ. Ọkievo vwọ wan nu, o de ni obo ro si phiyotọ na je mrẹvughe nẹ Jihova kpahenphiyọ ẹrhovwo rọyen buebun re, tobọ te evo rọ karophiyọ-ọ. Nọke ra ruọke, ofori nẹ a fọ ji roro kpahen oborẹ Jihova kpahenphiyọ ẹrhovwo avwanre wan.​—Un 66:​19, 20.

16. Mavọ yen e se vwo dje esegbuyota phia siẹrẹ a da nẹrhovwo? (Hibru 11:6)

¹⁶ Ọ dia ẹrhovwo ra nẹ rhe Jihova ọvo yen djephia nẹ e vwo esegbuyota kpahọ-ọn, ẹkẹvuọvo e ji che rhiabọreyọ ẹkpahọnphiyọ na o toro obo rẹ ẹdia na hepha-a. (Se Hibru 11:6.) Roro kpahen udje ri Mike vẹ aye rọyen Chrissy. Ayen vwo ẹwẹn rẹ ayen vwọ ga vwẹ Bẹtẹl. Mike da ta, “Avwanre ihwo ivẹ na ghwobọphiyọ ẹbe je nẹrhovwo rhe Jihova kpahọn abọ buebun, ẹkẹvuọvo e durhie avwanre-e.” Ọkieje yen o vwo mu Mike vẹ Chrissy ẹro nẹ Jihova riẹn idjerhe ro me yovwin rọ sa vwọ reyọ ayen vwo ruiruo vwẹ ẹga rọyen. Ayen ru asan rẹ ẹgba rayen muru eje, ga kerẹ ekobaro vwẹ asan ra da ma guọnọ ukẹcha ji bicha iruo rẹ ebanbọn rẹ ukoko na. Enẹna, oniọvo na vẹ aye rọyen ruiruo rẹ ikiekin. Mike da je ta, “Ọ dia ọkieje yen Jihova vwọ kpahenphiyọ ẹrhovwo avwanre vwẹ idjerhe ra guọnọre-e, ẹkẹvuọvo ọ kpahenphiyọ ayen re, o ji ruo vwẹ idjerhe ra tobọ rhẹro rọye-en.”

17-18. Vwo nene obo rehẹ Une rẹ Ejiro 86:​6, 7, imuẹro vọ yen e se vwo?

¹⁷ Se Une rẹ Ejiro 86:​6, 7. Ọbuine Devid vwo imuẹro nẹ Jihova nyo je kpahenphiyọ ẹrhovwo rọyen. Wo ji se vwo imuẹro tiọyena. Idje ra ta ota kpahen vwẹ uyono nana kẹ avwanre imuẹro nẹ Jihova sa kẹ avwanre aghwanre vẹ ẹgba ra guọnọre e se vwo chirakon. Ọ sa reyọ iniọvo rẹ ukoko na yẹrẹ ihwo re dia idibo rọye-en vwọ chọn avwanre uko vwẹ ẹdia evo.

¹⁸ Avwanre riẹnre nẹ Jihova kpahenphiyọ ẹrhovwo avwanre dede nẹ ọ dia ọkieje yen o vwo ruo nene obo ra guọnọre-e. Ọ cha kẹ avwanre obo ra guọnọre vwẹ ọke ro fori. Eriyin na, nẹrhovwo, vwo esegbuyota vẹ imuẹro nẹ Jihova cha vwẹrote we enẹna, nẹ ọ je cha vwẹ “obo ri kohwo kohwo” guọnọre vwẹ akpọ ọkpokpọ rọ cha vwẹ obaro na vwọ kẹ.​—Un 145:16.