Mrẹ Erere nẹ Oshọẹdjẹ rẹ Ọghẹnẹ Rhe Ọkieje

1-2. Kerẹ Lọt, obẹnbẹn vọ yen Inenikristi hirharokuẹ nonẹna?

KIROBO rẹ oma ru Lọt, ọtiọyen oma ji ru avwanre siẹrẹ a da mrẹ erharhe iruemu rẹ akpọ na titẹ nonẹna. Kidie nẹ ọ riẹnre nẹ Ọsẹ avwanre rọhẹ odjuvwu vwo utuoma kpahen oka rẹ orharhe iruemu tiọyena, “ofu rẹ ọfanrhiẹ rẹ ihwo umwemwu” na de dje mamọ. (2Pi 2:​7, 8) Oshọẹdjẹ vẹ ẹguọnọ rẹ Ọghẹnẹ ro vwori, da nẹrhẹ Lọt sen uruemu rẹ ọfanrhiẹn rẹ ihwo re riarierẹ phiyọ. Nonẹna ihwo ri ghwe muọghọ kẹ yẹrẹ nene iwan ri Jihova ri shekpahen ẹfuọ-ọn, yen riariẹ avwanre phiyọ. Dedena, avwanre de vwo ẹguọnọ kugbe oshọẹdjẹ rẹ Ọghẹnẹ avwanre je sa dia fuanfon vwọrẹ uruemu.​—Isẹ 14:2.

² Ọtiọyena, Jihova chọn avwanre uko womarẹ uchebro rọhẹ ọbe rẹ Isẹ. Inenikristi eje, te imitete te ekpako sa mrẹ erere vwo nẹ uchebro rẹ aghwanre rọhẹ evun rọyen.

OSHỌẸDJẸ RẸ ỌGHẸNẸ SẸRO RẸ AVWANRE

3. Vwo nene obo rehẹ Isẹ 17:​3, ọrhọ yen emuọvo kiriguo rọ sorọ ro vwo fo nẹ a sẹro rẹ ubiudu avwanre? (Ni uhoho na.)

³ Emuọvo kiriguo rọ sorọ o vwo fo nẹ a sẹro rẹ ubiudu avwanre yen, Jihova fuẹrẹn ubiudu na. Ọ dia oborẹ avwanre hepha vwẹ otafe yen Jihova nẹ-ẹ ẹkẹvuọvo oka rẹ ohwo rẹ avwanre hepha vwẹ obevun. (Se Isẹ 17:3.) O che vwo ẹguọnọ avwanre siẹrẹ e de roro kpahen aghwanre rọyen. (Jọ 4:14) Ọtiọyena a cha vwẹ uphẹn kẹ erharhe iruemu kugbe efian rẹ Eshu vẹ ihwo umwemwu guẹn nẹ e dia ekprowọ kẹ avwanre-e. (1Jọ 5:​18, 19) E vwo siẹkẹrẹ Jihova phiyọ ye, ẹguọnọ re vwo kpahọn vẹ ọghọ avwanre vwọ kẹ kọ cha ganphiyọ. Kidie nẹ avwanre guọnọ ru obo ri miovwo Ọsẹ avwanre ivu-un, ke che vwo utuoma kpahen iroro re vwo ru umwemwu. Ọ da dianẹ iroro re vwo ru obo re chọre djẹ ro avwanre ẹwẹn, a cha nọ oma avwanre, ‘Die yen cha nẹrhẹ me vwẹ arogba vwo ru umwemwu vwọso ohwo ro vwo ẹguọnọ mẹ?’​—1Jọ 4:​9, 10.

4. Mavọ yen oshọẹdjẹ ri Jihova vwọ chọn oniọvo aye ọvo uko vwọ sen ọdavwini?

⁴ Oniọvo aye ọvo re se Marta vwẹ Croatia rẹ urhuru rẹ ọfanrhiẹn siẹ, de si: “Me mrẹrẹ bẹnbẹn me vwọ kpairoro vrẹ urhurusivwe rẹ ọfanrhiẹn ji te omavwerhovwẹn rẹ ọmọke rọ kẹ ohwo. Ẹkẹvuọvo oshọẹdjẹ ri Jihova chọn vwẹ uko.”b Vwẹ idjerhe vọ? Marta da tanẹ ọyen roro kpahen obo ri se nẹ obuko rẹ orharhe uruemu tiọyen rhe. Avwanre ji se ru ọtiọyen. Ọ rọ ma bra kparobọ yen, ọ cha da Jihova ji miovwo oyerinkugbe avwanre vẹ ọyen vwori.​—Jẹ 6:​5, 6.

5. Die wo se yono vwo nẹ ikuegbe ri Leo rhe?

⁵ Avwanre de vwo oshọẹdjẹ ri Jihova, a cha jomaotọ vwọ kẹnoma kẹ erharhe igbeyan. Leo, rọ dia Congo, yono uyono ọghanghanre ọvo. Ẹgbukpe ẹne ro vwo bromaphiyame nu, o de mu erharhe igbeyan. O rorori nẹ ọyen rhe vwobọ vwẹ erharhe iruemu rayen na-a, ọyen rha dia orumwemwu vwẹ obaro ri Jihova-a. O rhe kri-i, erharhe igbeyan na da rhe riẹriẹ phiyọ udi ẹda vroma je nẹrhẹ o gbe ọfanrhiẹn. Ọtiọyena o de rhi roro kpahen oborẹ ọsẹ vẹ oni rọyen yoniro kugbe omavwerhovwẹn ro rhe re ọke rọ vwọ ga Jihova. Die kọyen nẹ obuko rẹ ọnana rhe? O de rhi bru iroro kpo evun. Womarẹ ukẹcha rẹ ekpako na, o de rhivwin bru Jihova rhe. Enẹna ọ ga kerẹ ọkpako kugbe ọkobaro oghẹresan.

6. Udje rẹ eya ivẹ vọ yen a cha ta ota kpahen?

⁶ E jẹ a fuẹrẹn obo rehẹ Isẹ uyovwin 9, ra da ta ota kpahen eya ivẹ, a vwẹ ọvo vwo dje aghwanre, a da rha vwẹ o ro chekọ vwo dje ẹkpa. (Ni Rom 5:14; Galesha 4:24.) A vwọ fuẹrẹn yaran na, vwo vwẹ ẹwẹn nẹ akpọ rẹ Eshu nana vọnre vẹ urhurusivwe rẹ ọfanrhiẹn vẹ ihoho rẹ ihwo re banphiyọ. (Ẹf 4:19) Ọtiọyena ọyen obo re ghanre e vwo vwo oshọẹdjẹ rẹ Ọghẹnẹ je kẹnoma kẹ obo re brare. (Isẹ 16:6) Eriyina, avwanre eje sa mrẹ erere vwo nẹ obo rehẹ uyovwinrota nana. Eya nana ọvuọvo se ivwugheghẹn rẹ ihwo​—kọyẹn ihwo ri “vwo ọhọ-ọ.” Ayen ọvuọvo tanẹ, ‘Yanrhe uwevwin mẹ wọ rhe re emu.’ (Isẹ 9:​1, 5, 6, 13, 16, 17) Ẹkẹvuọvo obo re phia kẹ ayen ọvuọvo re seri na fẹnẹre.

SEN USE RẸ ẸKPA RẸ AYE NA

7. Vwo nene obo rehẹ Isẹ 9:​13-18, tivọ yen use rẹ aye na suẹn ohwo ra? (Ni uhoho na.)

⁷ E jẹ a fuẹrẹn use rẹ “ẹkpa rẹ aye” na. (Se Isẹ 9:​13-18.) Ọ nabọ kparẹ unu se ihwo ri vwo ọhọ-ọ nẹ, “vwẹriẹ rhe etinẹ” ovwan rhe re emu. Kẹ die yen phiare? Ayen “rha riẹn nẹ erivwi etiyi-in.” Wọ sa karophiyọ eta rẹ uchebro ra ka ta ota kpahen vwẹ Isẹ uyovwin ivẹ jovwo re. E si avwanre orhọ kpahen “igberadja na” kugbe aye rọ ta “eta ro riẹriẹvwe.” A vuẹ avwanre nẹ: “Uwevwi rọye she divwi kpotọ.” (Isẹ 2:​11-19) Ọbe rẹ Isẹ 5:​3-10 si avwanre orhọ kpahen “igberadja na” rẹ awọ rọyen “suẹn ohwo kpo ughwu.”

8. Orhiẹn vọ yen avwanre che bru?

⁸ Ihwo ri nyo umri rẹ “ẹkpa rẹ aye” na vwo orhiẹn rẹ ayen che bru: Ayen che rhiabọreyọ use na gbanẹ ayen cha siọn? Avwanre ji se hirharoku ọkpọ rẹ orhiẹn ọtiọyen na. Ọ da dianẹ ohwo guọnọ riẹriẹ avwanre vwo gbe ọfanrhiẹn yẹrẹ ni ihoho rẹ ihwo re banphiyọ vwẹ intanẹti, die yen avwanre che ru?

9-10. Erhọ yen iroro evo re sorọ ra vwọ kẹnoma kẹ uruemu rẹ ọfanrhiẹn?

⁹ O vwo oboresorọ a vwọ kẹnoma kẹ uruemu rẹ ọfanrhiẹn. “Ẹkpa rẹ aye” na tanẹ: “Ame re chori vwerha.” Die yen “ame re chori”? Baibol na reyọ ovwerhẹn rẹ aye gbe ọshare re rọnvwọn re vwo dje ame ra da nẹ, ẹwẹn ohwo me dia siẹ-ẹn. (Isẹ 5:​15-18) Aye gbe ọshare re rọnvwọn re vwo uphẹn rẹ ayen vwọ riavwerhen rẹ ovwerhẹn kugbe. Ọnana fẹnẹ “ame re chori” re vwo dje ọfanrhiẹn. Kerẹ oji ro siomanẹ cho orọnvwọn, ọtiọyen ayen ji siomanẹ. Kidie nẹ ohwo vuọvo mrẹ oborẹ ayen ruẹ-ẹ, ayen se no nẹ “ame re chori” na vwerhan. Ayen phiẹn oma rayen! Kidie Jihova mrẹ erọnvwọn eje. Ọ “vwerha” oma e de ku aroesiri ri Jihova kufia-a, emu vuọvo rọ bra te herọ-ọ. (1Kọ 6:​9, 10) O ji vwo erọnvwọn efa.

¹⁰ Ọfanrhiẹn sa so omavovwẹ, re vwo ni oma kueku, re vwo mu evun ra guọnọre-e, ọ je so ohra vwevunrẹ orua. Ọtiọyena, ọyen emu rẹ aghwanre ra vwọ kẹnoma kẹ “uwevwin” rẹ ẹkpa rẹ aye na je sen emu rọyen. Vwọ vrẹ oyerinkugbe ra vẹ Jihova vwori rọ cha va avwanre abọ, ihwo buebun ri vwobọ vwẹ uruemu nana mu ega sansan re sa so ughwu kẹ ayen. (Isẹ 7:​23, 26) Ọbe rẹ Isẹ uyovwin 9 owọ 18 si avwanre orhọ nẹ: “Erhorha ri woro e hẹ obo Ushi.” Kẹ, diesorọ ihwo buebun vwo rhiabọreyọ use rọyen dede nẹ o sun ohwo kpo ughwu?​—Isẹ 9:​13-18.

11. Diesorọ ughe rẹ ihwo re banphiyọ vwọ vọn vẹ imuoshọ?

¹¹ Ufi ọvo ro me mu ihwo yen ihoho rẹ ihwo re banphiyọ. Ihwo evo no nẹ e vwo ni ihoho rẹ ihwo re banphiyọ chọre-e. Vwọ fẹnẹ ọyena, ihoho rẹ ihwo re banphiyọ so okpetu, ọ nẹrhẹ ihwo ni oma rayen kueku, ọ je bẹn ra vwọ dobọ rẹ eno rayen ji. Ihoho rẹ ihwo re banphiyọ na dia afọnrhe ọke grongron; ọtiọyena ọ bẹn e se vwo phoro ayen no. Vwọba, ihoho rẹ ihwo re banphiyọ hwe urhurusivwe rẹ ugboma na-a; ọ nẹrhẹ ọ rhoma ganphiyọ. (Kọl 3:5; Jem 1:​14, 15) Ọtiọyena, ihwo buebun ri nẹ ihoho rẹ ihwo re banphiyọ ki gbe ọfanrhiẹn.

12. Mavọ yen e se vwo djephia nẹ avwanre kẹnoma kẹ ihoho re sa nẹrhẹ e vwo urhurusivwe rẹ ọfanrhiẹn?

¹² Ọ da dianẹ ihoho rẹ ihwo re banphiyọ vwomaphia vwẹ ifonu yẹrẹ ikọmputa avwanre, die yen ofori nẹ e ru kerẹ Inenikristi? E jẹ e si ayen no kpakpata. Ọ cha lọhọ e vwo ru ọtiọyen siẹrẹ e de no nẹ oyerinkugbe avwanre vẹ Jihova yen ma ghanre. Vwọrẹ uyota, ihoho efa je herọ re dia e rẹ ihwo re banphiyọ-ọ re sa nẹrhẹ e vwo urhurusivwe rẹ ọfanrhiẹn. Diesorọ a vwọ kẹnoma kẹ ayen? Kidie avwanre guọnọ ru emu vuọvo rọ cha nẹrhẹ avwanre gbe ọfanrhiẹn vwẹ udu rẹ avwanre-e. (Mt 5:​28, 29) Ọkpako ọvo re se David vwẹ Thailand da ta: “Me nọ oma mẹ: ‘Ọ da tobọ dianẹ ihoho na dia e rẹ ihwo re banphiyọ-ọ, oma cha vwerhen Jihova siẹrẹ mi de ni ayen?’ Uruemu nana chọn vwẹ uko vwo brorhiẹn rẹ aghwanre.”

13. Die yen sa chọn avwanre uko vwọ reyọ aghwanre vwo ruiruo?

¹³ Oshọ re vwo ru obo ri miovwin Jihova ivun nẹrhẹ avwanre reyọ aghwanre vwo ruiruo. Oshọẹdjẹ rẹ Ọghẹnẹ yen “ẹtuọhọ rẹ ẹghwanre.” (Isẹ 9:10) A nabọ djisẹ rẹ ọnana vwẹ ọtonphiyọ rẹ uyovwin 9 rẹ ọbe rẹ Isẹ, ra da reyọ uvi rẹ “aghwanre” vwo dje aye ọvo.

RHIABỌREYỌ USE RẸ AYE RO VWO AGHWANRE NA

14. Use ọfa vọ yen e se kpahen vwẹ Isẹ 9:​1-6?

¹⁴ Se Isẹ 9:​1-6. Vwẹ awọreta nana avwanre se kpahen use ro nẹ obọ ri Jihova rhe, rọ dia Ọmemama rẹ avwanre kugbe Esiri rẹ aghwanre. (Isẹ 2:6; Ro 16:27) Vwẹ ẹkpo ri Baibol nana e se kpahen uwevwin rode ro vwo ichivwo ighwrẹn. Ọnana odjephia nẹ Jihova kẹ okẹ ghwologhwolo o ji rhiabọreyọ kohwo kohwo rọ guọnọ reyọ aghwanre rọyen vwo ruiruo vwẹ akpeyeren.

15. Die yen Ọghẹnẹ vuẹ avwanre nẹ e ru?

¹⁵ Jihova ghini ohwo rọ kẹ okẹ ghwologhwolo. A mrẹ iruemu nana vwẹ omarẹ aye re vwo dje uvi “aghwanre” na rọhẹ Isẹ uyovwin 9. Ẹkpo ri Baibol na tare nẹ, aye nana muegbe rẹ emu, udi, je rhuẹrẹ imẹjẹ rọyen fia. (Isẹ 9:2) Vwọba, vwo nene obo rehẹ awọ 4 vẹ 5: “Aye nana re vwo dje [uvi aghwanre na] ta kẹ ohwo ro vwo ọhọ-ọ nẹ: Yanrhe, wọ rhe re ikara mẹ.” Diesorọ o vwo fo nẹ e rhiabọreyọ use rẹ aye nana? Jihova guọnọre nẹ emọ rọyen vwo aghwanre je vrabọ rẹ imuoshọ. Ọ guọnọre nẹ avwanre ru erọnvwọn re cha so okpetu re cha nẹrhẹ avwanre viẹ idiekpọvwẹ-ẹ. Kọyensorọ ọ vwọ “sẹro rẹ omamọ rẹ aghwanre nẹ kẹ ihwo rẹ udu rayen dia ọsoso.” (Isẹ 2:7) Siẹrẹ e de vwo oshọẹdjẹ ri Jihova, e che ru obo re vwerhọn oma. Ọtiọyena ka cha kerhọ rẹ uchebro rọyen je reyọ vwo ruiruo.​—Jem 1:25.

16. Idjerhe vọ yen oshọẹdjẹ rẹ Ọghẹnẹ vwọ vwẹ ukẹcha vwọ kẹ Alain vwo brorhiẹn rẹ aghwanre, kẹ die yen nẹ obuko rọyen rhe?

¹⁶ Roro kpahen oborẹ oshọẹdjẹ rẹ Ọghẹnẹ vwẹ ukẹcha kẹ Alain vwo brorhiẹn rẹ aghwanre. Ọkpako nana rọ je dia oyono vwẹ isikuru na da ta, “Buebun rẹ ihwo rẹ me vẹ ayen gba wian owian nẹ ifimu rẹ ihoho rẹ ihwo re banphiyọ kerẹ idjerhe ọvo re vwo yono kpahen ehware.” Ẹkẹvuọvo Alain niro ọtiọye-en. Ọ da ta, “Fikirẹ oshọẹdjẹ rẹ Ọghẹnẹ ri mi vwori, me da sen nẹ mi che ni ifimu ọtiọyena-a. Mi ji djefiotọ kẹ igbeyan mẹ na oboresorọ me vwọ sen.” Ọ reyọ uchebro rẹ aye ro vwo “aghwanre” na, rọ tare nẹ “yan vwẹ idjerhe rẹ orẹmrẹ” na vwo ruiruo. (Isẹ 9:6) Fikirẹ uruemu rẹ Alain djephia na, evo usun rẹ ihwo rọ vẹ ayen gba wian vwẹ asan ọvo yono Baibol na enẹna ji kpo uyono.

17-18. Ebruphiyọ vọ yen ihwo ri nyo use rẹ aye ro vwo “aghwanre” na riavwerhen rọyen enẹna, kẹ die yen ayen se rhẹro rọyen? (Ni uhoho na.)

¹⁷ Jihova reyọ idje rẹ eya ivẹ na vwo dje oborẹ avwanre se vwo vwo omavwerhovwẹn vwẹ obaro na. Ihwo ri nyo use rẹ “ẹkpa rẹ aye” na tẹnroviẹ omavwerhovwẹn rẹ ayen cha mrẹ siẹrẹ ayen de gbe ọfanrhiẹn. Vwọrẹ uyota, akpọ ri nonẹ ọvo yen ayen yerẹn, ayen kpairoro vrẹ ọ rọ cha vwẹ obaro na. Ukuotọ rọyen “obo Ushi” yen ayen ra.​—Isẹ 9:​13, 17, 18.

¹⁸ Ẹkẹvuọvo obo re cha phia kẹ ihwo ri nyo use rẹ aye ro vwo “aghwanre” na fẹnẹre. Oma vwerhen otu ri nyo use rẹ aye na kidie ayen vwo erọnvwọn eje rẹ ayen guọnọre ayen vwo sikẹrẹ Jihova. (Aiz 65:13) Womarẹ ọmraro Aizaya, Jihova da ta: “Nabọ kerhọn mẹ, re wọ re obo ri yovwiri, rere oma rẹ ivwri vwerhe owẹ.” (Aiz 55:​1, 2) Avwanre yono obo re se vwo vwo ẹguọnọ kpahen oborẹ Jihova vwo ẹguọnọ rọyen ji vwo utuoma kpahen obo ri tuoma. (Un 97:10) Oma vwerhen avwanre vwo durhie ihwo efa nẹ ayen rhe yono mie aye ro vwo “aghwanre na.” Avwanre họhọ ikọnpha ri “se ayen nẹ asan ro me kpenu vwẹ orho na rhe: Kohwo kohwo ro ghẹri, jọ vwẹriẹ rhe etinẹ.” Erere rọ herọ vwọ kẹ avwanre vẹ ihwo ri nyo use na dia ọ rẹ nana nana ọvo-o. Erere nana cha nẹrhẹ avwanre “rhọ” yẹrẹ dia bedẹ bedẹ, avwanre vwọ “yan vwẹ idjerhe rẹ orẹmrẹ” na.​—Isẹ 9:​3, 4, 6.

19. Vwo nene obo rehẹ Aghwoghwo 12:​13, 14, orhiẹn vọ yen ofori nẹ e bru? (Ni ekpeti na “Oshọẹdjẹ rẹ Ọghẹnẹ Nẹrhẹ Avwanre Mrẹ Erere.”)

¹⁹ Se Aghwoghwo 12:​13, 14. E jẹ oshọẹdjẹ rẹ Ọghẹnẹ sẹro rẹ ubiudu avwanre ọkieje je chọn avwanre uko vwo vwo uruemu rọ fonro, ji sikẹre Jihova phiyọ vwẹ ẹdẹ re koba na. Oshọẹdjẹ yena che mu avwanre vwo durhie ihwo rẹ avwanre se durhie eje nẹ ayen guọnọ uvi “aghwanre” re vwo dje aye na, ayen me je mrẹ erere norhe.