Obọ ri Jihova Krẹnọọ

1. Ọke ri Mosis vwo sun ihwo rẹ Izrẹl vwo nẹ ijipt, idjerhe vọ yen o vwo djephia nẹ ọyen vwẹroso Jihova?

MOSIS ọyen ọvo usun rẹ ihwo ọbe ri Hibru djunute nẹ o vwo esegbuyota rọ ganre mamọ. (Hib. 3:2-5; 11:23-25) O dje esegbuyota phia ọke ro vwo sun ihwo rẹ Izrẹl vwo nẹ Ijipt. Ọ rhọnvwere nẹ Fero vẹ ituofovwin rọyen djuguegue mu ọyeen. Ọ vwẹroso Jihova, o de sun ihwo na wan Abadi Ọvwavware na je ra ro evunrẹ aton na. (Hib. 11:27-29) Ihwo rẹ Izrẹl buebun vwẹroso Jihova nẹ o vwo ẹgba rọ sa vwọ vwẹrote ayeen, ẹkẹvuọvo Mosis vwẹroso Ọghẹnẹ ọkieje. Esegbuyota ri Mosis kurophiyotọọ, kidie Ọghẹnẹ vwẹ emu vẹ ame vwọ ghẹrẹ ihwo na vwọrẹ igbevwunu vwẹ aton rẹ emu vuọvọ hephaa na.a​—Eyan. 15:22-25; Une 78:23-25.

2. Diesorọ Ọghẹnẹ vwọ nọ Mosis nẹ: “Kẹ obọ rẹ Ọrovwohwo krẹre”? (Ukeri 11:21-23)

² Dede nẹ Mosis vwo esegbuyota ọgangan, jẹ omarẹ ẹgbukpe ọvo re vwo sivwin ihwo rẹ Izrẹl vwọrẹ igbevwunu nu, Mosis de vwo ẹwẹn ivivẹ sẹ Jihova vwo ẹgba rọ sa vwọ vwẹ eranvwe kẹ ihwo Rọyen. O mu Mosis ẹro nẹ Jihova cha sa reyọ eranvwe vwọ ghẹrẹ iduduru rẹ ihwo rehẹ evunrẹ aton na evun da vọn ayeen. Ọtiọyena Jihova da nọ Mosis nẹ: “Kẹ obọ rẹ Ọrovwohwo krẹre?” (Se Ukeri 11:21-23.) Vwẹ ẹkpo ri Baibol re vwo ruiruo vwẹ etinẹ na, ota na “obọ rẹ Ọrovwohwo” mudiaphiyọ ẹwẹn ọfuanfon rẹ Ọghẹnẹ yẹrẹ ẹgba ro vwo ruiruo. Kọ ghwa họhọ nẹ, Jihova nọ Mosis nẹ, ‘Wo rorori nẹ mi che se ru oborẹ me tare nẹ mi che ru?’

3. Diesorọ e vwo roro kpahen obo re phia kẹ Mosis kugbe ihwo IzrẹI?

³ Wo rorori jovwo re sẹ Jihova cha vwẹrote ọdavwẹ wẹn vẹ ọ rẹ orua wẹn? Ọ da dia e yẹrẹ ẹjo, e jẹ a fuẹrẹn obo re phia kẹ Mosis vẹ ihwo rẹ Izrel, re vwẹroso ẹgba ri Jihova nẹ ọ sa vwẹrote ayeen. E che djunutẹ ẹkpo ri Baibol sansan re cha nẹrhẹ ẹroẹvwọsuọ avwanre kpahen Jihova ganphiyọ nẹ obọ rọyen krẹnọọ.

YONO MIE MOSIS KUGBE IHWO RẸ IZRẸL

4. Die yen mu ihwo rẹ Izrẹl buebun vwo roro sẹ Jihova vwo ẹgba rọ vwọ kẹ ayen oborẹ ayen guọnọre?

⁴ Roro kpahen ẹkpo ri Baibol efa ri mu Jihova vwọ nọ onọ yena. Ẹgborho rẹ Izrẹl vẹ ‘ọguagua ihwo buebun’ re dia ihwo rẹ Izrẹẹl jehẹ evunrẹ aton na vwẹ uvwre rẹ ọke evo rẹ ayen vwọ yan nẹ Ijipt vwo kpo Otọ rẹ Ive na. (Eyan. 12:38; Urhi 8:15) Ọtiọyena ẹriọ rẹ imana da rhe bẹn ọguagua rẹ ihwo na kugbe ihwo rẹ Izrẹl buebun, ayen da vwomaba ayen vwo brenu kẹ Mosis. (Ukeri 11:4-6) Ọtiọyena urhuru rẹ emu rẹ ayen ria vwẹ Ijipt jovwo ko si ayen. Fikirẹ enuebro rẹ ihwo na, Mosis ko roro nẹ ọyen komobọ cha guọnọ eranvwe vwọ kẹ ayen.​—Ukeri 11:13, 14.

5-6. Die yen e se yono nẹ oborẹ uruemu rẹ ọguagua rẹ ihwo na ru vwẹ oma ihwo re Izrẹl?

⁵ Ọ sa dianẹ jẹ ọdavwaro evwo rẹ ọguagua rẹ ihwo buebun na djephia yen nẹrhẹ ihwo rẹ Izrẹl vwẹrokere ayen. Oka rẹ uruemu rẹ ihwo ọtiọyena ji se ghworo avwanre ọ da nẹrhẹ a vwẹ ẹro ri sakamu vwo ni oborẹ Jihova ruẹ kẹ avwanre. Ọyena sa phia ọ da dianẹ urhuru rẹ avwanre djẹ kpo obo re vwori jovwo yẹrẹ rioma kpahen oborẹ ihwo efa vwori. Jẹ, e che vwo omavwerhovwẹn siẹrẹ e de vwo otekẹvwẹ o toro ẹdia rẹ avwanre hephaa.

⁶ Ofori ihwo rẹ Izrẹl karophiyọ nẹ Ọghẹnẹ vwẹ imuẹro kẹ ayen jovwo nẹ siẹrẹ ayen de te uwevwin kpokpọ rayen na, ayen cha riavwerhen rẹ erọnvwọn buebun. Otọ rẹ Ive na yen ive yena de che rugba, ọ dia ọke ayen vwọ yan vwevunrẹ aton naa. Vwẹ idjerhe vuọvo na, ukpe ra vwọ tẹnrovi obo re vworii vwẹ eyeren nana, e jẹ e roro kpahen oborẹ Jihova veri nẹ o che ru kẹ avwanre vwẹ akpọ kpokpọ na. Vwọba, e se roro kpahen ẹkpo ri Baibol re sa cha avwanre uko vwo ru ẹroẹvwọsuo rẹ avwanre kpahen Jihova ganphiyọ.

7. Diesorọ e se vwo vwo imuẹro nẹ obọ ri Jihova krẹnọọ?

⁷ Dedena, wo ji se roro kpahen oboresorọ Ọghẹnẹ vwọ nọ Mosis nẹ: “Kẹ obọ rẹ Ọrovwohwo krẹre?” Ọ sa dianẹ ọ dia Jihova de guọnọ vwẹ ukẹcha kẹ Mosis vwo roro kpahen ẹgba rọhẹ obọ Rọyen ọvoo, ẹkẹvuọvo ji te asan ro se te. Ọghẹnẹ sa kẹ ihwo rẹ Izrẹl eranvwe buebun dede nẹ evunrẹ aton ro sherabọ yen ayen hepha. Vwẹ “obọ ọgangan kugbe igbabọ ra riẹnre,” yen Ọghẹnẹ vwo dje ẹgba rọyen phia. (Une 136:11, 12) Ọtiọyena, a dahẹ ọdavwini, e jẹ e vwo ẹwẹn ivivẹ sẹ obọ ri Jihova che te avwanre komobọọ.​—Une 138:6, 7.

8. Mavọ yen a sa vwọ kẹnoma kẹ oruchọ rẹ ihwo buebun she ro vwevunrẹ aton na? (Ni uhoho na.)

⁸ Okririi Jihova da kẹ ayen eranvwe; ọ da kẹ ayen ikurede buebun. Ẹkẹvuọvo, ihwo rẹ Izrẹl kpẹvwẹ Jihova vwọ kẹ igbevwunu nanaa. Ukperẹ ọtiọyen, urhuru de mu ayen rọ. Ayen da wian kọke rhie vwọ ghwe ikurede buebun koko. Ophu de mu Jihova kpahen “ivwurhuru” na, o de gboja kẹ ayen. (Ukeri 11:31-34) E se yono nẹ udje yena rhe. Ofori nẹ a jomaotọ e vwo jẹ ufi rẹ urhuru e she ruọ. Owenẹ avwanre edafe yẹrẹ igbere, ofori e vwo ‘koko efe . . . avwanre vwẹ obodjuvwu’ womarẹ a vẹ Jihova kugbe Jesu vwo vwo uvi rẹ oyerinkugbe. (Mat. 6:19, 20; Luk 16:9) E de ru ọtiọyen, ke se vwo imuẹro nẹ Jihova cha vwẹrote avwanre.

9. Imuẹro vọ yen avwanre se vwo kpahen ukẹcha ri Jihova?

⁹ Nonẹna, Jihova je riẹn obọ rọyen rọ vwọ vwẹ ukẹcha kẹ ihwo rọyen. Ẹkẹvuọvo, ọ dia ọyen o vwo mudiaphiyọ nẹ igho rha cha kanre avwanre yẹrẹ owẹnvwe rhe che hwe avwanree.b Jẹ, o vwo ọke vuọvo Jihova che vwo gbobọnyẹ avwanree. Ọ cha vwẹ ukẹcha ke avwanre vwẹ edavwini rẹ avwanre eje. A sa mrẹ uyota nana siẹrẹ a da fuẹrẹn ẹdia ivẹ e de se djephia nẹ a vwẹroso Jihova nẹ ọ cha riẹn obọ rọyen vwọ vwẹrote ọdavwẹ avwanre; (1) siẹrẹ e de vwo ebẹnbẹn rẹ igho kugbe (2) a da jiroro rẹ obo ra sa vwọ vwẹrote oma vwẹ ọke ọghwo.

E DE VWO EBẸNBẸN RẸ IGHO

10. Die yen sa nẹrhẹ igho kanre avwanre?

¹⁰ E jẹ e vwo vwẹ ẹwẹn nẹ uweren cha ganphiyọ re vwo siẹkẹrẹ oba rẹ eyeren nana. Otighi ro no cha siẹrẹ e de wene usuon, ifovwin, oghwọrọ ri kpregede, iwevwin, ekuakua re vwori vẹ iruo sa va avwanre abọ kugbe ega kpokpọ re vwomaphia sa nẹrhẹ a ghwọrọ igho re rhẹro rọyeen. A sa guọnọ iruo kpokpọ vwẹ asan ra dia yẹrẹ jiroro rẹ oborẹ orua na eje cha vwọ kua kpo asan ọfa rere a sa vwọ vwẹrote ayen. Die yen sa vwẹ ukẹcha kẹ avwanre vwo bru erhiẹn ri che djephia nẹ a vwẹroso Jihova?

11. Die yen sa vwẹ ukẹcha kẹ wẹ vwo yerin ghene ebẹnbẹn rẹ igho? (Luk 12:29-31)

¹¹ Owọẹjẹ rẹsosuọ ro ji me yovwin yen wọ vwọ nẹrhovwo rhe Jihova. (Isẹ 16:3) Vuẹ nẹ ọ kẹ wẹ aghwanre ru wọ guọnọre wo se vwo bru omamọ erhiẹn kugbe ẹwẹn ri dọe rere wo vwo jẹ ‘ẹnwan ẹ rua gan nọ’ kpahen ẹdia wẹn na. (Se Luk 12:29-31.) Rẹ nẹ o cha wẹ uko vwo vwo otekẹvwẹ kpahen ekuakua rẹ akpeyeren. (1 Tim. 6:7, 8) Reyọ ẹbe rẹ ukoko na vwo ru ehiahiẹ kpahen oborẹ wo se vwo yerin ghene ebẹnbẹn rẹ igho. Ihwo buebun mrẹ erere vwo nẹ iyovwinreta kugbe ividio sansan rehẹ jw.org re ta ota kpahen obo re se vwo yerin ghene ebẹnbẹn rẹ igho.

12. Erhọ yen enọ evo re sa vwẹ ukẹcha kẹ Onenikristi vwo bru omamọ orhiẹn ro shekpahen orua rọyen?

¹² Evo hirharoku ọdavwini ayen vwo rhiabọreyọ iruo rọ cha nẹrhẹ ayen yanjẹ orua rayen vwo, jẹ ọ dia ọkieje yen ọnana vwọ ghwa erhuvwu chaa. Tavwen wo ki rhiabọreyọ iruo kpokpọ, ọ dia igho ra cha hwa kẹ wẹ ọvo yen ofori nẹ wo roro kpaheen, ẹkẹvuọvo sẹ iruo na cha vwẹ ukẹcha kẹ wẹ vẹ orua wẹn vwo vwo oyerinkugbe rọ kpẹkpẹre vẹ Jihova. (Luk 14:28) Nọ oma wẹn: ‘Die yen cha phia kẹ orọnvwe me siẹrẹ mi de sherabọ kẹ ọrivẹ rẹ orọnvwe mẹ? Die yen oyan mẹ na se ru vwẹ uyono ẹra ve iruo aghwoghwo mẹ?’ Ọ da dianẹ wo vwo emọ, o ji fo nẹ wọ nọ oma wẹn onọ ọghanghanre nana: ‘Mavọ me cha yọnrọn emọ mẹ wan “vwẹ ọghwọku kugbe uchebro ri Jihova” me vẹ ayen rha herọọ?’ (Ẹfe. 6:4) Jẹ iroro ri Jihova sun we siẹrẹ wo de brorhiẹn, ọ dia ọ rẹ ihwo rẹ orua kugbe igbeyan ri nene odjekẹ ri Baibol naa.c Tony rọ dia ẹbẹre ọnre shera vwẹ Asia, mrẹ omamọ iruo sansan ra da cha hwa okposa kẹ vwẹ ẹkuotọ ọfa. Ẹkẹvuọvo ọ vẹ aye rọyen vwọ ta ota je nẹrhovwo kpahọn nu, ọ rha rhọnvwe reyọ iruo naa ukperẹ ọtiọyen ayen da jiroro kpahen oborẹ ayen se vwo yeren akpọ ri kekpe ji siobọ rẹ igho rẹ orua na ghwọrọ kpotọ. Ro vwo ni kpuko, Tony da ta: “Mi vwo uphẹn mi vwo yono ihwo buebun kpahen Jihova, emọ rẹ avwanre ji vwo ẹguọnọ rẹ uyota na mamọ. Orua rẹ avwanre rhe riẹn re nẹ e de yeren akpọ nene eta rehẹ Matiu 6:33, Jihova cha vwẹrote ọdavwẹ rẹ avwanre.”

A DA JIRORO RẸ OBO RA SA VWỌ VWẸROTE OMA VWẸ ỌKE ỌGHWO

13. Die yen e se ru enẹna vwọ vwẹrote ọdavwẹ rẹ avwanre vwẹ ọke ọghwo?

¹³ A je sa davwẹn ẹroẹvwọsuọ avwanre kpahen obọ ri Jihova ni siẹrẹ a da jiroro kpahan oborẹ ẹdia avwanre cha dia vwẹ ọke ọghwo. Baibol na jiriro kẹ avwanre nẹ a wian gangan rere a sa vwọ vwẹrote ọdavwẹ avwanre vwẹ obaro na. (Isẹ 6:6-11) Ọtiọyena, ọyen emu rẹ aghwanre ọ da dia obo re se ru vwọ sẹro rẹ igho phiyọ akọkọ vwọ kẹ obaro na. Uyota nẹ igho sa dia ekpọfia vwọ kẹ avwanre. (Aghwo. 7:12) Dedena, ofori a vwọ kẹnoma kẹ uruemu a vwọ reyọ igho vwọ kobaro vwẹ akpeyeren.

14. Siẹrẹ a da jiroro kpahen ọdavwẹ rẹ avwanre vwẹ obaro na, diesorọ e vwo vwo oniso obo rehẹ Hibru 13:5?

¹⁴ Jesu dje ughẹnghẹn rọ herọ re vwo koko igho jẹ e ‘feri vwẹ ẹro rẹ Ọghẹnẹẹ.’ (Luk 12:16-21) Ohwo vuọvo riẹn oborẹ odẹ cha ghwa rhee. (Isẹ 23:4, 5; Jems 4:13-15) Kerẹ idibo ri Jesu avwanre se hirharoku oka rẹ obẹnbẹn ọvo. Jesu tare nẹ a ke dia idibo rọyen, e muegbe re vwo “siobọnẹ” kemu kemu rẹ avwanre vwori. (Luk 14:33) Inenikristi rẹ ẹgbukpe ujorin rẹsosuọ vwẹ Judia vwo owenvwe rẹ ayen vwo siobọnẹ kemu kemu rẹ ayen vwori vẹ aghọghọ. (Hib. 10:34) Vwẹ ọke rẹ avwanre na, ekuakua akpeyeren va iniọvo avwanre buebun abọ kidie ayen rhọnvwe bicha usuon rẹ akpọ naa. (Ẹvwọ. 13:16, 17) Die yen vwẹ ukẹcha kẹ ayen vwo ru ọtiọyen? Ayen vwẹroso ive ri Jihova kakare rọ tare nẹ: ‘O vwo ọke vuọvo me cha vwọ yanjẹ uwe vwoo, o vwo ọke vuọvo me cha vwọ kpairoro vrẹ wẹẹ.’ (Se Hibru 13:5.) Ọtiọyena, avwanre davwẹngba rẹ avwanre eje vwọ jiroro kpahen obaro na, ọ da tobọ dianẹ obo re rhẹro rọyeen te avwanre oma, imuẹro herọ nẹ Jihova che bicha avwanre.

15. Ẹro vọ yen ofori nẹ emiọvwọn re dia Inenikristi vwo ni emọ rayen? (Ni uhoho na.)

¹⁵ Vwẹ ẹkuotọ evo, eya gbe eshare ton orua phiyọ rere emọ na sa vwọ vwẹrote ayen vwẹ ọke ọghwo. Kọ ghwa họhọ nẹ, emiọvwọn nana reyọ emọ na vwo ruẹ oborẹ ayen cha “ghwo kẹ.” Baibol na tare nẹ ofori emiọvwọn vwọ vwẹrote ọdavwẹ rẹ emọ rayen. (2 Kọr. 12:14) Vwọrẹ uyota, vwẹ ọke ọghwo rayen ayen cha guọnọ ukẹcha ro fori vwo mie emọ na, oma je vwerhen emọ buebun vwo ruẹ ọrhuẹrẹphiyotọ ayen vwọ vwẹ ukẹcha phia. (1 Tim. 5:4) Ẹkẹvuọvo ofori nẹ emiọvwọn re dia Inenikristi mrẹvughe nẹ, ọ dia a vwọ yọnrọn emọ re cha vwẹrote je kẹ ayen igho yen nẹrhẹ e vwo aghọghọọ, ẹkẹvuọvo ra vwọ cha ayen uko vwọ dia idibo ri Jihova.​—3 Jọn 4.

16. Ukẹcha vọ yen emiọvwọn sa vwọ kẹ emọ rayen ayen sa vwọ vwẹrote oma rayen? (Ẹfesọs 4:28)

¹⁶ Reyọ udje wẹn vwo yono emọ wẹn obo ra vwẹroso Jihova, je vwẹ ukẹcha kẹ ayen vwo muegbe oborẹ ayen sa vwọ vwẹrote oma rayen. Ghwe vwọ nẹ ọkiemọ rhe, dje ọghanrovwẹ rọ herọ rẹ ayen vwọ wian gangan. (Isẹ 29:21; se Ẹfesọs 4:28.) Ayen vwọ ghwanra na, vwẹ ukẹcha kẹ ayen vwọ davwẹngba rayen eje vwẹ isikuru. Emiọvwọn re dia Inenikristi cha nabọ ru ehiahiẹ je reyọ odjekẹ ri Baibol vwọ vwẹ ukẹcha kẹ emọ rayen vwo brorhiẹn rẹ aghwanre kpahen oka rẹ isikuru rẹ ayen cha ra. Ọnana cha nẹrhẹ emọ rayen sa vwẹrote oma rayen je mrẹ ọke vwo ruiruo aghwoghwo na vọnvọn.

17. Imuẹro vọ yen e se vwo?

¹⁷ Idibo ri Jihova sa vwẹroso ẹgba kugbe owenvwe ro vwori rọ vwọ kẹ ayen kemu kemu rẹ ayen guọnọre. A cha davwen ẹroẹvwọsuọ avwanre kpahen Jihova ni rẹ oba rẹ eyeren nana vwo siẹkẹrẹ phiyọ na. O toro obo re phiaree, e jẹ a vwẹroso Jihova kakare nẹ ọ cha reyọ ẹgba rọyen vwọ vwẹrote avwanre. Ọtiọyena ke se vwo imuẹro nẹ obọ ọgangan kugbe igbabọ rọyen rọ riẹnre na cha krẹnọ o de jẹ avwanre e tee.