Diesorọ e Vwo Vwo Oshọẹdjẹ ri Jihova?

1-2. Vwo nene obo rehẹ Une rẹ Ejiro 25:​14, die yen o fori nẹ avwanre ru e vwo vwo oyerinkugbe ọkpẹkpẹkpẹ vẹ Jihova?

IRUEMU eghanghanre vọ yen wo rorori nẹ a guọnọre wẹ vẹ ohwo ki se vwo oyerinkugbe ọkpẹkpẹkpẹ? Wọ cha tanẹ ofori nẹ omamọ igbeyan vwo ẹguọnọ ji bicha ohwohwo. Ẹwẹn wẹn cha nama djẹ kpo oshọẹdjẹ nẹ ọyen uruemu ọghanghanre a guọnọre a ke sa dia uvi ugbeya-an. Ẹkẹvuọvo, kirobo rẹ ẹkpo ri Baibol re mu uyono nana kpahen djere, ihwo re guọnọ vwo oyerinkugbe ọkpẹkpẹkpẹ vẹ Jihova “djẹ oshọ rọye.”​—Se Une rẹ Ejiro 25:14.

² O toro uchọke rẹ avwanre ga Jihova cha re-e, ofori nẹ avwanre eje vwo oshọẹdjẹ rọyen. Die yen o mudiaphiyọ e vwo vwo oshọẹdjẹ rẹ Ọghẹnẹ? Mavọ yen avwanre se vwo vwo oshọẹdjẹ ri Jihova? Die yen avwanre se yono kpahen oshọẹdjẹ Ọghẹnẹ vwo mie odibo Obadaya, Orherẹn Rode Jehoiada, kugbe Ovie Joash?

DIE YEN O MUDIAPHIYỌ E VWO VWO OSHỌẸDJẸ RẸ ỌGHẸNẸ?

3. Djisẹ rẹ oborẹ oshọ sa vwọ sẹro rẹ avwanre.

³ Oshọ se mu avwanre e de no nẹ orọnvwọn ọvo sa so omaẹwan kẹ avwanre. Oka rẹ oshọẹdjẹ nana fori kidie ọ sa nẹrhẹ e brorhiẹn rẹ aghwanre. Oshọ re vwo je she nẹ enu rẹ ugbenu cha nẹrhẹ avwanre jẹ akọkọ rọyen e siẹkẹrẹ gan nọ. Oshọ rẹ omaẹwan sa nẹrhẹ a kẹnoma kẹ ẹdia rẹ imuoshọ. Oshọ re vwo miovwin oyerinkugbe rẹ avwanre vẹ ohwo re vwo ẹguọnọ kpahen sa nẹrhẹ a kẹnoma kẹ orharhe uruemu yẹrẹ orharhe ota.

4. Mavọ yen Eshu guọnọre nẹ oshọ ri Jihova mu avwanre te?

⁴ Eshu guọnọre nẹ oshọ ri Jihova mu avwanre. Eshu titi ọkpọ rẹ iroro ro rhe Elifaz​—nẹ Jihova ọyen ohwo ro ruẹ orukeri, ro muophu djọghrọ djọghrọ e se ruẹ obo re vwerhọn oma-a. (Job 4:​18, 19) Ọ guọnọre nẹ oshọ rọyen mu avwanre tẹdia ra da dobọ rẹ ẹga ra vwọ kẹ ji. Re vwo jẹ ufi ọtiọyena e she phiyọ, kẹ ofori nẹ e vwo oshọẹdjẹ abavo kpahen Ọghẹnẹ.

5. Die yen o mudiaphiyọ e vwo vwo oshọẹdjẹ rẹ Ọghẹnẹ?

⁵ Ohwo rọ nabọ vwo uvi rẹ oshọẹdjẹ rẹ Ọghẹnẹ vwo ẹguọnọ rọyen, o ji che vwobọ vwẹ orọnvwọn vuọvo ro che miovwin oyerinkugbe rọyen vẹ ọ rẹ Ọghẹnẹ-ẹ. Jesu vwo oka rẹ “oshọẹdjẹ” tiọyena. (Hib 5:​7, NW ) O vwo ọke vuọvo rẹ oshọ ri Jihova vwo muo-o. (Aiz 11:​2, 3) Ukperẹ ọtiọyen, o vwo ẹguọnọ okokodo kpahọn ji nyupho rọyen. (Jọ 14:​21, 31) Kerẹ Jesu, avwanre guọnọ muọghọ okokodo kẹ Jihova je vwẹ urinrin kẹ kidie ọyen ohwo ro vwo ẹguọnọ, aghwanre, ro brorhiẹn abavo o ji vwo ẹgba. Avwanre riẹnre nẹ Jihova vwo ẹguọnọ avwanre mamọ, o ji vwo oniso rẹ uruemu rẹ avwanre djephia siẹrẹ ọ da vwẹ uchebro kẹ avwanre. Ọ sa nẹrhẹ oma vwerhọn yẹrẹ muomaphiyọ.​—Un 78:41; Isẹ 27:11.

E SE YONO KPAHEN OBO RE SE VWO VWO OSHỌẸDJẸ RẸ ỌGHẸNẸ

6. Ọrhọ yen idjerhe ọvo re se vwo yono kpahen oshọẹdjẹ rẹ Ọghẹnẹ? (Une rẹ Ejiro 34:11)

⁶ E vwiẹ avwanre vẹ oshọẹdjẹ ri Jihova-a; e yono tavwen e ki vwo. (Se Une rẹ Ejiro 34:11.) Idjerhe ọvo e se vwo ru ọtiọyen ọyen a vwọ fuẹrẹn emama. Kọke kọke a da mrẹ aghwanre rẹ Ọghẹnẹ, ẹgba rọyen, kugbe ẹguọnọ rọyen vwẹ oma rẹ obo “rọ mare,” ọghọ kugbe ẹguọnọ rẹ avwanre vwo kpahọn kọ ganphiyọ. (Ro 1:20) Oniọvo aye ọvo re se Adrienne da ta, “mi de ni erọnvwọn eje ri Jihova mare je mrẹ oborẹ aghwanre rọyen rho te, ọnana gbevwunu je chọn vwẹ uko vwọ riẹn nẹ Ọ riẹn obo ri me yovwin kẹ vwẹ.” Kidie nẹ o roro kpahen enana ọkieje ọ da ta, “Diesorọ mi che vwo ru orọnvwọn ro che miovwin oyerinkugbe mẹ vẹ Jihova, rọ dia ohwo rọ kẹ vwẹ arhọ?” Wọ sa ghwọrọ ọke evo uvwre rẹ udughwrẹn nana vwo roro kpahen orọnvwọn ọvo ri Jihova mare? Wo de ru ọtiọyen, ọghọ vẹ ẹguọnọ ru wo vwo kpahọn kọ cha ganphiyọ.​—Un 111:​2, 3.

7. Mavọ yen ẹrhovwo sa vwọ chọn avwanre uko vwo vwo oshọẹdjẹ ri Jihova?

⁷ Idjerhe ọfa re se vwo vwo oshọẹdjẹ rẹ Ọghẹnẹ yen a vwọ nẹrhovwo ọkieje. E de ru ọtiọyen, ke che vughe Jihova phiyọ. Kọke kọke a da nẹrhovwo rhe nẹ ọ kẹ avwanre ẹgba re vwo chirakon rẹ ọdavwini, ọnana karophiyọ avwanre nẹ ọyen ohwo vẹ ẹgba. Avwanre da kpẹvwẹ fikirẹ izobo rẹ ọtanhirhe rẹ Ọmọ rọyen na, ọnana nẹrhẹ avwanre karophiyọ oborẹ Jihova vwo ẹguọnọ rẹ avwanre te. Siẹrẹ e de vwo obẹnbẹn je rẹ Jihova nẹ ọ vwẹ ukẹcha kẹ avwanre, ọnana karophiyọ avwanre nẹ ọyen ohwo vẹ aghwanre. Ẹrhovwo tiọyena nẹrhẹ ọghọ rẹ avwanre muẹ kẹ Jihova ganphiyọ. Ọnana ko mu avwanre vwọ kẹnoma kẹ kemu kemu ro se gbowọphiyọ oyerinkugbe avwanre vẹ ọyen.

8. Die yen e se ru e se vwo vwo oshọẹdjẹ rẹ Ọghẹnẹ?

⁸ A sa sẹro rẹ oshọẹdjẹ rẹ Ọghẹnẹ rẹ avwanre vwori womarẹ e vwo yono Baibol na vẹ ẹwẹn re vwo yono vwo nẹ omamọ kugbe erharhe rẹ idje rehẹ evun rọyen. Jẹ a ta ota kpahen idibo ri Jihova ivẹ re fuevun​—odibo Obadaya rọ vwẹrote uwevwin rẹ Ovie Ehab kugbe Orherẹn Rode Jehoiada. A je cha mrẹ obo re se yono mie Ovie Joash ri Juda, rọ vwẹ ẹga ri Jihova vwọ ton akpọ phiyọ, ukuko na ọ da rhe dobọ rẹ ẹga rọ vwọ kẹ Jihova ji.

FIUDUGBERI KERẸ OBADAYA

9. Mavọ yen oshọẹdjẹ ri Jihova vwẹ ukẹcha kẹ Obadaya? (1 Ivie 18:​3, 12)

⁹ Obọ rẹsosuọ ri Baibol na ke vwo djunute Obadayab ọ da ta: “Obadaya mu ọghọ kẹ Ọrovwohwo gangan.” (Se 1 Ivie 18:​3, 12.) Idjerhe vọ yen oshọẹdjẹ nana vwọ vwẹ ukẹcha kẹ Obadaya? Ọ nẹrhẹ ọ rhe dia ohwo rẹ uyota vẹ ohwo ra sa vwẹrosua; ọnana yensorọ, ovie na vwọ reyọ vwo mu nẹ ọ vwẹrote uwevwin rọyen. (Ni Nehemaya 7:2.) Oshọẹdjẹ rẹ Ọghẹnẹ rẹ Obadaya vwori nẹrhẹ o vwo uduefiogbere​—uruemu rọ ghene guọnọ. Ọke rẹ orharhe rẹ Ovie Ehab ro “ru umwemwu vwẹ obaro rẹ Ọrovwohwo nọ otu re ka obaro kẹ ejobi” vwo suẹn, ọyen o vwo yerin. (1Iv 16:30) Vwọba, aye rọyen Jezibẹl rọ ga Baal, vwo utuoma kpahen Jihova mamọ tẹdia rọ vwọ davwẹngba ro vwo si ẹga rẹ uyota nẹ uvwiẹ ihwe rẹ Izrẹl. Ọ tobọ hwe emraro rẹ Ọghẹnẹ buebun. (1Iv 18:4) Aphro herọ-ọ nẹ, Obadaya ga Jihova vwẹ ọke rọ pha gangan.

10. Idjerhe vọ yen Obadaya vwo dje uduefiogbere phia?

¹⁰ Idjerhe vọ yen Obadaya vwo dje uduefiogbere phia? Ọke rẹ Jezibẹl vwọ guọnọ emraro rẹ Ọghẹnẹ ro che hwe, Obadaya da reyọ ujorin rayen o de si ayen nu “ujuvẹ gbe ihwe ẹko vwẹ evun rẹ emwa,” ọ da vwẹ emu kugbe ame vwọ ghẹrẹ ayen. (1Iv 18:​13, 14) Ọ da dianẹ Jezibẹl riẹn kpahen oborẹ Obadaya rọ dia ohwo ro fiudugberẹ na ruru, o rhe hwe. Vwọrẹ uyota, oshọ se mu Obadaya, kidie ọ guọnọ ghwu-u. Obadaya vwo ẹguọnọ ri Jihova vẹ ihwo re vwẹ ẹga kẹ vwọ vrẹ arhọ romobọ rọyen.

11. Idjerhe vọ yen idibo ri Jihova rẹ ọke nana vwọ họhọ Obadaya? (Ni uhoho na.)

¹¹ Nonẹna idibo ri Jihova buebun dia ẹkuotọ ra da dobọ rẹ owian avwanre ji. Ayen muọghọ kẹ ogangan rẹ usuon, jẹ kerẹ Obadaya, iniọvo eya vẹ e rẹ eshare nana vwẹ ẹga ro fori vwọ kẹ Jihova​—ẹga rẹ ọsoso! (Mt 22:21) Ayen djephia nẹ ayen vwo oshọẹdjẹ rẹ Ọghẹnẹ womarẹ ayen vwo nyo upho rẹ Ọghẹnẹ vrẹ ọ rẹ ihworakpọ. (Iru 5:29) Ayen ruẹ ọnana womarẹ ayen vwo ghwoghwo iyẹnrẹn esiri na ọkieje je vwẹ aghwanre vwo ru uyono vwẹ odjahọn. (Mt 10:​16, 28) Ọdavwẹ rayen ọyen ayen vwọ davwẹngba rere iniọvo rayen se vwo vwo oborẹ ayen guọnọre, rọ sa nẹrhẹ ayen sikẹrẹ Jihova phiyọ. Roro kpahen udje ri Henri rọ dia ẹkuotọ ọvo vwẹ Africa ra da dobọ rẹ owian avwanre ji ọke ọvo rọ wanre. Vwẹ ọke yena, oniọvo Henri da vwoma vwo ze vwo mu ẹbe rẹ ukoko na bru iniọvo na ra. O de si: “Notọ rhe mẹvwẹ ohwo rẹ oma vua. Ọtiọyena o muvwẹro nẹ ọghọ okokodo ri mi vwo kpahen Jihova yen kẹ vwẹ uduefiogbere ri mi ghwa guọnọ.” Wo se fiudugberi kirobo rẹ Henri ruru na? Wo de vwo oshọẹdjẹ rẹ Ọghẹnẹ wo se ru ọtiọyen.

FUEVUN KERẸ ORHERẸN RODE JEHOIADA

12. Idjerhe vọ yen Orherẹn Rode Jehoiada vẹ aye rọyen vwọ fuevun kẹ Jihova?

¹² Orherẹn Rode Jehoiada vwo oshọẹdjẹ ri Jihova, ọnana da nẹrhẹ ọ fuevun ji titi ẹga rẹ uyota. A mrẹ ọnana vughe ọke rẹ ọmọtẹ ri Jezibẹl re se Atalaya vwọ vwẹ ẹgba vwọ reyọ usuon ri Juda. Atalaya ọyen ghini ohwo ra djoshọ rọyen. Ohwo vẹ ọkon ro gbe arodọnvwẹ kẹ ohwo-o rọ guọnọ ẹdia rode, kọyensorọ ọ vwọ davwẹngba vwo hwe emọ eje ri nẹ uvwiẹ rẹ ovie na rhe tobọ te ivwrọmọ rọyen dede! (2Ik 22:​10, 11) Ọvo usun rẹ emọ na​—Joash, sivwin rhọ kidie aye ri Jehoiada re se Jehoshabeat, mu ro vwọ djẹ. Ọ vẹ ọshare rọyen si ọmọ na nu ayen da je vwẹrote. Ọnana ri Jehoiada vẹ Jehoshabeat ruru na da nẹrhẹ a sẹro rẹ urhiẹ rẹ ivie ri nẹ uvwiẹ ri Devid rhe. Jehoiada fuevun kẹ Jihova, oshọ rẹ Atalaya ji muo-o.​—Isẹ 29:25.

13. Idjerhe vọ yen Jehoiada vwo rhoma dje evuẹfuọn rọyen phia ọke ri Joash vwọ hẹ ẹgbukpe ighwrẹn?

¹³ Ọke ri Joash vwọ hẹ ẹgbukpe ighwrẹn, Jehoiada da rhoma dje evuẹfuọn rọyen kẹ Jihova. O de ru ọrhuẹrẹphiyotọ ọvo. Ọrhuẹrẹphiyotọ nana da wian, Joash rọ dia ọmọ ro nẹ uvwiẹ ri Devid rhe, kọ cha dia ovie. O de rhe shefia, o muẹro nẹ Jehoiada se ghwu. Ọrhuẹrẹphiyotọ na da wian vẹ ukẹcha ri Jihova. Womarẹ ukẹcha rẹ irherẹn na vẹ ihwo ri Livae vwọ kẹ Jehoiada, ayen da vwẹ Joash vwo mu ovie ji hwe Atalaya. (2Ik 23:​1-5, 11, 12, 15; 24:1) Ọtiọyena Jehoiada “vẹ Ọrovwohwo da re ọphọ kugbe ovie vẹ ihwo, nẹ ayen dia ihwo rẹ Ọrovwohwo.” (2Iv 11:17) Jehoiada je vwẹ ihwo mu nẹ e “rhẹrẹ anurhoro rẹ Ọrovwohwo na rere ohwo ro jẹfuọn vwo jẹ vwẹriẹ.”​—2Ik 23:19.

14. Idjerhe vọ yen e vwo brọghọ phiyọ Jehoiada oma kidie nẹ o muọghọ kẹ Jihova?

¹⁴ Jihova ka ta ẹsosuọ nẹ: “Ihwo ri mu ọghọ kẹ vwẹ eye mi ji mu ọghọ kẹ.” Vwọrẹ uyota, Jihova hwosa kẹ Jehoiada. (1Sa 2:30) Kerẹ udje, ọ nẹrhẹ a niyẹnrẹn rẹ ikuegbe ri Jehoiada phiyọ Baibol na rere avwanre se vwo yono norhe. (Ro 15:4) Ọke ri Jehoiada vwo ghwu, e de brọghọ phiyọ oma re vwo sho phiyọ “orere ri Devid vwẹ ohri rẹ ivie na, fikiridie o ru emu esiri kẹ Izrẹl, kugbe Ọghẹnẹ vẹ uwevwi rọye.”​—2Ik 24:​15, 16.

15. Die yen e se yono vwo nẹ ikuegbe ri Jehoiada rhe? (Ni uhoho na.)

¹⁵ Ikuegbe ri Jehoiada na sa chọn avwanre eje uko vwo vwo oshọẹdjẹ rẹ Ọghẹnẹ. Ekpako rẹ ukoko sa vwẹrokere Jehoiada womarẹ ayen vwọ guọnọ idjerhe sansan vwọ sẹro rẹ ichuru rẹ Ọghẹnẹ. (Iru 20:28) Ihwo re kpakore se yono mie Jehoiada nẹ ayen da fuevun ji vwo oshọẹdjẹ rọyen, Ọ sa reyọ ayen vwo ru ọhọre rọyen. O che gbobọnyẹ aye-en. Ighene se vwo oniso rẹ oborẹ Jihova ru kẹ Jehoiada je vwẹrokere uruemu rọyen womarẹ ayen vwo muọghọ vwọ kẹ ihwo re kpakore, marho ihwo re fuevun ga Jihova ọke grongron re. (Isẹ 16:31) Ọtiọyena, avwanre eje se yono vwo mie irherẹn na vẹ ihwo ri Livae re vwẹ ukẹcha kẹ Jehoiada. E je bicha “ihwo re kobaro, NW” womarẹ e vwo nyupho rayen.​—Hib 13:17.

WỌ VWẸROKERE JOASHI-I

16. Die yen djerephia nẹ Ovie Joash dia omamọ rẹ ohwo-o?

¹⁶ Jehoiada vwẹ ukẹcha kẹ Ovie Joash vwọ dia omamọ rẹ ohwo. (2Iv 12:2) Ọtiọyena ọke rọ vwọ hẹ eghene, o de ru obo re vwerhen Jihova oma. Jẹ Jehoiada vwo ghwu nu, ọ da kerhọ kẹ emọ rẹ ivie re ga Jihova-a. Die yen nẹ obuko rẹ ọnana rhe? Ọ vẹ ihwo ro suẹn eje “da gọ ighriki vẹ ema.” (2Ik 24:​4, 17, 18) Dede nẹ oborẹ ayen ruru na da Jihova mamọ, jẹ o ji “ji emraro rhe ohri rayen rere ọ vwẹ ayen rhivwi rhe . . . , ẹkẹvuọvo yẹ ayen davwerhọ-ọn.” Ayen tobọ kerhọ kẹ Zekaraya ọmọ ri Jehoiada, ri Jihova vwo mu ọmraro kugbe orherẹ-ẹn rẹ ọ vẹ Joash gba dia emọ rẹ iniọvo. Dede nẹ Ovie Joash riẹnre nẹ orua ri Zekaraya yen sivwin arhọ rọyen, ọ nama dje ọdavwaro phia-a, o de hwe.​—2Ik 22:11; 24:​19-22.

17. Die yen rhe phia kẹ Joash ukuko na?

¹⁷ Joash vwo oshọẹdjẹ ri Jihova-a, ọnana da nẹrhẹ erọnvwọn rhi miovwin kẹ. Jihova tare jovwo nẹ: “Ihwo re jẹ vwẹ fia ke ni ayen phorhi.” (1Sa 2:30) Ituofovwin rẹ ihwo ri Siria ri te emuọvo-o de phi “unuofovwi rode” ri Joash kparobọ, ayen da je “woma phihọ otọ gangan.” Ọke rẹ ihwo ri Siria vwo kpo nu, idibo ri Joash da tenyọ hwe kidie o hwe Zekaraya. Kidie nẹ orharhe ovie yen o ruẹ ihwo beubun de no nẹ o muwan re vwo sho phiyọ “ushi rẹ ivie-e.”​—2Ik 24:​23-25; ni study note “son of Barachiah” rọhẹ Matiu 23:​35, NW.

18. Vwo nene obo rehẹ Jerimaya 17:​7, 8, mavọ yen a sa vwọ kẹnoma kẹ uruemu ri Joash?

¹⁸ Die yen e se yono vwo nẹ udje ri Joash rhe? Ọ pha kerẹ urhe rẹ awọ rọyen ro otọ-ọ ra reyọ urhe ọfa vwọ cha. Ọke rẹ urhe ra vwọ cha na​—Jehoiada vwo ghwu nu, rẹ odju rẹ ẹga rẹ efian vwo dju, Joash de ghwie she. Udje nana djerephia nẹ ọ dia iruemu rẹ iniọvo na yẹrẹ ihwo rẹ orua yen mu avwanre vwo vwo oshọẹdjẹ rẹ Ọghẹnẹ-ẹ. A vẹ Jihova se vwo vwo oyerinkugbe rọ kpẹkpẹre, ofori nẹ e muọghọ ji ru ẹguọnọ re vwo kpahọn ganphiyọ womarẹ uyono rẹ ọkieje, erorokodo, kugbe ẹrhovwo.​—Se Jerimaya 17:​7, 8; Kọl 2:​6, 7.

19. Die yen Jihova guọnọ mie avwanre?

¹⁹ Jihova guọnọre nẹ e ru vrẹ asan rẹ ẹgba rẹ avwanre teri-i. Aghwoghwo 12:13 vuẹ avwanre obo rọ guọnọre, nẹ: “Djẹ oshọ rẹ Ọghẹnẹ, rere wọ yọnrọn irhi rọye; kidie ọnana ọye iruo ro te ohwo.” Avwanre de vwo oshọẹdjẹ rẹ Ọghẹnẹ, ka sa fuevun kẹ je yọnregan kerẹ Obadaya vẹ Jehoiada. O vwo emu vuọvo rọ cha sa guọghọ oyerinkugbe avwanre vẹ Jihova-a.