Nḓila ine Ra nga Amba Ngayo na “Mupfi wa Dzithabelo”
“Iwe Mupfi wa dzithabelo, vhathu vhoṱhe vha ḓa ha Iwe.”—PSALME YA 65:2.
1. Ndi mini zwine zwa fhambanya vhathu vha re kha ḽifhasi na zwiṅwe zwivhumbiwa, nahone zwenezwi zwi ri ṋea tshibuli tshifhio?
KHA zwivhumbiwa zwoṱhe zwa zwigidi zwi re kha ḽifhasi, ndi vhathu fhedzi vha re na vhukoni ha u gwadamela Musiki. Ndi vhathu fhedzi vhane vha ṱhogomela uri vha a ṱoḓa u gwadamela Mudzimu nahone vha a ṱoḓa u ḓadzisa yeneyo ṱhoḓea. Zwenezwi zwi ri ṋea tshibuli tshavhuḓi tsha u vha na vhushaka havhuḓi na Khotsi ashu wa ṱaḓulu.
2. Ndi mvelelo ifhio mmbi ye tshivhi tsha vha nayo kha vhushaka ha vhathu na Musiki wavho?
2 Mudzimu o sika muthu e na vhukoni ha u amba na Musiki wawe. Adamu na Eva vho sikwa vhe si na tshivhi. Nga zwenezwo, vho vha vha tshi amba na Mudzimu vho vhofholowa u fana na musi ṅwana a tshi amba na khotsi awe. Naho zwo ralo, vho mbo ḓi xelelwa nga yeneyo ndugelo khulwane nge vha ita tshivhi. Adamu na Eva a vho ngo thetshelesa Mudzimu nahone vha xelelwa nga vhushaka havho nae. (Genesi 3:8-13, 17-24) Naa zwenezwo zwi amba uri vhaḓuhulu vha Adamu vha songo fhelelaho vha nga si tsha kona u amba na Mudzimu? Hai, Yehova u kha ḓi vha tendela vha tshi amba nae fhedzi arali vha tshi tendelana na dziṅwe ṱhoḓea dza ndeme. Ndi dzifhio dzenedzo ṱhoḓea?
Zwine zwa Ṱoḓea u Itela u Amba na Mudzimu
3. Vhathu vha re na tshivhi vha nga amba hani na Mudzimu, nahone ndi tsumbo ifhio ine ya sumbedza zwenezwi?
3 Tshiitea tshi katelaho vharwa vhavhili vha Adamu tshi ri thusa u vhona zwine Mudzimu a zwi ṱoḓa kha vhathu vha songo fhelelaho vhane vha tama u amba Nae. Kaini na Abele vho lingedza u amba na Mudzimu nga u mu ṋekedza zwiṱhavhelo. Tshiṱhavhelo tsha Abele tsho ṱanganedzwa, ngeno tsha Kaini tshi songo ṱanganedzwa. (Genesi 4:3-5) Ndi mini tsho itaho uri zwi sa ṱanganedzwe zwoṱhe? Vha-Heberu 11:4 i ri: “Ndi nga lutendo Abele ó ṋekedza Mudzimu tshidzimu tshi fhirisaho tsha Kaini; nga lwone o pfa vhuṱanzi he ha ri o luga.” Nga zwenezwo, zwi tou vha khagala uri lutendo ndi ṱhoḓea i itaho uri muthu a kone u amba na Mudzimu. Iṅwe ṱhoḓea i vhonala kha maipfi e Yehova a a vhudza Kaini: “Nandi? Wá ita zwivhuya, a si hone khofheni hu tshi ḓo tshá naa.” Ee, khumbelo ya Kaini ya u amba na Mudzimu yo vha i tshi ḓo vha yo ṱanganedzwa arali Kaini a ite zwivhuya. Naho zwo ralo, Kaini ha ngo thetshelesa nyeletshedzo ya Mudzimu, a mbo ḓi vhulaha Abele, nahone a mbo ḓi shavha. (Genesi 4:7-12) U bva mathomoni a ḓivhazwakale ya vhathu, ndeme ya u amba na Mudzimu nga lutendo khathihi na u ita mishumo mivhuya yo ombedzelwa.
4. Ndi mini zwine ra fanela u zwi ṱhogomela malugana na nḓila ine ra amba ngayo na Mudzimu?
4 U ṱhogomela vhuimo hashu ha u vha na tshivhi ndi zwa ndeme arali ri tshi ṱoḓa u amba na Mudzimu. Vhathu vhoṱhe vha na tshivhi, nahone tshivhi ndi tshikhukhulisi tshine tsha ri thivhela u amba na Mudzimu. Muporofita Yeremia o ṅwala malugana na Isiraele a ri: “Ho tshinya riṋe . . . Wo fuka gole, thabelo i si tsha swika ha Iwe.” (Zwililo 3:42, 44) Hu sa londwi mbuno ya uri vhathu vha na tshivhi, kha ḓivhazwakale yoṱhe ya vhathu Mudzimu o sumbedza uri u a ṱanganedza thabelo dza vhane vha amba nae nga lutendo na vha re na mavhonele avhuḓi, na vhane vha tevhela ndaela dzawe. (Psalme ya 119:145) Vhaṅwe vha vhenevho vhathu ndi vhonnyi, nahone ri nga guda mini kha thabelo dzavho?
5, 6. Ri nga guda mini kha nḓila ye Abrahamu a amba ngayo na Mudzimu?
5 Muṅwe wa vhenevho vhathu o vha e Abrahamu. Mudzimu o ṱanganedza vhuḓidini ha Abrahamu ha u amba nae, ndi ngazwo Mudzimu o vhidza Abrahamu uri “khonani yanga.” (Yesaya 41:8) Ri nga guda mini kha nḓila ye Abrahamu a amba ngayo na Mudzimu? Onoyu musimulalushaka o vhudzisa Yehova malugana na muḽaifa a ri: “U ḓo mpha’ni? Huufha ndi tshi tshimbila ndí si ná ṅwana.” (Genesi 15:2, 3; 17:18) Nga tshiṅwe tshifhinga, o amba vhuḓipfiwa hawe malugana na vhane vha ḓo tshidzwa musi Mudzimu a tshi ḓo fhelisa vhuvhi vhu re Sodoma na Gomora. (Genesi 18:23-33) Abrahamu o dovha a rabelela na vhaṅwe. (Genesi 20:7, 17) Nahone u fana na kha mafhungo a Abele, nga zwiṅwe zwifhinga u amba ha Abrahamu na Mudzimu ho vha hu tshi katela u ṋekedza tshiṱhavhelo kha Yehova.—Genesi 22:9-14.
6 Kha zwenezwi zwiitea zwoṱhe, Abrahamu o amba na Yehova o vhofholowa. Naho zwo ralo, u amba hawe o vhofholowa zwo sumbedza mavhonele a u ḓiṱukufhadza phanḓa ha Musiki wawe. Ṱhogomelani maipfi awe a sumbedzaho u ḓiṱukufhadza, a re kha Genesi 18:27 ane a ri: “Yawee, ndo ḓi-funga nda amba na Muṋe wanga, ngeno ndí buse na milora fhedzi.” Ndi mavhonele avhuḓi lungafhani ane ra fanela u a edzisa!
7. Ndi mafhungo afhio e vhasimulalushaka vha a vhudza Yehova nga thabelo?
7 Vhasimulalushaka vho rabela malugana na mafhungo o fhamba-fhambanaho, na vhone thabelo dzavho dzo pfiwa nga Yehova. Yakobo o rabela a tshi khou ita muano. Nga murahu ha u humbela u tikedzwa nga Mudzimu, o fulufhedzisa zwi tshi bva mbiluni a ri: “Huno kha zwoṱhe zwine a ḓo mpha, ndi ḓo mu suma nga tshafumi.” (Genesi 28:20-22) Nga murahu, musi a tshi khou ṱoḓa u ṱangana na mukomana wawe, Yakobo o humbela Yehova uri a mu tsireledze, a ri: “Ntshidze tshanḓani tsha mukomana wanga, tshanḓani tsha Esau, ngauri ndi a mu ofha.” (Genesi 32:9-12) Musimulalushaka Yobo o amba na Yehova a tshi itela muṱa wawe, nahone a ṋekedza zwiṱhavhelo a tshi itela vhone. Musi khonani tharu dza Yobo dzo ita tshivhi nga zwe dza amba, Yobo o dzi rabelela, nahone “Yehova a mbo tenda thabelo ya Yobo.” (Yobo 1:5; 42:7-9) Enea mafhungo a ri thusa u ṱhogomela mafhungo ane ra fanela u a katela musi ri tshi rabela Yehova. Ri dovha ra vhona uri Yehova o ḓiimisela u ṱanganedza thabelo dza vhane vha amba nae nga nḓila yo teaho.
Nga Fhasi ha Mulanga wa Mulayo
8. Nga fhasi ha Mulayo wa mulanga, mafhungo o vha a tshi iswa kha Yehova nga nḓila-ḓe?
8 Nga murahu ha musi Yehova o tshidza lushaka lwa Isiraele ngei Egipita, o vha ṋea mulanga wa Mulayo. Wonoyo Mulayo wo vha u tshi amba nga ha ndugiselelo dza u amba na Mudzimu vha tshi shumisa vhotshifhe vho khethiwaho. Vhaṅwe Vha-Levi vho vha vho ṋewa mushumo wa u shuma sa vhotshifhe u itela u thusa vhathu. Musi hu tshi vha na mafhungo a lushaka a ndeme, muimeleli wa vhathu—ane nga zwiṅwe zwifhinga a nga vha khosi kana muporofita—o vha a tshi isa mafhungo kha Mudzimu nga thabelo. (1 Samuele 8:21, 22; 14:36-41; Yeremia 42:1-3) Sa tsumbo, musi a tshi khou ṋekedza thembele, Khosi Salomo o amba na Yehova nga thabelo i bvaho mbiluni. Nga hu fanaho, Yehova o sumbedza uri o ṱanganedza thabelo ya Salomo nga u ḓadza thembele nga vhugala Hawe nahone a ri: “Dzinḓevhe dzanga dzi ḓo dzula dzi tshi thetshelesa dzithabelo dza henefha.”—2 Koronika 6:12–7:3, 15.
9. Ho vha hu tshi ṱoḓea mini u itela u amba na Yehova nga ho teaho fhethu hukhethwa?
9 Kha Mulayo we wa ṋewa Vhaisiraele, Yehova o katela na zwithu zwine zwa ṱoḓea musi hu tshi ambiwa nae fhethu hukhethwa. Zwo vha zwi zwifhio? Nga matsheloni maṅwe na maṅwe na nga madekwana maṅwe na maṅwe, nga nnḓa ha u ṋekedza zwiṱhavhelo zwa zwipuka, tshifhe muhulu o vha tshi fanela uri a fhise zwioro phanḓa ha Yehova. Nga murahu, vhotshifhe vha re nga fhasi na vhone vho vha vha tshi ita yeneyi tshumelo, nga nnḓa ha musi hu Ḓuvha ḽa u Pfumelelwa. Arali vhotshifhe vha songo ṱhonifha yeneyo tshumelo khethwa, Yehova o vha a sa takaleli vhuḓinḓa havho.—Ekisodo 30:7, 8; 2 Koronika 13:11.
10, 11. Ndi vhuṱanzi vhufhio vhune ra vha naho ha uri Yehova u a ṱanganedza thabelo dza muṅwe na muṅwe?
10 Kha ḽa Isiraele ḽa kale, naa muthu o vha a tshi kona u amba na Mudzimu fhedzi a tshi shumisa vhaimeleli vho khethiwaho? Hai, Maṅwalo a sumbedza uri Yehova o vha a tshi ṱanganedza thabelo dza muthu muṅwe na muṅwe. Kha thabelo ya Salomo ya u ṋekedza thembele, o humbela Yehova a ri: “Thabelo na khumbelo dzoṱhe dzine dza ḓo ḓiswa hu tshi rabelelwa muthihi kana vhoṱhe vhathu vhau vha Isiraele, . . . a imisa zwanḓa zwawe nḓuni ino, U vha pfe Ú ngeo ṱaḓulu.” (2 Koronika 6:29, 30) Mafhungo a Luka a ri vhudza uri musi Sakaria, khotsi a Yohane Mulovhedzi, a tshi khou ṋekedza zwioro nḓuni khethwa, vhagwadameli vha Yehova vhe vha vha vhe si vhotshifhe vho vha vhe “nnḓa vha tshi khou rabela.” Zwi vhonala uri zwo mbo ḓi vha mukhuvha uri vhathu vha kuvhangane vha tshi khou rabela nnḓa ha nnḓu khethwa ngeno zwioro zwi tshi khou iswa phanḓa ha Yehova kha aletare ya musuku.—Luka 1:8-10.
11 Nga zwenezwo, musi hu tshi ambiwa na Yehova nga nḓila yo teaho, o vha a tshi ṱanganedza dzenedzo thabelo dzi bvaho kha vhane vha imela lushaka lwoṱhe na dzi bvaho kha muthu muṅwe na muṅwe ane a ṱoḓa u amba nae. Ṋamusi a ri tsha tshila nga fhasi ha Mulayo wa mulanga. Hafhu ri nga guda dziṅwe ngudo dza ndeme dza malugana na thabelo kha nḓila ye Vhaisiraele vha kale vha amba ngayo na Mudzimu.
Nga Fhasi ha Ndugiselelo ya Vhukriste
12. Ndi ndugiselelo ifhio ine Vhakriste vha vha nayo ya u amba na Yehova?
12 Zwino ri khou tshila nga fhasi ha ndugiselelo ya Vhukriste. A hu tshe na thembele ine vhotshifhe vha imelela hone vhathu vhoṱhe vha Mudzimu kana ine ra nga ya khayo musi ri tshi rabela Mudzimu. Naho zwo ralo, Yehova o ita ndugiselelo ine ra fanela u amba nae ngayo. Ndi ifhio? Nga 29 C.E., musi Kristo a tshi ḓodzwa na u khethiwa uri a vhe Tshifhe Muhulu, thembele ya muya yo mbo ḓi thoma u shuma.a Yeneyi thembele ya muya yo vha i ndugiselelo ntswa ya u ya kha Yehova nga thabelo nga mutheo wa tshiṱhavhelo tshi pfumelelaho tsha Yesu Kristo.—Vha-Heberu 9:11, 12.
13. Malugana na thabelo, ndi hufhio huṅwe u fana hu re hone vhukati ha thembele ya ngei Yerusalema na thembele ya muya?
13 Masia manzhi a thembele ya Yerusalema o vha a tshi imela zwavhuḓi ndugiselelo dzo fhamba-fhambanaho dza thembele ya muya, u katela na dzine dza tshimbidzana na thabelo. (Vha-Heberu 9:1-10) Sa tsumbo, zwioro zwe zwa vha zwi tshi ṋekedzwa nga matsheloni na nga madekwana, kha aletare ya zwioro fhethu Hukhethwa ngei thembeleni zwo vha zwi tshi imela mini? U ya nga bugu ya Ndzumbululo, “zwioro ndi dzithabelo dza vhakhethwa.” (Ndzumbululo 5:8; 8:3, 4) Davida o hevhedzwa uri a ṅwale uri: “Thabelo yanga nga i nge zwioro phanḓa hau.” (Psalme ya 141:2) Nga zwenezwo, u ya nga ndugiselelo ya Vhukriste, zwioro zwi nukhelelaho zwi imela thabelo na thendo zwi ṱanganedzwaho nga Yehova.—1 Vha-Thesalonika 3:10.
14, 15. Hu nga ambiwa mini nga ha u amba na Yehova nga (a) Vhakriste vho ḓodzwaho? (b) nga vha “dziṅwe nngu”?
14 Ndi vhafhio vhane vha nga amba na Mudzimu kha yeneyi thembele ya muya? Thembeleni ya vhukuma, vhotshifhe na Vha-Levi vho vha vhe na ndugelo ya u shuma muṱani wa nga ngomu, fhedzi ho vha hu vhotshifhe fhedzi vhe vha vha vha tshi dzhena fhethu Hukhethwa. Vhakriste vho ḓodzwaho vha re na fulufhelo ḽa u tshila ṱaḓulu vha ḓiphina nga vhuimo ha muya ho khetheaho vhu imelwaho nga muṱa wa nga ngomu na nga fhethu Hukhethwa, vhune ha ita uri vha kone u rabela na u renda Mudzimu.
15 Hu pfi mini nga vha re na fulufhelo ḽa u tshila kha ḽifhasi, vha “dziṅwe nngu”? (Yohane 10:16) Muporofita Yesaya o sumbedza uri vhathu vha tshaka nnzhi vha ḓo ḓa vha gwadamela Yehova “vhufheloni ha maḓuvha.” (Yesaya 2:2, 3) O dovha a ṅwala u ri “vhatsinda” vha ḓo ḓa vha vha vhathu vha Yehova. A tshi sumbedza u tama u ṱanganedza thabelo dzavho, Mudzimu o ri: “Ndi ḓo . . . vha takadza nḓuni yanga ya thabelo.” (Yesaya 56:6, 7) Ndzumbululo 7:9-15 i ri ṋea maṅwe mafhungo o engedzeaho, i ṱalusa “gogo ḽihulu” ḽi bvaho kha “tshaka dzoṱhe” ḽo kuvhanganaho u itela u gwadamela na u rabela Mudzimu “masiari na vhusiku” sa ḽo imaho muṱani wa nga nnḓa wa thembele ya muya. Ndi mafhungo a khuthadzaho lungafhani a uri vhashumeli vhoṱhe vha Mudzimu ṋamusi vha nga amba na Mudzimu vho vhofholowa vhe na fulufhelo ḽa uri u ḓo vha pfa!
Ndi Thabelo Dzifhio Dzine dza Ṱanganedzwa?
16. Ri nga guda mini kha thabelo dza Vhakriste vha u thoma?
16 Vhakriste vha u thoma vho vha vhe vhathu vhane vha rabela nga maanḓa. Ndi mafhungo afhio e vha vha vha tshi a rabelela? Vhahulwane vha Vhakriste vho vha vha tshi humbela vhulivhisi musi vha tshi khetha vhanna vhane vha ḓo vha na vhuḓifhinduleli ndanguloni. (Mishumo 1:24, 25; 6:5, 6) Epafra o rabelela vhatendi ngae. (Vha-Kolosa 4:12) Miraḓo ya tshivhidzo tsha Yerusalema yo rabelela Petro musi e dzhele. (Mishumo 12:5) Vhakriste vha u thoma vho humbela Mudzimu uri a vha ṋee tshivhindi musi vha tshi khou hanedzwa, vha ri: “Murena, vhona u sinyuwa havho, huno vhaḓinḓa vhau U vha farise vha ambe fhungo ḽau nga dakalo ḽoṱhe.” (Mishumo 4:23-30) Mufunziwa Yakobo o ṱuṱuwedza Vhakriste uri vha rabelele vhuṱali musi vho sedzana na mulingo. (Yakobo 1:5) Naa ni a katela mafhungo o raloho musi ni tshi rabela Yehova?
17. Yehova u ṱanganedza thabelo dza vhafhio?
17 Mudzimu ha ṱanganedzi thabelo dzoṱhe. Ngauralo-ha, ri nga rabela hani ri na fulufhelo ḽa uri thabelo dzashu dzi ḓo ṱanganedzwa? Vhathu vha fulufhedzeaho vhane Mudzimu a vha thetshelesa vha tshifhingani tsho fhiraho vho amba nae zwi tshi bva mbiluni nahone na nga mavhonele avhuḓi. Vho sumbedza lutendo nahone vha lu sumbedza nga mishumo mivhuya. Ri nga vha na vhungoho ha uri Yehova u ḓo thetshelesa vhane vha amba nae nga nḓila i fanaho ṋamusi.
18. U itela uri thabelo dzavho dzi pfiwe, ndi ṱhoḓea ifhio ine Vhakriste vha fanela u i swikelela?
18 Hu na iṅwe ṱhoḓea yo engedzeaho. Muapostola Paulo o ṱalutshedza zwenezwi a ri: ‘Nga ene . . . ri kona u amba na Khotsi nga Muya muthihi.’ Paulo o vha a tshi khou ambela kha nnyi musi a tshi ṅwala uri ‘nga ene’? Kha Yesu Kristo. (Vha-Efesa 2:13, 18) Ee, ri nga kona u amba na Khotsi ro vhofholowa nga Yesu fhedzi.—Yohane 14:6; 15:16; 16:23, 24.
19. (a) U ṋekedzwa ha zwioro nga Vhaisiraele zwo thoma lini u nengisa Yehova? (b) Ri nga ita hani vhungoho ha uri thabelo dzashu dzi nge zwioro zwi nukhelelaho kha Yehova?
19 Samusi zwo no ambiwa, zwioro zwo ṋekedzwaho nga vhotshifhe vha Vhaisiraele zwi imela thabelo dzi ṱanganedzwaho dza vhashumeli vha fulufhedzeaho vha Mudzimu. Naho zwo ralo, nga zwiṅwe zwifhinga, zwioro zwo ṋekedzwaho nga Vhaisiraele zwo vha zwi tshi nengisa Yehova. Zwenezwo zwo itea musi Vhaisiraele vha tshi khou fhisa zwioro thembeleni fhedzi nga tshifhinga tshi fanaho vha tshi khou gwadamela zwifanyiso. (Hesekiele 8:10, 11) Nga hu fanaho ṋamusi, thabelo dza vhathu vhane vha amba uri vha shumela Yehova fhedzi nga zwiṅwe zwifhinga vha tshi ita zwithu zwi lwisanaho na milayo yawe vha mbo ḓi vha munukho u nengisaho phanḓa hawe. (Mirero 15:8) Ngauralo, kha ri bvele phanḓa ri tshi ita uri masia oṱhe a vhutshilo hashu a dzule o kuna u itela uri thabelo dzashu dzi nge zwioro zwi nukhelelaho kha Mudzimu. Yehova u takalela thabelo dza vhane vha tevhela nḓila dzawe dzo lugaho. (Yohane 9:31) Naho zwo ralo, hu kha ḓi vha na dziṅwe mbudziso. Ri fanela u rabela nga nḓila-ḓe? Ndi mini zwine ra nga zwi rabelela? Nahone Mudzimu u fhindula hani thabelo dzashu? Thero yashu i tevhelaho i ḓo haseledza dzenedzi mbudziso na dziṅwe.
[Ṱhaluso i re magumoni a siaṱari]
a Sedzani Tshiingamo tsha ḽa 15 May, 2001, siaṱari 27.
Ni Nga Ṱalusa?
• Vhathu vha songo fhelelaho vha nga amba hani na Mudzimu nga nḓila ine a i ṱanganedza?
• Kha thabelo dzashu, ri nga edzisa hani vhasimulalushaka?
• Ri guda mini kha thabelo dza Vhakriste vha u thoma?
• Ndi lini hune thabelo dzashu dza nga zwioro zwi nukhelelaho kha Mudzimu?
[Tshifanyiso kha siaṱari 23]
Ndi ngani Mudzimu o ṱanganedza tshiṱhavhelo tsha Abele hu si tsha Kaini?
[Tshifanyiso kha siaṱari 24]
“Ndí buse na milora”
[Tshifanyiso kha siaṱari 25]
“Ndi ḓo mu suma nga tshafumi”
[Tshifanyiso kha siaṱari 26]
Naa thabelo dzaṋu dzi nga zwioro zwi nukhelelaho kha Yehova?