Dzulani No Lindela Ḓuvha Ḽa Yehova
“Na inwi dzulani-ha nó lindela, ngauri Murwa-muthu u ḓo ḓa nga tshikhathi tshiné ni si tshi ḓivhe.”—MATEO 24:44.
1. Ndi ngani ri tshi fanela u livhisa ṱhogomelo kha ḓuvha ḽa Yehova?
ḼI ḒO vha ḓuvha ḽa nndwa na ḽa mbiti, ḽa u tshinya na ḽa u tshinyala, ḽa swiswi na u tshinyadzwa. “Ḓuvha ḽihulu ḽi ofhisaho” ḽa Yehova ḽi ḓo ḓela zwa vhukuma ano maitele mavhi a zwithu, u fana na Maḓi Mahulu o kumba shango ḽivhi ḽa misini ya Noaxe. Ḽi ḓo ḓa zwa vhukuma. Ngauralo, “ane a ḓo rabela dzina ḽa Yehova, u ḓo hanya.” (Yoele 2:30-32; Amosi 5:18-20) Mudzimu u ḓo fhelisa maswina awe nahone a tshidza vhathu vhawe. E na muya wa u ṱavhanyisa zwithu, muporofita Tsefanya o ri: “Ḽi tsini ḽeneḽo ḓuvha ḽihulu ḽa Yehova; ḽi tsini, ḽi khou tou vhilula ḽi tshi ḓa.” (Tsefanya 1:14) Naho zwo ralo, yeneyi khaṱulo ya Mudzimu i ḓo itwa lini?
2, 3. Ndi ngani zwi zwa ndeme uri ri ḓilugisele ḓuvha ḽa Yehova?
2 Yesu o ri: “Ḽone ḓuvha na tshikhathi tshazwo, a huna a zwi ḓivhaho; na kha vharuṅwa vha ṱaḓulu haho’. Zwi ḓihwa nga Khotsi é eṱhe.” (Mateo 24:36) Samusi ri sa ḓivhi tshifhinga tsho livhaho, ndi zwa ndeme uri ri thetshelese maipfi a ndimana yashu ya ṅwaha wa 2004 ane a ri: “Ni dzule no fhaṱuwa . . . Dzulani-ha nó lindela.”—Mateo. 24:42, 44.
3 A tshi sumbedza nḓila ine zwa ḓo ṱavhanyiswa ngayo u tsireledza vhane vha dzula vho lindela musi vhaṅwe vha tshi ḓo laṱwa, Yesu o ri: “Musi uyo vhavhili vha ḓo vha vhe tsimuni; muṅwe a ṱanganedzwa muṅwe a laṱwa. Vhavhili vha ḓo vha vha tshi sinḓa nga mutuli muthihi; muṅwe a ṱanganedzwa muṅwe a laṱwa.” (Mateo 24:40, 41) Nga tshenetsho tshifhinga tshi konḓaho, vhuimo hashu vhu ḓo vha vhufhio? Naa ri ḓo vha ro lindela, kana ḽeneḽo ḓuvha ḽi ḓo ḓa ri songo lavhelela? Zwinzhi zwi ḓitika nga vhukando vhune ra vhu dzhia zwino. U itela u dzula ro lindela ḓuvha ḽa Yehova zwi ṱoḓa uri ri iledze maṅwe mavhonele o ḓoweleaho ṋamusi, ri lwisane na u wela kha honoho vhuimo ha muya, na uri ri iledze eneo matshilele.
Iledzani Mavhonele A U Sa Londa
4. Vhathu vha misini ya Noaxe vho vha vhe na mavhonele afhio?
4 Humbulani misini ya Noaxe. Bivhili i ri: “Ndi nga lutendo Noaxe a tshi laiwa nga Mudzimu, a vhudzwa zwe zwa vha zwi sathu u vhonwa, a renda Mudzimu, a fhaṱa gungwa ḽa u tshidza vha nnḓu yawe.” (Vha-Heberu 11:7) Gungwa ḽo vha ḽi songo ḓowelea nahone ḽi ḽihulwane. Zwiṅwe hafhu, Noaxe o vha e “muhuweleli wa u luga.” (2 Petro 2:5) Mushumo wa Noaxe wa u fhaṱa kana u huwelela hawe a zwo ngo sudzulusela vhathu vha misini yawe uri vha dzhie vhukando. Ndi ngani? Ngauri vho vha “vha tshi ḽa, vha tshi nwa, vha tshi dzea, vha tshi dzewa.” Vhathu vhe Noaxe a huwelela khavho vho vha vho farakanea vhukuma nga mishumo yavho na u ḓitakadza lwe “vha si sedze tshithu ha vhuya ha ḓa maḓi mahulu a vha fhedza.”—Mateo 24:38, 39.
5. Vhadzulapo vha Sodoma vha misini ya Loto vho vha vhe na mavhonele afhio?
5 Zwo vha zwi tshi fana na misini ya Loto. Maṅwalo a ri vhudza uri: “Vho vha vha tshi ḽa, vha tshi nwa, vha tshi renga, vha tshi rengisa, vha tshi zwala, vha tshi fhaṱa. Huno musi Loto a tshi bva muḓini wa Sodoma, ha na mulilo na tsevhela zwi tshi bva ṱaḓulu, zwa vha fhedza vhoṱhe.” (Luka 17:28, 29) Musi vharuṅwa vho no sevha Loto nga ha ndozwo ine ya khou ḓa, o amba na vhakwasha vhawe nga ha zwe zwa vha zwi tshi khou ḓa. Naho zwo ralo, vho ri “u khou ita miswaswo navho’.”—Genesi 19:14.
6. Ndi mavhonele afhio ane ra fanela u a iledza?
6 Samusi zwo vha zwo ralo misini ya Noaxe na Loto, Yesu o ri zwi ḓo ralo “musi Murwa-muthu a tshi vhuya.” (Mateo 24:39; Luka 17:30) I ngoho, mavhonele ane vhathu vhanzhi vha vha nao ṋamusi ndi a u sa londa. Ri fanela u ḓilinda uri ri sa ṱuṱuwedzwe nga eneo mavhonele. A huna tsho khakheaho nga u ḓiphina nga zwiḽiwa zwavhuḓi na u nwa halwa nga nḓila yo linganyiselwaho. Nga hu fanaho, mbingano ndi ndugiselelo ya Mudzimu. Naho zwo ralo, arali zwenezwo zwithu zwa vha zwa ndeme vhukuma vhutshiloni hashu nahone ra dzhiela fhasi madzangalelo a muya, naa zwi ḓo sumbedza uri ro lindela ḓuvha ḽi ofhisaho ḽa Yehova?
7. Ndi mbudziso ifhio ya ndeme ine ra fanela u ḓivhudzisa yone musi ri sa athu dzhia buḓo naho ḽi ḽifhio, nahone ndi ngani?
7 Muapostola Paulo o ri: “Tshifhinga tshi iteaho tsho no kuvhanganela hupfufhi, nga hu vhuye hu ri na vha ré na vhasadzi vha ngé a vha na.” (1 Vha-Korinta 7:29-31) Ro salelwa nga tshifhinganyana tsha u fhedza mushumo washu wa u huwelela Muvhuso we ra ṋewa nga Mudzimu. (Mateo 24:14) Paulo o eletshedza na vhavhingani uri vha si livhise nga maanḓa ṱhogomelo kha vhafarisi vhavho lune madzangalelo a Muvhuso a si tsha vha tshithu tsha ndeme vhukuma vhutshiloni havho. Zwi khagala uri mavhonele e a vha a tshi khou themendelwa nga Paulo o fhambana na a u sa londa. Yesu o ri: “Tsha phanḓa ṱoḓani muvhuso wa Mudzimu na u luga hawe.” (Mateo 6:33) Musi ni tshi ita phetho naho ifhio kana u dzhia buḓo naho ḽi ḽifhio, mbudziso ya ndeme ndi ya uri, ‘Zwenezwi zwi ḓo kwama hani u ṱoḓa hanga madzangalelo a Muvhuso u thoma vhutshiloni hanga?’
8. Arali ro farakanea nga maanḓa nga mishumo ya ḓuvha ḽiṅwe na ḽiṅwe, ri fanela u ita mini?
8 Hu pfi mini arali ra zwi ṱhogomela uri ro no farakanea nga mishumo ya ḓuvha ḽiṅwe na ḽiṅwe ya vhutshilo u swika kha vhuimo vhune madzangalelo a muya a si tsha vha a ndeme? Naa hu na u fhambananyana vhukati ha matshilele ashu na a vhahura vhashu vhane vha si vhe na nḓivho yo teaho ya Maṅwalo na vhane vha si vhe vhahuweleli vha Muvhuso? Arali zwo ralo, ri fanela u rabela nga hazwo. Yehova a nga ri thusa u vha na mavhonele o teaho. (Vha-Roma 15:5; Vha-Filipi 3:15) A nga ri thusa u vhea madzangalelo a Muvhuso u thoma, u ita zwo lugaho, na u ḓadzisa vhuḓifhinduleli hashu khae.—Vha-Roma 12:2; 2 Vha-Korinta 13:7.
Ilwani Na U Kumedza Muyani
9. U ya nga Ndzumbululo 16:14-16, ndi ngani zwi zwa ndeme u lwa na u kumedza muyani?
9 Honoho vhuporofita vhu ambaho nga ha u ḓa ha ‘nndwa ya ḽone ḓuvha ḽihulu ḽa Mudzimu, Mu-vhusa-hoṱhe’ nga Haramagedo vhu sevha uri vhaṅwe vha nga si ḓo fhaṱuwa. Murena Yesu Kristo uri: “Asizwo! ndi ḓa u nga mbava; mashudu! a tshesaho, a londaho nguvho dzawe, á sa ḓo tshimbila é fhedzi, ha vhonala u shona hawe.” (Ndzumbululo 16:14-16) Nguvho yo ambiwaho hafha i ambela kha zwine zwa ri ṱalula samusi ri Vhakriste vha Ṱhanzi dza Yehova. Hezwi zwi katela mushumo washu samusi ri vhahuweleli vha Muvhuso na vhuḓifari hashu ha Vhukriste. Arali ra fhola, ri nga bvulwa luswayo lwashu lwa Vhukriste. Zwenezwo zwi a shonisa nahone zwi nga vha na khombo. Ri fanela u lwa uri ri si wele kha vhuimo ha u kumedza muyani kana ha u bvafha. Ri nga iledza hani yeneyo nḓowelo?
10. Ndi ngani u vhala Bivhili ḓuvha ḽiṅwe na ḽiṅwe zwi tshi ri thusa u dzula ro fhaṱuwa muyani?
10 Bivhili i ombedzela lunzhi-lunzhi ṱhoḓea ya u dzula wo fhaṱuwa na u dzivhuluwa. Sa tsumbo, mafhungo a Evangeli a ri humbudza uri: “Ni dzule nó fhaṱuwa” (Mateo 24:42; 25:13; Marko 13:35, 37); “na inwi dzulani-ha nó lindela” (Mateo 24:44); “lavhelani ni karuwe” (Marko13:33); “dzulani nó ḓi-lugisa” (Luka 12:40). Musi o no amba uri ḓuvha ḽa Yehova ḽi ḓo ḓela ḽino shango ḽi songo lavhelela, muapostola Paulo o ṱuṱuwedza vhatendi ngae a ri: “Ndi zwone-ha ri songo eḓela sa vhaḽa vhaṅwe, aiwa! nga ri fhaṱuwe, ri dzule ró dzivhuluwa.” (1 Vha-Thesalonika 5:6) Kha bugu ya u fhedza ya Bivhili, Kristo Yesu o ṋewaho vhugala u ombedzela u ḓa hawe nga u ṱavhanya, a tshi ri: “Ndi a vhilula u ḓa.” (Ndzumbululo 3:11; 22:7, 12, 20) Vhunzhi ha vhaporofita vha Vhaheberu vho dovha vha ṱalusa na u sevha nga ha ḓuvha ḽihulu ḽa Yehova ḽa khaṱulo. (Yesaya 2:12, 17; Yeremia 30:7; Yoele 2:11; Tsefanya 3:8) U vhala Ipfi ḽa Mudzimu, Bivhili, ḓuvha ḽiṅwe na ḽiṅwe na u elekanya nga zwine ra zwi vhala zwi ḓo ri thusa vhukuma kha u dzula ro fhaṱuwa muyani.
11. Ndi ngani u ḓigudisa Bivhili zwi zwa ndeme kha u fhaṱuwa muyani?
11 Vhukuma, zwi a karusa muyani hashu musi ri tshi guda nga mafulufulu Maṅwalo ri tshi shumisa khandiso dzo thewaho Bivhilini dzo ṋekedzwaho nga “mukoma a fulufhedzeaho na wa vhuṱali.” (Mateo 24:45-47) Naho zwo ralo, u ḓigudisa hu vhuyedza fhedzi arali hu tshi itwa tshifhinga tshoṱhe. (Vha-Heberu 5:14–6:3) Ri fanela u ḽa zwiḽiwa zwo dziaho zwa muya tshifhinga tshoṱhe. Zwi nga konḓa u wana tshifhinga tshazwo musalauno. (Vha-Efesa 5:15, 16) Naho zwo ralo, u vhala Bivhili na khandiso dza Maṅwalo nga zwiṅwe zwifhinga fhedzi a zwo ngo eḓana. U ḓigudisa tshifhinga tshoṱhe ndi zwa ndeme arali ri tshi ṱoḓa u dzula ri ‘sa lwali kha lutendo’ na u dzula ro fhaṱuwa.—Tito 1:13.
12. Miṱangano ya Vhukriste, maguvhangano, na mabuthano zwi ri thusa hani u lwa na u eḓela muyani?
12 Miṱangano ya Vhukriste, maguvhangano, na mabuthano zwi dovha zwa ri thusa u lwa na u eḓela muyani. Nga nḓila-ḓe? Nga ṅwambo wa ndayo ine ra i wana. Kha eneo maguvhangano, naa a ri humbudzwi tshifhinga tshoṱhe nga ha u vha tsini ha ḓuvha ḽa Yehova? Miṱangano ya Vhukriste ya vhege iṅwe na iṅwe i dovha ya ri ṋea zwibuli zwa u ‘ṱuṱuwedzana lufunoni na kha mishumo mivhuya.’ Honoho u ṱuṱuwedzana, hu thusa muthu uri a dzule o fhaṱuwa muyani. Ndi ngazwo ri tshi laedzwa u kuvhangana tshifhinga tshoṱhe samusi ri tshi “zwi vhona zwauri ḓuvha ḽi vho tsha.”—Vha-Heberu 10:24, 25.
13. Vhuḓinḓa ha Vhukriste vhu ri thusa hani u dzula ro fhaṱuwa muyani?
13 Ri dovha ra thuswa u dzula ro fhaṱuwa musi ri tshi ṱanganela nga mbilu yoṱhe vhuḓinḓani ha Vhukriste. Ndi ifhio nḓila ya khwine ya u fhaṱutshela zwiga zwa tshifhinga na zwine zwa amba zwone u fhira u amba na vhaṅwe nga hazwo? Nahone musi ri tshi vhona vhe ra guda navho Bivhili vha tshi bvela phanḓa nahone vha tshi thoma u dzhia vhukando kha zwine vha khou zwi guda, muya washu wa u ṱavhanyisa zwithu u a khwaṱhiswa. Muapostola Petro o ri: “Ḓi-shamuleni dzikhundu dza u ḓi-pfa haṋu ni dzivhuluwe.” (1 Petro 1:13) U “simesa u shuma mushumo wa Mudzimu” ndi dzilafho ḽavhuḓi kha u bvafha nga lwa muya.—1 Vha-Korinta 15:58.
Iledzani Matshilele Ane A nga Ni Tshinya Muyani
14. Samusi zwo ṱaluswa kha Luka 21:34-36, Yesu o sevha nga matshilele afhio?
14 Kha vhuporofita hawe vhuhulwane nga ha tshiga tsha u vha hone hawe, Yesu o ṋea iṅwe tsevho. O ri: “Hone ḓi-thanyeleni, uri dzimbilu dzaṋu dzi sa ḓo lemedzwa nga vhupangwa na nga u nwesa na nga u vhilaelela vhutshilo vhuno, ḓuvha heḽo ḽa vhilula u ni ḓela. Ngauri ḽi ḓo nga tshifu u̗ wela vhoṱhe vho dzulaho kha shango ḽoṱhe. Fhaṱuwani-ha, ni dzule ni tshi rabela, uri ni ḓo kona u ponyoka hezwo zwoṱhe, zwiné zwa ḓo vha hone, ni kone u ima phanḓa ha Murwa-muthu.” (Luka 21:34-36) Yesu o ṱalusa zwavhuḓi matshilele ane vhathu vhanzhi vha a ṱoḓa: u kaludza kha u ḽesa, vhudakwa, na matshilele ane a ḓisa dzimbilaelo.
15. Ndi ngani ri tshi fanela u iledza u kaludza kha u ḽa na u nwesa?
15 U ḽesa na u nwesa a zwi tendelani na maitele a Bivhili nahone zwi fanela u iledzwa. Bivhili i ri: “U songo dzula na vhadzia-u-nwa, vhane vha nyadzisa mivhili yavho.” (Mirero 23:20) Naho zwo ralo, muthu a nga vhea vhumuya hawe khomboni naho a songo swika kha vhuimo ha u ḽesa na u nwesa. Zwi nga ita uri muthu a kumedze muyani na u bvafha musi muthu a sa athu ḓivhona mulandu wa u ḽesa na u nwesa. Murero wa Bivhili uri: “Mbilu ya mubva i tama i si wane; hu fura mbilu ya mushumi.” (Mirero 13:4) Onoyo muthu a nga ṱoḓa u ita zwine Mudzimu a zwi funa, fhedzi lutamo lwawe a lu swikelelei nga ṅwambo wa u litshelela.
16. Ri nga iledza hani u lemedzwa nga mbilaelo dzi tshimbidzanaho na miṱa yashu?
16 Ndi dzifhio mbilaelo dza vhutshilo dze Yesu a sevha nga hadzo? Dzi katela mbilaelo dza muthu nga eṱhe, u ṱhogomela muṱa, na zwithu zwi fanaho na zwenezwo. Zwi ḓo vha vhutsilu lungafhani u tendela zwenezwi zwithu zwi tshi ri lemedza! Yesu o vhudzisa a ri: “Ndi nnyi kha inwi, ané na̗ u vhilaela, tshiimo tshawe a kona u ṱumetshedza tshipiḓa namusi tshi tshithihi?” O ṱuṱuwedza vhatevheli vhawe a ri: “Ni songo vhilaela na ri: Ri ḓo ḽa’ni, ri ḓo nwa’ni, ri ḓo fuka’ni? Hezwo zwoṱhe zwi londiwa nga vha-nnḓa. Ngauri khotsi-aṋu wa ṱaḓulu u a zwi ḓivha zwauri hezwo zwoṱhe ni na mushumo nazwo’.” U vhea madzangalelo a Muvhuso u thoma vhutshiloni hashu na u vha na fulufhelo ḽa uri Yehova u ḓo ri ṱhogomela zwi ḓo langa mbilaelo na u ri thusa u dzula ro fhaṱuwa.—Mateo 6:25-34.
17. U ṱoḓesa zwithu zwi vhonalaho zwi nga ḓisa mbilaelo nga nḓila-ḓe?
17 Mbilaelo dzi nga dovha dza ḓiswa nga u ṱoḓesa zwithu zwi vhonalaho. Sa tsumbo, vhaṅwe vho ita uri vhutshilo havho vhu vhe vhu konḓaho nga u ṱoḓa zwithu zwine vha si kone u zwi swikelela. Vhaṅwe vho kungwa nga maitele a u pfuma nga u ṱavhanya nahone vha xelelwa nga tshelede yavho. Kha vhaṅwe, u ṱoḓa pfunzo ya shango sa yone nḓila ya u bvelela kha zwa dzitshelede zwo mbo ḓi vha tshikwekwe. Vhukuma, u dzhena tshikolo u swika kha vhuṅwe vhuimo zwi nga vhuyedza u itela u wana mushumo. Naho zwo ralo, ngoho ndi ya uri vhaṅwe vho tshinya vhumuya havho nga u fhedza tshifhinga vha tshi khou ṱoḓa pfunzo ya nṱha. Zwi na khombo lungafhani u vha zwiimoni zwo raloho musi ḓuvha ḽi tshi khou sendela! Bivhili i a sevha: “Vha lilaho u pfuma vha wela milingoni na mireoni, vha dzhenwa nga dzinyemulo nzhi dza vhutsilu dzi tshinyaho, dziné dza bwandamedza vhathu kha u tshinyala na u lovha.”—1 Timotheo 6:9.
18. U itela u iledza matshilele a u ṱoḓesa zwithu zwi vhonalaho, ndi vhukoni vhufhio vhune ra fanela u vhu ṱahulela?
18 Tshithu tsha ndeme tshine tsha nga ri thusa uri ri sa ṱoḓese zwithu zwi vhonalaho ndi u ṱahulela vhukoni ha u ṱalukanya zwo lugaho na zwi songo lugaho musi ri tshi ita dziphetho. Honovhu vhukoni vhu bveledzwa nga u ḽa ‘zwiḽiwa zwo dziaho zwa vho vuledzaho’ zwifhinga zwoṱhe na u ‘ḓowedza ṱhalukanyo dzashu.’ (Vha-Heberu 5:13, 14) Nga u nanganya “zwithu zwa ndeme” musi ri tshi ḓivhetshela zwipikwa ri ḓo dovha ra ḓilinda kha u ita khetho dzo khakheaho.—Vha-Filipi 1:10, vhambedzani NW.
19. Arali ra zwi ṱhogomela uri ri na tshifhinganyana tsha u ṱoḓa zwithu zwa muya, ri fanela u ita mini?
19 U ṱoḓesa zwithu zwi vhonalaho zwi nga ri swingisa, zwa ita uri ri vhe na tshifhinga tshiṱuku kana u sa vha na tshifhinga tsha u ṱoḓa zwithu zwa muya. Ri nga ḓiṱolisisa hani nahone ra iledza u fashwa nga eneo matshilele? Ri fanela u zwi humbula nga thabelo uri ri nga leludza hani vhutshilo hashu nahone u swika kha vhuimo vhufhio. Khosi Salomo wa Isiraele ḽa kale o ri: “Hu ḓifha khofhe dza mushumi we a ḽa zwiṱuku, naho ó ḽa zwinzhi. Mupfumi u kundiswa u eḓela nga u fura.” (Muhuweleli 5:11) Naa u ṱhogomela thundu dzi vhonalaho dzi si dza ndeme zwi ḽa tshifhinga na nungo dzashu? Musi dzenedzo thundu dzi tshi engedzea, u dzi ṱhogomela, u badela ndindakhombo, na u dzi tsireledza zwi a engedzea. Naa zwi nga ri vhuyedza u leludza vhutshilo hashu nga u fhungudza dziṅwe thundu?
Itani Nga Nḓila Dzoṱhe Uri Ni Dzule No Lindela
20, 21. (a) Muapostola Petro u ṋea khwaṱhisedzo ifhio malugana na ḓuvha ḽa Yehova? (b) Ndi matshimbilele na mishumo ifhio zwine ra fanela u zwi ita musi ro lindela ḓuvha ḽa Yehova?
20 Shango ḽa misini ya Noaxe ḽo swika he ḽa fhela, nahone na ano maitele a zwithu a ḓo swika hune a fhela. Muapostola Petro o ri khwaṱhisedza uri: “Ḓuvha ḽa Murena hone ḽi ḓo ḓa sa mbava. Ndi hone maṱaḓulu a tshi ḓo pwashekana hu tshi pfala mibvumo, dzithikho dza litshana nga u swa, ḽifhasi na mishumo i re khaḽo’ zwa fhiswa tshoṱhe.” Maṱaḓulu a pfanyisedzo—mivhuso mivhi—kana ḽifhasi ḽa pfanyisedzo—vhathu vho ḓifhambanyaho na Mudzimu—zwi nga si ḓo ponyoka mbiti dza Mudzimu dzi dugaho. A tshi sumbedza nḓila ine ra fanela u dzula ro lindela ngayo ḽeneḽo ḓuvha, Petro o ri: “Zwino huufha hezwo zwoṱhe zwi tshi litshana, tshaṋu ndi u vha vhanzani kha matshimbilele makhethwa na kha u ofha Mudzimu? Tshaṋu ndi u dzula nó lindela u ḓa ha ḓuvha ḽa Murena, ni tshi rumeledza uri ḽi ṱavhanye.”—2 Petro 3:10-12.
21 U ya hashu miṱanganoni ya Vhukriste tshifhinga tshoṱhe na u ṱanganela kha u huwelela mafhungo maḓifha zwo katelwa kha matshimbilele na kha u ofha Mudzimu. U nga ri ri nga zwi itela Mudzimu zwi tshi bva mbiluni musi ro lindela ri sa fheli mbilu ḓuvha ḽihulu ḽa Yehova. Kha ri ‘fungelele uri [Mudzimu] a ri wane ri si na tshika, ri sa solei, ri na mulalo.’—2 Petro 3:14.
Ni A Zwi Elelwa?
• Ndi ngani ri tshi fanela u dzula ro lindela ḓuvha ḽa Yehova?
• Arali ro farakanea vhukuma nga zwithu zwi vhonalaho zwo ḓoweleaho zwa vhutshilo, ri fanela u ita mini?
• Ndi mini zwine zwa ḓo ri thusa u lwa na u kumedza muyani?
• Ndi matshilele afhio a tshinyadzaho ane ra fanela u a iledza, nahone hani?
[Zwifanyiso kha siaṱari 20, 21]
Vhathu vha misini ya Noaxe a vho ngo dzhiela nṱha khaṱulo ine ya khou ḓa—naa ni a i dzhiela nṱha?
[Tshifanyiso kha siaṱari 23]
Naa ni nga leludza vhutshilo haṋu u itela u vha na tshifhinga tsho engedzeaho tsha zwithu zwa muya?