Naa No Lindela Ḓuvha ḽa Yehova?
“Ḽi tsini ḽeneḽo ḓuvha ḽihulu ḽa Yehova; ḽi tsini, ḽi khou tou vhilula ḽi tshi ḓa.”—TSEFANYA 1:14.
1-3. (a) Ndi mini zwine Bivhili ya zwi amba nga ha ḓuvha ḽa Yehova? (b) Ro sedzana na ‘ḓuvha ḽifhio ḽa Yehova’?
ḒUVHA ḽihulu ḽa Yehova a si vhulapfu vhu linganaho na awara dza 24. Ndi tshifhinga tshilapfu tshine Mudzimu a ḓo haṱula ngatsho vhavhi. Vhane vha sa ofhe Mudzimu vha na tshiitisi tsha u ofha ḽeneḽo ḓuvha ḽihulu ḽa swiswi, ḽa dzimbiti, ḽi dugaho vhuhali, ḽa u tshinyadza, na ḽa u lozwa. (Yesaya 13:9; Amosi 5:18-20; Tsefanya 1:15) Muporofita Yoele o amba uri: “Yowee, ḓuvha ḽa ṋamusi! Ḽo swika ḓuvha ḽa Yehova; ḽi ḓa ḽi ḽa phusuphusu i bvaho ha Ene Wa-Ṱaḓulu.” (Yoele 1:15) Naho zwo ralo, nga ḽeneḽo ḓuvha ḽihulu, Mudzimu u ḓo vha Mutshidzi wa vha “dzimbilu dzo lugaho.”—Psalme ya 7:10.
2 Mubulo une wa ri “ḓuvha . . ḽa Yehova” u ambela kha u ḓisa ha Mudzimu khaṱulo nga zwifhinga zwo fhamba-fhambanaho. Sa tsumbo, “ḓuvha . . ḽa Yehova” ḽo ḓa musi Vhababele vha tshi fhelisa Yerusalema nga 607 B.C.E. (Tsefanya 1:4-7) Nga hu fanaho, Mudzimu o ḓisa khaṱulo nga 70 C.E. musi a tshi shumisa Vharoma u itela u fhelisa lushaka lwa Vhayuda lwe lwa landula Murwa wawe. (Daniele 9:24-27; Yohane 19:15) Bivhili yo dovha ya dzula yo amba nga ha “ḓuvha . . ḽa Yehova” musi a tshi ḓo ‘lwa na tshaka dzoṱhe.’ (Sakaria 14:1-3) Muapostola Paulo o hevhedzwaho o ṱumanya ḽeneḽo ḓuvha na u vha hone ha Kristo, ḽe ḽa thoma musi Yesu a tshi vhewa khuluṋoni sa Khosi ya ṱaḓulu nga 1914. (2 Vha-Thesalonika 2:1, 2) Samusi hu na vhuṱanzi vhune ha sumbedza uri ḓuvha ḽa Yehova ḽi khou ḓa nga u ṱavhanya, ndimana ya ṅwaha ya Ṱhanzi dza Yehova ya 2007 yo tea vhukuma. Yo bviswa kha Tsefanya 1:14, ine ya ri: “Ḽi tsini ḽeneḽo ḓuvha ḽihulu ḽa Yehova.”
3 Samusi ḓuvha ḽihulu ḽa Mudzimu ḽi tsini, zwino ndi tshifhinga tsha uri ni dzule no ḓilugisa. Ni nga ḓilugiselela hani ḽeneḽo ḓuvha? Naa hu na zwiṅwe zwo engedzeaho zwine na zwi ṱoḓa u itela u ḓilugiselela ḽeneḽo ḓuvha ḽa Yehova?
Dzulani No Lindela
4. Ndi mulingo ufhio muhulwane we Yesu a ḓilugiselela wone?
4 Kha vhuporofita hawe malugana na vhufhelo ha maitele a zwithu, Yesu Kristo o vhudza vhafunziwa vhawe uri: “dzulani-ha nó lindela.” (Mateo 24:44) Musi Yesu a tshi amba eneo mafhungo, ene muṋe o vha o lindela mulingo muhulwane—wa u fa sa tshiṱhavhelo tshi rengululaho. (Mateo 20:28) Ndi mini zwine ra nga zwi guda kha nḓila ye Yesu a vha o ḓilugiselela ngayo?
5, 6. (a) U funa hashu Mudzimu na vhathu zwi ri thusa hani kha u dzula ro ḓilugiselela ḓuvha ḽa Yehova? (b) Malugana na u funa vhahura vhashu, ndi tsumbo ifhio ye Yesu a ri vhetshela yone?
5 Yesu o vha a tshi funa Yehova nga mbilu yawe yoṱhe na zwilinganyo zwawe zwo lugaho. Musi Vha-Heberu 1:9, i tshi ambela kha Yesu i ri: “U ḓo funa u luga, wa vhénga zwi tshinyaho mulayo. Ndi zwone zwe Mudzimu, ene Mudzimu wau, a U ḓolisa mapfura a mifhululu, wa fhira vhahura vhau.” Ngauri o vha a tshi funa Khotsi awe wa ṱaḓulu, Yesu o dzula a tshi fulufhedzea khae. Arali ri tshi funa Mudzimu nga nḓila i fanaho na u tshila u tendelana na zwine a zwi ṱoḓa, u ḓo ri tsireledza. (Psalme ya 31:23) Lufuno lwo raloho na u thetshelesa, zwi ḓo ri thusa uri ri dzule ro lindela ḓuvha ḽihulu ḽa Yehova.
6 U funa vhathu ho vha hu mbonalo i swayeaho ya vhumuthu ha Yesu. Vhukuma, o vha “khathutshela mbilu, ngauri vho vha vhó neta vhó balangana sa nngu dzi sí na mulisa.” (Mateo 9:36) Nga ṅwambo lwonolo lufuno Yesu o funza mafhungo maḓifha kha vhathu, samusi na riṋe ri tshi ṱuṱuwedzwa nga lufuno uri ri ḓivhadze mulaedza wa Muvhuso kha vhahura vhashu. U funa hashu Mudzimu na vhahura vhashu zwi ita uri ri dzule ri vhaḓinḓa vha Vhakriste vha fhiseaho nahone zwi ri thusa uri ri ḓilugiselele ḓuvha ḽihulu ḽa Yehova.—Mateo 22:37-39.
7. Musi ro lindela ḓuvha ḽa Yehova, ndi ngani ri tshi fanela u takala?
7 Yesu o vha a tshi takalela u ita zwine Yehova a zwi funa. (Psalme ya 40:8) Arali ri na mavhonele a fanaho, ri ḓo wana dakalo musi ri tshi ṋekedza Mudzimu tshumelo khethwa. U fana na Yesu, ri ḓo vha na mafunda, nahone zwenezwi zwi ḓo ri ita uri ri takale vhukuma. (Mishumo 20:35) Vhukuma, “u takala ha Yehova ndi one maanḓa [ashu].” Nga honoho u takala ri ḓo kona u ḓilugiselela ḓuvha ḽihulu ḽa Yehova.—Nehemia 8:10, vhambedzani NW.
8. Ndi ngani ri tshi fanela u sendela tsini na Yehova nga thabelo?
8 U rabela Mudzimu zwi tshi bva mbiluni zwo thusa Yesu u ḓilugiselela milingo ya lutendo. O vha a tshi khou rabela musi Yohane a tshi khou mu lovhedza. Yesu o rabela vhusiku hoṱhe musi a sa athu khetha vhaapostola vhawe. (Luka 6:12-16) Naa u hone muthu ane a vhala Bivhili ane a nga si kwamee nga thabelo dze Yesu a dzi ita dzi tshi bva mbiluni vhusikuni hawe ha u fhedza e kha ḽifhasi? (Marko 14:32-42; Yohane 17:1-26) Naa ni muthu ane a rabela tshifhinga tshoṱhe u fana na zwe Yesu a vha a tshi zwi ita? Ambani na Yehova tshifhinga tshoṱhe, ni fhedze tshifhinga ni tshi khou rabela, ni ṱoḓe vhulivhisi ha muya mukhethwa, nahone ni ṱavhanye u shumisa honoho vhulivhisi musi ni tshi vhu wana. Vhushaka ho khwaṱhaho na Khotsi ashu wa ṱaḓulu ndi ha ndeme kha tshifhinga tshino tshi lemelaho musi ḓuvha ḽihulu ḽa Mudzimu ḽi tshi khou sendela nga u ṱavhanya. Nga zwenezwo, ri songo vhuya ra timatima u sendela tsini na Yehova nga thabelo.—Yakobo 4:8.
9. Ndi zwa ndeme lungafhani u vha na dzangalelo kha u khethwa ha dzina ḽa Yehova?
9 U vha na dzangalelo kha u khethwa ha dzina ḽikhethwa ḽa Yehova na zwone zwo thusa Yesu uri a ḓilugiselele milingo ye a vha o sedzana nayo. O funza vhatevheli vhawe uri musi vha tshi rabela Mudzimu vha fanela u katela na khumbelo ine ya ri: “Dzina ḽau ḽi khethwe.” (Mateo 6:9) Arali na ngoho ri tshi ṱoḓa uri dzina ḽa Yehova ḽi khethwe, kana ḽi dzhiiwe ḽi ḽikhethwa, ri ḓo lwela u iledza u ita naho tshi tshini tshine tsha ḓo ḽi nyadzisa. Nga zwenezwo, ri ḓo vha ro ḓilugiselela zwavhuḓi ḓuvha ḽihulu ḽa Yehova.
Naa Ni Fanela u Ita Dziṅwe Tshanduko?
10. Ndi ngani zwo tea uri ri ṱolisise vhutshilo hashu?
10 Arali ḓuvha ḽa Yehova ḽa nga ḓa matshelo, naa ni ḓo vha no lindela na ngoho? Zwi ḓo vha zwavhuḓi uri muṅwe na muṅwe washu a ṱolisise vhutshilo hawe u itela u vhona arali nyito kana mavhonele awe a tshi ṱoḓa uri a shandulwe. U humbula uri vhutshilo ha vhathu ndi vhupfufhi, muṅwe na muṅwe washu u fanela u fhaṱuwa muyani ḓuvha ḽiṅwe na ḽiṅwe. (Muhuweleli 9:11, 12; Yakobo 4:13-15) Nga zwenezwo, kha ri haseledze maṅwe masia ane a nga ṱoḓa uri ri livhise ṱhogomelo khao vhutshiloni hashu.
11. No ḓi vhetshela tshipikwa tshifhio tsha u vhala Bivhili?
11 Ḽiṅwe sia ḽa ndeme ndi nyeletshedzo ya “mukoma a fulufhedzeaho” ya u vhala Bivhili ḓuvha ḽiṅwe na ḽiṅwe. (Mateo 24:45) Ni nga kha ḓi zwi ita tshipikwa tshaṋu u vhala Maṅwalo a Bivhili u bva kha Genesi u swika kha Ndzumbululo na u ḓiṋea tshifhinga tsha u elekanya nga zwine na khou zwi vhala ṅwaha muṅwe na muṅwe. Nga u vhala ndima nṋa nga ḓuvha, ni nga vhala ndima dza 1 189 dza Bivhili nga ṅwaha. Khosi iṅwe na iṅwe ya Isiraele yo vha i tshi fanela u vhala Mulayo “misi yoṱhe ya vhutshilo ha[yo].” Zwi tou vha khagala uri Yoshua o ita zwi fanaho. (Doiteronomio 17:14-20; Yoshua 1:7, 8) Ndi zwa ndeme lungafhani uri vhalisa vha muya vha vhale Ipfi ḽa Mudzimu ḓuvha ḽiṅwe na ḽiṅwe, ngauri zwenezwo zwi ḓo vha thusa u funza “pfunzo i sá lwaliho.”—Tito 2:1.
12. U vha tsini vhukuma ha ḓuvha ḽa Yehova zwi fanela u ni sudzulusela u ita mini?
12 U vha tsini vhukuma ha ḓuvha ḽa Yehova zwi fanela u ni sudzulusela u ya miṱanganoni ya Vhukriste tshifhinga tshoṱhe na u ṱanganela khayo nga vhuḓalo nga hune zwa nga konadzea ngaho. (Vha-Heberu 10:24, 25) U ita nga u ralo, zwi ḓo ni thusa u khwinisa vhutsila haṋu sa muhuweleli wa Muvhuso ane a ṱoḓa u wana na u thusa vhane vha fanelwa nga vhutshilo vhu sa fheli. (Mishumo 13:48) Khamusi ni nga kha ḓi ṱanganela nga ho engedzeaho tshivhidzoni nga dziṅwe nḓila-vho dzi ngaho u thusa vhalala na u ṱuṱuwedza vhaswa. Honoho vhuḓidini vhu ḓo ita uri ni fushee vhukuma.
Vhushaka Haṋu na Vhaṅwe
13. Ndi mbudziso dzifhio dzine ra nga kha ḓi ḓivhudzisa dzone nga ha u ambara vhumuthu vhuswa?
13 Samusi ḓuvha ḽa Yehova ḽi tsini, naa ni a ṱoḓa u ita vhuḓidini vhuhulwane ha u ambara “muthu muswa, we a ri a tshi vhumbiwa ha vha u tevhedza Mudzimu, a vhumbwa ó luga, e mukhethwa, zwi tshi bva kha mafhungo-ngoho”? (Vha-Efesa 4:20-24) Musi ni tshi ṱahulela pfaneleo dza Mudzimu, zwi tou vha khagala uri vhaṅwe vha ḓo ṱhogomela uri ni khou ‘tshimbila nga muya wa Mudzimu’ na u sumbedza zwiaṋwiwa zwawo. (Vha-Galata 5:16, 22-25) Naa ni nga kona u sumba zwiṅwe zwithu zwine zwa sumbedza uri inwi na vha muṱa wa haṋu no ambara vhumuthu vhuswa? (Vha-Kolosa 3:9, 10) Sa tsumbo, naa ni ḓivhelwa u itela zwivhuya vhatendi nga inwi na vhaṅwe? (Vha-Galata 6:10) U vhala Maṅwalo tshifhinga tshoṱhe zwi ḓo ni thusa u ṱahulela pfaneleo dzi fanaho na dza Mudzimu dzine dza ḓo ni lugiselela ḓuvha ḽa Yehova.
14. Ndi ngani muthu a tshi fanela u rabelela muya mukhethwa musi a tshi khou ṱahulela u ḓifara?
14 Hu pfi mini arali ni muthu ane a sa lenge u sinyuwa nahone na zwi ṱhogomela uri ni ṱoḓa u ḓifara nga ho engedzeaho? Yeneyo pfaneleo ndi tshipiḓa tsha zwiaṋwiwa zwine muya mukhethwa wa Mudzimu wa zwi bveledza kha inwi. Ngauralo, rabelelani muya mukhethwa u tendelana na maipfi a Yesu ane a ri: “Humbelani, ndi hone ni tshi ḓo fhiwa; ṱoḓani, ndi hone ni tshi ḓo wana; omba-ombani, ndi hone ni tshi ḓo vulelwa. . . . Huufha inwi ni re vhavhi, ni tshi ḓivha u ṋea vhana vhaṋu zwifhiwa zwavhuḓi! Khotsi wa ṱaḓulu u ni fhira kule-kule. Vha mu humbelaho u ḓo vha fha Muya-mukhethwa.”—Luka 11:9-13.
15. Ndi mini zwine na fanela u zwi ita arali hu si na vhukonani havhuḓi vhukati haṋu na mutendi nga inwi?
15 Kha ri zwi dzhie u nga a hu na vhukonani havhuḓi vhukati haṋu na muṅwe mutendi nga inwi. Kha vhuimo ho raloho, ni fanela u ita vhuḓidini ho engedzeaho u itela u pfumedzana uri hu vhe na mulalo na vhuthihi tshivhidzoni. (Psalme ya 133:1-3) Shumisani nyeletshedzo ya Yesu samusi yo ṅwaliwa kha Mateo 5:23, 24; kana Mateo 18:15-17. Arali no vha ni tshi khou tenda ḓuvha ḽi tshi kovhela ni tshee no sinyuwa, ni fanela u lugisa eneo mafhungo nga u ṱavhanya. Kanzhi zwine zwa ṱoḓea fhedzi ndi u ḓiimisela u hangwela. Paulo o ṅwala uri: “Nga hu vhe u itelana vhuhwavho, na vhulenda na u khathutshelana, vhunga na Mudzimu ó ni khathutshela kha Kristo.”—Vha-Efesa 4:25, 26, 32.
16. Ndi nga nḓila dzifhio hune u pfelana vhuṱungu zwa ṱoḓea mbinganoni?
16 Vhushaka ha mbingano vhu ṱoḓa uri vhavhingani vha pfelane vhuṱungu na u hangwelana nga zwiṅwe zwifhinga. Arali ni tshi ṱoḓa u sumbedza lufuno na u pfela vhuṱungu mufarisi waṋu wa mbingano nga ho engedzeaho, itani vhuḓidini u itela u swikelela tshenetshi tshipikwa ni tshi khou thuswa nga Mudzimu na Ipfi ḽawe. Naa hu na zwiṅwe zwine zwa ṱoḓea kha inwi uri ni tendelane na 1 Vha-Korinta 7:1-5, u itela u fhungudza mutsiko na u iledza u sa fulufhedzea? Vhukuma ḽeneḽi ndi sia ḽa vhutshilo ḽine ḽa ṱoḓa uri munna na musadzi vha sumbedze “u khathutshelana.”
17. Ndi vhukando vhufhio vhune ha fanela u dzhiiwa arali muthu o ita tshivhi tshihulwane?
17 Hu pfi mini arali no ita tshivhi tshihulwane nga nḓila yo kalulaho? Dzhiani vhukando nga u ṱavhanya u itela u khakhulula tshenetsho tshivhi. Ṱoḓani thuso kha vhahulwane vha Vhakriste nga hune zwa konadzea ngaho. Thabelo dzavho na ndayo zwi ḓo ni thusa uri ni vusuluse mutakalo wavhuḓi wa muya. (Yakobo 5:13-16) Rabelani kha Yehova ni na mavhonele a u rembuluwa. U kundelwa u ita nga u ralo zwi ḓo ni sia ni tshi khou ḓipfa ni na mulandu na u dinwa nga luvalo. Davida o tshenzhela zwenezwo, fhedzi o ḓipfa o vhofholowa lungafhani musi a tshi bula tshivhi tshawe kha Yehova! Davida o ṅwala uri: “Wa mashudu ndi uyo we a hangwelwa zwivhi, we vhutshinyi hawe ha fukedzwa. Wa mashudu ndi muthu uyo ané Yehova a si mu vhalele mulandu, ané muyani wawe hu si vhe na tshiné a dzumba.” (Psalme ya 32:1-5) Yehova u hangwela vhane vha ita tshivhi, fhedzi vha rembuluwa zwi tshi bva mbiluni.—Psalme ya 103:8-14; Mirero 28:13.
Dzulani Ni Si Tshipiḓa Tsha Shango
18. Ni fanela u dzhia hani shango?
18 A zwi timatimisi uri no lavhelela nga maṱo matswuku u vhona shango ḽiswa ḽavhuḓi ḽo fulufhedziswaho nga Khotsi ashu wa ṱaḓulu. Ngauralo, ni dzhia hani vhathu vha songo lugaho vha shango vha re kule na Mudzimu? Sathane “muvhusi wa shango” ha ngo kona u langa Yesu Kristo na luthihi. (Yohane 12:31; 14:30) Vhukuma, na inwi a ni ṱoḓi Diabolo na shango ḽawe zwi tshi ni langa, nga zwenezwo thetshelesani maipfi a muapostola Yohane ane a ri: “Ni songo funa shango na zwi re shangoni.” Ḽeneḽo ndi buḓo ḽa vhuṱali ngauri “shango ḽi a lovha na nyemulo dzaḽo, huno ane a ita zwiné Khotsi a zwi funa u ḓi dzula e hone na lini na lini.”—1 Yohane 2:15-17.
19. Vhaswa vha Vhakriste vha ṱuṱuwedzwa uri vha vhe na zwipikwa zwa mufuda-ḓe?
19 Naa ni khou thusa vhana vhaṋu ‘uri vha ḓilinde uri vha sa shatiwe tshika nga shango’? (Yakobo 1:27) Sathane u ḓo takalela u fasha vhana vhaṋu u fana na musi muthu a tshi fasha khovhe. Kilabu dzo fhamba-fhambanaho na maṅwe madzangano zwo itelwa uri vhaswa vha ḓipfe vha tshi fanelea shangoni ḽa Sathane. Fhedzi vhashumeli vha Yehova vho no ḓi vha kha ndangulo ine ya ḓo ponyoka vhufhelo ha ano maitele mavhi a zwithu. Ngauralo, vhaswa vha Vhakriste vha fanela u ṱuṱuwedzwa uri vha “simese u shuma mushumo wa Mudzimu.” (1 Vha-Korinta 15:58) Vhabebi vha ofhaho Mudzimu vha fanela u thusa vhana vhavho u vhea zwipikwa zwine zwa ḓo vha ita uri vha takale na u vha na vhutshilo vhu fushaho vhune ha hulisa Mudzimu na u vha thusa uri vha dzule vho lindela ḓuvha ḽa Yehova.
Sedzani Zwine zwa ḓo Itea nga Murahu ha Ḓuvha Ḽihulu ḽa Yehova
20. Ndi ngani ri tshi fanela u dzula ro lavhelela vhutshilo vhu sa fheli?
20 Ni ḓo kona u lindela ḓuvha ḽa Yehova no dzika arali ni tshi dzula no lavhelela vhutshilo vhu sa fheli. (Yuda 20, 21) No sedza phanḓa kha vhutshilo vhu sa fheli paradisoni, nahone ni na fulufhelo ḽa u vha na maanḓa a vhuswa na tshifhinga tshi sa fheli tsha u tovhola zwipikwa zwi vhuyedzaho na u guda zwo engedzeaho nga ha Yehova. Zwi re zwone ndi uri ni ḓo kona u bvela phanḓa ni tshi guda nga ha Mudzimu nga hu sa fheli ngauri vhathu vha ḓo vha vha tshi khou ḓivha “hune dzinḓila dzawe dza yo guma hone.” (Yobo 26:14) Ndi zwilavhelelwa zwi takadzaho lungafhani zwenezwo!
21, 22. Ndi zwifhio zwine inwi na vho vuswaho na ḓo vhudzana zwone?
21 Paradisoni, vho vuswaho vha ḓo kona uri vhudza mafhungo ane ra sa a ḓivhe o iteaho tshifhingani tsho fhiraho. Henoxe u ḓo vha e hone a tshi khou ṱalutshedza uri o kona hani u vha na tshivhindi tsha u ḓivhadza mulaedza wa Yehova kha vhathu vha sa ofhi Mudzimu. (Yuda 14, 15) Noaxe na ene u ḓo kona uri anetshela uri u fhaṱa gungwa zwo vha zwi hani. Abrahamu na Sara vhone vha ḓo kona uri vhudza nḓila ye vha ḓipfa ngayo musi vha tshi ṱutshela madzanga a Uri nahone vha yo dzula madenndeni. Humbulani nga ha Esitere a tshi khou ri vhudza nga ha nḓila ye a imelela ngayo vhathu vha hawe na u kanganyisa tshimbevha tshee Hamani a vha o vha itela tshone. (Esitere 7:1-6) Edzani u humbula nga ha Yona musi a tshi khou ri vhudza nga ha u vha thumbuni ya khovhe khulu lwa maḓuvha mararu kana Yohane Mulovhedzi a tshi khou amba nga ha nḓila ye a ḓipfa ngayo musi a tshi lovhedza Yesu. (Luka 3:21, 22; 7:28) Ndi zwithu zwi takadzaho lungafhani zwine ra ḓo zwi guda!
22 Tshifhingani tsha Vhuvhusi ha Kristo ha Miṅwaha ya Tshigidi, ni nga kha ḓi vha na ndugelo ya u thusa vho vuswaho u “ḓivha Mudzimu.” (Mirero 2:1-6) Ṋamusi, zwi takadza lungafhani u vhona vhathu vha tshi khou wana nḓivho ya Yehova Mudzimu na u i shumisa! Fhedzi edzanu humbula nga ha dakalo ḽaṋu nga tshenetsho tshifhinga tshi ḓaho musi Yehova a tshi fhaṱutshedza vhuḓidini haṋu ha u funza vhathu vhe vha tshila tshifhingani tsha kale na musi vha tshi aravha nga mbilu dzi sumbedzaho ndivhuho!
23. Ndi mini zwine ra fanela u ḓiimisela u zwi ita?
23 Mbuyelo dzine ra ḓiphina ngadzo zwino sa vhathu vha Yehova ndi nnzhi lune ra nga kundwa u dzi vhala samusi ri songo fhelela. (Psalme ya 40:5) Ri livhuha vhukuma ndugiselelo dza Mudzimu dza muya. (Yesaya 48:17, 18) Hu sa londwi zwiimo zwashu, kha ri ite tshumelo khethwa nga mbilu yoṱhe samusi ro lindela ḓuvha ḽihulu ḽa Yehova.
Ni ḓo Aravha Hani?
• “Ḓuvha ḽa Yehova” ndi mini?
• Ni ḓo sumbedza hani uri no lindela ḓuvha ḽa Yehova?
• Samusi ḓuvha ḽihulu ḽa Mudzimu ḽi tsini vhukuma, ndi tshanduko dzifhio dzine ra nga kha ḓi fanela u dzi ita?
• Ndi mini zwe na zwi lavhelela musi ḓuvha ḽa Yehova ḽo no fhira?
[Tshifanyiso]
Yesu o vha o ḓilugiselela milingo
[Tshifanyiso]
I ḓo vha ndugelo yavhuḓi lungafhani u thusa vho vuswaho u ḓivha Yehova!