Tovholani ‘Vhukhethwa Nga U Ofha Mudzimu’

VHUKHETHWA ndi pfaneleo khulwane ya Yehova Mudzimu, Bivhili i ri: “Mukhethwa, Mukhethwa, Mukhethwa ndi Yehova.” (Yes. 6:3; Ndzumb. 4:8) Maipfi a Tshiheberu na a Tshigerika ane a amba “vhukhethwa” a na muhumbulo wa u kuna nga lwa vhurereli, u sa tshikafhadzwa nga tshithu. Vhukhethwa ha Mudzimu vhu ambela kha vhuḓifari havhuḓi vhune a vhu dzhia vhu ha ndeme.

Naa Mudzimu mukhethwa, Yehova, ha lavheleli vhane vha mu gwadamela uri vha vhe vhakhethwa, zwine zwa amba u kuna ṋamani na nga lwa vhuḓifari na muyani? Nga nḓila i pfalaho, Bivhili i sumbedza uri Yehova u ṱoḓa vhathu vhawe vha tshi vha vhakhethwa. Kha 1 Petro 1:16 ri vhala uri: “Ivhani vhakhethwa, ngauri nṋe ndi mukhethwa!” Naa vhathu vha songo fhelelaho vha nga edzisa zwa vhukuma vhukhethwa ha Yehova? Ee, naho vha tshi nga kha ḓi sa zwi ita kokotolo. Ri nga dzhiiwa ri vhakhethwa phanḓa ha Mudzimu arali ri tshi mu gwadamela nga maitele o kunaho a muya na u vha na vhushaka ha tsini-tsini nae.

Ngauralo-ha, ri nga dzula hani ro kuna shangoni ḽi songo kunaho ḽine ḽa ḓifara luvhi? Ndi zwithu zwifhio zwine ra fanela u zwi iledza? Ndi tshanduko dzifhio dza maambele na vhuḓifari dzine ra fanela u dzi ita? Kha ri vhone zwine ra nga zwi guda malugana na zwenezwi u bva kha zwe Mudzimu a vha a tshi zwi ṱoḓa kha Vhayuda musi vha tshi bva Babele vha tshi ya shangohaya ḽavho nga 537 B.C.E.

‘Hu Ḓo Vha Na Gondo Ḽa Nḓila Khethwa’

Yehova o dzula o amba uri vhathu vhawe vhe vha vha vhe vhuthubwani Babele vho vha vha tshi ḓo vhuyelela shangohaya ḽavho. Vhuporofita ha u vhuyedzedzwa hu na heyi khwaṱhisedzo: “Hu ḓo vha na gondo ḽo aṱamaho, nḓila ine ya ḓo pfi nḓila khethwa.” (Yes. 35:8a) Enea maipfi a sumbedza uri Yehova ha ngo sokou vulela Vhayuda nḓila ya u ya hayani fhedzi, fhedzi o dovha a vha khwaṱhisedza uri u ḓo vha tsireledza musi vho fara lwonolwo lwendo.

Kha vhashumeli vhawe vha musalauno vha re kha ḽifhasi, Yehova o vha vulela “nḓila khethwa” i vha bvisaho Babele Ḽihulu, vhurereli ha mazwifhi ha shango ḽoṱhe. Nga 1919 o vhofholola Vhakriste vho ḓodzwaho vhupulini ha vhurereli ha mazwifhi, nahone vho bvela phanḓa vha tshi kunakisa vhurabeli havho kha pfunzo dzoṱhe dza mazwifhi. Sa vhagwadameli vha Yehova ṋamusi, tshivhidzo tsha vhagwadameli vha Yehova tsho kuna, tsho dzika nahone ndi hune ra gwadamela hone Yehova nahone ra vha na mulalo nae khathihi na vhahashu.

Miraḓo ya “sambi ḽiṱuku” ya Vhakriste vho ḓodzwaho na “gogo ḽihulu” ḽine ḽa khou engedzea vho khetha u tshimbila nḓilani khethwa nahone vha khou ramba vhaṅwe uri vha ṱanganele navho. (Luka 12:32; Ndzumb. 7:9; Yoh. 10:16) “Nḓila khethwa” yo vuletshela vhoṱhe vho ḓiimiselaho u ‘kumedza mivhili yavho uri i vhe tshidzimu tshi tshilaho, tshikhethwa, tshi takadzaho Mudzimu.’—Vha-Roma 12:1.

“A i Nga Tshimbilwi Nga Wa Tshikha”

Nga 537 B.C.E., Vhayuda vho vhuyelelaho hayani vho vha vho tea u swikelela ṱhoḓea ya ndeme. Malugana na vhane vha fanelea u tshimbila “nḓila[ni] khethwa,” Yesaya 35:8b i ri: “A i nga tshimbilwi nga wa tshikha; i ḓo vha ya vhenevho vhe vha i fara; na matsilu ha nga xeli nḓila.” Samusi ndivho ya Vhayuda vhe vha vhuyelela Yerusalema yo vha i ya u vusulusa vhurabeli ho kunaho, ho vha hu si tsha ḓo dovha ha vha na fhethu ha vhathu vha re na zwiṱuṱuwedzi zwa tseḓa, vhane vha sa ṱhonifhe zwithu zwikhethwa, kana vha songo kunaho muyani. Vhenevho vhe vha vhuyelela vho vha vha tshi ṱoḓa u vhulunga zwilinganyo zwa vhuḓifari zwa nṱha zwa Yehova. Vhane vha ṱoḓa u ṱanganedzwa nga Mudzimu vha fanela u swikelela ṱhoḓea i fanaho. Vha fanela u tovhola “vhukhethwa hoṱhe [vha] tshi ofha Mudzimu.” (2 Vha-Kor. 7:1) Nga zwenezwo, ndi zwithu zwifhio zwine ra fanela u zwi iledza?

Muapostola Paulo o ṅwala u ri: “Mishumo ya ṋama i khagala, a siyi: Vhupombwe, vhuyaḓa, u ṱambela zwithu.” (Vha-Gal. 5:19) Vhupombwe vhu tshimbidzana na mishumo naho i ifhio ya u ṱangana nga dzimbeu ine ya katela u shumisa zwiraḓo zwa mbeu nga nnḓa ha mbingano. U ṱambela zwithu zwi katela “vhuḓabaḓaba; u vha phiranadzo; vhuḓifari vhu shonisaho; u ḓifara luvhi.” Vhupombwe na vhuyaḓa a zwi tshimbidzani na vhukhethwa ha Yehova. Nga zwenezwo, vhane vha bvela phanḓa vha tshi ita zwenezwi zwithu a vho ngo tendelwa u vha tshipiḓa tsha tshivhidzo tsha Vhukriste kana vha a bviswa tshivhidzoni. Zwi a fana na kha vhane vha ita vhuyaḓa ho kalulaho, vhune ha vha “dzitshikha dzoṱhe lwa u tou kalula.”—Vha-Ef. 4:19.

“Dzitshikha” ndi ipfi ḽine ḽa katela zwivhi zwinzhi. Ḽeneḽo ipfi nga Tshigerika ḽi ambela u sa kuna kana vhuyaḓa ha mufuda naho u ufhio—ha vhuḓifari, ha u amba, na u konana na vhathu vhane vha si vhe vhatendi. Ḽi katela vhuyaḓa vhuhulwane vhu sa vhuyafhedzwi.a Fhedzi naa vhenevho vhane vha ita zwenezwi zwithu zwa vhuyaḓa vha khou tovhola nḓila khethwa?

Khamusi Mukriste u khou thoma u vhona zwifanyiso zwa vhathu vha songo ambaraho tshiphirini. Nga zwiṱuku nga zwiṱuku, a vusa lutamo lu songo lugaho, u mbo ḓi tshinya u ḓiimisela hawe u dzula o kuna phanḓa ha Yehova. Vhuḓifari hawe hu nga kha ḓi vha vhu sa athu ṋaṋa u swika kha vhuimo ha u ita vhuyaḓa vhuhulwane, fhedzi ha khou bvela phanḓa a tshi ṱhogomela “zwa phungo mbuya, na zwi re vhuvhuya, kana zwi khoḓwaho.” (Vha-Fil. 4:8) U vhona zwifanyiso zwa vhathu vha songo ambaraho a zwo ngo kuna nahone zwi tshinya nga maanḓa vhushaka ha muthu na Mudzimu. Vhuyaḓa ha mufuda naho u ufhio a ho ngo fanela u bulwa kha riṋe.—Vha-Ef. 5:3.

Ṱhogomelani iṅwe tsumbo. Kha ri ri Mukriste u khou ita zwa u swoṱa zwiraḓo zwa mbeu—a tshi khou vusa lutamo lwa u ṱangana nga dzimbeu nga khole—naho zwi tshi khou tshimbidzana na u vhona zwifanyiso zwa vhathu vha songo ambaraho kana hai. Naho ipfi “u swoṱa zwiraḓo zwa mbeu” ḽi sa bveleli Bivhilini, naa zwi a timatimisa uri enea maitele a a tshinya muhumbulo na maḓipfele? Naa u bvela phanḓa u tshi ḓitshikafhadza nga yeneyi nḓila hu nga si tshinye vhushaka ha muthu na Yehova nahone zwa ita uri onoyo muthu a si kune phanḓa ha Mudzimu? Kha ri dzhiele nṱha nyeletshedzo ya muapostola Paulo ya uri “ri ṱambe dzitshika dzoṱhe dza kha ṋama na kha muya” nahone ri ‘vhulahe miraḓo [yashu] ya fhano shangoni, vhupombwe, vhuyaḓa, u tambula nyemulo mmbi, na vhutshivha.’—2 Vha-Kor. 7:1; Vha-Kol. 3:5.

Heḽi shango ḽine ḽa khou vhuswa nga Sathane ḽi a vhuyafhedza vhuḓifari vhuvhi, na u vhu ṱuṱuwedza. U iledza mulingo wa u ḓifara luvhi zwi nga konḓa nga maanḓa. Fhedzi Vhakriste vha ngoho a vho ngo fanela u “tshimbila lwa vha-nnḓa vhané vha sokou tshimbila nga henefho huné mihumbulo yavho ya sokou vha isa.” (Vha-Ef. 4:17) Arali ri sa iledzi vhuḓifari vhuvhi, tshiphirini kana vhathuni, Yehova a nga si ri tendele ri tshi bvela phanḓa ri tshi tshimbila “nḓila[ni] khethwa.”

“A Hu Nga Vhi Na Ndau”

U itela u takalelwa nga Mudzimu mukhethwa, Yehova, zwi nga ṱoḓa uri vhaṅwe vha ite tshanduko khulwane nga nḓila ine vha ḓifara ngayo na nḓila ine vha amba ngayo. Yesaya 35:9 i ri: “A hu nga vhi na ndau; na tshivhanda tshi lumaho a tshi nga swiki tsini hayo,” zwine zwa vha, “Nḓila Khethwa.” Nga lwa pfanyisedzo, vhathu vha mavemu na vha re na vhuhali vha vhambedzwa na zwivhanda. A vha nga ḓo dzula shangoni ḽiswa ḽa Mudzimu ḽo lugaho. (Yes. 11:6; 65:25) Nga zwenezwo ndi zwa ndeme uri vhane vha tama u takalelwa nga Mudzimu vha fanela u litsha vhumuthu ho raloho vhu ngaho ha zwivhanda nahone vha tovhole maitele a vhukhethwa.

Maṅwalo a ri ṱuṱuwedza u ri: “U kalakata hoṱhe na mbiti na tsinyuwo na u zhamba na maṱamba nga zwi vhe kule haṋu na vhuvhi hoṱhe.” (Vha-Ef. 4:31) Kha Vha-Kolosa 3:8, ri a vhala uri: “Zwoṱhe ni a zwi bvula, tsinyuwo, mbiti, vhuvhi, maṱamba na dzinyambo dzo vhifhaho dzi bvaho mulomoni waṋu.” Mubulo une wa ri “maṱamba” wo shumiswaho kha dzenedzi ndimana mbili u ambela kha u amba nga nḓila i si yavhuḓi na i nyadzisaho.

Ṋamusi, u amba nga nḓila i vhaisaho, na u semana zwo ḓowelea nga maanḓa, naho hu hayani. Vhavhingani vha amba nga nḓila i vhaisaho, ya tshiṱuhu, na i nyadzisaho kana musi vha tshi amba na vhana vhavho. Enea maambele a si avhuḓi ha ngo fanela u shumiswa miḓini ya Vhakriste.—1 Vha-Kor. 5:11.

U Tovhola ‘Vhukhethwa Nga U Ofha Mudzimu’—Ndi Phaṱhutshedzo!

Ndi ndugelo lungafhani u shumela Yehova Mudzimu mukhethwa! (Yosh. 24:19) Paradiso ya muya ye Yehova a ri isa khayo ndi ya ndeme nga maanḓa. U ita uri vhuḓifari hashu vhu vhe vhukhethwa phanḓa ha Yehova ndi nḓila ya khwine vhutshiloni.

Hu si kale Paradiso ya Mudzimu ye a ri fulufhedzisa yone kha ḽifhasi i ḓo vha hone. (Yes. 35:1, 2, 5-7) Vhane vha i ṱulutshelwa na vhane vha dzula vha tshi tovhola maitele a u ofha Mudzimu vha ḓo fhaṱutshedzwa nga u vha hone henefho. (Yes. 65:17, 21) Vhukuma, roṱhe kha ri bvele phanḓa ri tshi gwadamela Mudzimu nga nḓila yo kunaho ya muya nahone ri vhe na vhushaka ha tsini-tsini nae.

[Ṱhaluso i re magumoni a siaṱari]

[Tshifanyiso kha siaṱari 26]

Ndi mini zwe zwa vha zwi tshi ṱoḓea kha Vhayuda u itela uri vha tshimbile “nḓila[ni] khethwa”?

[Tshifanyiso kha siaṱari 27]

U vhona zwifanyiso zwa vhathu vha songo ambaraho zwi tshinya vhushaka ha muthu na Yehova

[Tshifanyiso kha siaṱari 28]

“U zhamba na maṱamba nga zwi vhe kule haṋu”