Thabelo Dzaṋu Dzi Sumbedza Mini Nga Ha Inwi?
“Iwe Mupfi wa dzithabelo, vhathu vhoṱhe vha ḓa ha Iwe.”—PS. 65:2.
1, 2. Ndi ngani vhashumeli vha Yehova vha tshi nga rabela khae vhe na khwaṱhisedzo?
TSHIFHINGA tshoṱhe Yehova u a thetshelesa zwine vhashumeli vhawe vha fulufhedzeaho vha zwi humbela. Ri nga vha na khwaṱhisedzo ya uri u a ri pfa. Naho Ṱhanzi dza Yehova dza dzimilioni dzo vha dzi tshi nga rabela Mudzimu nga tshifhinga tshithihi, vhoṱhe vho vha vha tshi ḓo pfiwa.
2 Musi e na khwaṱhisedzo ya uri Mudzimu o pfa zwe a zwi humbela, mupsalme Davida o imba a ri: “Iwe Mupfi wa dzithabelo, vhathu vhoṱhe vha ḓa ha Iwe.” (Ps. 65:2) Thabelo dza Davida dzo fhindulwa ngauri o vha e mugwadameli wa Yehova a fulufhedzeaho. Zwi ḓo vha zwavhuḓi arali ra ḓivhudzisa: ‘Naa zwine nda zwi humbela zwi a sumbedza uri ndi fulufhela Yehova na uri vhurabeli ho kunaho ndi ha ndeme vhukuma kha nṋe? Thabelo dzanga dzi sumbedza mini nga ha nṋe?’
Rabelani Yehova Nga U Ḓiṱukufhadza
3, 4. (a) Ndi mavhonele afhio ane ra fanela u vha nao musi ri tshi rabela Mudzimu? (b) Ri fanela u ita mini musi ri tshi dinwa nga ‘zwine ra zwi elekanya’ malugana na tshivhi tshihulwane tshe ra tshi ita?
3 Arali ri tshi ṱoḓa uri thabelo dzashu dzi fhindulwe, ri fanela u rabela Mudzimu nga u ḓiṱukufhadza. (Ps. 138:6) Ri fanela u humbela Yehova uri a ri ṱolisise, u fana na zwe Davida a zwi ita musi a tshi ri: “Itou mphenḓa, Iwe Mudzimu, U ḓivhe mbilu yanga; U ndinge, U ḓivhe zwiné nda elekanya. Wá vhoná ndi kha nḓila mmbi, U ntshimbidze kha nḓila ya zwa lini na lini.” (Ps. 139:23, 24) Ri songo sokou rabela fhedzi, fhedzi ri fanela u dovha ra ḓiṱukufhadza kha Mudzimu uri a ri ṱolisise na u ri eletshedza nga Ipfi ḽawe. Yehova a nga ri livhisa “kha nḓila ya zwa lini na lini,” na u ri thusa uri ri tovhole buḓo ḽi isaho vhutshiloni vhu sa fheli.
4 Hu pfi mini arali ri tshi dinwa nga ‘zwine ra zwi elekanya’ malugana na tshivhi tshihulwane tshe ra tshi ita? (Vhalani Psalme ya 32:1-5.) U lingedza u kandeledza luvalo lu re na mulandu zwi nga ri kula nungo u fana na muri une wa fhelelwa nga maḓi nga ṅwambo wa mufhiso wo kalulaho wa tshilimo. Nga ṅwambo wa tshivhi tshawe, Davida ho ngo tsha takala nahone a nga kha ḓi vha o farwa nga vhulwadze. Fhedzi u ḓibula kha Mudzimu zwo ita uri a ḓipfe o vhofholowa lungafhani! Edzani u humbula nḓila ye Davida a vha o takala ngayo uri Yehova o mu “hangwelwa zwivhi” zwawe. U bula tshivhi tshau kha Mudzimu zwi nga ita uri u vhofholowe, nahone vhahulwane vha Vhakriste vha dovha vha thusa o khakhaho uri a dovhe a vhe na vhushaka havhuḓi na Mudzimu.—Mir. 28:13; Yak. 5:13-16.
Humbelani Mudzimu Na U Mu Livhuha
5. Ri fanela u ita mini arali ri tshi vhilaela nga maanḓa?
5 Arali ri tshi vhilaela nga maanḓa nga ṅwambo wa tshiitisi naho tshi tshifhio, ri fanela u shumisa nyeletshedzo ya Paulo ine ya ri: “Ni songo vhilaela tshithu. Zwoṱhe zwiné na zwi tama ni ḓivhadze Mudzimuni nga thabelo na nga u humbela hu re na u livhuha.” (Vha-Fil. 4:6) Zwihuluhulu musi ri khomboni kana ri tshi tovholwa, ri fanela u humbela thuso kha Yehova na vhulivhisi hawe.
6, 7. U livhuha hu fanela u katelwa kha thabelo nga ṅwambo wa zwiitisi zwifhio?
6 Naho zwo ralo, arali ro vha ri tshi nga rabela musi hu na zwine ra zwi ṱoḓa fhedzi, zwenezwo zwo vha zwi tshi ḓo sumbedza mini nga ha zwiṱuṱuwedzi zwashu? Paulo o amba uri ri fanela u ḓivhadza Mudzimu zwine ra zwi tama nga “u livhuha.” Zwi tou vha khagala uri ri na zwiitisi zwa u sumbedza u livhuha u fana na Davida we a ri: “Yehova ndi Iwe Muṋe wa vhuhulwane na maanḓa na vhurena na dzithendo na vhuhosi; ngauri zwoṱhe zwa ṱaḓulu na fhasi ndi zwau Yehova. U Muvhusi, U ṱhoho i re ṱaḓulu ha zwithu zwoṱhe. . . . Mudzimu washu, riṋe zwino ri vha u U livhuha na vha u khoḓa dzina ḽa vhurena hau.”—1 Koron. 29:11-13.
7 Yesu o livhuha Mudzimu malugana na zwiḽiwa, tshinnkwa na veine zwe zwa shumiswa Tshilaleloni tsha Murena. (Mat. 15:36; Marko 14:22, 23) Nga nnḓa ha u sumbedza u livhuha hu fanaho, ri fanela u ‘livhuha Yehova’ nga ṅwambo wa “maḓembe e a a ita kha vhana vha vhathu,” nga ‘zwe a vhusa A sa ṱaluli,’ na nga ṅwambo wa fhungo ḽawe, kana mulaedza wawe une zwino wa wanala Bivhilini.—Ps. 107:15; 119:62, 105.
Ni Rabelele Vhaṅwe
8, 9. Ndi ngani ri tshi fanela u rabelela Vhakriste nga riṋe?
8 A zwi timatimisi uri ri a ḓirabelela, fhedzi ri fanela u rabelela na vhaṅwe—u katela na Vhakriste vhane ra sa vha ḓivhe. Naho zwi tshi nga kha ḓi itea uri muapostola Paulo o vha a sa ḓivhi vhatendi vhoṱhe vha ngei Kolosa, o ṅwala uri: “Ri dzula ri tshi livhuha Mudzimu Khotsi-a Murena washu Yesu Kristo musi ri tshi ni rabelela, Nge ra pfa zwa lutendo lwaṋu lwa u tenda Kristo Yesu na zwa lufuno luné na funa vhakhethwa vhoṱhe ngalwo.” (Vha-Kol. 1:3, 4) Paulo o dovha a rabelela Vhakriste vha ngei Thesalonika. (2 Vha-Thes. 1:11, 12) Thabelo dzo raloho dzi amba zwinzhi nga ha riṋe na nga ha nḓila ine ra dzhia ngayo vhahashu vha tshinnani na vha tshisadzini vha Vhakriste.
9 U rabelela hashu Vhakriste vho ḓodzwaho na khonani dzavho dza vha “dziṅwe nngu,” zwi ṋea vhuṱanzi ha uri ri vhilaelela ndangulo ya Mudzimu. (Yoh. 10:16) Paulo o humbela vhagwadameli ngae uri vha mu rabelele u itela uri a ‘tou fhiwa fhungo musi a tshi vula mulomo wawe, uri a kone u ḓivhadza tshiphiri tsha mafhungo-maḓifha.’ (Vha-Ef. 6:17-20) Naa ri a rabelela vhaṅwe Vhakriste nga nḓila yeneyo?
10. U rabelela vhaṅwe zwi nga ri kwama nga nḓila-ḓe?
10 U rabelela vhaṅwe zwi nga kha ḓi ita uri ri shandule mavhonele ashu nga havho. Arali ri tshi rabelela muthu ane ra si mu fune, zwi nga kha ḓi ita uri ri shandule mavhonele ashu nga hae. (1 Yoh. 4:20, 21) Thabelo dzenedzi dzi a fhaṱa nahone dzi ita uri hu vhe na vhuthihi vhukati ha vhahashu. Zwiṅwe hafhu, thabelo dzo raloho dzi sumbedza uri ri na lufuno lu fanaho na lwa Kristo. (Yoh. 13:34, 35) Pfaneleo yo raloho ndi iṅwe ya zwiaṋwiwa zwa muya wa Mudzimu. Naa roṱhe ri a rabelela muya mukhethwa, u itela u humbela Yehova uri a ri thuse u sumbedza zwiaṋwiwa zwawo zwine zwa vha lufuno, dakalo, mulalo, u sa fhela mbilu, vhulenda, vhuthu, lutendo, u vuḓa, na u konḓelela? (Luka 11:13; Vha-Gal. 5:22, 23) Arali ri tshi u rabelela, zwine ra zwi amba na zwine ra zwi ita zwi ḓo sumbedza uri ri khou tshimbila na u tshila nga nḓila ya lwa muya.—Vhalani Vha-Galata 5:16, 25.
11. Ndi ngani ni tshi nga amba uri zwo tea u humbela vhaṅwe uri vha ri rabelele?
11 Arali ra ṱhogomela uri vhana vhashu vha khou lingea uri vha tswele musi vha tshi ṅwala milingo tshikoloni, ri fanela u vha rabelela na u vha thusa nga Maṅwalo uri vha fulufhedzee na u sa ita tshithu tsho khakheaho. Paulo o vhudza Vhakriste vha ngei Korinta a ri: “Ri khou rabela Mudzimu uri inwi ni si ite tshivhi na tshithihi.” (2 Vha-Kor. 13:7) Thabelo dzo raloho dza u ḓiṱukufhadza dzi a takadza Yehova na u sumbedza uri ri vhathu vho lugaho. (Vhalani Mirero 15:8.) Ri nga humbela uri vhaṅwe vha ri rabelele samusi na muapostola Paulo o ita nga u ralo. O ṅwala uri: “Ni ri rabelele. Ro fulufhela nge ra pfa mvalo dzashu dzó ṱamba, ró ḓi funa u shuma zwavhuḓi kha zwithu zwoṱhe.”—Vha-Heb. 13:18.
Thabelo Dzashu Dzi Sumbedza Zwo Engedzeaho
12. Ndi mini zwine zwa fanela u vha zwithu zwa ndeme kha thabelo dzashu?
12 Naa thabelo dzashu dzi a sumbedza uri ri Ṱhanzi dza Yehova dzo takalaho na dzi fhiseaho? Naa zwine ra zwi humbela zwi livhisa ṱhogomelo zwihuluhulu kha zwine Mudzimu a zwi funa, zwine zwa vha u huwelela mulaedza wa Muvhuso, u lwelwa ha vhuvhusahoṱhe ha Yehova, na u itwa ha dzina ḽawe uri ḽi vhe ḽikhethwa? Zwenezwi zwi fanela u vha zwithu zwa ndeme kha thabelo dzashu, samusi zwo sumbedzwa kha thabelo ya Yesu ya tsumbo, ine ya thoma nga maipfi ane a ri: “Khotsi-ashu wa ṱaḓulu! dzina ḽau ḽi khethwe; Muvhuso wau u ḓe; zwiné wa funa nga zwi itwe fhano fhasi vhunga zwi tshi itwa ngei ṱaḓulu.”—Mat. 6:9, 10.
13, 14. Thabelo dzashu dzi sumbedza mini nga ha riṋe?
13 Musi ri tshi rabela Mudzimu, zwine ra zwi humbela zwi sumbedza zwiṱuṱuwedzi zwashu, madzangalelo ashu, na zwine ra zwi tama. Yehova u ḓivha zwine ra vha zwone zwa vhukuma. Mirero 17:3 i ri: “Ha tsimbi-tseṱha ndi ṋanḓoni, musuku u naka nga mulilo; mu-ṋwisa-mbilu-ṋandoni ndi Yehova.” Mudzimu u vhona zwine zwa vha mbiluni dzashu. (1 Sam. 16:7) U a ḓivha nḓila ine ra ḓipfa ngayo nga ha miṱangano yashu, vhuḓinḓa hashu na vhahashu vha tshinnani na vha tshisadzini vha Vhakriste. Yehova u a ḓivha zwine ra zwi humbula nga ha “vharathu” vha Kristo. (Mat. 25:40) U a ḓivha arali ri tshi tama zwa vhukuma zwine ra zwi rabelela kana ri tshi sokou dovholola maipfi. Samusi vhathu vha misini yawe vho vha vhe na mavhonele o khakheaho nga ha thabelo, Yesu o ri: “Ni tshi rabela ni songo sokou amba-amba sa vha-nnḓa, ngauri vhone vha ri; ri ḓo pfiwa ri tshi anza u amba.”—Mat. 6:7.
14 Zwine ra zwi amba musi ri tshi rabela zwi dovha zwa sumbedza arali ri tshi ḓitika nga Mudzimu. Davida o ri: “Ngauri dzhavhelo ḽanga ndi Iwe [Yehova], mutsheṱo wanga wa u thivhela maswina anga. Kha ndi ḓi dzula nḓuni yau, ndi khude nga ḓasi ha phapha dzau.” (Ps. 61:3, 4) Musi Mudzimu ‘a tshi fhaṱa mushasha kha riṋe’ nga lwa pfanyisedzo, ri ḓiphina nga tsireledzo yawe na ṱhogomelo yawe ya lufuno. (Ndzumb. 7:15) Zwi khuthadza lungafhani u sendela tsini na Yehova nga thabelo ri na vhungoho ha uri “u na [ri]ṋe” musi ro sedzana na milingo naho i ifhio ya lutendo lwashu.—Vhalani Psalme ya 118:5-9.
15, 16. Thabelo i nga ri thusa u pfesesa mini nga ha zwine ra zwi tama musi ri tshi ṱoḓa u swikelela ndugelo dza tshumelo?
15 U rabela kha Yehova nga u fulufhedzea nga ha zwiṱuṱuwedzi zwashu zwi nga ri thusa u zwi pfesesa zwavhuḓi. Sa tsumbo, naa u fhisetshela u shuma kha vhuimo ha vhulavhelesi vhukati ha vhathu vha Mudzimu ndi lutamo lwa u ḓiṱukufhadza lwa u ṱoḓa u thusa u itela u isa madzangalelo a Muvhuso phanḓa? Kana naa ndi nga ṅwambo wa uri ri tama “u vha [vha]hulwane” kana u “vhusa” vhaṅwe? A zwo ngo fanela u vha nga u ralo vhukati ha vhathu vha Yehova. (Vhalani 3 Yohane 9, 10; Luka 22:24-27.) Arali ri na lutamo lwo khakheaho, u rabela Yehova Mudzimu nga u fulufhedzea zwi nga bvukulula lutamo lwonolo na u ri thusa musi lu sa athu nwelela.
16 Vhasadzi vha Vhakriste vha nga kha ḓi vha na lutamo luhulwane lwa uri vhanna vhavho vha shume sa vhashumeli kana khamusi vha fheleledze vhe vhalavhelesi, kana vhahulwane. Vhahashu vhenevha vha tshisadzini vha nga kha ḓi ita zwithu u tendelana na zwine vha zwi bula musi vha tshi rabela tshiphirini nga u lwela u ḓifara sa tsumbo yavhuḓi. Zwenezwi ndi zwa ndeme, ngauri nḓila ine muṱa wa munna wa amba na u ḓifara ngayo i shela mulenzhe kha nḓila ine tshivhidzo tsha mu dzhia ngayo.
U Imela Vhaṅwe Kha Thabelo Ya Khagala
17. Ndi ngani zwi zwavhuḓi uri ri vhe na tshifhinga tsha u rabela ri roṱhe?
17 Yesu o vha a tshi anzela u bva vhathuni u itela u yo rabela Khotsi awe e eṱhe. (Mat. 14:13; Luka 5:16; 6:12) Na riṋe ri na ṱhoḓea i fanaho ya u vha na tshifhinga ri roṱhe. Musi ri tshi rabela ro dzika fhethu hu si na phosho, ri nga kha ḓi kona u ita phetho dzine dza takadza Yehova na dzine dza ḓo ri vhuyedza vhukuma nga lwa muya. Naho zwo ralo, Yesu o dovha a rabela khagala, nahone ndi zwavhuḓi u ṱhogomela nḓila ine zwa nga itwa ngayo nga nḓila yo teaho.
18. Ndi dzifhio dziṅwe mbuno dzine vhahashu vha tshinnani vha fanela u dzi humbula musi vha tshi rabelela tshivhidzo?
18 Miṱanganoni yashu, vhanna vha fulufhedzeaho vha a rabelela tshivhidzo. (1 Tim. 2:8) Vhatendi nga riṋe vha fanela u kona u amba uri “amen,” zwine zwa amba uri “nga zwi ralo,” magumoni a thabelo yeneyo. Naho zwo ralo, u itela u amba zwenezwo, vha fanela u tendelana na zwe zwa ambiwa. A hu na tshee tsha vha tshi tshi tshuwisa kana tsho ambiwaho nga u sa humbulela kha thabelo ya Yesu ya tsumbo. (Luka 11:2-4) Zwiṅwe hafhu, ho ngo amba ṱhoḓea dzoṱhe kana vhuleme hoṱhe ha vhathetshelesi vhawe. Mbilaelo dza muthu nga eṱhe dzo tea kha thabelo dza tshiphirini hu si dza khagala. Nahone musi ri tshi rabelela tshigwada, ri fanela u iledza u amba mafhungo a tshiphiri.
19. Ri fanela u ḓifara hani tshifhingani tsha thabelo ya khagala?
19 Musi hu na muthu ane a khou ri imela khagala nga thabelo, ri fanela u sumbedza u ‘ofha Mudzimu’ nga ṱhonifho. (1 Pet. 2:17) Hu na zwithu zwi songo teaho u itwa miṱanganoni ya Vhukriste, fhedzi zwine zwa nga itwa huṅwe fhethu ho teaho na nga tshifhinga tsho teaho. (Muh. 3:1) Sa tsumbo, khamusi muṅwe muthu a nga kha ḓi vhona zwo tea uri vhoṱhe vha kuvhatedzane kana vha farane nga zwanḓa musi hu tshi khou rabelwa. Zwenezwi zwi nga kha ḓi khukhulisa vhaṅwe kana u vha thithisa, u katela na vhaeni vhane vha si vhe vhatendi nga riṋe. Vhaṅwe vhavhingani vha nga kha ḓi farana nga zwanḓa nga vhuṱali, fhedzi arali vha tshi kuvhatedzana musi hu tshi khou rabelwa, vhane vha vhona zwithu zwenezwo vha nga kha ḓi khukhulisea. Vha nga kha ḓi humbula uri vhavhingani vhenevho vho livhisa ṱhogomelo nga maanḓa kha u funana havho nṱhani ha u livhisa ṱhogomelo kha u ṱhonifha Yehova. Nga ṅwambo wa u mu ṱhonifha nga ho dzikaho, “zwoṱhe ni ite luné Mudzimu a ḓo rendwa ngalwo” nahone ni iledze u thithisa, u tshuwisa, na u khukhulisa naho e nnyi.—1 Vha-Kor. 10:31, 32; 2 Vha-Kor. 6:3.
Ndi Mini Zwine Ra Fanela U Zwi Rabelela?
20. Ni nga ṱalutshedza Vha-Roma 8:26, 27 nga nḓila-ḓe?
20 Nga zwiṅwe zwifhinga, ri nga kha ḓi sa ḓivha zwine ra ḓo zwi amba musi ri tshi rabela ri roṱhe. Paulo o ṅwala uri: “Ngauri tshiné ra nga rabela tshone na uri hu pfi hu rabelwa hani a ri zwi ḓivhi, Muya [mukhethwa] nga eṱhe ndi ene a ri imelelaho nga u fhihamelwa zwiné mulomo u si kone u amba. Ene-ha [Mudzimu] ané a sedzesa dzimbilu u a zwi ḓivha zwiné muya wa elekanya zwone.” (Vha-Roma 8:26, 27) Yehova o ita uri thabelo nnzhi dzi ṅwalwe Maṅwaloni. U ṱanganedza thabelo dzenedzi dzo hevhedzwaho sa dzine dza vha dzashu nahone u a dzi fhindula. Mudzimu u a ri ḓivha na u ḓivha zwe a zwi vhudza vhaṅwali vha Bivhili a tshi shumisa muya wawe u itela uri vha zwi ṅwale. Yehova u a fhindula zwine ra zwi humbela musi muya wawe u tshi ri ‘imelela’ kana u ri ambelela. Fhedzi musi ri tshi ḓivha zwavhuḓi Ipfi ḽa Mudzimu, zwine ra zwi rabelela zwi nga kha ḓi ḓa mihumbuloni yashu nga hu leluwaho.
21. Ndi mini zwine ra ḓo zwi ṱolisisa theroni i tevhelaho?
21 Samusi ro zwi guda, thabelo dzashu dzi amba zwinzhi nga ha riṋe. Sa tsumbo, dzi nga kha ḓi sumbedza nḓila ye ra sendela ngayo tsini na Yehova na nḓila ine ra ḓivha ngayo Ipfi ḽawe. (Yak. 4:8) Kha thero i tevhelaho, ri ḓo ṱolisisa dziṅwe thabelo na maipfi o ṅwalwaho Bivhilini. U ṱolisisa honoho ha Maṅwalo hu ḓo kwama hani nḓila ine ra rabela ngayo Mudzimu?
Ni Ḓo Aravha Hani?
• Ri fanela u rabela Yehova ri na mavhonele afhio?
• Ndi ngani ri tshi fanela u rabelela vhatendi nga riṋe?
• Thabelo dzashu dzi fanela u sumbedza mini nga ha riṋe na zwiṱuṱuwedzi zwashu?
• Ri fanela u ḓifara hani tshifhingani tsha thabelo ya khagala?
[Tshifanyiso kha siaṱari 4]
Naa ni a renda na u livhuha Yehova tshifhinga tshoṱhe?
[Tshifanyiso kha siaṱari 6]
Nḓila ine ra ḓifara ngayo musi hu tshi rabelwa khagala i fanela u hulisa Yehova tshifhinga tshoṱhe