Tshanḓa Tsha Yehova A Si Tshipfufhi

1. Mushe o sumbedza hani u fhulufhela Yehova musi a tshi ranga phanḓa Vhaisiraele a tshi vha bvisa shangoni ḽa Egipita?

BUGU ya Vhahevheru i amba nga ha vhathu vhanzhi vhe vha sumbedza lutendo kha Yehova. Muṅwe wa vhathu vhe vha sumbedza lutendo lu mangadzaho ndi Mushe. (Vhahev. 3:2-5; 11:23-25) O vha na lutendo musi a tshi ranga phanḓa Vhaisiraele a tshi vha bvisa shangoni ḽa Egipita. Mushe ho ngo ofha Farao na mmbi yawe. O fhulufhela Yehova nahone a thusa Vhaisiraele u fhira lwanzheni lutswuku na u vha thusa musi vhe sogani. (Vhahev. 11:27-29) Vhunzhi ha Vhaisiraele vho timatima uri Yehova u ḓo vha ṱhogomela, fhedzi Mushe o bvela phanḓa a tshi fhulufhela Mudzimu wawe. U fhulufhela ha Mushe Mudzimu a zwo ngo vha mahandana ngauri Yehova o kona u ṋea Vhaisiraele zwiḽiwa na maḓi musi vhe sogani u itela uri vha kone u tshila.a​—Ek. 15:22-25; Ps. 78:23-25.

2. Ndi ngani Mudzimu o vhudzisa Mushe uri: “Naa tshanḓa tsha Yehova ndi tshipfufhi”? (Numeri 11:21-23)

² Naho Mushe o vha e na lutendo lwo khwaṱhaho, nga murahu ha ṅwaha musi Yehova o no bvisa Vhaisiraele shangoni ḽa Egipita, Mushe o thoma u ḓivhudzisa uri Yehova u ḓo zwi kona hani u fha vhathu vhanzhi nga u rali ṋama. Ho vha hu na vhanna vha 600 000, na vhana na vhafumakadzi nahone ho vha hu si na na tshiḽiwa na tshithihi sogani. Yehova o fhindula Mushe a ri “Naa tshanḓa tsha Yehova ndi tshipfufhi?” (Vhalani Numeri 11:21-23.) Maipfi ane a ri “tshanḓa tsha Yehova” a ambela kha muya mukhethwa wa Mudzimu kana maanḓa awe. Nga maṅwe maipfi, Yehova o vha a tshi khou vhudzisa Mushe uri: ‘Naa ni vhona u nga ndi nga si kone u ita zwe nda amba?’

3. Ndi ngani zwi zwa ndeme u humbula nga ha tshifhinga tshe Mushe na Vhaisiraele vha balelwa u fhulufhela Yehova?

³ Naa no no vhuya na ḓivhudzisa uri Yehova a nga kona u ni ṋea zwine na zwi shaya kana u ṱhogomela vha muṱa waṋu? Hu sa londwi uri no no vhuya na ḓivhudzisa kana a ni athu u ḓivhudzisa, kha ri vhone uri ndi ngani Mushe na Vhaisiraele vha songo fhulufhela uri Yehova a nga vha ṋea zwine vha zwi shaya. Ri ḓo dovha ra sedza na maṅwalo ane a nga ri thusa u khwaṱhisa lutendo lwashu lwa uri Yehova u ḓo dzula a tshi ri thusa.

GUDANI KHA MUSHE NA KHA VHAISIRAELE

4. Ndi ngani Vhaisiraele vhanzhi vho thoma u timatima uri Yehova u ḓo vha ṱhogomela?

⁴ Ndi ngani Vhaisiraele vhanzhi vho timatima uri Yehova u ḓo vha ṱhogomela? Vhone na “vhaṅwe vhatsinda” vhe vha bva navho Egipita vho vha vho no fhedza tshifhinga tshilapfu vha tshi khou tshimbila sogani vha tshi khou ya Shangoni ḽo Fhulufhedziswaho. (Ek. 12:38; Dot. 8:15) Vhatsinda na vhaṅwe Vhaisiraele vho thoma u gungulela Mushe ngauri vho vha vho neta nga u ḽa mana. (Num. 11:4-6) Vhathu vho vha vho ṱuvha u ḽa zwiḽiwa zwe vha vha vha tshi zwi ḽa Egipita. Nga nṱhani ha uri vhathu vho vha vha tshi khou gungulela Mushe, o vhona u nga ndi ene ane a tea u vha ṋea ṋama, fhedzi o vha a sa ḓivhi uri u ḓo tou zwi itisa hani.​—Num. 11:13, 14.

5-6. Ri nga guda mini kha nḓila ye vhatsinda vha ṱuṱuwedza ngayo Vhaisiraele?

⁵ Vhatsinda vho thoma u sa dzhiela nṱha zwe Yehova a vha itela zwone, zwa ita uri na Vhaisiraele vha ite zwi fanaho. Zwenezwo zwi nga kha ḓi itea na kha riṋe. Arali ri vhukati ha vhathu vha sa livhuwi, na riṋe ri nga thoma u sa dzhiela nṱha zwine Yehova a ri itela zwone. Ri nga thoma u ṱuvha vhutshilo he ra vha ri tshi vhu tshila kale kana ra thoma u vha na vivho. Fhedzi ri nga takala arali ra guda u fushea nga zwine ra vha nazwo.

⁶ Vhaisiraele vho vha vho tea vho humbula nga ha zwe Mudzimu a vha khwaṱhisedza zwone zwe vha vha vha tshi ḓo zwi wana musi vha tshi swika hayani havho huswa. Vho vha vha tshi ḓo ḓiphiṋa nga zwithu zwinzhi. Zwenezwo zwo vha zwi tshi ḓo itea Shangoni ḽo Fhulufhedziswaho, hu si sogani. Nga hu fanaho, na riṋe ṋamusi zwi nga vha zwavhuḓi arali ra sa livhisesa ṱhogomelo kha zwithu zwine ra vha nazwo, ra humbula nga ha zwithu zwavhuḓi zwe Yehova a ri fhulufhedzisa zwone shangoni ḽiswa. Ri nga dovha ra humbula nga ha dziṅwe vese dzi re Bivhilini dzine dza nga ri thusa u fhulufhela Yehova nga ho engedzeaho.

7. Ndi ngani ri tshi nga vha na vhungoho ha uri Yehova u ḓo dzula a tshi ri thusa?

⁷ Khamusi ni kha ḓi ḓivhudzisa uri ndi ngani Mudzimu o vhudzisa Mushe uri: “Naa tshanḓa tsha Yehova ndi tshipfufhi?” Musi Yehova a tshi vhudzisa Mushe yeneyo mbudziso, o vha a tshi khou ṱoḓa uri a humbule zwithu zwivhili. Tsha u thoma, Mushe o vha a tshi tea u humbula uri maanḓa a Yehova ndi mahulu. Tsha vhuvhili, Mushe o vha a tshi tea u humbula uri Yehova a nga shumisa maanḓa awe huṅwe na huṅwe. Zwino Mudzimu o vha a tshi nga kona u ṋea Vhaisiraele ṋama nnzhi naho vho vha vhe sogani. “Nga tshanḓa tshawe tsha maanḓa,” Mudzimu o sumbedza uri a nga kona u thusa vhathu vhawe, hu sa londwi uri vha ngafhi. (Ps. 136:11, 12) Arali ri tshi khou ṱangana na milingo, kha ri vhe na vhungoho ha uri Yehova u ḓo kona u thusa muṅwe na muṅwe washu, hu sa londwi uri ri ngafhi.​—Ps. 138:6, 7.

8. Ndi mini zwine zwa nga ri thusa u sa ita vhukhakhi he vhunzhi ha Vhaisiraele vha vhu ita? (Sedzani tshifanyiso.)

⁸ Yehova o mbo ḓi ita zwe a zwi fhulufhedzisa, a vha ṋea khwali nnzhi vhukuma. Nṱhani ha uri Vhaisiraele vha livhuwe, vhunzhi havho vho mbo ḓi vha na tseḓa. Vha fhedza ḽeneḽo ḓuvha na vhusiku haḽo na ḓuvha ḽi tevhelaho vha tshi khou dobela khwali. Yehova a sinyutshela vhenevho vhathu “vha sa fushei nga zwiḽiwa,” a vha ṱarafa. (Num. 11:31-34) Ri guda mini kha enea mafhungo? Ri guda uri a ro ngo tea u vha na tseḓa ra ṱoḓa zwithu zwinzhi zwi fhiraho zwine ra vha nazwo. Hu sa londwi uri ri na zwinzhi kana zwiṱuku, ri tea u ‘kuvhanganya lupfumo ngei ṱaḓulu.’ (Mat. 6:19, 20; Luka 16:9) Arali ra ita nga u ralo, ri nga vha na vhungoho ha uri Yehova u ḓo ri ṱhogomela.

9. Ri nga vha na vhungoho ha mini?

⁹ Yehova o ḓiimisela u thusa vhathu vhawe ṋamusi. Zwenezwo a zwi ambi uri ri nga si tsha shaya tshelede kana zwiḽiwa.b Fhedzi ri nga vha na vhungoho ha uri Yehova u ḓo dzula a tshi ri ṱhogomela. U ḓo ri ṋea maanḓa hu sa londwi vhuimo vhu konḓaho vhune ra sedzana naho. Ri nga sumbedza hani uri ri fhulufhela uri Yehova u ḓo ri ṱhogomela? Kha ri haseledze nga ha vhuimo vhuvhili vhune ra nga zwi sumbedza khaho. Ha u thoma ndi musi ri tshi ṱoḓa mushumo kana tshelede. Ha vhuvhili ndi musi ri tshi khou vhilaela nga ha uri ri ḓo wana hani tshelede musi ro no vha vhalala.

MUSI RI TSHI ṰOḒA MUSHUMO KANA TSHELEDE

10. Ndi mini zwine ra nga sedzana nazwo?

¹⁰ Samusi ḽino shango ḽi tsini na u fheliswa, thaidzo dzi ḓo ṋaṋa dzi tshi ya nga nṱhani ha u shanduka-shanduka ha vhavhusi, dzinndwa, khombo dza mupo, na malwadze maswa. Zwenezwi zwithu zwi nga ita uri ri xelelwe nga mushumo, nga zwithu zwine ra vha nazwo kana ra tea u pfuluwa ra ya huṅwe fhethu, zwa ita uri zwi ri konḓele u ṱunḓela miṱa yashu. Arali zwa nga itea ra vha ri tshi tea u ṱoḓa muṅwe mushumo kana u pfuluwa ra ya huṅwe fhethu na miṱa yashu, ndi mini zwine zwa nga ri thusa uri ri ite phetho dzine dza sumbedza uri ri fhulufhela uri tshanḓa tsha Yehova a si tshipfufhi?

11. Ndi mini zwine zwa nga ni thusa u sedzana na thaidzo dza zwa masheleni? (Luka 12:29-31)

¹¹ Tshithu tsha ndeme tshine na nga tshi ita ndi u vhudza Yehova thaidzo dzoṱhe dzine na vha nadzo. Zwenezwo zwi ḓo ni thusa nga maanḓa. (Mir. 16:3) Mu humbeleni uri a ni ṋee vhuṱali uri ni kone u ita phetho dzavhuḓi na uri ni si ‘vhilaele lwo kalulaho’ nga vhuimo vhune na vha khaho. (Vhalani Luka 12:29-31.) Ni nga dovha na mu humbela uri a ni thuse uri ni bvele phanḓa ni tshi fushea nga zwiṱukuṱuku zwine na vha nazwo. (1 Tim. 6:7, 8) Wanani khandiso dzine dza nga ni vhudza zwine na nga zwi ita musi no sedzana na thaidzo dza zwa masheleni. Vhunzhi ha vhathu vha amba uri dzividio na thero dzi re kha jw.org dzi ambaho nga ha thaidzo dza zwa masheleni dzi a thusa.

12. Ndi mbudziso dzifhio dzine Mukriste a nga ḓivhudzisa dzone uri a kone u ita phetho ine ya ḓo vhuyedza muṱa wawe?

¹² Vhaṅwe vho no ṱanganedza mishumo ine ya ita uri vha vhe kule na miṱa yavho, fhedzi vha zwi ṱhogomela nga murahu uri vho ita phetho i si yavhuḓi. Musi ni sa athu u ṱanganedza mushumo, humbulani arali wonoyo mushumo u tshi ḓo thusa inwi na muṱa waṋu uri ni sendele tsini na Yehova. (Luka 14:28) Ḓivhudziseni uri: ‘Arali nda fhedza tshifhinga tshinzhi ndi kule na mufarisi wanga, zwi nga kwama hani vhushaka hashu? Naa ndi ḓo kona u ya miṱanganoni yoṱhe, u ya tsimuni na u fhedza tshifhinga na vhahashu?’ Arali ni na vhana, ni nga tea u dovha na ḓivhudzisa uri: ‘Naa ndi ḓo kona u thusa vhana vhanga u sendela tsini na Yehova nga u “vha laya na u vha ṱuṱuwedzela zwa Yehova” musi ndi kule navho?’ (Vhaef. 6:4) Musi ni tshi ita phetho, ni tea u humbula nga nḓila ine Yehova a humbula ngayo, nṱhani ha u thetshelesa zwine muṱa waṋu na khonani dzaṋu vhane vha si gwadamele Yehova vha nga ni vhudza zwone.c Tony ane a dzula Asia vhukovhela o vha e na mishumo minzhi ye a vha a tshi khou ṱoḓa u tholiwa khayo, he a vha a tshi ḓo tea u ya u shuma kha maṅwe mashango. Yeneyi mishumo yo vha i tshi ḓo mu holela tshelede i si na vhukono. Fhedzi musi Tony o no rabela nga hazwo na u amba na mufumakadzi wawe nga hazwo, o mbo ḓi ita phetho ya u sa ṱanganedza yeneyo mishumo. Nṱhani hazwo, ene na muṱa wawe vho vha vha tshi ḓo ita tshanduko vhutshiloni havho uri vha shumise tshelede ṱhukhu. Musi Tony a tshi humbula nga ha phetho ye a i ita, u ri: “Nga nṱhani ha uri ndo ita yeneyi phetho, ndo kona u thusa vhathu vhanzhi uri vha ḓivhe Yehova na u thusa vhananga uri vha fune Yehova. Muṱa washu wo guda uri arali ra tevhedza zwe Yesu a zwi amba kha Mateo 6:33, Yehova u ḓo ri ṱhogomela.”

MUSI RI TSHI KHOU VHILAELA NGA HA VHUMATSHELO

13. Ndi mini zwine ra nga zwi ita uri ri vhe na tshelede yo eḓanaho musi ro no vha vhalala?

¹³ Ri nga dovha ra sumbedza nḓila ine ra fhulufhela ngayo Yehova musi ri tshi khou dzudzanya nḓila ine ra ḓo ḓiṱhogomela ngayo musi ro no vha vhalala. Bivhili i a ṱuṱuwedza uri ri shume u itela u wana tshelede yo eḓanaho u itela u ḓiṱhogomela tshifhingani tshi ḓaho. (Mir. 6:6-11) Arali ri tshi nga kona, zwi nga vha zwavhuḓi uri ri vhetshele iṅwe tshelede thungo u itela ḽa matshelo. Ndi ngoho uri tshelede i nga ri thusa. (Muh. 7:12) Fhedzi tshelede a yo ngo tea u vha tshone tshithu tsha ndemesa vhutshiloni hashu.

14. Vhahevheru 13:5 i nga ri thusa hani uri ri si vhilaele nga maanḓa?

¹⁴ Yesu o anetshela tshifanyiso tshine tsha sumbedza uri zwi vha zwi vhutsilu uri muthu a vhetshele tshelede thungo ngeno a “songo pfuma phanḓa ha Mudzimu.” (Luka 12:16-21) A hu na muthu ane a ḓivha ḽa matshelo. (Mir. 23:4, 5; Yak. 4:13-15) Vhatevheli vha Kristo vha ṱangana na thaidzo nnzhi. Yesu o amba uri ri tea u ḓiimisela u ‘ṱutshela’ thundu dzashu dzoṱhe u itela uri ri vhe vhatevheli vhawe. (Luka 14:33) Zwenezwo ndi zwe zwa itea kha Vhakriste vha Yudea nga tshifhinga tsha vhaapostola. Vho vha vho ḓiimisela u xelelwa nga zwoṱhe nga u ḓifunela. (Vhahev. 10:34) Namusi, vhahashu vhanzhi vho xelelwa nga zwithu zwinzhi nga nṱhani ha u sa ḓidzhenisa kha zwa politiki. (Nzumb. 13:16, 17) Ndi mini zwo vha thusaho? Vho vha vha tshi fhulufhela zwe Yehova a zwi fhulufhedzisa musi a tshi ri: “Ndi nga si vhuye nda u ṱutshela, ndi nga si vhuye nda u laṱa.” (Vhalani Vhahevheru 13:5.) Kha ri ite zwoṱhe zwine ra nga kona u vhetshela zwiṅwe thungo, fhedzi arali ha itea zwiṅwe zwithu zwe ra si zwi lavhelele, kha ri fhulufhele Yehova.

15. Vhabebi vha Vhakriste vha tea u dzhia hani vhana vhavho? (Sedzani tshifanyiso.)

¹⁵ Vhaṅwe vhathu vha vha na vhana u itela uri musi vho no aluwa, vhana vha kone u vha ṱhogomela nga zwa masheleni. Fhedzi Bivhili i amba uri vhabebi ndi vhone vhane vha tea u ṱhogomela vhana vhavho. (2 Vhakor. 12:14) Ndi ngoho uri musi vhabebi vho no aluwa, vha nga ṱoḓa thuso kha vhana vhavho nahone vhana vha a takalela u ṱhogomela vhabebi vhavho. (1 Tim. 5:4) Fhedzi vhabebi vhane vha fhulufhela Yehova vha a zwi ḓivha uri dakalo ḽa vhukuma ḽi ḓiswa nga u thusa vhana vhavho uri vha shumele Yehova nṱhani ha u vha alusa vhe na tshipikwa tsha uri vhana vhavho vha vha ṱhogomele nga zwa masheleni musi vho no aluwa.​—3 Yoh. 4.

16. Vhabebi vha nga thusa hani vhana vhavho uri vha kone u ḓiṱhogomela musi vho no aluwa? (Vhaefesa 4:28)

¹⁶ Musi ni tshi khou thusa ṅwana waṋu u vhona nḓila ine a nga ḓiṱhogomela ngayo musi a tshi khou aluwa, dovhani ni mu vhetshele tsumbo ya u fhulufhela Yehova. Musi vha tshi kha ḓi vha vhaṱuku, vha gudiseni u vha vhashumi vha biko. (Mir. 29:21; vhalani Vhaefesa 4:28.) Musi vha tshi thoma u ya tshikoloni, vha thuseni uri vha shume zwavhuḓi tshikoloni. Vhabebi vha nga ita ṱhoḓisiso Bivhilini ine ya nga vha thusa uri vha thuse vhana vhavho u dzhia phetho yavhuḓi musi zwi tshi ḓa kha pfunzo. Tshipikwa ndi tsha uri vha thuse vhana vhavho u vhona nḓila ine vha nga ḓiṱhogomela ngayo musi vha tshi aluwa na uri vha vhe na tshifhinga tsho engedzeaho tsha u huwelela kana uri vha vhe vhavulanḓila.

17. Ri nga vha na vhungoho ha mini?

¹⁷ Vhane vha fhulufhela Yehova vha nga vha na vhungoho ha uri u ḓo vha ṱhogomela nga zwine vha zwi shaya. Samusi ri tshi khou tshila maḓuvhani a vhufhelo, ri khou tea u fhulufhela Yehova u fhira naho hu lini. Hu sa londwi zwine zwa nga itea, kha ri vhe na vhungoho ha uri Yehova u ḓo shumisa maanḓa awe u itela u ri ṱhogomela. Tshanḓa tsha Yehova a si tshipfufhi, u ḓo ri thusa hu sa londwi hune ra vha hone.