THERO I GUDWAHO 19
LUIMBO 22 Muvhuso Wo No Vhewa—Kha U Ḓe!
Ri Ḓivha Mini Nga Ha Nḓila Ine Yehova A Ḓo Haṱula Ngayo Tshifhingani Tshi Ḓaho?
“Yehova . . . ha ṱoḓi na muthihi a tshi fheliswa.”—2 PET. 3:9.
ZWINE RA ḒO ZWI GUDA
Ri nga vha na vhungoho ha uri musi Yehova a tshi haṱula vhathu tshifhingani tshi ḓaho, u ḓo vha haṱula nga nḓila yo lugaho na yo teaho.
1. Ndi ngani ri tshi nga ri ri khou tshila tshifhingani tshi takadzaho?
RI KHOU tshila zwifhingani zwi takadzaho! Ḓuvha ḽiṅwe na ḽiṅwe, ri vhona hu tshi khou itea zwithu zwe Bivhili ya dzula yo amba uri zwi ḓo itea. Sa tsumbo, ri vhona “khosi ya devhula” na “khosi ya tshipembe” dzi tshi khou lwela u vhusa shango. (Dan. 11:40) Ri vhona mafhungo maḓifha a Muvhuso wa Mudzimu a tshi khou huwelelwa shangoni ḽoṱhe nahone vhathu vha dzimiḽioni vho khetha u shumela Yehova. (Yes. 60:22; Mat. 24:14) Nahone ri wana zwiḽiwa zwinzhi “nga tshifhinga tsho teaho” zwine zwa ri thusa u vha na vhushaka ha tsini na Yehova.—Mat. 24:45-47.
2. Ri nga vha na vhungoho ha mini nahone ndi mini zwine ra tea u zwi ḓivha?
2 Yehova u bvela phanḓa a tshi ri thusa u pfesesa zwithu zwa ndeme zwine zwa ḓo itea hu si kale. (Mir. 4:18; Dan. 2:28) Ri nga vha na vhungoho ha uri musi maṱungu mahulu a tshi thoma, ri ḓo vha ri tshi vho ḓivha zwoṱhe zwine ra tea u zwi ḓivha uri ri konḓelele nga u fhulufhedzea na uri ri dzule ri na vhuthihi nga tshenetsho tshifhinga tshi konḓaho. Fhedzi ri tea u zwi ḓivha uri hu na zwiṅwe zwithu zwine ra si zwi ḓivhe nga ha zwine zwa ḓo itea hu si kale. Kha ino thero ri ḓo thoma nga u haseledza uri ndi ngani ro shandula zwe ra zwi amba nga ha zwiṅwe zwa zwenezwo zwiitea. Nga murahu, ri ḓo vusulusa zwiṅwe zwa zwithu zwine ra zwi ḓivha nga ha zwiṅwe zwine zwa ḓo itea tshifhingani tshi ḓaho na nga ha nḓila ine Khotsi ashu wa ṱaḓulu a ḓo ita ngayo zwithu.
ZWINE RI SI ZWI ḒIVHE
3. Ndi mini zwe ra ri zwi ḓo itea kha vhathu tshifhingani tsha maṱungu mahulu nahone ndi mini zwe zwa ita uri ri humbule nga u ralo?
3 Tshifhingani tsho fhiraho, ro amba uri musi maṱungu mahulu a tshi thoma, vhathu vha ḓo vha vhe si tsheena tshibuli tsha u guda nga ha Yehova na uri vha tshidzwe nga Haramagedo. Ro amba zwenezwo ngauri ro vha ri tshi humbula uri zwe zwa itea tshifhinga tsha Maḓi Mahulu zwo vha tshi khou fanyisela zwine zwa ḓo itea tshifhingani tshi ḓaho. Sa tsumbo, samusi ho vha hu si na muthu we a kona u dzhena gungwani musi Yehova o no vala vothi, ro vha ri tshi vhona u nga hu nga si vhe na muthu ane a ḓo vha na lutendo kha Yehova a tshidzwa, musi maṱungu mahulu o no thoma.—Mat. 24:37-39.
4. Ndi ngani ri si tsha amba uri zwo iteaho tshifhingani tsha Noaxe zwi khou imela zwiṅwe zwithu zwine zwa ḓo itea tshifhingani tshi ḓaho?
4 Naa zwo tea u amba uri tshithu tshiṅwe na tshiṅwe tsho iteaho nga Maḓi Mahulu tsho vha tshi tshi imela zwine zwa ḓo itea tshifhingani tshi ḓaho? Hai. Ndi ngani? Ngauri Bivhili a i ri vhudzi.a Ndi ngoho uri Yesu o fanyisa tshifhinga tshe a vha a tshi khou tshila khatsho na ‘maḓuvha a Noaxe’ fhedzi ho ngo amba uri zwoṱhe zwo iteaho tshifhingani tsha Noaxe zwo vha zwi tshi khou imela zwine zwa ḓo itea tshifhingani tshi ḓaho nahone ho ngo amba uri u valiwa ha gungwa zwo vha zwi tshi imela zwiṅwe zwithu. Fhedzi zwenezwi a zwi ambi uri a hu na zwine ra nga zwi guda kha mafhungo a Noaxe na kha zwe zwa itea nga Maḓi Mahulu.
5. (a) Noaxe o sumbedza hani uri u na lutendo musi hu sa athu ḓa Maḓi Mahulu? (Vhahevheru 11:7; 1 Petro 3:20) (b) Ndi mini zwine zwa fana nga ha mushumo wa u huwelela, une ra u ita ṋamusi na mushumo wa u huwelela wa tshifhingani tsha Noaxe?
5 Musi Noaxe a tshi pfa mulaedza wa Yehova, o sumbedza u vha na lutendo nga u fhaṱa gungwa. (Vhalani Vhahevheru 11:7; 1 Petro 3:20.) Nga hu fanaho, vhathu vhane vha pfa mafhungo maḓifha a Muvhuso wa Mudzimu vha tea u sumbedza u vha na lutendo nga u tshila u tendelana na zwine vha zwi guda. (Mish. 3:17-20) Petro o ri Noaxe o “huwelela nga ha u luga.” (2 Pet. 2:5) Naho zwo ralo, samusi ro zwi haseledza kha thero yo fhiraho, a ri ḓivhi arali Noaxe o bva fulo ḽa u huwelela kha muthu muṅwe na muṅwe we a vha a tshi khou tshila kha ḽifhasi musi Maḓi Mahulu a sa athu swika. Ṋamusi ri lingedza nga nḓila dzoṱhe u huwelela kha vhathu vhane vha khou tshila u mona na shango ḽoṱhe nahone ri zwi ita nga u fhisea. Naho ri tshi lingedza, ri nga si kone u huwelela kha muthu muṅwe na muṅwe ane a khou tshila kha ḽifhasi musi vhufhelo vhu sa athu swika. Ndi ngani?
6-7. Ndi ngani ri tshi nga amba uri a ri nga ḓo kona u huwelela kha muthu muṅwe na muṅwe kha ḽifhasi vhufhelo vhu sa athu swika? Ṱalutshedzani.
6 Humbulani nga ha zwe Yesu a zwi amba nga ha mushumo wa u huwelela. O ri mafhungo maḓifha o vha a tshi ḓo huwelelwa “ḽifhasini ḽoṱhe uri a pfiwe nga tshaka dzoṱhe.” (Mat. 24:14) Zwenezwo zwi khou itea ṋamusi u fhira naho hu lini. Mulaedza wa mafhungo maḓifha u wanala nga nyambo dzi fhiraho 1 000 nahone vhathu vhanzhi kha ḽifhasi vha a kona u guda mafhungo maḓifha vha tshi shumisa website yashu ya jw.org.
7 Yesu o dovha a vhudza vhafunziwa vhawe uri a vha nga ḓo “ṱanganya miḓi yoṱhe,” kana u huwelela kha vhathu vhoṱhe a sa athu ḓa. (Mat. 10:23; 25:31-33) Zwe Yesu a zwi amba zwi ḓo itea na tshifhingani tshashu. Vhathu vhanzhi ṋamusi vha dzula fhethu he mushumo washu wa u huwelela wa thivhelwa. Zwiṅwe hafhu, hu bebiwa vhana vhanzhi munithi muṅwe na muṅwe. Ri ita zwine ra nga kona u huwelela mafhungo maḓifha kha vhathu ‘vha tshaka dzoṱhe na ndimi dzoṱhe.’ (Nzumb. 14:6) Fhedzi mbuno ndi ya uri a ri nga ḓo kona u huwelela mafhungo maḓifha kha muthu muṅwe na muṅwe kha ḽifhasi vhufhelo vhu sa athu swika.
8. Ri nga ḓivhudzisa mbudziso ifhio nga ha nḓila ine Yehova a ḓo haṱula ngayo vhathu tshifhingani tshi ḓaho? (Sedzani zwifanyiso.)
8 U ya nga zwe ra zwi haseledza, ri nga ḓivhudzisa uri: Hu ḓo itea mini kha vhathu vhane vha ḓo vha vha sa athu u wana tshibuli tsha u wana mafhungo maḓifha musi maṱungu mahulu a tshi thoma? Yehova na Yesu we a vhewa uri a haṱule, vha ḓo vha haṱula hani? (Yoh. 5:19, 22, 27; Mish. 17:31) Ndimana ye ino thero ya thewa khayo i amba uri Yehova “ha ṱoḓi na muthihi a tshi fheliswa.” Nṱhani hazwo, u ṱoḓa “vhoṱhe vha tshi rembuluwa.” (2 Pet. 3:9; 1 Tim. 2:4) Naho ri tshi ḓivha zwenezwi zwithu nga ha Yehova, ha athu ri vhudza nḓila ine a ḓo haṱula ngayo vhathu vhe vha si wane tshibuli tsha u pfa mafhungo maḓifha nahone ha kombetshedzei u ri vhudza.
Yehova u ḓo haṱula hani vhe vha si wane tshibuli tsha u pfa mafhungo maḓifha maṱungu mahulu a sa athu swika? (Sedzani phara 8)c
9. Ndi zwifhio zwe Yehova a ri vhudza zwone Bivhilini?
9 A tshi shumisa Bivhili, Yehova o ri vhudza zwiṅwe zwa zwithu zwine a ḓo zwi ita. Sa tsumbo, Bivhili i ri vhudza uri Yehova u ḓo vusa vhathu “vha songo lugaho” vhe vha si wane tshibuli tsha u guda mafhungo maḓifha na u shandula nḓila ine vha ḓifara ngayo. (Mish. 24:15; Luka 23:42, 43) Zwenezwi zwi ita uri ri ḓivhudzise dziṅwe mbudziso dza ndeme.
10. Ndi dzifhio dziṅwe mbudziso dzine ra nga vha nadzo?
10 Naa vhoṱhe vhane vha ḓo lovha tshifhingani tsha maṱungu mahulu vha ḓo vha vho fheliswa lwa tshoṱhe vha si tsha dovha vha vuswa? Maṅwalo a a zwi bvisela khagala uri vhane vha hanedzana na Yehova na mmbi yawe vha ḓo fheliswa nga nndwa ya Haramagedo, vha si tsha dovha vha vuswa. (2 Vhathes. 1:6-10) Fhedzi hu pfi mini nga vhaṅwe vhane vha nga lovha nga khombo dza mupo kana nga dziṅwe khombo kana vho tou vhulawa nga vhathu? (Muh. 9:11; Sak. 14:13) Naa vhaṅwe vha vhenevha vhathu vha nga wela kha “vha songo lugaho” vhane vha ḓo vuswa shangoni ḽiswa? A ri ḓivhi.
ZWINE RA ZWI ḒIVHA
11. Musi vhathu vha tshi haṱulwa nga nndwa ya Haramagedo vha ḓo haṱulwa ho sedzwa mini?
11 Hu na zwithu zwo vhalaho zwine ra zwi ḓivha nga ha zwine zwa ḓo itea tshifhingani tshi ḓaho. Sa tsumbo, ri a zwi ḓivha uri nga Haramagedo vhathu vha ḓo haṱulwa zwi tshi ya nga nḓila ye vha fara ngayo vharathu vha Kristo. (Mat. 25:40) Vhane vha ḓo haṱulwa sa dzinngu ndi vhane vha ḓo vha vho tikedza vhaḓodzwa na Kristo. Zwiṅwe zwine ra zwi ḓivha ndi uri vharathu vha Kristo vha ḓo vha vha tshi kha ḓi vha kha ḽifhasi musi maṱungu mahulu a tshi thoma na uri vha ḓo iswa ṱaḓulu musi nndwa ya Haramagedo i tsini na u thoma. Musi vharathu vha Kristo vha tshi kha ḓi vha hone kha ḽifhasi, zwi nga konadzea uri vhathu vha re na mbilu dzavhuḓi vha vhe na tshibuli tsha u vha tikedza na u tikedza mushumo une vha khou ita. (Mat. 25:31, 32; Nzumb. 12:17) Ndi ngani u ḓivha zwenezwi zwi zwa ndeme?
12-13. Vhaṅwe vha nga ita mini musi vha tshi vhona “Babele Ḽihulu” ḽi tshi fheliswa? (Sedzani zwifanyiso.)
12 Na musi maṱungu mahulu o no thoma, zwi nga konadzea uri musi vhaṅwe vha tshi vhona hu tshi fheliswa “Babele Ḽihulu,” vha humbule uri ndi kale Ṱhanzi dza Yehova dzo amba uri zwenezwi zwithu zwi ḓo itea. Naa vhaṅwe vhane vha vhona “Babele Ḽihulu” ḽi tshi fheliswa tshifhingani tsha maṱungu mahulu vha nga thoma u vha na lutendo kha Yehova?—Nzumb. 17:5; Hesek. 33:33.
13 Arali zwenezwo zwa itea, zwi ḓo vha zwi tshi fana na zwe zwa itea ngei Egipita tshifhingani tsha Mushe. Humbulani uri musi Vhaisiraele vha tshi bva Egipita ho vha na ‘vhatsinda vhanzhi’ vhe vha ṱuwa navho. Vhaṅwe vha vhenevho vhatsinda vha nga vha vho thoma u vha na lutendo kha Yehova musi vha tshi vhona hu tshi itea zwe Mushe a amba uri zwi ḓo itea. (Ek. 12:38) Arali ha itea zwi fanaho na zwenezwo musi Babele ḽihulu ḽi tshi fheliswa, naa ri ḓo humbula uri a zwi pfali uri vhaṅwe vhathu vha ḓe ngohoni ho tou sala tshifhinga tshiṱukuṱuku uri Haramagedo i thome? Hai! Ri khou ṱoḓa u fana na Khotsi ashu wa ṱaḓulu ane a ‘khathutshela na u pfela vhuṱungu, a sa ṱavhanyi u sinyuwa na a re na lufuno luhulu lu sa shanduki, ane a dzulela u amba ngoho.’b—Ek. 34:6.
Vhaṅwe vhane vha ḓo vhona musi hu tshi fheliswa “Babele Ḽihulu” vha nga zwi humbula uri ndi kale Ṱhanzi dza Yehova vho amba uri zwi ḓo itea (Sedzani dziphara 12-13)d
14-15. Naa uri muthu a wane vhutshilo vhu sa fheli zwi ḓitika nga uri o lovha lini kana uri u dzula gai? Ṱalutshedzani. (Phisalema 33:4, 5)
14 Nga zwiṅwe zwifhinga ri nga pfa muṅwe a tshi ri: “Zwi nga vha khwine arali shaka ḽanga ḽa lovha musi maṱungu mahulu a sa athu thoma, ngauri hu nga vha na fhulufhelo ḽa uri a nga vuswa.” Vhathu vhane vha amba zwenezwi vha vha vhe na zwiṱuṱuwedzi zwavhuḓi. Fhedzi uri muthu u ḓo wana vhutshilo vhu sa fheli kana hai a zwi ḓitiki nga uri o lovha lini. Yehova ndi Muhaṱuli a sa khakhi, u dzula a tshi ita zwo lugaho. (Vhalani Phisalema 33:4, 5.) Ri nga vha na vhungoho ha uri “Muhaṱuli wa ḽifhasi ḽoṱhe” u ḓo ita zwo lugaho.—Gen. 18:25.
15 Zwi a pfala u tenda uri, uri muthu a wane vhutshilo vhu sa fheli a zwi ḓitiki nga uri u dzula gai. Yehova a nga si vhuye a haṱula vhathu vha dzimiḽioni sa “mbudzi” nga nṱhani ha uri vho vha vha tshi dzula fhethu he vha si wane tshibuli tsha u guda ngoho. (Mat. 25:46) Muhaṱuli wa ḽifhasi ḽoṱhe o luga nahone u na ndavha na vhenevha vhathu u fhira na nḓila ine riṋe ra vha na ndavha navho ngayo. A ri ḓivhi uri Yehova u ḓo itisa hani zwithu nga tshifhinga tsha maṱungu mahulu. Khamusi vhaṅwe vha vhenevha vhathu vha ḓo wana tshibuli tsha u guda nga ha Yehova, vha vha na lutendo khae, vha ima nae musi a tshi ita uri dzina ḽawe ḽi ḓivhiwe kha tshaka dzoṱhe.—Hesek. 38:16.
Naa vhaṅwe vhane vha vhona “Babele Ḽihulu” ḽi tshi fheliswa tshifhingani tsha maṱungu mahulu vha ḓo thoma u vha na lutendo kha Yehova?
16. Ndi mini zwine ra zwi ḓivha nga ha Yehova? (Sedzani tshifanyiso.)
16 Musi ri tshi khou guda Bivhili, ro kona u ḓivha uri Yehova u funa vhathu lungafhani. O ri ṋea Murwa wawe we a ri fela uri ri wane tshibuli tsha u tshila lwa tshoṱhe. (Yoh. 3:16) Roṱhe ro no vhona nḓila ine Yehova a ri funa ngayo. (Yes. 49:15) U ḓivha muṅwe na muṅwe washu nga dzina. Zwavhuḓivhuḓi, u a ri ḓivha zwavhuḓi lune arali ra nga fa, a nga ri vusa ngauri u humbula tshiṅwe na tshiṅwe nga ha riṋe na zwoṱhe zwi re mihumbuloni yashu! (Mat. 10:29-31) Ngauralo, ri na tshiitisi tshavhuḓi tsha u tenda uri Khotsi ashu wa ṱaḓulu a re na lufuno u ḓo haṱula muthu muṅwe na muṅwe nga nḓila yo teaho, yo lugaho na nga khathutshelo.—Yak. 2:13.
Ri nga vha na vhungoho ha uri Yehova u ḓo haṱula muṅwe na muṅwe nga nḓila yo teaho, yo lugaho na nga khathutshelo (Sedzani phara 16)
17. Ndi mini zwine ra ḓo zwi haseledza kha thero i tevhelaho?
17 U khwiniswa ha nḓila ine ra pfesesa ngayo enea mafhungo zwi ita uri ri vhone uri mushumo washu wa u huwelela wo ṱavhanyiswa u fhira naho hu lini. Ndi ngani ri tshi ralo? Nahone ndi mini zwine zwa ri ṱuṱuwedza uri ri bvele phanḓa ri tshi huwelela mafhungo maḓifha ri sa neti? Ri ḓo haseledza phindulo dza dzenedzo mbudziso nga vhuḓalo kha thero i tevhelaho.
LUIMBO 76 Ni Ḓipfa Ni Hani?
a U itela u vhona uri ndi ngani yeneyi tshanduko yo itwa, vhalani thero ine ya ri ‘Yeneyo Ndi Nḓila Ine Wa I Takalela,’ kha Tshiingamo tsha 15 March 2015, masiaṱ. 3-8.
b Musi Babele Ḽihulu ḽo no fheliswa, vhashumeli vha Yehova vhoṱhe vha ḓo lingwa musi vha tshi ṱhaselwa nga Gogo wa Magogo. Vhoṱhe vhane vha ḓo ima na vhathu vha Mudzimu nga murahu ha u fheliswa ha Babele Ḽihulu na vhone vha ḓo lingwa.
c ṰHALUSO YA TSHIFANYISO: Zwifanyiso zwiraru zwi sumbedzaho uri ndi ngani ri sa ḓo kona u swikelela vhaṅwe musi ri tshi khou ita mushumo washu wa u huwelela: (1) Mufumakadzi ane a dzula fhethu hune zwa vha khombo u huwelela nga nṱhani ha vhurereli ha henefho, (2) vhavhingani vha dzula fhethu hune u huwelela a zwo ngo tendelwa nga muvhuso wa henefho nahone zwi na khombo, (3) munna ane a dzula fhethu hu re kule na hune zwa konḓa u hu swikelela.
d ṰHALUSO YA TSHIFANYISO: Musidzana we a litsha u shumela Yehova u humbula zwe a zwi guda nga ha u fheliswa ha “Babele Ḽihulu.” U ita phetho ya u vhuyelela kha Yehova nahone a humela kha vhabebi vhawe. Arali zwenezwi zwa itea, ri ṱoḓa u fana na Khotsi ashu wa ṱaḓulu nga u mu khathutshela na u mu pfela vhuṱungu nahone ri takale uri muitazwivhi o rembuluwa.