U THOMA NYAMBEDZANO
NGUDO 2
Tendelani Nyambedzano I Tshi Elela Nga Yone Iṋe
Vhulivhisi: “Ndi zwavhuḓi musi fhungo ḽi tshi ambiwa nga tshifhinga tsho teaho!”—Mir. 15:23.
Zwe Filipo A Zwi Ita
1. Ṱalelani VIDIO, kana ni vhale Mishumo 8:30, 31. Nga murahu ni fhindule mbudziso dzi tevhelaho:
Filipo o thoma hani nyambedzano?
Ndi ngani ni tshi nga ri yeneyi yo vha i nḓila yavhuḓi ya u thoma nyambedzano na u funza onoyo munna zwithu zwe a vha a sa zwi ḓivhi?
Ri Guda Mini Kha Filipo?
2. Arali ra tendela nyambedzano i tshi elela nga yone iṋe, zwi nga ita uri ane ra khou amba nae a ḓipfe o vhofholowa nahone a thetshelese mulaedza washu.
Edzisani Filipo
3. Ivhani na vhusedzi. Tshifhaṱuwo tsha muthu na nḓila ine a khou dzinginyisa ngayo muvhili zwi nga ri vhudza zwithu zwinzhi nga hae. Naa onoyo muthu u vhonala a tshi khou ṱoḓa u amba na inwi? Ni nga thoma u vhudza muthu nga zwine zwa vha Bivhilini nga u mu vhudzisa uri, “Naa no vha ni tshi zwi ḓivha uri . . . ?” Ni songo kombetshedza u amba na muthu arali a sa ṱoḓi u amba.
4. Ni songo ṱavhanyedza. Ni songo pfa u nga ni tea u ṱavhanya na amba nga ha Bivhili. Lindelani tshifhinga tsho teaho uri ni kone u amba nga ha Bivhili. Nga zwiṅwe zwifhinga, ni nga tea u lindela uri ni dovhe ni vhe na iṅwe nyambedzano uri ni kone u huwelela kha onoyo muthu.
5. Ni tendelane na zwiimo. Nga zwiṅwe zwifhinga, muthu a nga thoma u amba nga ha zwithu zwe na vha ni songo zwi lavhelela. Nga zwenezwo, ni tea u ḓiimisela u tendelana na zwiimo, naho zwi tshi amba uri ni tea u shandula mulaedza we na vha no ḓivhudza u huwelela nga hawo.