“ Nyuwo mwa mutthu òsiveleyaxa”!

1-2. Etthu heeni enrowa onikhavihera ororomela weera hiyo tootthuneya vamaithoni va Yehova?

ARUMEYI a Yehova, tootthuneya wa yoowo. Mene atthu akina, khenroromela weera Yehova mweekhaikhai oonnasivela. Pooti weeraka awo ennahasuliwa, ni mwaha wa yeeyo awo kheniisoona okhalano mwiitti. Nyuwo-tho muniisoonela hiiho? Etthu heeni enrowa wookhaviherani ororomela weera nyuwo tootthuneya vamaithoni va Yehova?

² Etthu emoha enrowa wookhaviherani nyuwo, ori wuupuwelela sooweereya sa mBiblyani sinoonihera moota Yehova ontthuna awe weera atthu yooniweke ni ekosoopiweke. Mwanawe Yehova ori Yesu annakosoopa atthu mwa nttittimiho ni annawoona okhala ootthuneya. Mwaha woopaka eyo, owo ohoonihera weera yaale aniisoona ohikhala ootthuneya mweekhaikhai tootthuneya vantxipale wa Yesu ni wa Atithi awe. (Yoh. 5:19; Aheb. 1:3) Mwa yoosomeene yeela, nnoorowa woona: (1) moota Yesu aakhavihenraawe atthu osuwela weera tootthuneya vamaithoni va Yehova ni (2) moota ninrowa ahu ororomela weera hiyo tootthuneya vantxipale vamaithoni va Yehova. — Hag. 2:7.

MOOTA HEENI YESU AAKHAVIHENRA AWE ATTHU OSUWELA MWIITTI YARAAYANO?

3. Moota heeni Yesu aathokororaawe atthu yaawa wa yoowo oGalileya?

³ Emaara Yesu aalaleya awe oGalileya, atthu antxipale yannamwaattamela weera emwiiwelele ni olamihiwa. Yesu aahoona weera “awo yaakhala ntoko iputtiputthi inaasa weetta sihikhanleno mukukhuli.” (Math. 9:36; nwehe-tho enoota yoosoma.) Ahooleli a ittiini khayaathokorera atthu ni khiyaapwattha mpaka awo yaawitthana okhala “atthu oowuulumeliwa.” (Yoh. 7:47-49; enoota yoosoma) Menento, Yesu annaathokorora mooreera murima ni mwa nttittimiho aihiyeraka etempu weera aaxuttihe ni alamiha iretta saya. (Math. 9:35) Opwaha wa yeeyo, weera aakhavihere atthu antxipale, Yesu aahatxentxeria atthareli awe moota woolaleera ni aahaavaha owera woowalamiha aretta. — Math. 10:5-8.

4. Etthu heeni ninxuttera ahu ni moota Yesu aakosoopa awe atthu yahaapwatthiwa?

⁴ Mwaha woowaavaha mwiitti atthu ni waathokorora mwa nttittimiho, Yesu ohoonihera weera wa owo ni wa Atiithi awe, atthu yaale ikwaha sintxipale ehimpwatthiwa ni atthu akina, tootthuneya vantxipale. Wakhala weera nyuwo munanvarela Yehova mene muhiniivaha mwitti muupuwele moota Yesu aapwattha awe atthu yaawo yahaavahiwa mwiitti ni atthu akina yaatthuna oxuttihiwa ni owo. Opaka eyo, enimookhaviherani woona mwiitti muraanyuno vamaithoni va Yehova.

5. Etthu heeni ninsuwelaahu woohima sa muthiyana Yesu aamusuwelaawe oGalileya?

⁵ Yesu ohiya paahi aaxuttiha ikurupu sa atthu, mene-tho, annampwattha mutthu ti mutthu. Mwa ntakihero, mpuwa mwa muteko awe woolaleera oGalileya, owo aamusuwela muthiyana mmoha yoowo aavirinhe iyaakha 12 ephome awe eyeeheyaka. (Mar. 5:25) Moovarihana ni nlamulo, eretta eyo yannamweeriha mutthu okhala a mwiikho ni mutthu ori poothe aamutava mutthu owo aamurowa-tho okhala a mwiikho. Eyo yannaamweeriha owo ohikhala vakhiviru ni atthu. Opwaha mwa yeeyo, owo khaatthuneya omukokhorela Yehova ni atthu akina osinakooka naari ofestani. (Onam. 15:19, 25) Moohihovela, muthiyana owo annahaawa mwa mukhalelo wa weerutthuni ni wa mmuupuweloni. — Mar. 5:26.

6. Etthu heeni muthiyana ole aapankaawe weera alamihiwe?

⁶ Muthiyana ole aahaawa aatthuna weera Yesu amulamihe. Menento, owo khanvekele weera ampakele eyo. Mwaha wa heeni? Apaale pooti weeraka owo oona wuuliha muru, mwaha wa eretta awe. Naari pooti weeraka owo annoova weera Yesu aamurowa omoomola mwaha wooweera owo aari namwiikho ni khaaphwanela okhala variyari va atthu antxipale. Nto, owo aatava ekuwo ya Yesu, aroromelaka weera opaka eyo aamurowa olama. (Mar. 5:27, 28) Ni eyo yaari ekhaikhai mwaha wookhalano nroromelo noolipa. Eretta awe yaamala! Avinyaka, Yesu aakoha weera taani anvanre, ni muthiyana owo aahima weera aari yoowo anvanre. Moota heeni Yesu oonenlaawe?

7. Moota heeni Yesu aamukosompaawe muthiyana aahaawa vantxipale? (Marko 5:34)

⁷ Yesu aamukosoopa muthiyana ole mooreera murima ni mwa nttittimiho. Owo ahoona weera muthiyana ole ‘annoova ni othukumela.’ (Mar. 5:33) Oonelelakaru moota aisoonelaawe, owo aamoonihera nsivelo ni aamulipiha. Mpaka owo, aamwiitthana “mwanaka,” masu yaawo yoonihera ohiya paahi nttittimiho, mene-tho ninsivelo. (Mmusome Marko 5:34.) Enoota ya yoosoma ehimme weera “Ela ekwaha emoha paahi elempwale mBiblyani Yesu onuulumaawe ni muthiyana ammwiitthana ‘mwanaka,’ pooti weeraka owo aapanke eyo mwaha wooweera aaxupeya ni ‘annathukumela.’” Nkamuupuwelani muthiyana owo moota aataphunwaawe ni ohakalala! Wakhanle weera Yesu khaamureerenle murima, muthiyana owo aamurowa alamihinweene mwa mukhalelo wa weerutthuni, mene anvirelela oxupeya mmuupuweloni ni wiivaha nthowa. Yesu aatthuna opaka etthu ekina, ohiya paahi omulamiha. Owo aatthuna weera aiweheke mwaneene awe moota owo aaraawe, mwana oosiveleya a Tiithi ahu a wiirimu.

8. Maxupo heeni murokora mmoha a oBrasil aavirihaawe?

⁸ Olelo-tho, arumeyi akina a Muluku, ennaxupeya mwaha wa maxupo a ekumi yaawo enweeriha okhala ooriipiwa murima ni ohiivaha mwiitti. Moone ntakihero na Maria,a piyoneira mmoha a nthiti a oBrasil, mwaha wa maxupo a ekumi, owo oyarinwe ahikhanleno metto ni ahikhanleno moono woothiyana. Owo ohimme ha: “Miyo kannavehiwa vantxipale oskola ni kannathokororiwa moohixariya mwaha woorakala. Makoleeka aka yannakivaha masina oohireerela. Ikwaha ikina mpaka amusi aka yannakithanya.”

9. Etthu heeni emukhavihenre Maria woona weera tootthuneya wa Yehova?

⁹ Etthu heeni emukhavihenre Maria? Akhalakaru Namoona a Yehova, asinna ni asirokora akina yaahimmaaliha ni omukhavihera Maria wiiweha mwaneene awe ntoko Yehova aamoonelaawe. Owo onhima ha: “Ekadernu aka yooyeva weera kihele masina aasirokora ni asinna ekikhavihenre. Miyo kinnamuxukurela Yehova ni murima aka wootheene mwaha wookivaha, emusi ya omunepani yootepa oreera!” Asinna awo ni asirokora aamukhavihera Maria woona weera owo tootthuneya vamaithoni va Muluku.

10. Maxupo heeni aavirihaawe Maria Madalena ni aisoonela hayi mwaha wa etthu eyo? (Nwehe-tho efootu.)

¹⁰ Moone moota Yesu aamukhavihenraawe mutthu mukina, Maria Madalena. Owo aavoleeliwa ni minepa soonanara 7! (Luka 8:2) Owo aanniisoona okhala meekhaawe mwaha woovoleeliwa ni minepa iyo soonanara. Ni mwaha wa yeeyo, atthu yannamurakamela owo. Mpuwa mwa etempu eyo yooxupa ya ekumi awe, owo anniisoona ohipwatthiwa ni ohivareleleya, uupuwelaka weera aari ooriheya. Onooneya weera Yesu aahoomola minepa iye soonanara saamuhasula, ni owo aakhala mutthareli awe oororomeleya. Mwa mukhalelo heeni mukina Yesu aamukhavihenraawe Maria Madalena woonelela weera owo aari ootthuneya wa Muluku?

11. Moota heeni Yesu oonihenraawe weera Maria Madalena aari ootthuneya wa Muluku? (Nwehe-tho efootu.)

¹¹ Yesu anwopa-tho Maria Madalena weera amuhooleke ikwaha sawe sa muteko awe woolaleera.b Mwa mukhalelo ene yoowo, owo aavirelela okhalano eparakha ya omwiiwa Yesu vaavo aaxuttihaawe atthu. Yesu-tho aamukhumelela owo nihiku aavinyererihinwaawe; owo aari mutthu oopatxera uulummwe ni Yesu nihiku nene nenne. Ni Yesu anvekela weera aaleele atthareli awe weera owo aavinyererihiwa. Mwa sootheene iyo, Yesu aamukhavihera Maria Madalena woona weera owo aari ootthuneya wa Yehova! — Yoh. 20:11-18.

12. Etthu heeni yaamweeriha Lídia wuupuwela weera khaaphwanela wooniheriwa nsivelo?

¹² Ntoko hiihaale Maria Madalena, atthu antxipale olelo, ennahaawa ni miyuupuwelo soothanyiwa. Lídia, murokora mmoha a wEspanha, ohimme weera emaara aarupaliwaawe ameyawe yuupuwela oyeeha erukulu. Lídia, onnuupuwela weera naari emaara aaraawe mwaana ameyawe khiyaamukosoopa nnene, ni yannamulumela itthu soonanara. Owo ohimme ha: “Etthu miyo kaatthunaka mweekumini, waari waakhuleliwa ni osiveliwa ni atthu akina. Miyo kannoova kuupuwelaka weera nkaarowa wooniheriwa nsivelo ni mutthu mukina, mwaha wooweera ameyaka yaakileela weera miyo kaaari mutthu oonanara murima.”

13. Etthu heeni emukhavinre Lídia woona weera owo tootthuneya vamaithoni va Yehova?

¹³ Emaara Lídia aapatxenraawe omusoma Biblya, itthu saatxentxa. Onvekela Yehova, omusoma Biblya masu ooreera ni itthu aapakeliwaawe ni asinna ni asirokora saamukhavihera woonenelela weera owo aari ootthuneya wa Yehova. Owo ohimme ha: “Aiyaka ikwaha sootheene ennakeerela weera ennasiveliwa ni miyo. Ni awo-tho ennakuupuxera mikhalelo saka sooreera. Asinthamwene ahu akina oosiveleya ennapaka-tho eyo.” Ntoko hiihaale Lídia, apaale pooti weeraka ookhala mutthu mmulokoni mwanyu yoowo onhaawela nikhavihero weera oone moota oraawe ootthuneya wa Yehova. Neereke nyuwo munnawera omuupuwela mutthu onviriha maxupo ntoko ala?

MOOTA HEENI HIYO NNEERAAHU NISOONEKE MOOTA YEHOVA ONNOONAAWE?

14. Moota heeni 1 Samuweli 16:7 onnikhaviheraawe okhalano moonelo mmoha wa Yehova woohima sa mwaneene ahu? (Nwehe-tho ekwaadru “Mwaha wa heeni atthu a Yehova eraaya ootthuneya wa Owo?”)

¹⁴ Muupuweleke weera Yehova khanwoonani moota mmoharu ntoko atthu a mulaponi enwoonaayani. (Mmusome 1 Samuweli 16:7.) Wa atthu antxipale a mulaponi, mutthu tootthuneya wakhala weera owo tooreera, ookhalano musurukhu ni toosoma vantxipale. Mene Yehova khannoona mwa mukhalelo ene yoowo. (Yes. 55:8, 9) Nto, ohiya wiisoona moovarihana ni muupuwelo wa elapo, nyuwo muntthuneya wiisoonaka moovarihana ni muupuwelo wa Yehova. Biblya onnawuuluma atthu yaawo ikwaha ikina yuupuwela weera khiyaavareleya muteko, ntoko, Eliya, Noemi ni Ana. Mwaasomaka sooweereya saya, mwiiwexexeke moota Yehova aasivelaawe. Nyuwo-tho pooti okhalano ekadernu anyu weera mulepeke itthu seiyo seereñye mweekumini mwanyu sinoonihera weera Yehova onnoosivelani ni onnoovahani mwiitti. Nyuwo pooti waasaasa mwaha “autoestima” mu ipublikasawu sahu.c

15. Mwaha wa heeni Yehova aamoonaawe Daniyeli okhala “mutthu òsiveleya”? (Daniyeli 9:23)

¹⁵ Musuweleke weera ororomeleya wanyu ti wootthuneya wa Yehova. Emaara emoha profeta Daniyeli, yoowo aarino iyaakha 90 ‘aakhulumuwa moomalela’ ni aaxupeya. (Dan. 9:20, 21) Moota heeni Yehova aamulipinhaawe? Owo aarumiha nlaika Gabriyeli weera namuupuxere Daniyeli weera owo aari mutthu “òsiveleyaxa” ni weera mavekelo awe yannaiwiwa. (Mmusome Daniyeli 9:23.) Etthu heeni yaamwerinhe Daniyeli okhala ootthuneya wa Muluku? Mwa mikhalelo sawe sooreera, naari nsivelo nawe wa ele eri yooreera ni ororomeleya wawe. (Ez. 14:14) Yehova ohiiyaathi mBiblyani yoowereya ela weera enimaaliheke olelo. (Arom. 15:4) Owo-tho onnaiwa mavekelo anyu ni onnoopwatthani mwaha wa nsivelo nanyu wa ele eri yooreera ni ororomeleya wanyu wa yoowo. — Mik. 6:8, inoota.; Aheb. 6:10.

16. Etthu heeni enrowa wookhaviherani nyuwo omoona Yehova ntoko Tiithi anyu a nsivelo?

¹⁶ Mmooneke Yehova ntoko Tiithi anyu onoosivelani. Owo ontthuna wookhaviherani ohiya waasa mikhalelo sanyu soonanara. (Nsal. 130:3; Math. 7:11; Luka 12:6, 7) Wuupuwelela eyo, onnaakhavihera atthu antxipale eniisoona ohikhalano mwiitti. Mwa ntakihero, moone yooweereya ya Michelle, murokora mmoha a wEspanha yoowo aisoona okhala oothanyiwa ohivareleya muteko sivinreene iyaakha sintxipale mwaha woohasuliwa ni aiyawe. Owo ohimme ha: “Vaavo miyo kaisoonaaka okhala oohivarela muteko kannerera omuupuwela Yehova akiteexaka mmakhatani mwawe ni akooniheraka nsivelo ni okikosoopa.” (Nsal. 28:9) Lauren, murokora mmoha a wAfrica do Sul, owo onnavirelela wiisupuwelela ha: “Wakhala weera Yehova ookipurulela wa yoowo mwa nsivelo, onnakhala vakhiviru ni miyo iyaakha sootheene iya ni mpaka ookivarihela muteko weera kaaxuttihe atthu akina. Mwa yeeyo, Yehova onnakoona okhala mutthu ootthuneya ni oovareleya muteko.” — Hos. 11:4.

17. Moota heeni nyuwo muneraanyu muroromeleke weera munnaakhuleliwa ni Yehova? (Nsalmu 5:12) (Nwehe-tho efootu.)

¹⁷ Muroromeleke weera nyuwo munnakhuleliwa ni Yehova. (Mmusome Nsalmu 5:13 [5:12, NM]) Davidi aalikanxera waakhuleliwa ni Yehova ni “exikudu” yeeyo enakosoopa anaxariya. Osuwela weera munnakhuleliwa ni Yehova pooti okhala ntoko exikudu yeeyo enrowa wookosoopani vaavo munrowaanyu opatxera okhalano miyuupuwelo soonanara. Mene moota heeni nyuwo munrowaanyu osuwela weera munnaakhuleliwa ni Yehova? Ntoko nonnaahu, hiyo pooti ororomela eyo nimusomaka Biblya, mwemmo Yehova onnileelaawe etthu onuupuwelaawe wa hiyo. Opwaha mwa yeeyo, Owo onnaavarihela muteko asitokweene a mmulokoni, asinthamwene eri vakhiviru vahu ni atthu akina weera enuupuxere weera hiyo tootthuneya vamaithoni vawe. Menento etthu heeni nyuwo muntthuneyaanyu opaka wakhala weera mutthu oohima etthu yooreera wa nyuwo?

18. Mwaha wa heeni nyuwo muntthuneyaanyu waakhulela vaavo atthu akina enoottottopelaayani?

¹⁸ Mwaakhuleleke ottottopeliwa ni atthu enoosivelani ni enoosuwelani. Muupuweleke weera Yehova pooti waavarihela muteko atthu awo weera yookhavihereni woona weera Owo onnawaakhulelani. Michelle, yoowo ohimmwale woopatxerani, ohimme ha: “Vakhaani-vakhaani kinnaxuttera waakhulela ni murima aka wootheene masu ooreera atthu akina enkileelaaya. Opaka eyo khaiyene ti wookhweya wa miyo, menento koosuwela weera ti yeeyo Yehova ontthunaawe weera kipakeke.” Mooreera murima asitokweene ennamukhavihera Michelle woona weera owo onnaakhuleliwa ni Yehova. Owo vano onvara ntoko piyoneira ni onnakhavihera oBeteeli areene owaani.

19. Mwaha wa heeni nyuwo muntthuneyaanyu ororomelaka weera nyuwo tootthuneya vamaithoni va Yehova?

¹⁹ Mooreera murima Yesu oonuupuxera weera hiyo nookhalano mwiitti wa Tiithi ahu a wiirimu. (Luka 12:24) Hiyo pooti ororomela weera Yehova onnanoona okahala atthu ootthuneya. Nto muhittiwale eyo! Ni nintthuna opaka ele ninweraahu weera naakhavihere atthu akina woona moota eraaya ootthuneya vamaithoni va Muluku!